Wajkunata yanapana Jehovata allinta rejsinankupaj

1. ¿Imaynataj sientekunchej uj estudio ñauparisqanta rikuspa?

¿IMAYNATAJ sientekunchej uj estudio ñauparisqanta rikuspa? Maytapuni kusikunchej primera vez reunionman jamojtin, ñaupaj comentarionta qojtin, predicayta qallarejtin, bautizakojtin ima. Jinapis yachanchej ajinata ñauparinanpajqa Jehová yanapasqanta. Chayrayku payta jatunchanchej (1 Cor. 3:5-9; 3 Juan 3, 4).

2. ¿Imatá Jehová munan? (1 Timoteo 2:3, 4).

² Jehovaqa “munan tukuy laya runas salvakunankuta, cheqa kajtataj allinta rejsinankuta” (1 Timoteo 2:3, 4 leey). Reparanchej jina Jehovaqa munan tukuy runas pay imaynachus kasqanta, imastachus ruwayta munasqantapis “allinta rejsinankuta” (Jer. 9:24). Bibliamanta yachaj uj runa nisqanman jina, griego parlaypi ‘allinta rejsiy’ nisqa palabrasqa, mana ashkha imasta yachayllatachu niyta munan, manaqa chay yachasqanchej tanqanawanchej tiyan kausayninchejta cambianapaj. ¿Imataj kanqa uj estudio Jehovata allinta rejsejtin? Paytaqa Jehovamanta yachakusqan tanqanqa kausayninta cambiananpaj. Ajinamanta ‘wiñay kausayta’ japʼikuyta atenqa (Juan 17:3).

3. ¿Ima tapuykunamantaj kay yachaqanapi kutichisun?

³ Jehovaqa uj sumaj llankʼayta qowanchej. Chaytaj kashan wajkunata payta rejsinankupaj yanapay. Kay yachaqanapeqa kay tapuykunaman kutichisun: ¿Imaraykutaj Bibliamanta yachakojkuna Jehovata allinta rejsinanku tiyan? ¿Imaynasmantá paykunaman yachachisunman imaynachus Jehová kasqanta? ¿Imaynatá yanapasunman Jehovamanta imastachus yachasqankuman jina kausayninkupi ruwanankupaj?

ESTUDIOSNINCHEJTA YANAPANA JEHOVATA ALLINTA REJSINANKUPAJ

4. Marcos 12:30 nisqanman jina, ¿imapajtaj estudionchejta yanapayta munanchej?

⁴ Jesusqa nerqa Jehová Diosninchejta ‘munakunanchejta tukuy sonqonchejwan, tukuy kausayninchejwan, tukuy yuyayninchejwan, tukuy kallpanchejwantaj’. Chay kashan tukuy kamachiykunamanta ñaupaj kaj (Marcos 12:30 leey). Uj estudio Jehovata mana allinta rejsispaqa, mana payta munakuyta atenqachu. Munanchej estudionchej bautizakunanta Jehovata munakusqanrayku, manataj amigonchej kayta munasqanraykullachu, chayri Diospa llajtanman yaykumunanraykullachu, nitaj Bibliamanta wakin yachachiykuna payman gustasqanraykullachu. Chayrayku Bibliamanta yachachishaspaqa estudionchejta astawan yanapayta munanchej Jehovata allinta rejsinanpaj, munakunanpaj ima.

5. Uj estudio Jehovata munakonqa chay, ¿imatataj ruwayta munanqa?

⁵ Munakuywan kasukuywanqa ujchasqetapuni kanku. Uj estudio Jehovata rejsenqa, munakonqataj chayqa, payta kasukuyta munanqa. Jesús nerqa: “Kay mundomanta runasqa yachananku tiyan Tatayta munakusqayta. Chayrayku imaynatachus Tatay kamachiwarqa ruwanayta ajinata ruwashani”, nispa (Juan 14:31). Ajinallatataj uj estudiopis payta munakusqanrayku kasukonqa, payllatapunitaj sirviyta munanqa (1 Juan 5:3).

6. ¿Imaynatá uj estudiota Jehovata allinta rejsiy yanapanqa kausayninpi imatapis allinta ajllananpaj? Kikinchariy.

⁶ Uj estudioqa Jehovata astawan rejsisqanman jina aswan sumajta imatapis kausayninpi ajllanqa. Chayta entiendenapaj motota manejayta yachakoj runamanta parlarina. Chay runaqa mana wajkuna imaynatachus manejasqankuta qhawaspallachu, nitaj motota imaynatachus apaykachanamanta parlaj papelesta leespallachu motota manejayta yachakonqa. Allinta manejayta yachakunanpajqa ashkha horasta practicanan kanqa. Practicasqanman jinataj astawan yachakonqa imapi rikukuspapis imaynatachus manejayta. Ajinallatataj uj estudiopis mana Jehovamanta yachakuspallachu payta allinta rejsenqa, manaqa Bibliaj yuyaychaykunasninman jina imatapis ajllajtin imaynachus kausayninpi risqanta rikuspa. Jehovata aswan sumajta rejsisqanman jina, pay imaynatachus kausayninpi yanapasqanta rikusqanman jinataj, aswan wakichisqa kanqa kausayninpi imatapis allinta ajllananpaj.

7. ¿Imataj Joseta yanaparqa allinta ajllananpaj?

⁷ Joseqa Jehovata sumajta rejserqa. Chaytaj payta yanaparqa Potifarpa warmin paywan puñuykunanta nishajtin qhesachananpaj. Paymanqa wawitallaraj kashajtin willarerqankuchá Adanmanta, Evamanta, chantá Abrahanmanta, Saramantawan (Gén. 2:24; 20:3, 6). Chay willarisqankuraykutaj Joseqa entienderqa imaynatachus qhariwarmi kausayta Dios qhawasqanta, jinallataj qhariwarmi jina puñuykuytapis. Jehovata allinta rejsisqanrayku yacharqa imatachus pay allinpaj qhawasqanta, imatatajchus mana, imaschus sonqonta nanachisqantapis. Chayrayku allinta ajllarqa, Potifarpa warmintataj nerqa: “¿Imaynatataj ruwayman kasqa chay millaytari, juchallikuymantaj Diospa contrantari?”, nispa (Gén. 39:7-9). Ajinallatataj estudiosninchejtapis yanapasun Jehovata allinta rejsinankupaj, imachus payta kusichisqanta, imatajchus mana kusichisqanta yachanankupaj ima chayqa, kausayninkupi payta kusichinanpaj jinapuni imatapis ajllanqanku.

IMAYNACHUS JEHOVÁ KASQANTA YACHACHINA

8. ¿Imaynatá Wiñaypaj kusisqa kausakuy librowan estudiosninchejta yachachisunman imaynachus Jehová kasqanta?

⁸ ¿Imaynasmantá uj estudioman yachachisunman imaynachus Jehová kasqanta? Tapuykunata ruwaspa. Jehovapis tapuykunata ruwaspapuni yachachin. Por ejemplo Jehovaqa munarqa Job payta allinta rejsinanta, chaypajtaj 50 kuraj tapuykunata ruwarqa (Job 38:1–41:34). Noqanchejpis tapuykunawan yachachina. Chaypajtaj Wiñaypaj kusisqa kausakuy librowan yanapachikusunman. Chaypeqa ashkha tapuykuna tiyan, chay tapuykunataj estudionchejta yanapan imaynachus Jehová kasqanta aswan sumajta yachananpaj (“Imaynachus Jehová kasqanta yachachinapaj tapuykuna” nisqa recuadrota qhawariy). Chayrayku chay tapuykunata tapurinapuni, ajinamanta estudiosninchej Jehovata sumajta rejsinankupaj.

9, 10. 1) ¿Imataj uj estudiota yanapanqa Bibliata leespa Jehovamanta astawan yachakunanpaj? (Santiago 5:11). 2) ¿Imaynatá uj estudio Bibliata leespa reparanman imachus Jehovata kusichisqanta, imatajchus mana? Kikinchariy.

⁹ Uj runaman Bibliamanta yachachiyta qallarishaspaqa, chay rato kallpacharinchej Bibliata sapa día leenanpaj.a ¿Imaynatá yanapasunman chay leesqanpi Jehovamanta astawan yachakunanpaj? Ichapis sapa Bibliata leespa kay tapuykunata ruwakunanta nisunman: “¿Imaraykutaj Jehová kayta Palabranpi qhelqacherqa? ¿Imatá kay versículos Jehovamanta yachachiwan?”. Discípulo Santiagopis chayta ruwarqa Jobmanta yachakushaspa. Payqa repararqa Jobqa ashkha llakiykunata aguantasqanta, jinapis reparallarqataj Jehovaqa manchay munakuyniyoj, khuyakuyniyojtaj kasqanta (Santiago 5:11 leey).

¹⁰ Munanchej estudiosninchej sapa Bibliata leespa reparanankuta imachus Jehovata kusichisqanta, imatajchus mana. Por ejemplo ichapis estudionchejqa Wiñaypaj kusisqa kausakuy libropi, “Bibliata leeyta qallarinapaj yanapa” nisqa parteman yaykuspa, “Danielta leonesman wijchʼuykunku” nisqata leeyta ajllanman. Ajina kajtenqa ichapis kay tapuykunata ruwakunanta nisunman: “¿Imaraykutaj Jehová Danielta salvarqa? ¿Imatá chay yachachiwan imachus Jehovata kusichisqanmanta?” (Dan. 6:10, 22). Chantá tapurikullanmantaj: “¿Imataj karqa Danielta qhasimanta tumpaykorqanku chay runaswan? ¿Imatá chay yachachiwan imatachus Jehová mana allinpajchu qhawasqanmanta?” (Dan. 6:4, 5, 24). Chantá nillasunmantaj chay leesqanpi imastawanchus Jehovamanta yachakusqanpi piensarinanta (Dan. 6:26, 27).

11. ¿Imatá ruwasunman estudionchej Jehovapuni payta yachachishasqanta reparananpaj?

¹¹ Maytapuni kusikunchej uj estudionchej Bibliamanta yachakusqan imaynatachus yanapasqanta reparakojtin. Ichapis payqa yachakusqanmanta agradecekuwasun, imaynatachus yachachisqanchejmantapis felicitawasun. Chayta niwasqanchej allin kajtinpis, yuyarichinapuni Sumaj Yachachejninchej Jehová payta yachachishasqanta, payllatataj jatunchana kasqanta (Isa. 30:20, 21).

JEHOVAMANTA YACHASQANKUMAN JINA RUWANANKUPAJ YANAPANA

12, 13. Uj estudio Bibliamanta uj parteta leesqanta mana entiendejtin, ¿imaynatá Jehovamanta yachasqanña yanapanman? (Fototawan qhawariy).

¹² Uj estudioqa imatachus Jehovamanta yachanña chaywan kausayninpi yanapachikunan tiyan. ¿Imaynatá chayta ruwananpaj estudionchejta yanapasunman? Por ejemplo ichapis Bibliamanta leeshaspa uj parteta mana entiendeyta atillanchu. Ichapis tapukun: “¿Imajtintaj Dios wakin runasta wañucherqa, wakintataj mana?”, nispa. Ajina kajtin, ¿imaynatá estudionchejta yanapasunman Jehovamanta imatachus yachanña chaypi piensarinanpaj?

¹³ Kay imaspi tʼukurinanta nisunman. ¿Imaynatá Jehová kausayta qhawan? (2 Ped. 3:9). ¿Imatá Jehová ruwarqa pantaj runas kajtinchejpis salvanawanchejpaj? (Efe. 2:4, 5). ¿Mana juchayoj runasta castiganchu? ¿Pichus juchallikojta qhawakullanchu? (Éxo. 34:6, 7). Chantapis allin kanman kayta yuyarichinanchej, Bibliaqa imaraykuchus Jehová imatapis ruwasqanta entiendenapaj mana tukuysituntapunichu willawanchej. Jinapis mana chay imasta yachayta necesitanchejpunichu. Imaraykuchus Jehová Diosninchejta rejsinchej, yachanchejtaj cheqan kajtapuni ruwananta.

14. ¿Imaynatá estudionchejta yanapasunman congregacionmanta pillawanpis mana allinta apanakuyta atejtin?

¹⁴ ¿Imaynatá estudionchejta yanapallasunmantaj, imatachus Jehovamanta yachanña chaywan yanapachikunanpaj? Ichapis payqa tantakuykunaman jamushanña. Congregacionmanta uj hermano chayri uj hermana ruwasqanwan chayri parlasqanwan sonqonta nanachisqanraykutaj, ichapis chay hermanowan mana apanakuyta atishallanchu. Jina kajtenqa, kallpacharina Jehová imaynatachus hermanosta qhawasqanpi tʼukurinanpaj. Chaypajqa ichapis tapurikunman, “¿imatá Jehová hermanosta munakusqanrayku ruwarqa?” (Juan 3:16). “¿Imaynatá Jehová qhawan kamachisnin ujchasqa kasqankuta?” (Sal. 133:1). “¿Imayná Jehová sientekun congregacionpi tukuywan allinta kausakunapaj kallpachakojtinchej?” (2 Cor. 13:11). Jehovaqa wajkunaj allin ruwasqasninkuta qhawasqanchejmanta kusikun, manataj pantasqasninkuta qhawasqanchejmantachu. Chayta estudionchejman reparachina.

15, 16. 1) ¿Imaynatá estudionchej Jesús jina ruwanman kausayninpi imatapis ajllanan kajtin? (Juan 8:29). 2) ¿Imaynatá Marianne estudionta yanaparqa sumajta ajllananpaj? (Fototawan qhawariy).

¹⁵ ¿Imaynatá estudionchejta yanapallasunmantaj imatachus Jehovamanta yachanña chaywan yanapachikunanpaj? Ichapis payqa kausayninpi uj imata ajllanan kashan. Chaypajqa Wiñaypaj kusisqa kausakuy libromanta 35 leccionta rikuchisunman. Chay leccionpa titulonqa kashan “¿Imatá ruwasunman imatapis sumajta ajllanapaj?”. Jinapis ichá estudionchejqa orakunña, yuyaychaykunatapis maskʼanña, jinapis nirajpuni yachanchu imatachus ruwananta. Ichapis Bibliamanta ashkha yuyaychaykunata tarin. Pero mana yachanchu mayqenman jinachus ruwananta, imaynatachus ruwanantapis. Jesús jina ruwananta yuyaychasunman. Tatanmanta parlaspa pay nerqa: ‘Munasqantapuni ruwani’, nispa (Juan 8:29 leey). Chantá nisunman kayta tapurikunanta: “Investigasqayman jina, imatachus Jehovamanta yachasqayman jina, ¿imata ajllasqaytaj payta kusichinman?”. Imata ajllasqanpis Jehovata kusichenqa chayqa, allinpuni kanqa.

¹⁶ Chilepi tiyakoj uj warmimanta parlarina. Payqa Bibliata estudiakusharqa. Paytaqa maytapuni familian matʼisharqanku ashkha qolqeta ganananpaj jina uj trabajota japʼikunanpaj. Jinapis chay trabajota japʼikojtenqa manaña wakin reunionesman riyta atinmanchu karqa. ¿Imatá pay ruwarqa? Bibliamanta yachachejnin Marianne sutiyoj hermana nin: “Payta nerqani imatachus ajllasqan Jehovata kusichinanpichus manachus piensarinanta. Chantapis yuyaycharillarqanitaj tukuy imatapuni Jehovaman willakunanta, imaynatachus pay kutichisqantataj sumajta reparananta. Payqa mana chay trabajota japʼikorqachu. Pisi tiemponmantaj waj trabajota tarikorqa. Chay trabajowantaj tukuy reunionesman riyta atillarqa”. ¿Imatá Marianne ruwarqa? Estudionman imatachus ruwananta ninanmantaqa, imatachus Jehovamanta yachasqanpi tʼukurinanpaj kallpacharqa. Chayta ruwasqanrayku estudionqa paypi astawan confiarqa, Jehovamanpis astawan qayllaykorqa. Marianne nillantaj: “Estudioyqa yachakorqa, Jehovaqa payta kausayninchejpi ñaupajman churajtinchej cuidanawanchejtapuni”, nispa.

JEHOVAQA ALLINTA REJSISQAYKIRAYKU BENDECISONQA

17. ¿Estudiosninchej imata ruwanankutataj astawan munanchej?

¹⁷ Estudiosqa Bibliamanta yachachisqanchejrayku ashkha sumaj imasta yachakunku. Por ejemplo Bibliamanta qallariy yachachiykunata yachakunku. Chaykunamanta wakintaj kashan: Juchamanta wañuymantawan kacharichisqa kasqanchej, Diospa Gobiernon, wañusqaswan imachus kasqan ima. Chantá Diospa llajtanmanta wakin imasta yachakullankutaj. Por ejemplo imaynachus tantakuykunasninchej kasqanta, imatachus ancianos ruwasqankuta, imatachus Diospa Llajtanta Kamachejkuna ruwasqankutapis. Jinapis yachakorqanchej jina, mana munanchejchu estudiosninchej ashkha imasta yachakusqallankuta umankuman juntʼachinankuta. Astawanqa munanchej paykuna Jehovata allinta rejsinankuta.

18. Jehovata rejsejkuna, ¿ima bendicionestataj japʼinku?

¹⁸ Wajkunata Jehovata rejsinankupaj yanapayqa may sumajpuni. Pikunachus Jehovata allinta rejsinchej, munakunchej, yupaychanchejtaj chaykunaqa, ashkha bendicionesta japʼinchej. Chantapis kay tiempopiña sonqo juntʼasqa, kusisqataj kausakunchej (Sal. 25:12-15). Aswan qhepamantaj cheqa Diosta rejsejkunaqa wiñaypaj kausakusunchej (1 Juan 5:20). Mana chayllachu. Bibliaqa nin: “Pillapis Diosta munakun chayqa, Diospis payta rejsin”, nispa (1 Cor. 8:3). Tukuy Atiyniyoj Jehová Diosninchejqa munakuwanchej, amigosninta jinataj qhawawanchej. Chaytaj uj jatun bendicionpuni.