Jehová yanapawan aswan sumaj kamachin kanaypaj

Chay imasta rikuspa mayta tʼukorqani, jinapis astawanraj tʼukorqani chaypi trabajajkunata rikuspa. Chaypeqa ashkha joven hermanos, hermanas ima mayta llankʼasharqanku. Chay llankʼayninkutaj sapa día kikillanpuni kasqanrayku, saykʼupunapaj jina karqa. Jinapis ni mayqenninku alabachikuyta maskʼajchu kanku, astawanpis tukuyninku kusisqas kasharqanku. Paykunapi sutʼita repararqani imaynatachus kʼumuykukoj sonqowan Diosninchejta sirviyta atisqanchejta.

Watas pasasqanman jina, Jehovaqa yanapawarqa aswan sumaj cristiano kanaypaj. Jinapis kunan willarisqaykichej qallariymantapacha imaynachus kausayniy kasqanta. Noqaqa budista karqani, cheqa kajtataj maskʼasharqani.

WAWAMANTAPACHA DIOSTA MASKʼARQANI

Noqaqa Chicagopi, Illinoispi nacekorqani, chaypitaj wiñakorqani, kinsa sullkʼa hermanosniytaj tiyan. Tatasneyqa Japonmanta Estados Unidosman ripusqanku allin kausayta maskʼaspa. Paykunaqa munarqanku wawasninku sumaj escuelaspi estudianankuta, profesionalestaj kanankuta.

Tatasneyqa manchay creyente budistaspuni karqanku. Mamay tiyakorqa chay wasipeqa budista templonku tiyaporqa, mamaypa tatan, iskay hermanosninpis monjes karqanku. Chayrayku wawitamantapacha budista jina wiñakorqani. Sapa día escuelamanta kutipuytawanqa, ñaupajta budista santoykumanraj inciensota qʼoshñichej kani, chaymantataj ofrendata jina arrozta, yakutawan jaywaj kani. Domingosnenqa uj jatun temploman rej kayku, chaypitaj uj santoman takej kayku. Chay santoqa wasiykupi karqa chay santoman rijchʼasqa kaj, orowan bañasqataj.

Uj día siete watitasniyoj jina kashajtiy, wasiykupi kaj santo qhawarisqalla kasharqani, tapukorqanitaj: “¿Imataj noqawan kanqa wañupojtiyri?”, nispa. Yachachiwasqankuman jina creej kani wañupusqaytawan imallaypis kausashanallantapuni. Chayllapitaj repararqani uj día wañupojtiy imallaypis kausashajtillanpunipis, niña ujtawan runa jina kusisqa kausakuyta atinayta. Chaypi piensarispa mayta llakikorqani, nitaj ni imata ruwayta aterqanichu mana ajina kananpaj.

15 watasniyoj jina kashajtiy, repararqani budista santopaj imatachus ruwasqayqa qhasilla kasqanta, nitaj sonqo juntʼasqachu kasharqani (Mat. 5:3). Noqaqa yacharqani tukuy atiyniyoj kausaj Dios kasqantapuni, rejsiytataj munarqani. Yuyarqani ichapis Biblia tapuykunasniyman kutichiyta atinanta. Chayrayku King James nisqa Bibliata medio usota rantikorqani. Chaytataj ranterqani budistaspaj feriankupi, nipuni yuyarqanichu chaypi chay Bibliata tariyta.

17 watasniyoj kashajtiy, alqoyta paseachishajtiy Wilson Bashou sutiyoj hermano qayllaykamuwarqa, tapuwarqataj: “¿Yachankichu imatachus Dios aswan qhepaman ruwananta?”, nispa. Chayta tapuwasqanraykutaj Bibliamanta maytapuni parlaykorqayku. Wilsonqa Apocalipsis 17:1 versiculota leeripuwarqa. Chantá tapuriwarqa: “¿Imawantaj ninakun kay ‘ashkha yakus’, mayqenpichus patanpi tiyasqa kashan khuchi warmi?”, nispa. Mana yacharqanichu imamantachus parlashawasqanta. Chaymantataj 15 versiculota leeripuwarqa, chaypitaj nin chay yakusqa runaswan ninakusqanta. Maytapuni tʼukorqani Jehovaj Testigosnin ima tapuymanpis Bibliawanpuni kutichisqankumanta. Wilsonqa niraj ripushaspa La verdad que lleva a vida eterna nisqa librota qowarqa. Chay azul libritoqa maytapuni kausayniyta cambiachiwarqa.

Chaymanta chunka diasninman ñaupaj kutirayku uj tantakuyman rerqani. Nipuni ni jaykʼaj qonqasajchu hermanos may munakuywan, kʼachamantataj chaypi japʼikuwasqankumanta. Chaymantapacha niña ujtawan reunionman faltakorqanichu. Wilsonqa Bibliamanta yachachiyta qallariwarqa, noqataj maytapuni gustachikorqani. Chayrayku wakin kutisqa ocho horasta jinapuni estudiaj kayku. Tatasneyqa Bibliamanta yachakushasqayta yachaspa mayta mancharerqanku, niñataj Bibliamanta yachakunayta munarqankuchu. Jinapis astawan estudiasqayman jina, astawan repararqani cheqa kajpuni kasqanta. Chayrayku 1983 watapi bautizakorqani.

UNIVERSIDADMANTA LLOJSIPUNI, PRECURSORTAJ KANI

Bautizakushajteyqa uj rejsisqa universidadpi medicinata estudiasharqani. Tatasneyqa tukuy atisqankuta ruwarqanku chay carrerata estudianaypaj. Atiyman karqa universidadpi estudiallaytapuni, jinapis munarqani Jehovata tukuy kallpaywan, tukuy tiempoywantaj sirviyta.

Tatayqa qhapariykuwaspa niwarqa: “Universidadta saqepunki chayqa, wasimanta ripunki”, nispa. Maytapuni llakikorqani, nitaj yacharqanichu imatachus ruwanayta. Mayta tatasniyta munakorqani, nitaj llakichiyta munarqanichu. Chayrayku universidadmanta tutasnin llojsej kani chʼaskasta qhawarej jina orakunaypaj. Jehovaman nej kani: “Por favor yanapariway allinta ajllanaypaj”, nispa. Chaymantataj universidadmanta llojsiporqanipuni, tataytaj wasimanta wijchʼuwarqapuni. Chantá Wilsonman wajyarqani imachus pasawasqanta willarinaypaj, paytaj paywan tiyakunaypaj wasinman wajyawarqa. Cositasniyta uj bolsonman churaykuytawantaj, autota japʼikuytawan wasinman riporqani. Tʼukunapaj jina niña anchata llakikorqanichu. Yacharqani allintapuni ajllasqayta.

Niña ima jarkʼaypis kapuwarqachu. Chayrayku aterqani Jehovata tukuy atisqayta sirviyta, 1984 watapitaj precursor kayta qallarerqani.

Precursor kashajtiy Jehovaqa yanapawarqa sumaj kʼacha kaykunasniyoj kanaypaj, por ejemplo mana saykʼunaypaj. Uj tarde predicaj llojsiyta munarqani, jinapis ni pi acompañanawanpaj karqachu, chayrayku desanimasqa kasharqani. Tukuy imapis contraypi jina kasharqa, chayrayku wasillapi qhepakuyta munayman karqa. Jinapis predicaj llojserqanipuni. Chaymanta iskay horata jina predicaytawantaj, uj edificiopi último punkuta takanayta nerqani. Sapallay kasharqani, saykʼusqataj, paramuytataj munasharqa. Chayrayku nikorqani “¿ripullasajñachu?” nispa. Jinapis chay edificiopi kinsa kaj pisoman wicharishajtiy uj jovenwan tinkorqani, chay jovenqa Filipinasmanta karqa. Noqaqa payta rikuspa nerqani: “Ni creenichu uyarinawanta”, nispa. Jinapis pantasqa kasharqani, payqa Bibliamanta yachakuyta qallarerqa, bautizakorqataj.

BROOKLYN BETELPI SUMAJ IMASTA YACHAKUNI

1985 watapi, iskay watataña Wilsonwan tiyakushajtiy, Brooklyn Betelman invitawarqanku. Qallariypi willarerqaykichej jina, librosta ruwanapaj tallerpi trabajanaypaj invitawarqanku. Uj día chaypi maquinaswan trabajashajtiy pantaykorqani, chayraykutaj may chhika librospa tapasnin niña sirverqachu. Hermanosqa niwarqanku imachus pasasqanta superintendenteman willanayta. Tukuy imata willarqani, jinapis uj imallata mana ruwasqanichu, chay hermanoqa kʼachamanta niwarqa: “Disculpakuyta yachayqa may sumajpuni”, nispa. Chaypi yachakorqani pantasqasniyta reconocenaypuni kasqanta, disculpakuytataj yachanapuni kasqanta.

Betelpi kaj kuraj hermanitosmantapis wajkunata sirviyta yachakorqani. Uj día hermano Milton Henschelwan khuska uj mesapi tiyasqa kasharqayku, payqa Diospa Llajtanta Kamachejkunamanta ujnin karqa. Chay diaqa comedorpi aswan ashkha runas karqayku, chayrayku meserosqa mana tukuyman mikhunata sirvispa alcanzayta atishallarqankuchu. Mesaypi kaj jovenestaj meseros anchata tardashasqankuta yuyaspa, paykunapaj mana reparayllata thutuyta qallarerqayku. Hermano Miltonqa mana ni imata nispalla sayarikuytawan meserosta yanaparqa yaku jarrasta, tʼantata, mantequillatapis mesasman apaysispa. Ajina kʼumuykukoj sonqo kasqanqa, yuyarichiwarqa Jesús imaynatachus apostolesninta sirvisqanta, kunankamataj manapuni chayta qonqakunichu (Juan 13:3-5).

“JAPONESTA YACHAKUNAYKI TIYAN”

1987 watapi Japonman rerqani, maytataj tʼukorqani hermanos sonqo kʼajaywan Jehovata sirvisqankumanta, kʼumuykukoj sonqostaj kasqankumanta. Paykunata predicacionpi yanapayta munarqani, jinapis mana japonesta yacharqanichu. Chaymanta kutinpusqaytawanña, Japonmanta uj hermana Brooklyn Betelta visitasharqa. Payqa sutikorqa Michiko Oda. Paytaj qhawariwaspa niwarqa: “Japonesta yachakunayki tiyan”, nispa. Chaytapunitaj ruwarqani. Jinapis mana yuyarqanichu chay yuyaychawasqan aswan qhepaman maytapuni yanapanawanta.

Uj mashkha killasninman Japonespi kaj congregacionman cambiakorqani. Chayqa karqa Nueva Yorkpi. Japonesta yachakoyqa yanapawarqa astawan ashkha imaynasmanta Jehovata sirvinaypaj. 1989 watapi por primera vez japonés parlaypi uj asamblea de distritoman rerqani. Chayqa karqa Los Angelespi, Californiapi. Chaypitaj Miwako Onami sutiyoj precursorata rikurqorqani. Payqa dramapi actuarqa.

1992 watapi casarakorqayku, khuskataj Brooklyn Betelpi sirverqayku. Miwakoqa manchay kʼachapuni, munakuyniyoj, wajkunatapis yanaparishanpuni. Paymantaqa yachakuni wajkunawan aswan kʼacha kayta. Payqa Jehovamanta uj sumaj regalopuni, aswan kusisqa kanaypajtaj mayta yanapawan.

JAPÓN SUCURSALPI SIRVIYKU, PRECURSORES ESPECIALESTAJ KAYKU

Uj mashkha watasninman Miwakoj tatasnin maytapuni onqoykorqanku. Paykunaqa Japonpi tiyakorqanku. Hermanosqa may kʼachaspuni noqaykuwan karqanku, saqewarqaykutaj Japón sucursalman cambiakunaykuta. Ajinamanta Miwakoj tatasninta yanaparinaykupaj, cuidanaykupaj ima. Chayrayku 1999 watapi Japonman riporqayku.

Japón Betelmanta hermanosqa may munakuywan japʼikuwarqayku, chay ratotaj chayman yachaykukuyta atillarqayku. Hermanos, hermanaspis manchay kʼacha kaykunasniyoj kasqankoqa mayta yanapawarqa aswan sumaj cristianoman tukunaypaj. Paykunaqa maytapuni qorikuyta, wajyarikuytapis yachanku. Chantapis ruwanasninkuta tukuy sonqo juntʼanku. Culturankupeqa ujchasqa uj equipo jina trabajayman yachasqa kanku, nitaj sapallankuchu imatapis ruwayta munanku. Paykunamantaqa yachakorqani kʼumuykukoj sonqowan wajkunawan khuska trabajayta. Repararqanitaj Jehovapaj imaynallamantapis llankʼaspaqa, paypaj munaynin juntʼakunanpaj yanapakushasqanchejta.

Jinapis mana kikin culturayojchu kasqaykurayku, wakin kutisqa mana entiendeyta atillarqanichu imaraykuchus wakin imasta uj jinamanta ruwasqankuta. Chayrayku paykunawanqa mejoranay karqa astawan pacienciayoj kanaypaj, nitaj phiñarpakunallaypaj. Tiempowantaj cambiarqani, repararqanitaj Jehovaqa imatapis llajtannejta kamachiwasqanchejman jina ruwajtinchej bendecinawanchejtapuni. Jehovaj yanapallanwan imata ruwasqanchejpis allin llojsin.

Piensariytapuni yachani Jehová imaynatachus yachachiwasqanqa, Moisesta imaynatachus yachachisqanman rijchʼakusqanpi. Moisesqa sumaj escuelaspi yachachisqa karqa. Jinapis 40 watasta ovejasta michishajtin, Jehovaqa payman yachacherqa kʼumuykukoj sonqo kayta, llampʼu sonqo kayta ima. Kikillantataj universidadpi kashaspaqa mayta jatunchakuyta, noqallapitaj atienekuyta yachakorqani. Jinapis Betelpeqa yachakorqani kʼumuykukoj sonqo kayta, Jehovapipunitaj atienekuyta. Jehovaqa kay chhika watasta Moiseswan jinallataj noqawan pacienciakuwarqa.

Miwakoj tatasninta 24 watasta jina cuidarqayku. Chanta wañuporqanku. Chay tiempopeqa ashkhas wajyamuwaj kayku, wakin kutis llakisqaslla kaj kayku, hospitalmantaj sapa kuti rej kayku. Suegray Masakoqa maytapuni onqoykusqanrayku, manaña purikuyta atillajchu, chayraykutaj tantakuykunaman, predicacionmanpis niña riyta atillajchu. Ultimostaqa tantakuykunaman silla de ruedasllapiña rej. Chay imaspi rikukuspapis Jehovata mayta munakullarqapuni. Cheqa kajmanta parlarispaqa kusiywanpuni parlarej. Paymantaqa maytapuni yachakorqani imapi rikukuspapis Jehovata kusisqallapuni sirviyta atisqanchejta.

2024 watapi uj jatun cambio chayamuwarqayku. 30 watas kurajta Betelpi sirvisqaykutawan, precursores especiales kanaykuta niwarqayku, Okinawa islamantaj kachawarqayku. Chaymanqa ashkha militaresta kachanku. Chayrayku familiasninkoqa chay qayllasman tiyakoj ripunku, paykunamantaj predicayku. Betelpi sumajta yachachiwasqaykoqa maytapuni yanapawarqayku chay cambioman yachaykukunaykupaj. Mayta kallpachakuyku sumaj horarioyoj kanaykupaj, tiempoykuta allinta apaykachanaykupaj, predicaciontapunitaj ñaupajman churanaykupaj. Jehovaqa may kʼachapuni, ashkha estudioswantaj bendeciwayku. Paykunaqa noqaykupaj familiayku jina kanku. Ni jaykʼaj jina reparashayku runasta munakuy may importante kasqanta. Sapa día maytapuni Jehovaman agradecekuyku kay kʼachitu asignacionta qowasqaykumanta.

SAQELLASAJPUNI JEHOVÁ YACHACHINAWANTA

Familiayqa kunankama nirajpuni Bibliamanta yachakunkuchu. Jinapis niña ñaupajta jina churanakuwankuchu. Chaywanpis sutʼita repararqani imaynatachus Jesuspa nisqan juntʼakusqanta. Pay nerqa pichus payrayku familianta saqejqa pachaj jinastawanraj japʼinanta, uj jatun familiata (Mar. 10:29, 30). May chhika hermanospuni familiankuta jina munakuwarqanku, niña tukuysitunkumantapuni yuyarikuyta atiniñachu.

Wilson qowarqa chay azul libritotaqa kunankama jallchʼakushallanipuni. Sapa chay librota rikuspa yuyarikunipuni Jehová noqawan may kʼacha kasqanta, payta rejsinaypajtaj yanapawasqanta (1 Cró. 28:9). Saqekullasajpuni Jehová aswan sumaj cristianoman tukuchinawanta, wajkunatapis yanapallasajpuni Jehovamanta yachakunankupaj, ajinamanta wiñay kausayta japʼikunankupaj.