Leeqkunaq tapukusqan

¿Jayk’aqmi gobiernokuna ninqaku: “Kunanmantaqa thajmi kasunchis, allin waqaychasqan kasunchispas”, nispa?

Qayninpa killa Qhawaq revistapi yachamusqanchis jina,a pisi tiempollamantan Jehová Diosqa “chunka waqrakunaq” otaq llapa gobiernokunaq “sonqonman” juj yuyayta churanqa. ¿Ima yuyaytan churanqa? Paykunan “k’anchaq puka colorniyoq” “manchay phiña animalman” otaq Organización de las Naciones Unidas nisqaman gobierno atiyninkuta qonqaku. Chay manchay phiña animaltaqa “manchay phiña animalpa rijch’aynin” nikullantaqmi (Apo. 13:​14, 15; 17:​3, 16, 17). Chay atiy chaskisqanwanmi chay manchay phiña animalqa “chunka waqrakunawan” kuska llapa pantasqa religionkunata chinkachinqaku. Ichaqa, ¿jayk’aqmi “kunanmantaqa thajmi kasunchis, allin waqaychasqan kasunchispas” nispa ninqaku?b ¿Jehová Dios chay chunka waqrakunaq sonqonman manaraq juj yuyayta churaqtinchu, icha yuyayta qosqan qhepamanñachu? (1 Tes. 5:3).

Manan yachakunchu jayk’aqsi chayta ninqaku chaytaqa, chaymi noqanchisqa Jesuspa yuyaychasqanta kasukunanchis. “Rijch’asqalla” “makillan” kashananchis (Mat. 24:42; 25:13; 26:41). Kunanqa t’aqwirisun apóstol Pabloq Tesalónica llaqtapi iñiqkunaman apachisqan cartapi willasqan profeciata.

Apóstol Pablon nirqan: “Runakunan nishanqaku: “¡Kunanmantaqa thajmi kasunchis, allin waqaychasqan kasunchis!”, nispa; chayllamanmi qonqaylla ch’usaqyachisqa kanqaku”, nispa (1 Tes. 5:​2, 3). Ñaupaqkunaqa qelqanchiskunapiqa: “Ñaupaqtaqa nacionkunan ninqaku: Thajmi kasunchis, allin waqaychasqan kasunchispas, nispa. Chayllamanmi qonqaylla manchay ñak’ariy tiempo qallarinqa, jinan gobiernokunaqa llapa pantasqa religionkunaman phawaykunqaku”, nispan niq. Arí ñaupaqkunaqa, gobiernokuna “thajmi kasunchis, allin waqaychasqan kasunchispas” nisqanku qhepamanmi manchay ñak’ariy tiempoqa qallarinqa nispan nirqanchis.

Ichaqa allintan apóstol Pabloq willasqan profeciakunata t’aqwikurqan, chaymi kunanqa mana “chhaynapunin kanqa” nisunmanchu. Yaqapaschá gobiernokunaqa pantasqa religionkunata chinkachisqanku qhepamanña “thajmi kasunchis, allin waqaychasqan kasunchispas” nispa ninqaku. ¿Imaraykun chayta ninchis? Chaypaq kay qatimuq tapuykunata allinta entiendesun.

¿Imatan ruwarqanku pantasqa religionkuna kay pachapi guerrakuna kananpaq? Chay jatun Babiloniamanta otaq ramera warmimanta rimaspan Bibliapi nin: “Chay llaqtapin tarisqa karqan […] jallp’a pachapi mana khuyapayaspa wañuchisqa runakunaq yawarnin”, nispa (Apo. 17:​1, 5; 18:24). Chhaynapunin chayqa, pantasqa religionkunan juchayoq karqanku guerrakuna kananpaq, mayninqa terroristakunata iman jatarichirqanku. Chhaynapin chay religionkunaqa thaj kayta apamunankutaqa guerrakunata, wañuchinakuykunata ima apamurqanku. Chhaynataq chayqa, yaqapaschá gobiernokunaqa ñaupaqtaqa llapa pantasqa religionkunataraq chinkachinqaku. Chay qhepamanpasñachá ninqaku: “Kunanmantaqa thajmi kasunchis”, nispa. Ichaqa “manan chhaynapunin kanqa” nisunmanchu.

¿Iman pasanqa gobiernokuna “kunanmataqa thajmi kasunchis” nisqanku qhepaman? Apóstol Pablon nirqan: “Chayllamanmi qonqaylla ch’usaqyachisqa kanqaku”, nispa (1 Tes. 5:3). Chaypi apóstol Pabloq nisqan jina, chay gobiernokuna chinkachisqa kanankupaqqa manan unayraqchu pasanqa, aswanpas paykunaqa “kunanmantaqa thajmi kasunchis” nisqanku qhepallamanmi qonqaylla chinkachisqa kanqaku. Arí, sichus paykuna ñaupaqta pantasqa religionkunata chinkachinqaku, chay qhepamantaq “kunanmantaqa thajmi kasunchis” nispa ninqaku chayqa, chay nisqanku qhepallamanmi chay gobiernokuna ch’usaqman tukuchisqa kanqaku, qonqayllan chayqa pasanqa.

¿Imatan chayta rikuspa Diosta serviqkuna ruwanqaku? Apóstol Pablon nirqan: “Wayqeykuna, qankunaqa manan laqhayaqpichu kashankichis, chhaynaqa manan p’unchayqa suwata jinachu jap’isunkichis”, nispa (1 Tes. 5:4). Kaypi piensariy, sichus gobiernokuna ñaupaqta pantasqa religionkunata chinkachinqaku, chaymantataq “kunanmantaqa thajmi kasunchis” nispa ninqaku chayqa, noqanchisqa chaykunata rikuspaqa allintan yachasun imaynas chayllaman llapa gobiernokuna chinkachisqa kanqaku chayta. Arí, chaytaqa allintan reparasun, chayta niq gobiernokunan ichaqa mana imatapas reparanqakuchu. Paykunaq chinkachisqa kanankuqa qonqayllan suwa jina chayamunqa.

Chhaynaqa, ¿imakunan pasanqa? Yachamusqanchis jina chunka waqrakunan manchay phiña animalman gobierno atiyninkuta qonqaku, chay atiywanmi llapa pantasqa religionkunata chinkachinqaku, chhaynatan manchay ñak’ariy tiempoqa qallarinqa. ¿Imatawanmi yachamurqanchis? Gobiernokunan “thajmi kasunchis, allin waqaychasqan kasunchispas” nispa ninqaku. ¿Jayk’aqmi chayta ninqaku? Manan sut’itapunichu yachakun. Ichaqa kaypi yachamusqanchis jina yaqapaschá kay iskay ruway pasanqa. 1) Yaqapaschá chaytaqa ninqaku Jatun Babilonia manaraq chinkachisqa kashaqtin, gobiernokuna manaraq Organización de las Naciones Unidas nisqaman gobierno atiyninkuta qoshaqtinku, otaq gobierno atiyninkuta qosqanku qhepallaman. Chaymantapas chaytaqa yaqachus jina ninqaku manaraq pantasqa religionkunata chinkachishaqtinku. 2) Yaqachus jina chaytaqa ninqaku pantasqa religionkunata chinkachisqanku qhepamanña. Suyakunanchischá kanqa imapunichus pasanqa chayta yachanapaqqa. ¿Imaraykun chayta ninchis? Bibliaq willasqan wakin profeciakunaqa chaykuna pasashaqtinñan mayninqa allinta entiendekun, maynintaq junt’akusqan qhepamanña entiendekun (tupanachiy Juan 12:16 textowan).

Manaña yachanchischu jayk’aqsi gobiernokuna “kunanmantaqa thajmi kasunchis, allin waqaychasqan kasunchispas” nispa ninqaku chayta chaypas, “makillan, rijch’asqallan” kashananchis. Tukuy atisqanchistan kallpachakunanchis Jehová Diosmanta ama t’aqakunanchispaq (1 Tes. 5:6).