Kallpachakuy bautizakunaykipaq

1. a) ¿Ima bendicionkunatan chaskinku bautizakuqkuna? b) ¿Imakunamantan kaypi yachasunchis?

¿ÑACHU Jehová Diosman entregakurqankiña jinaspa bautizakurqankiña? Chayta ruwarqankiña chayqa allintan ruwarqanki. Chayta ruwasqaykiraykun Diosqa allin concienciata qorqasunki (1 Ped. 3:21). Chaymantapas manaraq bautizakuqkunamanmi ejemplota qosharqanki. Ichaqa, ¿manaraq bautizasqachu kashanki chayri? Qanqa maytachá munakunki Jehová Diostaqa, munaynintapas maytachá ruwayta munashanki. Ichaqa yachasqayki jinapas, juchanchis perdonasqa kananpaqqa paypa sumaq chaskisqan kanapaqpas bautizakunan (Hech. 2:​38-40). Chhaynaña chaypas imapaschá jark’ashasunki. Kay yachachikuymi chaypi yanapasunki. Chaypaqmi rimasunchis kay kinsa tapuymanta: 1) ¿Imaraykun wakin mana bautizakunkuchu? 2) ¿Imaraykun allinta piensana imaynas tukukuy p’unchaykunaqa cercapiña kashan chaypi? 3) ¿Imaraykun allinpuni kanman bautizakuy? Chaykunamanta.

¿IMARAYKUN WAKIN MANA BAUTIZAKUNKUCHU?

2. ¿Imaraykun wakin manchakunku bautizakuyta?

² Wakinqa munashankuña Jehová Diosta serviyta chaypas manchakunkun bautizakuyta. Wakinmi ninku: “Noqaqa manasuna jayk’aqpas Diospa sonqontaqa kusichiyta atiymanchu”, nispa. Chhaynata piensashanki chayqa, allinta yuyariy: Jehová Diosqa manan mana imapi pantaspa servinaykitachu munan. Chaymanta rimaq textokunata maskhay. Arí tukuy atisqaykita kallpachakunki payta servinaykipaq chayqa, kusisqan Diosqa qanwan kanqa (Sal. 103:​13, 14; Col. 3:23). Wakinqa qatikachasqa kayta cheqnisqa kayta iman manchakunku. Chayta qanpas manchakushanki chayqa, Jehová Diosmanta mañakuy salmista jina kanaykipaq. Paymi nirqan: “Jehová Diosqa noqawanmi kashan, manan manchakusaqchu. ¿Imanawanmantaq runari?”, nispa (Sal. 118:6).

3. ¿Imaraykun wakin mana bautizakuyta munankuchu? (Qhaway kay parrafopaq dibujota).

³ Wakinqa “astawanraq yacharusaq Bibliamanta” nispan mana bautizakuyta munankuraqchu. Ichaqa, ¿maykamataq Bibliamantari yachana? Chaypaq yachasun juj kuti Pablowan Silaspiwan carcelpi kashaqtinku imachus pasarqan chayta. Terremoton chay carcelta chhafchirirqan jinan paykunaqa libre kapurqanku. Chay qhepamantaq Pablowan Silaspiwanqa carcelerota wasinpi llapa kaqkunatawan Diosmanta yachachirqanku. Chay runapas familianpas allintachá repararqanku imaynas chay terremotoqa Diosmanta jamurqan chayta. Chay kutiqa paykunaqa imaymanatan yacharqanku Jehová Diosmanta Jesusmantapas. ¿Imatan chay qhepaman chay carcelero ruwarqan? Wasinpi llapa kaqkunapiwanmi bautizakapurqanku (Hech. 16:​25-33). Qanpas Jehová Diosta tukuy sonqo munakunki, yachachikuyninkunatapas sonqoykipi waqaychanki, arrepientesqataq kashanki juchaykimantapas, Diosta kasukuytataq munankipas chayqa, listoñan kashanki bautizakunaykipaq (Mar. 12:30).

4. ¿Imaraykun wakin mana bautizakuyta munallankutaqchu? (Qhaway kay parrafopaq fotota).

⁴ Wakinqa munakunkuña Diosta chaypas, imatapas saqenankuta manchakuspan mana bautizakuyta munankuchu. Allinpunin allinta piensaspa imatapas ruwayqa, Jesuspunin chayta nirqan (Luc. 14:​27-30). Ichaqa wakinqa nishutan piensanku “kayta jaqaytapaschá saqenay kanqa” nispa. Chaysi pasasqa Candace sutiyoq hermanawanpas. Payqa Testigo familiapiña uywasqa karqan chaypas manas bautizakusqachu. Qhepamanñan kuraq kaspaña jujmanta Bibliata estudiayta qallarisqa. Paymi nin: “Noqaqa allintan yacharani Jehová Diospa sonqonta kusichinaypaq imatachus ruwanay karqan chayta. Ichaqa manan saqeyta munasharanichu imayna kausasqayta. Sasan noqapaqqa karqan chaykunata saqeyqa”, nispa. Wakinqa “manapaschá atisaqchu Diospa kamachikuyninta junt’ayta” nispan manchakunku bautizakuyta. Manchakunkun ima juchamanpas urmaspa Diospa llaqtanmanta t’aqasqa kayta. Sichus qanpas chaykunapi piensashanki chayqa, ¿iman yanapasunkiman?

5. ¿Imakunapin piensana manaraq bautizakushaspa? (Mateo 13:​44-46).

⁵ Kaypi piensasun. Imatapas rantiyta munanki chayqa, manan jayk’achus valen chayllapichu piensanayki ¿riki? Imapaqchus chayta utilizanki chaypi iman piensanayki. Sichus chay allinta servisunki chayqa, jayk’aña valenqa chaypas rantinkin ¿riki? Chhaynan bautizowanpas. Manan imakunatachus saqenanchis kanqa chaykunallapichu piensananchis. Aswanpas kamaqninchis Jehová Dioswan amigontin kananchispin mastaqa piensananchis. Chaymanta rimaspan Jesusqa iskay rijch’anachiyta willarqan (leey Mateo 13:​44-46). Sapanka rijch’anachiypi runan llapa kaqninta venderqan tarisqan qorita rantinanpaq. ¿Manachu Diospa gobiernonmanta cheqaq kaqta yachasqayki chay ancha valeq qori jina? Chhaynan ¿riki? Chhaynaqa manchakushankichus imatapas saqeyta chayqa, Jesuspa chay rijch’anachiykuna willasqanpi piensariy. Chaypaqqa yaqapaschá tapukuwaq: “¿May tukuytan valorani Diosmanta kay yachasqayta? ¿Imaynatan qhawarini Dioswan amigontin kayta, wiñay kausay suyakuyta, Diospa kay familian qowasqantapas? ¿Qori jinachu noqapaq chaykuna?”, nispa. Imaynatas chaykunata qhawarinki chaypin reparakunki ñachus bautizakunaykipaq jinaña kashanki icha manaraqchus chayta.

6. ¿Iman yanapawasunman sonqonchis Diospa siminta allinta chaskikunanpaq?

⁶ Wakintaqa imaynachus sonqonku kashan chaymi jark’an bautizakunankuta. Jesuspunin chayta willarqan muju t’akaq runamanta rimashaspa. Paypa willasqanman jina, wakinqa imaynachus sonqonku kasqanman jinan ñauparinkupas manapas. Wakinqa allin sonqoyoq kasqankuraykun Diosmanta willakuyta uyarikuspa jina cambianku, imachus yachasqankuman jinan kausayta qallarinku. Wakinmi ichaqa sonqonkupi iskayanku. Chhaynachus sonqoyki kashan chayqa, ama pisipaychu. Jehová Diospa yanapayninta mañakuy, payqa pi runaq sonqontapas cambianmanmi, sonqoykitapas cambianmanmi. Arí munayninman jina kausanaykipaqmi yanapasunki (Luc. 8:​5-15). Chhaynaqa, Diospa yanapayninta mañakuy. Paypa yanapayninwanqa atinkipunin kamachisqanman jina kausayta (Ezeq. 18:31; 36:26).

7, 8. ¿Imaraykun wakin wayna-sipaskuna manaraq bautizakunkuchu? (Qhaway kay parrafokunapaq fotota).

⁷ Wakintaqa jujkunan jark’anku bautizakunankuta. Chayqa mastaqa pasan wayna-sipaskunatan. Paykuna munakunkuña Jehová Diosta chaypas, manan atinkuchu bautizakuyta. Paykunamanta wakintan profesorninku ninku: “Kay pachapi imayna kausaytapas allillantan qhawarinanchis, chaykunaqa normalmi”, nispa. Diospa kamachikuynin contraña chaykuna kashanman chaypas, chaykunata allinpaq qhawarinatan munanku. Ichaqa paykunaq chay nisqanta kasukuyqa manan allinchu kanman (Sal. 1:​1, 2; Prov. 7:​1-5). Waynakuna sipaskuna, ¿imatan ruwawaqchis ama paykuna jina imatapas qhawarinaykichispaq? Salmos librota qelqaq runaq ejemplonta qatikuychis. Paymi Jehová Diosta nirqan: “Noqaqa yuyarichiyniykikunapin yuyaymanani, chaymi yachachiwaqniy runakunamantapas aswan allin reparaq kani”, nispa (Sal. 119:99).

⁸ Willakuykunaq chayamusqanman jinaqa, wakin hermanokunapas jark’ashankus wawankuq bautizakunanta. Paykunaqa nishutas llakikushanku imapi estudianankumanta imapi llank’anankumanta. Wakintaq wawankuta mana yanapashankuchu Diospa llaqtanpi astawan ñauparinankupaq. Waynakuna sipaskuna, ¿imaynan kashankichis? ¿Yanapashasunkichischu papaykichis mamitaykichispas Diospa llaqtanpi astawan ñauparinaykichispaq? ¿Manachu paykunawan chaykunamanta rimariwaqchis? Chayqa allinmi kanman. Ichaqa kaypi allinta piensay: Jayk’a wataykipiña kashanki chaypas, atiwaqmi Jehová Dioswan amigontin kaytaqa (Prov. 20:11).

9. ¿Imaraykun wakin “qhepamanña bautizakusaq” nispa ninku?

⁹ Wakinqa bautizakunankupaq listoña kashaspapas manan chayta ruwankuchu. ¿Imarayku? Paykunaqa amigonkuta familiankuta imaraqmi suyayta munanku. “Paykunawan kuskaña bautizakusaq” nispan ninku. Ichaqa manan juchachu familianchiswan amigonchiskunawan kuska bautizakuyqa. Chhaynaña chaypas, ¿allinchu kanman chaykunarayku “qhepamanña bautizakusaq” nispa niy? Manan. Yachasqanchis jinapas, sapankanchismi Jehová Diosmanqa entregakunanchis. Bautizakusunchus manachus chaypas noqanchismantan, manan jujkunamantachu kanan (Rom. 14:12).

¿IMARAYKUN PIENSANANCHIS TUKUKUY P’UNCHAYPI?

10. ¿Imaraykun wakin mana kallpachakunkuchu bautizakunankupaq?

¹⁰ Yachamusqanchis jina, imaymana razonmi kashan wakin mana bautizakunankupaqqa. Wakinqa “unayraqma kashan tukukuy p’unchay chayamunanpaqqa” nispan mana kallpachakunkuchu bautizakunankupaq. Ichaqa, ¿allinchu kanman chhaynata piensay? Chaymanta rimaspan Jesús nirqan: “Rijch’ashaqlla kashaychis, mana piensasqaykichis horatan runaq Churinqa jamunqa”, nispa (Luc. 12:40).

11. Salmos 119:60 nisqanman jinaqa Jehová Diosta astawan reqsisun chayqa, ¿imaynatan qhawarisun kamachikuyninkunata?

¹¹ Jehová Diosman entregakunapaq bautizakunapaqpas, payta kamachikuyninkunata iman tukuy sonqo munakuna. Chaypaqqa astawanmi payta reqsinanchis. Astawan payta reqsisunchis chayqa, allintan reparasunchis imaynas payqa mayta munakuwanchis chayta, imaynas allinninchispaq imatapas kamachiwanchis chaytapas. Chaykunata allinta reparasun chayqa, kasukusunmi ima kamachiwasqanchistapas (leey Salmos 119:60). Jesuspa qatikuqnin Santiagoq imachus willasqanpipas allintan piensananchis, chaypi piensasun chayqa mana iskayaspan Diosta kasukusunchis. Paypa nisqanman jinaqa, manan yachakunchu imas paqarin noqanchismanta kanqa chayta. Chhaynataq chayqa kunanmi Diospa imachus kamachisqanta ruwananchis. Arí kunanmi tiempo kashan bautizakunapaq (Sant. 4:​13-17).

12. ¿Imatan yachasunman Jesuspa willasqan uvas chajrapi llank’aq runakunamanta?

¹² Yaqapaschá pipas ninman: “¿Manachu Jesusqa willaran uvas chajrapi llank’aqkunaqa, juj horata llank’aqpas ch’isiyaqta llank’aqpas igualta pagota chaskisqankuta?”, nispa. Arí chhaynan karan. Ichaqa, ¿imaraykutaq juj horata llank’aqkunari mana qallariymantapachachu llank’ayta qallarirqanku? Paykunaq willakusqankuman jinaqa llank’anata mana tarisqankuraykun. Chhaynaqa manan qella kaypichu paykunaqa juj horallataqa llank’aranku. Llank’anata tarinkuman karan chayqa ch’isiyaqchá llank’ankuman karan, ichaqa tarispaqa llank’arankupachan (Mat. 20:​1-16). Chhaynallataqmi kay tiempopipas kashan, Jesusqa llapatan wajawashanchis payta qatikunanchispaq, Diosmanta willaypi yanapananchispaqpas, uyarispa jinataqmi paypa wajasqantaqa kasukunanchis.

13. ¿Imatan yachasunman Lotpa esposanmanta?

¹³ Wakin “qhepakunamanña bautizakusaq” niqkunapaqqa, manapaschá facilchu kanqa qhepakunaman vidankuta cambiayqa. Chaymanta rimaspan Jesuspas apostolninkunata nirqan: “Lotpa esposanta imachus pasasqanta yuyariychis”, nispa (Luc. 17:​31-35). ¿Imaraykun chayta ninman karan? Lotpa esposanqa allintan yacharqan imaynas Sodoma Gomorra llaqtakunaqa ch’usaqman tukuchisqa kanan karan chayta. Yacharqanña chayta chaypas, manasuna kaqninkunata cosasninkunata saqeyta munarqanchu (Gén. 19:​23-26). ¿Imatan chaymanta yachasunman? Diosman kutirikuna tiempoqa manan wiñaypaqchu kanqa. Diospa churasqan tiempo chayamuqtinqa tukukapunqan, llavewanpas wisq’asqa kashanman jinan kanqa (Luc. 13:​24, 25).

14. Tukukuy tiempomanta willaq profeciakunaqa junt’akushantaq chayqa, ¿imata ruwanaykipaqmi kallpachakunayki?

¹⁴ Kay mundopi imaymana pasasqanmi sut’ita rikuchishan, imaynas kay millay kausaypa tukukunanmanta profeciakunaq willasqanqa junt’akushanña chayta. Ichaqa Bibliaq wakin willasqankunaqa manapaschá tiyasqayki llaqtapiqa junt’akushanchu. Chaywanpas juj ladokunapiqa junt’akushantaq chayqa, tukuy atisqaykitan ruwanayki bautizakunaykipaq. Apóstol Pedroq ñaupa tiempo iñiqkunata imachus nisqanpi piensarisun. Paykunatan nirqan: “Listollapuni kashaychis”, nispa. ¿Imaraykun paykunata chayta ninman karan? Payllataqmi nirqan: “Tukuy imaymanaq tukukuyninqa cercapiñan kashan”, nispa (1 Ped. 4:7). Apóstol Pedroqa chaypiqa rimasharqan judío runakunaman tukukuy chayamunanmantan. Paykunatataq rimapayasharqan chayqa, Jerusalenmanta karupi tiyaq iñiqkunaqa manachá imapipas tarikunankuchu karan (1 Ped. 1:1). Chhaynaña karqan chaypas, chayta rikuspaqa astawanchá paykunaqa confiarqanku Jehová Diospa wakin promesankuna junt’akunanpi. Chhaynan kay tiempopipas kashan, lliu ladokunapin rikukushan imaynatas Diospa willachisqan profeciakuna junt’akushan chayqa. Chaykunapi allinta piensanki chayqa, liston kanki Diospa p’unchaynin chayamunanpaq, tukuy atisqaykitan kallpachakunki bautizakunaykipaqpas.

15. ¿Imaynatan suyananchis Jehová Diospa p’unchayninta? (2 Pedro 3:​10-13).

¹⁵ Iskay kaq carta apachisqanpin apóstol Pedroqa llapa iñiqkunata nirqan imaynatachus Diospa p’unchayninta suyakunanku chayta. Ñaupa tiempo iñiqkunaqa unaytaraqmi suyakunanku karan chay p’unchaytaqa. Chaywanpas llapankutan nirqan chay p’unchayta makilla suyashanankupaq, sonqomantataqmi munananku karan chay p’unchay chayamunantaqa (leey 2 Pedro 3:​10-13). ¿Imaynatan noqanchispas rikuchisunman Diospa p’unchayninta makilla suyakusqanchista, chay p’unchay chayamunanta sonqomanta munasqanchistapas? Chaypaqqa allin preparasqan liston kashananchis, Diospa sonqonpaq jinataqmi tukuy imatapas ruwananchis. Chayta ruwasun chayqa Jehová Diosqa anchatan noqanchiswan kusikunqa, astawanqa kusikunqa payman entregakuspa bautizakuqtinchismi.

¿IMARAYKUN ALLINPUNI KANMAN BAUTIZAKUY?

16. ¿Unaytaraqchu bautizakunapaq suyana? (2 Corintios 6:​1, 2; qhaway kay parrafopaq dibujota fototawan).

¹⁶ Kunanmi tiempo kashan bautizakunapaq (leey 2 Corintios 6:​1, 2). Chaypaq piensasun Etiopía llaqtamanta juj jatun umalliqpi, paymanmi Felipe Diosmanta yachachirqan. Chay runaqa Diospa siminta entiendespa jinan bautizakurqan. Payqa manan nirqanchu “aschatawanraq entienderusaq, qhepakunamanña bautizakushasaq” nispaqa. Aswanmi Felipeta nirqan: “¡Qhawariy! ¡Unu! ¿Atiymanñachu bautizasqa kayta, icha imatawanraqchu ruwanay?”, nispa (Hech. 8:​26, 27, 35-39). Bautizarukuspataq chay runaqa ancha kusisqa ripurqan.

17. ¿Imamantan mana jayk’aqpas iskayananchischu?

¹⁷ Imapas jark’ashasunki bautizakunaykita chayqa, Jehová Diosqa yanapasunkipunin. Yanapasunkin paywan allin amigontin kanaykipaqpas (Rom. 2:4). Pay yanapasuqtiykiqa manan imatapas manchakunkichu manan imapas jark’asunkichu bautizakunaykipaq. Bautizakunki chayqa kusisqapunin kanki, Diospa ñaupanpin allin concienciayoq kapunki, manan llakikunkichu qhepapi imakunachus saqesqaykimantapas (Filip. 3:​8, 13). Chaymantapas kusisqan suyakunki imakunachus jamushan chaykunata. ¿Imataq chaykunari? Jehová Diospa promesankunan. Chaykunatan payqa qonqa payman entregakuspa bautizakuqkunaman (Hech. 3:19).