Kanqapunin sasachakuykunaqa

1, 2. ¿Imatan kunanmantapacha ruwananchis sasachakuykunapi tarikuspa Jehová Diosmanta ama t’aqakunanchispaq? Willay juj ejemplota.

KAY Satanaspa kamachisqan pachapiqa llapanchispas imaymana sasachakuypin tarikusunchis. Jesuspas chaytaqa sut’itan discipulonkunaman willarqan. Willarqanmi imaynas imaymana sasachakuykunapi tarikunanku karqan chayta (Mat. 18:7). Chhaynaqa kanqapunin sasachakuykunaqa, mayninqa yaqapaschá kikin hermanonchiskunawan ima phiñachinakusunchis. Ichaqa, ¿iman yanapawasunman chaykunawan ama pisipananchispaq? Chaypaqqa ñaupaqmantañan chay sasachakuykunapaq preparakunanchis.

² Chayta entiendenapaq juj chhikanta kaypi piensarisun. Diospa llaqtanqa sapa kutillanmi kallpachawanchis unu lloqllapas terremotopas manaraq pasashaqtin ñaupaqmanta preparakunanchispaq alistakunanchispaq. Chayta ruwananchispaqtaq kallpachawanchis chayqa, ¿imatan ruwananchis? May llaqtamanña rinchis maypiña tiyanchis chaypas, tapurikunanchismi imakunas chay llaqtapi pasan chayta. Chhaynapi chayman jina preparakunanchispaq alistakunanchispaq (Prov. 21:5). Chhaynan Dios serviyninchiswanpas pasan. Bautizakusqanchis qhepamanqa kanqapunin sasachakuykunaqa. Ichaqa kunanmantapachan allinta piensarinanchis imatas ruwasunman chhayna sasachakuykunapi tarikuspa chaypi. Chaykunapi piensaymi yanapawasun imaña kaqtinpas Jehová Diosmanta ama t’aqakunanchispaq (Sal. 17:5). Ichaqa, ¿ima sasachakuykunapin bautizakusqanchis qhepaman tarikusunman? ¿Iman yanapawasunman chhaynakunapiña tarikuspapas Jehová Diosmanta ama t’aqakunanchispaq? Chaykunamantan kaypi yachasunchis.a

JUJ HERMANO SONQONCHISTA K’IRIWAQTINCHIS

3. ¿Ima sasachakuypin yaqapas bautizakusqanchis qhepaman tarikusunman?

³ ¿Yuyashankichu chayllaraq juñunakuyman risqayki p’unchayta? Chay kuti juñunakuyman rispaqa sut’itachá repararqanki llapa hermanokunaq munanakusqankuta. Chayta rikuspaqa yaqapaschá nirqanki: “Kaypunimá cheqaq religionqa”, nispa (Juan 13:35; Col. 3:12). Chaytan hermananchis Blancapas juñunakuykunaman rispa reparasqa.b Ichaqa bautizakusqan qhepamansi juj sasachakuypi tarikusqa. Paymi nin: “Juj hermanan rimasqanwan sonqoyta k’iriwarqan. Chaymantapas payqa jujkunamantan malta rimaq. Noqaqa manan jayk’aqpas piensarqanichu hermanokuna chhayna kanankupaqqa”, nispa. Wakinninchispas chhaynatapaschá piensarqanchis. Ichaqa kaytan yuyarinanchis: Hermanonchiskunapas noqanchis jina juchayoqmi kanku, chaymi mayninqa kallpachakushankuña chaypas pantanqakupuni imallapipas (Efes. 4:​23, 24; 1 Juan 1:8). Chhaynataq chayqa, yaqapaschá mayninqa mana cuentata qokuspa sonqonchista k’iriwasun (Sant. 3:8). Ichaqa wakin hermanonchiskunaqa chaykunata rikuspan Diospa llaqtanmanta t’aqakapurqanku. ¡May llakikunapaqmi chayta yachayqa ¿riki?!

4. ¿Imatan kunanmantapacha ruwananchis juj hermanoña sonqonchista k’iriwasunman chaypas Jehová Diosmanta ama t’aqakunanchispaq? (Efesios 4:32).

⁴ Chhaynaqa, ¿imatan kunanmantapacha ruwananchis juj hermanoña sonqonchista k’iriwasunman chaypas Jehová Diosmanta ama t’aqakunanchispaq? Chaypaqqa Efesios 4:32 textoq nisqantan kasukunanchis (leey Efesios 4:32). Chaypi nisqan jina kallpachakunanchismi jujkunata sumaqta qhawarinanchispaq, khuyapayakuq iman kananchis. Chhayna kananchispaq kallpachakusun chayqa, manan ratuchu piwanpas phiñachinakusun. Chaymantapas kallpachakunanchismi jujkunata sonqomanta perdonananchispaq. Ichaqa, ¿iman yanapawasunman jujkunata sonqomanta perdonananchispaq? Chaypaqqa Jehová Dios perdonaykuq kasqanpin piensarinanchis. Payqa maytaña juchallikunchis chaypas, perdonawanchispunin. Chhaynatan noqanchispas hermanonchiskunataqa perdonananchis (Mat. 6:12). Jehová Diospa perdonawasqanchispi piensasun chayqa, faciltan hermanonchiskunatapas perdonasun.

5. ¿Ima textopi piensaymi yanapawallasunmantaq pipas sonqonchista k’iriwaqtinchis? (Proverbios 19:11; qhaway kay parrafopaq fotokunata).

⁵ (Leey Proverbios 19:11). Chaymantapas Proverbios 19:11 textoq nisqantan kasukunanchis. Chaypin nin: “Allin reparaq kayninmi runaq phiñakuynintaqa jark’an”, nispa.c Chayta ruwaysi hermananchis Rimatapas yanapasqa. Payqa chayllaraq bautizasqan kashan. Paymi nin: “Mayqen hermanopas nanaqta imatapas niwaqtinqa Proverbios 19:11 textoq nisqantan ruwani. “Sufrispapaschá wiñaran, ima sasachakuypipaschá tarikushan, chaypaschá chhaynata rimarun” nispan nini. Chaymantapas kallpachakunin paywan kuska predicanaypaq, chhaynapin payta allinta reqsini”, nispa. Noqanchispas chaytan ruwananchis. Kallpachakunanchismi llapa hermanonchiskunata allinta reqsinanchispaq. Paykunata allinta reqsisun chayqa, sonqonchistaña k’iriwasun chaypas faciltan perdonasunchis.

6. ¿Iman yanapawasun llapa hermanokunawan allinta apanakunanchispaq?

⁶ ¿Imatawanmi ruwasunman iñiqmasikunawan munayta apanakunapaq? Paykunaq allinkuna ruwasqanpin masta yuyayta churananchis, manan pantasqankupichu (tupanachiy Proverbios 10:12; Rom. 12:10; Filip. 2:​2, 3 textokunawan). Chaypaq yachasun chayllaraq bautizakuq Mark hermanonchismanta. Payqa hermanokunawan tiempota pasaspas reparasqa hermanokuna imaymanapi pantasqankuta. Chaykunataña rikurqan chaypas, ¿iman chay hermanonchista yanaparqan Jehová Diosmantapas hermanokunamantapas ama t’aqakunanpaq? Paymi nin: “Mayninqa hermanokunaq imachallapipas pantasqankutan nishuta qhawanchis. Chaymi noqatapas pasawarqan. Noqaqa nishutan hermanokunaq pantasqallanta qhawasharqani. Chaymantan ichaqa repararqani imaynas hermanonchiskunaqa mana kay pacha runakuna jinachu imatapas millayta ruwanku chayta. Chaypi piensaymi yanapawarqan hermanokunaq allinkuna ruwasqanta masta qhawanaypaq”, nispa. Noqanchispas hermanokunaq allinkuna ruwasqanta masta qhawasun chayqa, allintan llapa hermanokunawan apanakusun.

IMACHUS SAQESQANCHISPI NISHUTA PIENSAQTINCHIS

7. ¿Imapi tarikuspan imakunachus saqesqanchispi nishuta piensayta qallarisunman?

⁷ Jehová Diosta servinapaqqa llapapas imaymanatachá saqerqanchis. Mayninqa imaymana sasachakuykunapi tarikuspan imachus saqesqanchispi nishuta piensayta qallarisunman. Chaymi wakin hermanonchiskunawanpas pasarqan (tupanachiy Números 11:​4-6 textowan). Wakin hermanonchiskunaqa allin llank’anankutan saqerqanku Jehová Diosta astawan servinankupaq. Wakintaq Diosta mana serviq amigonkuta saqepurqanku. Wakintaq Jehová Diospa cheqnisqan qhelli ruwaykunata viciokunata ima saqepurqanku. Tiempowanmi ichaqa sasachakuykunapi tarikuspa chaykuna saqesqankupi jujmanta piensayta qallarirqanku, jujmantan chaykuna ruwaytapas qallarirqanku. ¡Maytachá Jehová Diospa sonqonqa nanarqan chaykunata rikuspaqa! Chhaynaqa, ¿iman yanapawasunman imachus saqesqanchispi ama nishuta piensananchispaq?

8. ¿Imatan Abrahanmanta Saramantawan yachasunman?

⁸ Ñaupa tiempo Dios sonqo runakunaq ejemplonmi yanapawasunman. Paykunamanta wakinqa Jehová Diosraykun imaymanankuta saqerqanku. Chaypaq yachasun Abrahanmanta Saramantawan. Paykunaqa Diospa kamachisqanta kasukuspan imaymanankuta saqespa Ur llaqtamanta ripurqanku, jinaspa karpakunallapi tiyarqanku (Heb. 11:​8, 9). Chay karpakunapi tiyashaspaqa paykunaqa yuyarirqankupunichá tukuy imaymana saqesqanku cosaskunataqa. Yuyarirankuña chaypas paykunaqa manan nishutachu chaykunapiqa piensarqanku. Chaykunapi nishuta piensankuman karqan chayqa, yaqapaschá llaqtankuman kutipuyta munankuman karqan. Ichaqa manan chhaynachu karqan. Paykunaqa Jehová Diospa imachus prometesqanpin masta piensarqanku (Heb. 11:​15, 16).

9. Filipenses 3:​7, 8, 13 textokunapi nisqan jina, ¿imaynatan apóstol Pablo qhawarirqan imakunachus saqesqanta?

⁹ Apóstol Pablopas Jesusta qatikunanpaqqa imaymanatan saqerqan. Payqa allin estudioyoqmi karqan. Paytaqa allin estudioyoq Gamaliel runan yachachirqan (Hech. 22:3). Chhaynaqa payqa atinmanmi karqan judío religionpi allin reqsisqa umalliq kayta (Gál. 1:​13, 14). Ichaqa llapa chaykunata saqespan payqa Jesusta qatikurqan. Chay qhepamanqa imaymana sasachakuypin payqa tarikurqan. Paytaqa kikin judiokunan cheqnikapurqanku, maqarqanku, carcelpi iman wisq’arqanku (2 Cor. 11:​23-26). ¿Imatan chhayna sasachakuypi tarikuspa ruwanman karqan? ¿“Amapas saqeymanchu karqan judío religionta” ninmanchu karqan? Manan payqa chaytaqa nirqanchu. Aswanpas payqa kusisqan kasharqan Jesusta qatikuspa, bendicionkuna chaskinanpitaqmi piensaqpas (leey Filipenses 3:​7, 8, 13).

10. ¿Imakunapin sapa kutilla yuyaymanananchis? (Marcos 10:​29, 30; qhaway kay parrafopaq fotokunata).

¹⁰ ¿Imatan chaymanta yachasunman? Manan imakunatachus saqerqanchis chaykunapiqa nishutachu piensananchis. Aswanpas imaraykus chaykunata saqerqanchis chaypin piensananchis (Ecl. 7:10). Chaymantapas ima allinkunatas Jehová Diosta servisqanchismantapacha chaskirqanchis chaykunapin piensanallanchistaq. Ichaqa, ¿ima allinkunatan chaskirqanchis? Kunanqa allin amigontinmi Jehová Dioswan kapunchis (Prov. 3:32). Chaymantapas kunanqa llapa hermanonchiskunan familianchis kapunku, paykunaqa anchatan munakuwanchis (leey Marcos 10:​29, 30). Chaymantapas pisi tiempollamantan juj sumaq paraisopi tiyasunchis (Isa. 65:​21-23). Sapa kutilla chaykunapi yuyaymanasun chayqa, manañan imakunachus saqesqanchistaqa yuyarisunpaschu.

11. ¿Imatan Rosmery hermananchispa ejemplonmanta yachasunman?

¹¹ Hermananchis Rosmerymanta yachasun. Payqa 50 más watanpiñas bautizakusqa. Paymi nin: “Noqamanqa navidad fiestata ruwaymi nishuta gustawaq. Chaymi bautizakusqay qhepamanpas munashallaq kani chay ruwayta. Chay navidad fiestapiqa llapa familiaywanmi kuska kaq kayku. Chaypin wawakunaman regalokunata qoq kani. Wawakunaqa kusisqan chay regalokunataqa chaskikuwaqku. Chayta rikuspan noqaqa anchata kusikuq kani”, nispa. ¿Iman hermananchis Rosmeryta yanapanman karqan chay navidad fiestapi ama nishuta piensananpaq? Paymi nillantaq: “Kunanqa manan navidad p’unchaypiñachu familiaywanqa juñukuni. Aswanpas juj p’unchaymi paykunawan juñukuni. Chaypin paykunaman regalokunata qoni, jinaspa willani imaraykus sapankankutapas munakuni chayta”, nispa. Hermananchis Rosmeryqa juj sasachakuypis tarikullasqataq. Paymi nillantaq: “Biblia estudiasqayta yacharuspan wakin amigoykuna noqamanta t’aqakapurqanku. Chaymi sapallay rikukapurqani, maytan paykunawan tupayta munaq kani”, nispa.d ¿Imatan hermananchis ruwanman karqan? Payqa kallpachakusqas hermanakunawan Diosmanta willaq lloqsinanpaq. Paymi nillantaq: “Kallpachakurqanin predicaq rinaypaq. Chaypin askha hermanakunawan reqsinakurqani. Kunanqa paykunaqa amigaykunan kapunku”, nispa. ¿Imatan yachasunman chay hermananchispa ejemplonmanta? Imachus saqesqanchispi nishuta piensanamantaqa, juj allin ruwaykunatan ruwasunman. Chhaynapin Jehová Diospa sonqonta kusichisunchis (Filip. 4:​8, 9). Kayta ama qonqaychu: Imaymanataña Jehová Diosta servinaykipaq saqerqanki chaypas, payqa mastaraqmi imatapas qosunki.

JEHOVÁ DIOSTA SAQEPUQTINKU

12. ¿Imakunata rikuspan pisikallpayasunman?

¹² Bautizakuspaqa Diospa llaqtanmantan kapunchis. Manañataqmi kay millay pachaq ruwayninkunapiqa ruwaysikunchischu (Isa. 65:14). Ichaqa mayninqa yaqapaschá, “kay hermanoqa Diospa llaqtanmantan t’aqasqa otaq orqosqa kapun” nisqa willakuyta juñunakuypi uyarisun, chayta uyarispaqa yaqapaschá nishuta llakikusunman, pisikallpayasunman imapaschá (1 Cor. 5:13). ¿Imarayku? Chaypaq Samar hermananchismanta yachasun. Paymi nin: “Bautizakusqay qhepallamanmi juj umalliq Diospa llaqtanmanta t’aqasqa kapurqan. Chayta uyarispan noqaqa anchata admirakurqani. “Maypi juj umalliq Jehová Dios contra juchallikunman” nispan nirqani”, nispa. Hermanonchiskunaqa munakunkun Jehová Diosta, kallpachakunkutaqmi payta tukuypi kasukunankupaqpas (1 Cor. 13:​4, 7). Ichaqa sapa watanmi askha hermanonchiskuna Diospa llaqtanmanta t’aqasqa kapunku. Chhaynaqa, ¿imatan ruwasunman mayqen amigonchispas familianchispas Diosmanta t’aqakapuqtinku? ¿Imatan ruwasunman chaykunawan ama pisipananchispaq?

13. Jujkunaña Jehová Diosta saqepunkuman chaypas, ¿imata ruwaymi yanapawasun Diosmanta ama t’aqakunanchispaq?

¹³ Wakin amigonchiskunaña familianchiskunaña Jehová Diosta saqepunkuman chaypas, ¿imatan ruwasunman ama chaywan pisipananchispaq? Chaypaqqa Jehová Diosmanmi astawan asuykunanchis (Sant. 4:8). Chaymantapas jujkunaña Jehová Diosta saqepunkuman chaypas, noqanchisqa manapunin paymanta t’aqakunanchischu. Juñunakuykunapiqa kuskan hermanonchiskunawan Bibliata estudianchis, mañakunchispas. Chaytan familia ukhupipas ruwanchis. Chaywanpas sapankanchismi kallpachakunanchis Bibliata sapa p’unchay leenanchispaq, Diosmanta mañakunanchispaqpas (Sal. 1:2; 62:8).

14. ¿Imatan apóstol Pedroq ejemplonmanta yachasunman? (Juan 6:​66-68).

¹⁴ Apóstol Pedroq ejemplonpas allintan yanapawasunman. Juj kutinmi payqa Jesuspa yachachisqanta mana entienderqanchu. Manaña entienderqanchu chaypas manan Jesustaqa saqerqanchu, jujkunaña payta saqerparirqanku chaypas. Chaytan sut’ita yachakun Jesusta imachus nisqanpi (leey Juan 6:​66-68). Arí, Pedroqa qatikushallarqanmi Jesustaqa. Payqa allintan yacharqan Jesús cheqaq kaqta yachachisqanta. Noqanchispas Diospa llaqtallanpin cheqaq yachachikuytaqa tarinchis. Chayraykun jujkunaña Jehová Diosmanta t’aqakapunkuman chaypas, noqanchisqa manapuni Diospa llaqtanmantaqa t’aqakunanchischu. Chaymantapas kallpachakunanchismi Jehová Diosta tukuypi kasukunanchispaq. 12 parrafopi rimamusqanchis Samar hermananchismi nillantaq: “Serviqninkunaña juchallikunku mana allinta ruwanku chaypas, Jehová Diosqa ch’uya Diosmi, llaqtanpas ch’uyallataqmi. Chaymi paymantaqa manapuni t’aqakunachu”, nispa.

15. ¿Imatan yachasunman Emily hermananchispa ejemplonmanta?

¹⁵ Yachasun hermananchis Emilymanta. Juj semana bautizakusqan qhepallamansi mamitanqa paykunata saqepusqa, iñiq t’aqamantapas orqosqas kapusqa. Paymi nin: “Manan jayk’aqpas piensaranichu mamitay chayta ruwawanankupaqqa, mamitay chayta ruwasqanwanqa maytan sonqoy nanawarqan, mayninqa mamitayta yuyarispan waqaq kani”, nispa. ¿Iman hermananchis Emilyta yanaparqan? Paymi nillantaq: “Noqataqa papay, iñiq t’aqapi hermanokuna iman yanapawarqanku, paykunaqa familiay jinapunin noqapaqqa karqanku. Juj hermanokunapas chhaynapin tarikushanku, chaymi tukuy tiempo hermanonchiskunawanqa kallpachanakushanallanchis”, nispa (1 Ped. 5:9). Hermananchis Emily nisqan jina, kunanmantapachan kallpachakunanchis llapa hermanonchiskunawan allinta apanakunanchispaq, paykunata allinta reqsinanchispaq. Chayta ruwasun chayqa imapiña tarikuspapas manan sapanchischu kasun.

16. ¿Imatan mana jayk’aqpas qonqananchischu? (Qhaway kay parrafopaq fotota).

¹⁶ Kayta ama qonqaychu: Jehová Diosqa munakusqan runakunatan wanachin (Heb. 12:6). Payqa maytan munashan paymanta t’aqakuqkuna llaqtanman kutimpunankuta (2 Ped. 3:9). Chhaynaqa munasqa wayqe-panaykuna, sichus mayqen familiaykichispas amigoykichispas Jehová Diospa llaqtanmanta t’aqasqa karqan chayqa, ama chaymanta nishuta llakikuychischu. Jehová Diosqa umalliqkunawanmi familiaykichista amigoykichista yanapachinqa llaqtanman kutimpunanpaq (2 Tim. 2:​24, 25).

17. ¿Imatan mana jayk’aqpas qonqananchischu?

¹⁷ Kaypi yachamusqanchis jina, bautizakusqanchis qhepamanqa imaymana sasachakuypin tarikusunchis. Chhaynakunapi tarikuspaqa yaqapaschá llakikusunman pisikallpayasunman ima. Ichaqa, ¿iman yanapawasunman chhayna sasachakuypiña tarikuspapas Jehová Diosmanta ama t’aqakunanchispaq? Chaypaqqa ñaupaqmantañan chhayna sasachakuykunapaq preparakunanchis. Chaymantapas kaytan mana jayk’aqpas qonqananchischu: Jehová Diosqa imapiña tarikusun chaypas yanapawasunpunin, manan jayk’aqpas saqerpariwasunchu. Imaynatas ñaupaqkunapi yanapawarqanchis chhaynatan yanapawashallasunchis (1 Ped. 5:10). Payqa qowasunpunin kallpata llapa chay sasachakuykunata aguantananchispaq. Jehová Diospa kay yachachikuypi yuyaychawasqanchista kasukusunchis chayqa, manan imaña kaqtinpas imapiña tarikuspapas paymantaqa t’aqakusunchu (Sal. 119:165; Rom. 8:​38, 39).