Usqhayllata allinyakuna
¿MAYQEN hermanollapis chayri hermanallapis sonqoykita nanachisorqachu, chaymantapachataj phiñanasqallapunichu kashankichej? Allinyakunaykichejpaj, watejmantataj amigosllapuni kanaykichejpajqa, usqhayllata chayta allinchanaykichej tiyan, imaraykuchus chayta ruwashasqaykita mana qonqaspataj. Chaywanqa yanapakunki Diospa llajtanpi ujchasqallapuni kananchejpaj.a
Por ejemplo tullunchejta pʼakirpakojtinchej, nitaj sanoyananpaj imatapis ruwajtinchej, nanayqa kallanqapuni. Chantapis tulloqa ichá mana lugarninpichu, nitaj allintachu sanoyanqa. Tullunchej sanoyananta munanchej, niñataj nananawanchejta munanchejchu chayqa, usqhayllata imatapis ruwananchej tiyan jampichikunapaj.
Ajinallatataj uj hermanowan phiñanasqa kashanchej chayqa, imallatapis chay rato ruwananchej tiyan allinyakunapaj, manachayqa phiñanasqasllapuni kasun. Chantapis ichá paypaj astawan astawan phiñakapusun, niñataj ni jaykʼaj amigos kayta atisunñachu. Chayraykuchá Jesusqa nerqa: “Usqhayllata allinyakapuy”, nispa (Mat. 5:25). Chayrayku aswan sumajqa amigonchejwan kʼachallamanta, sutʼitataj parlarinanchej. Jinapis chayqa mana atikullanchu. Qhawarina imaraykuchus chayta nisqanchejta.
Ñaupaj kaj, ichapis imachus pasasqanmanta ni parlallaytapis munasunchu, nitaj problemanchejta allinchanapaj imatapis ruwayta munasunchu.b Jinapis Evodiamantawan Sintiquemantawan yuyarikuna. Chay iskay hermanasqa problemankuta mana allinchayta aterqankuchu. Paykunaqa unaytasina phiñanasqas karqanku. Chayrayku Pablopis chay jina karupi kashaspa chay problemamanta yacharqa. Payqa Romapi kasharqa. Paykunatataj nerqa problemankuta allinchanankuta (Fili. 4:2). Paykunaqa kʼumuykukoj sonqo kaspa, sutʼita parlaspa, cheqamantapunitaj perdonanakuspa watejmanta amigas kankuman karqa.
Iskay kaj, ichapis yuyasunman piwanchus phiñanasqa kashanchej chayraj ñaupajta jamunawanchejta, pay juchayoj kasqantataj reconocenanta. Jinapis kayta yuyarikuna: Mana pichus juchayoj kasqantachu maskʼashanchej, manachayqa watejmanta amigosllapuni kayta. Uj doctorqa tullun pʼakisqata jampishaspa mana imaynapichus pʼakikusqanmanta tukuy imatapunichu tapuykachan, manaqa astawan jampiyta munan. Ajinallatataj noqanchejpis amigonchejwan parlarishaspaqa mana pichus juchayoj kasqantachu maskʼanchej, manaqa paywan allinyakuyta. Imajtinchus paywan amigosllapuni kayta munanchej.
Efesios 4:26 nin: “Ama inti yaykunankama phiñasqallapuni kaychejchu”, nispa. Chayrayku allin kanman noqanchejpuni kunanpacha chay hermanowan watejmanta amigos kanapaj allinyakoj rinanchej. Ajinamanta yanapakushanchej noqanchejpura allinta kausakunapaj (Efe. 4:1-3).
a Problemanchej mana jatunchu chayqa, noqanchejpuralla parlarikuspa tukuy sonqo perdonanakuna (Mat. 5:23, 24). Problemanchej jatun chaytaj ichapis necesitasun ancianos yanapanawanchejta (Mat. 18:17). Jinapis ancianoswanqa parlasun, imatachus Mateo 18:15, 16 versiculospi nisqanta ruwaspañapis manapuni problemanchejta allinchaspalla.
b Uj hermano chayri uj hermana sonqonchejta nanachiwajtinchejpis amigollanchejpuni kashan chayqa, qonqapuna imatachus ruwawasqanchejmanta (Pro. 26:20).