¿Iman bautizakuy? ¿Imaraykun bautizakunapuni?

1. ¿Imaraykun nisunman “bautismomanta yachachikuyqa Bibliapi juj jatun yachachikuymi” nispa?

PIPAS bautizakuqtinqa kusikunchismi ¿riki? 33 watapi Pentecostés fiestapi wakin runakuna bautizakuqtinpas, llapa iñiqkunan kusisqa kasharqanku. Chay kutipin apóstol Pedro willarqan imaynas bautizakuyqa ancha allinpuni chayta (Hech. 2:​38, 40, 41). Apóstol Pablopas willarqanmi imaynas bautismomanta yachachikuyqa “Cristomanta qallariy yachachikuy” chayta (Heb. 6:​1, 2). Yaqapaschá wakinqa bautismomanta rimaspaqa yanqapaq jinalla qhawarisunman. Ichaqa manan chhaynachu, aswanpas chayqa Bibliapi juj jatun yachachikuymi. Chaymi bautismomanta yachachikuytaqa allinta entiendenanchis.

2. ¿Imaraykun allinta entiendenanchis bautizomanta yachachikuyta?

² Unayña bautizasqa kashanchis chaypas, chayraq chaypaq kallpachakushanchis chaypas, allintan entiendenanchis bautismomanta yachachikuytaqa. ¿Imarayku? Chaypaq kaypi piensasun. Pipas wasita ruwashaspa chay wasi allinta qaqata sayananta munan chayqa, allintan cimentacionta churanan ¿riki? Chaytan iñiywanpas ruwananchis. Iñiyninchis mana kuyuriq fuerte kananpaqqa, allintan yachananchis Bibliapi yachachikuykunata, bautizomanta yachachikuytapas allintan entiendenanchis. Chaymi kaypi yachasunchis kay kinsa tapuykunamanta: ¿Iman bautizakuy? ¿Imaynatan chay bautizo aparikunan, imatan chay qhepaman ruwana? ¿Imaraykun Yayaq, Churiq, santo espirituq sutinpi bautizakuna? Chaykunamanta.

¿IMAN BAUTIZAKUY? ¿IMARAYKUN BAUTIZAKUNAPUNI?

3. ¿Imatan bautizakuspa rikuchirqanchis?

³ Bautizakuspan llapa runakunaman rikuchishanchis: 1) Jehová Diosmantawan Jesusmantawan yachachikuyta tukuy sonqowan chaskisqanchista. 2) Juchanchismanta arrepientekusqanchista. 3) Jehová Diospa munayninman jina kausananchispaq cambiapusqanchista. 4) Jehová Dios wawan Jesusta salvawananchispaq kachamusqanta allinta entiendesqanchista. 5) Jehová Diospa llaqtanwan kuska munayninta ruwananchispaq promesa ruwasqanchista. Promesa ruwasqan qhepamanmi bautizakuy munaqqa bautizakun. Chhaynapin wiñay kausayman apaq ñanninta puriyta qallarin.

4. ¿Imatan rikuchishanchis unuman chinkaykachisqa kaspa? (Qhaway kay parrafopaq fotota).

⁴ Bautizakuspaqa unumanmi chinkaykachisqa kanchis.a Chaymantataq jatarichisqa kanchis, p’ampasqa kasqanchismantapas jataripushasunman jinan chayqa (tupanachiy Colosenses 2:12 textowan). Chhaynatan bautizakuspa rikuchishanchis llapa imapi cambiapusqanchista. Unuman chinkaykachisqa kasqanchisqa, ñaupa kausayninchistapas p’ampapushasunman jinan. Jatarichisqa kasqanchistaq Diospa munayninta ruwananchispaqpas kausarimpushasunman jina.

5. ¿Imaynapin tupan bautizakunanchispaq preparakusqanchis Noepa arca ruwasqanwan? (1 Pedro 3:​18-21).

⁵ (Leey 1 Pedro 3:​18-21). Bautizakunanchispaq preparakusqanchisqa Noepa arca ruwasqanmanmi rijch’akunman. Chayllaraq Diosmanta yachashanki chayqa, yaqapaschá niwaq: “Waaa sasachunamá kayqa, Noé jinaraqchu llank’anay chaypaq”, nispa. Ichaqa, ¿ruwanapunichu chaykunata? Arí ruwanapunin. Chaypaq piensasunchis Noepa imachus ruwasqanpi. Chay manchay parata kausashaqlla pasananpaqqa, Diospa imaynachus kamachisqanman jinan chay arcata ruwanan karqan. Bibliaq willasqanman jinaqa, payqa kasukurqanmi Diosta. Arí, payqa “Diospa nisqanman jinapunin ruwarqan” (Gén. 6:22). ¿Imaraykun pay Diospa nisqanman jinapuni ruwanman karqan? Diospi tukuy sonqo iñisqanraykun. Chaymantapas Diosqa yanaparqanmi paytaqa. Qanpas atiwaqmi Noé jina Diospa nisqanman jina imapas ruwaytaqa. Chayta ruwanki chayqa liston kanki bautizakunaykipaq.

6. ¿Imamantan apóstol Pedro rimasharqan “bautismon kunanqa qankunatapas salvashasunkichis” nispa nisqanwan?

⁶ 21 versiculopin apóstol Pedro nirqan: “Bautismon kunanqa qankunatapas […] salvashasunkichis”, nispa. ¿Imatan Pedro chaywan nishanman karqan? ¿Bautizakuspalla salvasqa kanankumantachu rimashanman karqan? Manan. Manan bautizochu juchanchismantaqa librawanchis, aswanpas Jesuspa yawarninmi chaytaqa ruwan (1 Juan 1:7). Chaymantapas bautizakunanchispaqqa Diospunin kamachiwanchis. Bautizakuspaqa Diosmantapas allin concienciata mañakushasunman jinan. Bautizasqataq kashanchis chayqa, payqa Jesuspa sacrificio ruwasqanman jinan chay mañakusqanchista qowanchis. Chaytaq yanapawanchis salvasqa kananchispaq, wiñay kausayta chaskikunanchispaq ima. Chaymantan Pedroqa rimasharqan “bautismon kunanqa qankunatapas […] salvashasunkichis” nispa nisqanwanqa.

¿IMAYNATAN BAUTISMO APARIKUN? ¿IMATAN CHAYMANTA RUWANA?

7. ¿Imaynatan aparikunan juj bautizo?

⁷ ¿Imaynatan chay bautismo aparikunan? Yachamusqanchis jina, pipas bautizakuqqa unumanmi chinkaykachisqa kanan. Chaymanta jujtaqa manan Bibliaqa imaninpaschu. Ichaqa kanmi yuyaychaykuna imaynatas chay aparikunman chaypaq. Bibliapiqa willanmi imayna p’achakuymanta imayna portakuymantapas (1 Cor. 14:40; 1 Tim. 2:9). Chaymantapas juj umalliqmi bautizakuy munaqkunataqa bautizan. Ichaqa manan chay umalliqkunataqa jujkunamanta aswan allinpaq jinachu qhawarina (1 Cor. 1:​14, 15). Chay bautizo allin kananpaqqa manan askha runaraqchu rikunan, pisillapas kanmanmi (Hech. 8:36).

8. ¿Imakunatan tapukun bautizakuy munaqkunata, imaraykun chayta tapukun? (Hechos 2:​38-42; qhaway kay parrafopaq fotota).

⁸ Bibliaq willasqanman jinaqa, Jesusta qatikuqkuna salvasqa kananchispaqqa jujkunamanmi willananchis. Arí, imapichus iñisqanchistan runakunaman willananchis (Rom. 10:​9, 10). Chaytaqa bautizakusqanchis p’unchaypi iman ruwanchis. Yachamusqanchis jina, salvasqa kanapaqqa bautizakunapunin. Chay bautizo p’unchaypin bautizakuqkunaqa, imapichus iñisqankumanta lliuman willanku. Chaypaqmi kan iskay tapuy, jujninmi nin: “¿Ñachu juchaykikunata saqespa Jehová Diosman prometekurankiña payllataña servinaykipaq? ¿Allintachu entiendenki salvasqa kananchispaq Jesucristota Jehová Dios qowasqanchistapas?”, nispa. Chay tapuyqa imakunatas bautizakuyta munaq ruwarqan bautizakunanpaq chaymantan kashan. Pentecostés fiestapi apóstol Pedroq nisqanman jinataqmi kashanpas. Iskay kaq tapuymi nin: “¿Allintachu entiendenki bautizakusqaykiwan Jehová Diospa testigonña kasqaykita, llaqtanmanta kasqaykitapas?”, nispa. Chay tapuymi bautizakuqtaqa yanapashan imaynas Diosman promesa ruwasqanta junt’ananpaqqa paypa llaqtanpi imachus nikusqanta kasukunan chayta, imaynas hermanokunawan kuska Diosta servinan chaytapas. Chayta ruwaspan ñaupa tiempo iñiqkunata qatikushanchis (leey Hechos 2:​38-42). Chay tapuykunaman “arí” niqkunaqa, listoñan kashanku bautizakunankupaq.

9. ¿Imatan ruwana Dios chaskiwananchispaq?

⁹ Manaraq Jehová Diosta reqsishaspaqa yaqapaschá qanqa allinta kausarqanki. Manapaschá ima jatun juchatapas ruwarqankichu, Testigo familiapi imapaschá uywasqa karqanki. Papaykipas mamitaykipas Diosta munakunaykipaqpaschá yanaparqasunki. Chhaynapi kausarqanki chayqa, ¿arrepientekunaykipunichu? ¿Bautizakunaykipunichu Dios chaskinasuykipaq? Arí. Yachasqanchis jinapas llapanchispas juchasapañan nacemunchis. Chay juchan Diosmanta t’aqawanchis (Sal. 51:5). Jehová Diosta reqsispan ichaqa munayninta ruwananchispaq payman entregakunchis. Chaymantapachaqa manañan munayninchistachu ruwananchis. Arí, ñaupaq kausasqanchista saqespan arrepientekuspa kutimunchis, jinaspa Diospa munayninman jina kausayta qallarinchis. Chayta ruwasqan qhepamanqa pipas bautizakuytaqa atinmanñan (Hech. 3:19).

10. ¿Imatan ruwanayki juj religionpi bautizakurqankiña chaypas?

¹⁰ ¿Ña juj religionpi bautizakurqankiña chayri? ¿Chaywanpas bautizakunaykipunichu Jehová Diospa testigon jina? Arí bautizakunaykin. ¿Imarayku? Juj religionpi bautizakushaspaqa manan allintachu reqsirqanki Jehová Diostapas Jesustapas ¿riki? Chayraykun bautizakunayki. Diosmanta mañakuspa entregakurqankiña payman chaypas, chay ratuqa manaraqchá allintapunichu entienderqanki imas munaynin chayta. Chaypaq yachasun apostolkunaq tiemponpi imachus pasarqan chayta. Apóstol Pablon Éfeso llaqtapi tuparqan wakin runakunawan. Paykunaqa bautizasqan kasqaku, ichaqa manan Jesuspa sutinpichu, chaymi jujmanta bautizakurqanku (Hech. 19:​1-5).b Chhaynan pasan kay tiempopipas. Piqpa bautizakusqanpas Jehová Diospa ñaupanpi allin kananpaqqa, chay runaqa allintan entiendenan imapunis Diospa munaynin chayta.

“YAYAQ, CHURIQ, SANTO ESPIRITUQ SUTINPIN KANAN”

11. ¿Iman “Yayaq, Churiq, santo espirituq” sutinpi bautizakuy? (Mateo 28:​18-20).

¹¹ Jesuspa nisqanman jinaqa, payta qatikuqkunaqa “Yayaq, Churiq, santo espirituq sutinpin” bautizakunanku (leey Mateo 28:​18-20). Ichaqa, ¿imaninantaq chayri? Bibliapiqa “sutinpi” nispaqa, imaynachus chay runa chaymantan rimashan. Chaymantapas “sutinpi” nispaqa, chay runaq atiyninmanta autoridadniyoq kasqanmanta iman rimashanman. Chaymi chay runaq sutinpi imatapas ruwanapaqqa allinta chay runata reqsina; yachanan ima autoridadniyoqchus chaytapas (tupanachiy Mateo 10:41 textowan). Chhaynaqa, Yayaq Churiq sutinpi bautizakuspaqa, imata kamachiwananchispaqpas atiyniyoq kasqankutan rikuchishanchis. Santo espirituq sutinpi bautizakuspataq rikuchishanchis espirituq munayninman jina kausay munasqanchista. Sapankamanta astawan yachasun.

12. ¿Iman Yayaq sutinpi bautizakuy? (Apocalipsis 4:11; qhaway kay parrafopaq fotota).

¹² Yayaq sutinpi. Yayaq sutinpi bautizakuspan rikuchishanchis Jehová Diosta papanchista jina rikusqanchista. Chaymantapas tukuy atiyniyoqta jina, tukuyta kamaq Diosta jina rikusqanchistan rikuchishanchis (leey Apocalipsis 4:11). Chaymantapas paypa sutinpi bautizakuspan rikuchishanchis imaynas payqa mañakusqanchista uyarimushan chayta. Imaynas sutinmanta confianzawan respetowan ima wajakunchis chayta. Imaynas sutinmanta jujkunaman willanchis chaytapas (Sal. 65:2). Ichaqa manan chayllachu. Pentecostés fiestapi apóstol Pedroq rimapayasqan runakunaqa, ñan allintaña Jehová Diostaqa reqsirqanku. Chaywanpas allintan paykunaqa entiendenanku karqan imaynas Diosqa Jesuswan librawanchis chayta (Rom. 5:8).

13. ¿Iman churiq sutinpi bautizakuy? (Qhaway kay parrafopaq fotota ).

¹³ Churiq sutinpi. Churiq sutinpi bautizakuspan rikuchishanchis Jesusqa Diospa sapallan churin kasqanta, paylla ñan kasqantapas. Arí, payraykullan Jehová Dioswanqa allin amigontin kanchis (Juan 14:6). Chaymantapas paypa sutinpi bautizakuspan rikuchishanchis imaynas paylla libraqninchis chayta. Arí, paypa wañusqanraykullan wiñaypaq kausayta atisunchis. Chhaynataq chayqa, sapa p’unchaymi kallpachakunanchis payllata qatikunanchispaq, manan bautizakusqanchis p’unchayllachu (1 Juan 2:6). Chaymantapas Diosmantaqa willamushanallanchismi. Imaña kaqtinpas manan chay ruwaytaqa saqenanchischu (Luc. 4:43). Qatikachasqaña jark’asqaña kasunman chaypas, manapunin Jehová Diostaqa saqenanchischu (2 Tim. 3:12). Chaymantapas paypa sutinpi bautizakuspan rikuchishanchis Jesustaqa iñiq t’aqapi umalliqta jina rikusqanchista. Chhaynataq chayqa, ganaswanmi kasukunanchis paypa churasqan umalliqkunatapas (Efes. 4:​8, 11, 12; 5:23).

14. a) ¿Iman espirituq sutinpi bautizakuy? (Qhaway kay parrafopaq fotota . b) ¿Ima bautizokunatawanmi chaskinku janaq pachapaq ajllasqakuna? (Qhaway “Ajllasqa hermanokunaq chaskisqanku bautizokuna” nisqa willakuyta).

¹⁴ Santo espirituq sutinpi. Santo espirituq sutinpi bautizakuspan rikuchinchis imaynas espirituqa mana trinidad nisqa partemantachu, aswanpas Diospa atiynin chayta. Chay atiyninwanmi Jehová Diosqa wakin runakunata yuyaycharqan Bibliata qelqanankupaq. Chaymi Bibliataqa sapa p’unchay leenanchis, chayman jinataq kausananchis (2 Ped. 1:​20, 21). Chaymantapas manan Diospa cheqnisqan qhelli ruwaykunataqa ruwananchischu. Chayta ruwasunman chayqa, manan espirituqa yanapawasunmanchu, nitaqmi chayqa iñiq t’aqapipas kanmanchu (Efes. 4:30).

15. ¿Imata ruwananchispaqmi kallpachakunanchis?

¹⁵ Bautizasqaña kashanki chayqa, kallpachakuy imapunis bautizakuy chayta allinta entiendenaykipaq.c Kallpachakuy Jehová Diosman imachus prometesqaykita junt’anaykipaqpas. Ichaqa manaraq bautizakurqankichu chayqa, ¿iman jark’ashasunkiman bautizakunaykita? Qatimuq yachachikuypin yachasunchis imakunatas ruwawaq bautismoman chayanaykipaq chayta.