Wajkunaj ajllasqankuta respetana

1, 2. ¿Imaraykutaj cristianos mana kikin imastapunichu ajllanchej?

¿MAYKʼAJLLAPIS imata ajllasqaykimanta pillapis qhawarasorqachu? Chayri, ¿qanchu uj hermanota imallatapis ajllasqanmanta qhawararqanki? Casi tukuychá maykʼajllapis ajinapi rikukorqanchej.

² Mana tukuy cristianoschu kikin imasta ajllanchej. Imaraykuchus mana tukuychu kikin kanchej. Sapa ujpis uj jinata piensanchej culturanchejman jina, imayna familiapichus uywasqa kasqanchejman jina, imaspitajchus kausayninchejpi rikukusqanchejman jina. Chaywanpis atisunman congregacionpi hermanoswan allinta kausakuyta, ujchasqataj kayta (Efe. 4:3).

3. ¿Imaraykutaj wajkunaj ajllasqankuta qhawarasunman?

³ Uj hermanoj ajllasqan mana allinchu rijchʼawajtinchejqa, ichapis yuyasunman paywan parlananchej kasqanta imatachus ajllasqanta cambiananpaj. Chayri ichá wajkunawan parlayta munasunman chay ajllasqan mana allinchu rijchʼawasqanchejmanta. Chaytaqa ruwayta munasunman yanapariyta munasqanchejrayku. Hermanosninchejtaqa munakunchej, allinninkutapunitaj munanchej (Pro. 17:17). Chayrayku mana munanchejchu imatapis ajllasqankumanta arrepientekunankuta chayri imata ajllasqankupis Jehovamanta karunchachinanta.

4, 5. Uj hermanoj ajllasqan mana allinchu rijchʼawajtinchej, ¿imatá ruwasunman?

⁴ Uj hermanoj ajllasqan mana allinchu rijchʼawajtinchej, ¿paywan parlananchejpunichu tiyan? Wakin kutisqa allin kanman parlananchej, wakin kutistaj mana. Ichá reparanchej uj hermano uj imata ajllayta munashasqanta, chaywantaj Bibliaj ujnin kamachiyninta pʼakinanta. Jina kajtenqa munakusqanchejrayku paywan parlarina tiyan, imatachus ruwayta munashasqan mana allinchu kasqanta reparachinapaj (Pro. 27:5, 6). Jinapis uj hermanoj ajllasqan noqallanchejman mana allinchu rijchʼawanchej, nitaj Diospa ni mayqen kamachiykunasninta pʼakishanchu chay, ¿imatá ruwasunman? Romanos 14:1 niwanchej imatachus ruwanata. Chaypi nin: “Mana qankuna jinachu piensajkunataqa ama juzgaychejchu”, nispa.

⁵ Jinapis wakin kutisqa ichá manapuni wajkunaj ajllasqankuta respetayta atillasunmanchu. Kay yachaqanapi yachakusunchej imaraykuchus wajkunaj ajllasqankuta respetananchej kasqanta, imaynatatajchus chayta ruwanata. Jinapis ñaupajtaqa qhawarina ima kutispichus wajkunaj ajllasqankuta aswan facilta juzgayta chayri qhawarayta munasqanchejta.

¿IMASTA AJLLASQANKUTATAJ QHAWARAYTA MUNASUNMAN?

6, 7. ¿Ima kutispitaj wajkunaj ajllasqankuta juzgayta chayri qhawarayta munasunman?

⁶ Ñaupaj parrafospi yachakorqanchej jina, imayna uywasqachus kasqanchejrayku chayri kausayninchejpi imaspichus rikukusqanchejrayku, ichapis wakin imasmanta ninchej “kayqa ajinapuni ruwakunan tiyan”, chayri “ajinapuni kanan tiyan” nispa. Chantapis ichá yuyanchej wajkunapis noqanchej jina wakin imasmanta yuyasqankuta. Jinapis chayqa mana ajinachu. Sojta ejemplosta qhawarina. Uj kaj: Niraj testigo kashaspa uj hermanoqa mayta machakoj tatanwan wiñakorqa. Chayrayku uj arreglitopi hermanos machachej ujyanasta tomashasqankuta rikuspa phiñakun, mana allintachu ruwashasqankutataj nin. Iskay kaj: Uj hermana uj sinchʼi onqoymanta sanoyapun. Aswan qhepamantaj yachan waj hermana chay kikin onqoyllawantaj onqoykusqanta. Yanapariyta munaspataj pay ruwarqa chay kikin tratamientota ruwachiyta munan. Payta nin wakin imasta mikhunanta, chayri wakin medicamentosta tomananta, manachayrí waj imaswan jampikunanta. Kinsa kaj: Uj hermano niraj testigo kashaspa uj llulla religionpi kasharqa, kunantaj ni imata chay religionmanta yachayta munanchu. Jinapis waj hermano uj iglesiaman yaykusqanta yachaspa mayta phiñakun. Chay hermanoqa chay iglesiaman yaykusqa wañusqa familiarninta, chayri amigonta chayman apasqankurayku.a

⁷ Wakin ejemplostawan qhawarina. Tawa kaj: Uj hermano wiñakorqa chay tiempopeqa casi tukuy mana allinpajchu qhawaj kanku qharis barbayoj kanankuta, warmistaj asambleasman, tantakuykunaman, predicacionmanpis pantalonniyoj rinankuta. Chay hermanoqa yachan imatachus Diospa llajtan reciellanraj chaymanta niwasqanchejta. Jinapis payqa hermanosta nishallanpuni barbata wiñachikoyqa mana allinchu kasqanta, hermanaspis asambleasman, tantakuykunaman, predicacionmanpis vestidoyojpuni chayri faldayojpuni rinanku kasqanta. Phishqa kaj: Uj anciano uj hermanota rejsin. Chay hermanoqa colegiota tukuytawan astawan estudiarqa, chaymantataj Jehovata sirviyta saqeporqa. Kunantaj congregacionmanta uj jovencito colegiota tukuytawan astawan estudiayta ajllan. Chay ancianoqa chay jovencitomanta llakikusqanrayku, paytawan tatasnintawan imatachus ajllasqankuta cambianankupaj convenceyta munan.

8. 1) ¿Imajtintaj wakin tatas waj tatasta qhawarayta qallarinkuman? 2) ¿Imataj pasanman hermanospa ajllasqankuta qhawarajtinchej?

⁸ Tataspajñataj uj ejemplota qhawarina. Sojta kaj: Tatas qankunaqa mayta kallpachakunkichej wawasniykichejta “Jehová Dios nisqanman jina cheqanchaspa, yachachispataj” uywanaykichejpaj (Efe. 6:4). Jinapis ichá rikunki wakin cristiano tatasqa wawasninkuta wakin imasta ruwajta saqellasqankuta. Ichapis saqellanku wawasninku wasiman astawan tarde chayanankuta, mana maqanakuykunasniyoj wakin videojuegosta pujllanankuta, chayri wawasllaraj kajtinkupis celularniyoj kanankuta saqesqankuta. Chayraykutaj ichapis wawaykeqa nisunki: “¿Imaraykutaj kay jinata controlawankichejri? ¿Imajtintaj mana amigosniypa tatasnin jinachu kankichejri?”, nispa. Chayraykutaj ichapis qankunaqa chay tataspa ruwasqankuta qhawarayta qallarinkichejman. Kaykamaqa wakin imasllata qhawarinchej. Ashkha imaswanraj tiyan. Por ejemplo ichá qhawarasunman uj hermano imapichus qolqenta gastasqanta, sapa mashkha tiempochus paseaj rinanpaj viajasqanta, chayri imaswan kusirikuytachus ajllasqantapis. Wakin cristianos mana yuyasqanchejman jinapunichu wakin imasta ajllajtinkoqa phiñakusunman, paykunapajtaj malta piensasunman, chayri qhawarasunman. Jinapis ama saqenachu imatachus yuyasqanchej congregacionpi tʼaqanakusta rikhurichinanta.

9. ¿Imatataj tukuypis ruwayta munanchej, chanta imamantataj qhawarikunanchej tiyan? (Dibujotawan qhawariy).

⁹ Imatachus ajllasqanchejqa ichapis mana uj hermanoj ajllasqanwan kikinchu kanqa. Chayqa mana ninayanchu ujninpa ajllasqan allin kasqanta, ujninpatataj mana (Rom. 14:5). Bibliapi “uj yuyaylla kaychej” nispa niwasqanchejqa, niyta munan Jehovaj kamachiykunasninta tukuyninchej kasukunanchej kasqanta. Jinapis mana niyta munanchu tukuy imamanta kikinta yuyananchej kasqanta (2 Cor. 13:11). Ashkha runas uj lugarman viajayta munashasqankupi piensarina. Imaynatachus chay lugarman rinankutaqa sapa uj waj jinata ajllanqanku, maynintachus riyta munasqankuman jina, atisqankuman jinataj. Jinapis tukuyninku kikin lugarman chayanqanku. Ajinallatataj cristianospis mana tukuy imatapunichu kikinta ajllanchej, jinapis tukuyninchej Jehovata kusichiyta munanchej. Chayrayku wajkunaj ajllasqankuta mana juzganchejchu chayri qhawaranchejchu (Mat. 7:1; 1 Tes. 4:11).

¿IMARAYKUTAJ WAJKUNAJ AJLLASQANKUTA RESPETANA TIYAN?

10. Santiago 4:12 nisqanman jina, ¿imapajtaj mana derechoyojchu kanchej chanta imaraykutaj?

¹⁰ Bibliaqa niwanchej ashkha imasrayku wajkunaj ajllasqankuta respetananchej kasqanta. Wakinta qhawarina. Noqanchejqa mana derechoyojchu kanchej Biblia mana parlanchu chay imaspi hermanosta imatachus ruwanankuta, imatatajchus mana ruwanankuta ninapaj (Santiago 4:12 leey). Jehovalla Leyesta Churapuwajninchej, Juezninchejtaj. Chayrayku paylla niyta atiwanchej imatachus ruwananchejta, imastatajchus mana. Hermanostaj payman cuentata qonanku kanqa, manataj noqanchejmanchu (Rom. 14:10). Chayrayku ni ima ruwananchej kanchu wajkunaj ajllasqankuta imaynachus rijchʼawasqanchejman jinalla, chayri yuyasqanchejman jinalla juzgananchej.b

11. ¿Imaynatá yanapakunchej congregación ujchasqa kananpaj? (Fototawan qhawariy).

¹¹ Jehovaqa munan ujchasqa kananchejta, manataj kikisitun kananchejtachu. Jehovamanqa mana tukuychu kikin kasqanchej gustan. Chaytataj imastachus ruwasqanpi sutʼita reparanchej. Por ejemplo, uj sachʼapeqa mana iskay laqhes kikinkamalla kanchu. Runaswanpis kikillantaj. Runasqa ocho mil millonesmanta astawan kay jallpʼapi kanchej, manataj iskay runas kikisitunpuni kankuchu, kikinta piensajkuna, kikin imastapunitaj ruwajkuna. Jehovaqa tukuypis waj jina kanapaj ruwawarqanchej, manataj tukuyninchej kikisitunpuni kanapajchu. Jinapis munan tukuyninchej ujchasqa kananchejta. Chayrayku mana kikinchu kasqanchejrayku tʼaqanakunamantaqa, kallpachakunchej tukuywan allinta kausakunapaj. Noqanchejpajqa aswan importante congregacionpi ujchasqa kananchej, manataj imachus gustawasqanchejchu chayri imatachus piensasqanchejchu (Rom. 14:19).

¿IMAYNATÁ WAJKUNAJ PIENSASQANKUTA, AJLLASQANKUTAPIS RESPETASUNMAN?

12, 13. Pillapis ‘wistʼuykushasqanta’ yuyanchej chay, ¿imatá tapurikusunman? (Gálatas 6:1; “Imatachus ajllasqan mana allinchu rijchʼawajtinchej” nisqa recuadrotawan qhawariy).

¹² Wajkuna kausayninkupi imatapis ajllajtinku. Kayta tapurikuy: “¿Chay hermano ‘wistʼuykushanpunichu’ chayri imatachus noqa mana ruwaymanchu chayllatachu ruwashan?”. ‘Wistʼuykushanpuni’ chay, nisunman Bibliaj nisqanta pʼakishan chay, kaytañataj tapurikuy: “¿Noqachu paywan parlarinay kanman, chayri waj hermanochu paywan parlarinan kanman, ichapis uj anciano?”. Qan paywan parlarinaykipaj jina kashanki chayqa, kʼachallamanta parlariy (Gálatas 6:1 leey). Jinapis ashkha kutispeqa uj hermano imatapis ajllaspa mana pantashanchu, manaqa imatachus noqanchej mana ruwasunmanchu chayllata ruwashan. Chay kutispeqa imatachus ajllasqanta ama qhawaranachu, nitaj chay ajllasqanmanta mana allin imasta parlanachu. Ajllayta atinanpaj derechoyoj kasqanta respetana, amataj juzganachu (Rom. 14:2-4).

¹³ Kaypi piensarina, uj amigonchejwan uj restauranteman mikhoj rispa, ¿nicharí obligasunmanchu ima mikhunatachus mañakushanchej chayllatataj mañakunanta? Saqesun pay imatachus munasqanta mañakunanta. Imatachus mañakusqan mana gustawajtinchejqa mana afectawasunchu. Imajtinchus pay mikhonqa, manataj noqanchejchu. Payman gustasqan mikhunata noqanchejpaj ajllapuwajtinchejrí, ¿nillatajcharí allinchu kanman? Ajinallatataj wajkunata respetasqanchejta rikuchinchej paykuna ajllakunankuta saqespa, nitaj yuyasqanchejman jina imatapis ajllanankupaj tanqaspa.

14. Kausayniykipi imatapis ajllashaspa, ¿imaynatá yanapakuwaj congregación ujchasqallapuni kananpaj? (1 Corintios 8:12, 13).

¹⁴ Noqanchej kausayninchejpi imatapis ajllajtinchej. Congregación ujchasqa kananpaj yanapakunchej mana wajkunaj sonqonkuta nanachispa (1 Corintios 8:12, 13 leey). Ichapis uj imata ajllayta munashanchej, yachanchejtaj chayqa allillan kasqanta. Jinapis chayta ajllasqanchej uj hermanota phiñachenqa chayrí, ¿walejchu kanman chayta ruwananchej? (1 Cor. 10:23, 24).c Chay kutispi, ajllayta atisqanchejta valechinamantaqa, aswan allin kanman wajkuna imaynachus sientekunankupi piensarinanchej (Rom. 15:1). Jinapis, ¿nichu kaypi yachakunchej imatachus kausayninchejpi ajllasqanchejta wajkuna respetananku kasqanta? Ajinapuni. Wajkunaqa imatachus ajllasqanchejta respetananku tiyan, noqanchejpis imatachus ajllasqankuta respetananchej tiyan. Jinapis yuyarikunanchej tiyan imatachus Romanos 12:18 yuyaychawasqanchejta. Chaypi nin: “Tukuy atisqaykichejta ruwaychej tukuywan allinpi kausakunaykichejpaj”, nispa. Chayrayku tukuy atisqanchejta kallpachakunchej wajkunawan allinpi kanapaj, manataj sonqonkuta nanachinapaj.

15. ¿Imaynatá ancianos congregación ujchasqa kananpaj yanapakunku? (1 Corintios 4:6).

¹⁵ Ancianosqa wajkunaj ajllasqankuta respetanku. Paykunaqa congregación ujchasqa kananpaj yanapakunku, sapa uj ajllananchej kashan chay imaspaj mana kamachiykunata rikhurichispa, Bibliapi ‘qhelqasqa kasqanman jinallataj ruwaspa’ (1 Corintios 4:6 leey). Chantapis paykunaqa publicacionesninchejpi yuyaychaykunaman jinalla imatapis ninku, chay yuyaychaykunataj Biblia nisqanman jina kashan. Chantapis uj hermano yuyaycharinata mañakojtin mana yachasqankuman jinallachu yuyaycharinku, manaqa Bibliaman jinapuni (Isa. 48:17, 18).

16. ¿Imaynatataj uj anciano rikuchin tukuynin ancianospa decidisqankuta respetasqanta?

¹⁶ Ancianosqa congregacionmanta tukuynin ancianos imatachus decidisqankuta respetallankutaj. Congregacionmanta tukuynin ancianos tantakushaspa imatapis decidinankupajqa ñaupajta Jehovamanta espíritu santonta mañakunku, chantá Bibliaj yuyaychaykunasninta allinta qhawaykunku, chaymantataj imatapis decidinku. Sapa anciano imatachus la mayoria decidisqanta apoyanan tiyan (Efe. 5:17). Chantapis ancianosqa Diospa llajtan qosqan kamachiykunata allinta qhawaykurinku maychus kasqanman jina entiendenankupaj, mana qʼewinkuchu, chaypi nisqanman jinallataj ruwanku. Paykunaqa mana publicacionesninchejmanta uj partecitota orqhospa, chaymanta valekunkuchu imatachus piensasqanku chayri nisqanku cheqanpuni kasqanta rikuchinankupaj.

17. ¿Imaynataj congregacionninchej kanqa wajkunaj ajllasqankuta respetajtinchej?

¹⁷ Yachakunchej jina, mana tukuychu kikin kanchej. Sapa uj waj jina gustosniyoj kanchej, waj jinatataj piensanchej. May sumajpuni Diospa llajtanpi tukuy laya runas kasqankoqa. Tukuy ladomanta kasqanchejrayku, tukuy laya kʼacha kaykunasniyojtaj kasqanchejrayku congregacionqa kʼachitu, chaypi kayta munanapaj jinataj. Chayrayku waj jinas kasqanchejrayku tʼaqanakunamantaqa, tukuywan allinta kausakuyta maskʼanchej. Kallpachakunchej mana wajkunaj sonqonkuta nanachinapaj, imatachus kausayninkupi ajllasqankutataj respetanchej. Chayrayku congregacionqa sumaj ujchasqa, kusisqataj (Sal. 133:1; Mat. 5:9).