Astawan estudiashaspa Jehovaj qayllallanpipuni kay

1, 2. 1) Astawan estudiayta ajllanki chay, ¿imatá ruwanayki kanqa Jehovaj qayllallanpipuni kanaykipaj? 2) ¿Ima niytá munan “chayman jinallapuni maychus kajta purinachej” nisqa palabras? (Filipenses 3:16).

JEHOVAJ testigosninmanta wakenqa colegiota tukuytawan astawan estudiayta ajllanku. Paykunaqa chayta ajllanku mantienekunankupaj jina trabajitota tarikunankupaj, Jehovatapis astawan sirvinankupaj. Astawan estudiayta ajllankiña chay, ¿imatá ruwawaj Jehovaj qayllallanpipuni kanaykipaj? (Sant. 4:8 qallariynin). Colegiopi kashaspaqa ashkha imaspichá rikukorqanki, chay kutispitaj Jehovata mana wasancharqankichu. Kunanpis ‘chayman jinallapuni maychus kajta purinayki’ tiyan, nisunman ñaupajta jina Jehovata mana wasanchaspa sirvinallaykipuni tiyan (Filipenses 3:16 leey).

² Griego parlaypi, “chayman jinallapuni maychus kajta purinachej” nisqa palabraspaj oqharikusqan palabraqa, runasta yuyachej khuska, mana sayaspa, nitaj qhepaman suchuspa ñaupajllamanpuni rej soldadospi. Qanpis astawan estudiayta ajllanki chayqa, chay soldados jina ruwanayki kanqa. Jehovata sirviypi ñaupajllamanpuni rinaykipaj, nitaj paymanta karunchakunaykipaj, hermanoswan khuska imaschus Jehovaj qayllallanpipuni kanaykipaj yanapasorqa chay imasta ruwanallaykipuni kanqa. Kay yachaqanapeqa yanapasunanpaj jina Bibliamanta tawa yuyaychaykunata qhawarisun. Chay yuyaychaykunataqa rejsinkiña. Imaynatachus chay yuyaychaykunaman jina kunankama ruwarqanki, ajinallatapuni kunan astawan estudiashaspapis ruwanayki kanqa, jinallataj aswan qhepamanpis.

JEHOVAMAN QAYLLAYKUCHISOJ IMASTA RUWALLAYPUNI

3. Astawan estudiashaspa, ¿imataj pasanman mana allinta qhawarikojtinchej?

³ ¿Imasmantataj allinta qhawarikunayki tiyan? Astawan estudiashaspaqa may ocupasqachá kanki, sapa diataj aswan ashkha ruwanasniyoj kanki. Chantapis sumaj alumnochá kayta munanki. Jinapis mana allinta qhawarikojtiykeqa, Jehovata yupaychayta niña ñaupajmanchu churawaj. Pisimanta pisi reunionesman faltakuwaj, niña predicacionman riwajchu, Bibliata niña sapa diachu leewaj, pisillatañataj orakuwaj (Apo. 2:4).

4. ¿Imaynatá “Señorpa ruwayninpi ashkhata llankʼallaychejpuni” nisqanman jina ruwasunman? (1 Corintios 15:58).

⁴ (1 Corintios 15:58 leey). Uj bicicleta purinallanpajpuneqa pedaleana tiyan. Ajinallatataj noqanchejpis Jehovawan sumaj amigosllapuni kanapajqa, payta yupaychaspa ocupasqa kananchej tiyan. Chayrayku Bibliaqa nin: “Señorpa ruwayninpi ashkhata llankʼallaychejpuni”, nispa. ¿Imaynatá chayman jina ruwawaj? Noqanchejqa may allinpaj qhawanchej mashka tiempotachus Jehovapaj llankʼasqanchejta. Jinapis aswan importanteqa kanan tiyan imaraykuchus chayta ruwasqanchej. Kayta amapuni qonqaychu: Aswan ñaupajpeqa Jehovata sirviy kanan tiyan, manataj astawan estudiaychu (Mat. 22:37). Samantha sutiyoj sipas hermananchej nin: “Niraj estudiayta qallarishaspa nikorqani, estudiashasqayrayku niña Jehovata yupaychayta atisajchu chayqa, estudiayta saqepusaj”, nispa.

5. ¿Imatá ruwawaj Jehovata sirvispa ocupasqallapuni kanaykipaj?

⁵ Niraj astawan estudiashaspa, ¿imatá ruwawaj? Jehovata sirviy kausayniykipi ñaupajpipuni kananpaj kallpachakuy. Kayta tapurikuy: “¿Yachaniñachu imatachus ruwanayta reunionesman rinallaypajpuni, predicanallaypajpuni, Bibliatapis sapaypi estudianallaypajpuni?” (Jos. 1:8; Mat. 28:19, 20; Heb. 10:25). Imatachus ñaupajta ruwasqaykipi tʼukuriy. Kayta tapurikullaytaj: “Colegiopi kashaspa, ¿imatá ruwarqani reunionesman rinaypaj, predicanaypaj, Bibliatapis sapallaypi estudianaypaj? ¿Imata waj jinamanta ruwanaytaj aswan allin kanman karqa? ¿Imatataj ruwayman chayta aswan sumajta ruwanaypaj?”. Astawan estudiashaspaqa Jehovapaj ruwanasniykita tukuy atisqaykita ruwallaypuni. Kallpachakuy sumaj alumno kanaykipaj, jinapis ama chayraykoqa saqeychu Jehovapaj ruwanasniykita (Mat. 6:24).a

6. ¿Imastataj allinta qhawarikunayki tiyan? (Fototawan qhawariy).

⁶ Estudiayta qallariytawan sapa kuti qhawarikuy imaynachus kashasqaykita. Ichapis sapa killa kayta tapurikuwaj: “¿Jehovata sirviy kausayniypi ñaupajllapipunichu kashan?”. Chayta yachanaykipaj kay tapuykunapi tʼukuriy: “¿Reunionesman faltakushankichu chayri tardechu chayashanki? ¿Reunionpi kashaspa tareasnillaykipichu piensashanki, chayri reunionesman zoomnejllatachu conectakushanki? ¿Ñaupajmanta nisqa aswan pisillatañachu orakushanki, Bibliatapis leeshanki? ¿Predicacionmanpis rinaykiraykullachu llojsishanki, ripuyllapitajchu piensashanki?”. Chay imasmanta mayqellanpis pasashasusqanta reparanki chayqa cambiaypacha. Ama saqeychu estudiosniyki Jehovata ñaupajman churajta jarkʼasunanta.

AMA SAQEYCHU WAJKUNA ISKAYRAYACHISUNANKUTA

7. Astawan estudiashaspa, ¿ima yuyaykunamantataj allinta qhawarikunayki tiyan?

⁷ ¿Imasmantataj allinta qhawarikunayki tiyan? Wakin carreraspeqa llulla imasta yachachisunkuman. Chaytataj Bibliaqa sutichan ‘runaj yachaynin, qhasi manakaj yachachiykuna’ nispa. Ichapis yachachisunkuman Dios mana kasqanta, runapis jinallamanta rikhurisqanta (Col. 2:8). Chayri tanqasunkuman qanllapi astawan atienekunaykipaj. Uj joven hermano nin: “Mana imaynatachus imatapis ruwayllatachu yachachiwaj kayku. Manaqa waj jina yuyaykunatapis umaykuman satʼiwaj kayku. Chaytaj mana Jehovaj yuyasqanman jinachu karqa. Kutin kutita niwaj kayku kusisqa kanaykoqa noqallaykupi atienekunaykumanta kasqanta. Chayraykutaj yuyayta qallarerqani kusisqa kanaypajqa mana Jehovaj yanapanta necesitasqayta, niñataj paypi atienekuyta atillarqanichu”, nispa.

8. ¿Imaraykutaj ‘allinta yuyaychakuspa kausakunanchej’ tiyan? (Proverbios 5:1, 2).

⁸ (Proverbios 5:1, 2 leey). Bibliaqa nin: “Allinta yuyaychakuspa kausakunki”, nispa. Chaytataj ruwananchejpuni tiyan. Imaraykuchus Satanaswan mundonwanqa, paykuna jina yuyachiyta munawanchej (1 Ped. 5:8). Kay mundomanta runas llimphu kausayniyoj kaymanta, imaynatachus kausay rikhurisqanmanta, Dios kasqanmantapuni ima imaymanasta ninku. Chaytaj iskayrayachiwasunman imatachus Jehová Bibliapi yachachiwasqanchejmanta. Runasqa piensanku paykunaj yuyasqanku aswan sumaj kasqanta. Jinapis mana ajinachu. Imaraykuchus “kay mundoj yachaynenqa Diospaj qhasi manakajlla” (1 Cor. 3:18-20).

9. ¿Imatá ruwawaj imatachus yachasqaykimanta mana iskayrayanaykipaj?

⁹ Niraj astawan estudiashaspa, ¿imatá ruwawaj? Kallpachakuy Bibliaj yachachisqan cheqapuni kasqanmanta ama iskayrayanaykipaj. Chayrayku niraj imatapis estudiayta qallarishaspa, kay imasta tapurikuy: “¿Imaraykú Diospi creeni? ¿Imajtintaj niyman Biblia Diospa Palabranpuni kasqanta? ¿Imajtintaj mana iskayrayanichu Biblia llimphu kausayniyoj kaymanta imatachus nisqan aswan sumaj kasqanta, kay mundomanta runas imatachus nisqankumanta nisqaqa?”. Chantapis colegiollapiraj kashajtiyki kay mundomanta runas jina yuyanaykipaj tanqasorqanku. Chayrayku kay imasta tapurikuy: “Kausay jinallamanta rikhurisqanta nejtinku, ¿Dios kasqanmanta iskayrayarqanichu? Compañerosniy mana allin imasta ruwajtinku, ¿atillarqanichu mana paykuna jina ruwanaypaj kallpachakuyta? ¿Imata waj jinamanta ruwanaytaj aswan allin kanman karqa? ¿Imatá kunan ruwayman Bibliaj yachachisqan cheqapuni kasqanmanta, allinniypajpunitaj kasqanmanta mana iskayrayanaypaj?”. Astawan estudiashaspaqa ama saqeychu wajkuna yuyasqankuwan imatachus creesqaykimanta iskayrayachisunankuta (2 Tim. 2:16-18).b

10. ¿Imatá ruwallawajpuni imaspichus creesqaykimanta mana iskayrayanaykipaj?

¹⁰ Estudiayta qallariytawan sapa kuti imaynachus kashasqaykita qhawarikuypuni. Chaypaj kay imasta tapurikuwaj: “¿Wajkuna Jehovaj chejnisqan imasta ruwasqankumanta wakin imasta allillanpajñachu qhawashani? ¿Imastachus yachachiwasqankupi reparayta atinichu imaschus runaj yachaynillan kasqanta, llullataj kasqanta? ¿Sutʼitachu yachani Diospa Gobiernollan runaspa llakiyninkuta chinkachinanta?”. Compañerosniyki, profesoresniyki imatachus yuyasqaykita mana cambiachisunankupajqa, Bibliata estudiallaypuni, chaypitaj tʼukurillaypuni. Diospa Palabranta allinta estudiaspaqa, mana imamantapis iskayrayallankichu (1 Tim. 4:15).

AMA TIEMPOYKITA USUCHIYCHU

11. Astawan estudiashaspa mana tiempoykita usuchinaykipaj, ¿imasmantataj qhawarikunayki tiyan?

¹¹ ¿Imasmantataj allinta qhawarikunayki tiyan? Astawan estudiayqa mana tiempoyojta japʼisunkiman, astawanraj exámenes tiempopi chayri tareasta entregana tiempopi. Mana tiempoykita allinta apaykachankichu chayqa llakiykukullanki, saykʼupunkitaj. Chayrayku tukuy atisqaykita kallpachakuy sanito kanaykipaj, sumajtataj cuidakunaykipaj.

12. ¿Imaspajtaj tiempochakunayki tiyan? (Efesios 5:15, 16).

¹² (Efesios 5:15, 16 leey). ‘Tiempoykita ama usuchinaykipajqa’ allintapuni qhawarikunayki tiyan. Chayqa ashkha ruwanasniyoj kasqaykirayku ichapis mana atikullanqachu. Por ejemplo estudianaykipaj tiempochakunayki kajtinpis, familiaykiwan hermanoswan karikunaykipajpis tiempocharikunaykipuni tiyan (Sal. 133:1; Pro. 18:1). Jinapis aswan ñaupajtaqa imaschus Jehovaman qayllaykuchisunki chay imasta ruwallaypuni (Mat. 6:33). Chantapis ichá familiaykipi ruwanasniyki kanman, trabajoykipis. Ejerciciostapis ruwaypuni, sumajtataj samarikuy, ajinamanta sanito kanaykipaj (Ecl. 4:6; 1 Tim. 4:8). Tukuy chay imasta allinta ruwanaykipajqa tiempoykita sumajta apaykachanayki tiyan.

13. ¿Imatá ruwawaj tiempoykita sumajta apaykachanaykipaj?

¹³ Niraj astawan estudiashaspa, ¿imatá ruwawaj? Bibliaqa nin sumajta wakichikojtinchejqa imapis allinpuni llojsisqanta (Pro. 21:5). Chayrayku niraj astawan estudiashaspa, juntʼayta atinaykipaj jina horariota ruwakuy. Allin kanman kay imasta tapurikunayki: “¿Colegiopi kashaspa tiempoyta allintachu apaykachaj kani? ¿Imata waj jinamanta ruwanaytaj aswan allin kanman karqa? ¿Imatataj ruwayman chayta aswan sumajta ruwanaypaj?”. Tiempoykita allintapuni apaykachay. Ajinamanta tukuy ruwanasniykipaj tiempoyoj kanaykipaj.c

14. ¿Ima tapuykunatataj ruwakuwaj?

¹⁴ Estudiayta qallariytawan sapa kuti qhawaykurikuy imaynachus kashasqaykita. Kay imasta tapurikuwaj: “Horarioyman jina, ¿atishanichu ejerciciosta ruwayta, sumajta samarikuytapis? ¿Tiempoy kanchu hermanoswan karikunaypaj? ¿Tiemponpichu tareasniyta entregashani? Mana tiemponpichu entregashani chay, ¿ancha ashkha ruwanasniyoj kasqayraykuchu chayri ultimopaj tukuy imata tantaykukusqayraykuchu? ¿Familiaresniypis amigosniypis reparankuchu wakin imasta waj jinamanta ruwanay kasqanta?”. Horarioykipi wakin imasta waj jinamanta ruwanayki kasqanta reparanki, chayri horarioykita juntʼanaykipaj astawan kallpachakunayki kasqanta reparanki chayqa, kallpachakuy chayta ruwanaykipajpacha. Chantapis tiemponkuta sumajta apaykachajkunawan yuyaycharichikuwaj (Pro. 11:14).

“ALLIN YACHAYNIYOJ RUNASWAN” PURIY

15. Astawan estudiashaspa, ¿imamantataj allinta qhawarikunayki tiyan?

¹⁵ ¿Imasmantataj allinta qhawarikunayki tiyan? Estudiashajtiykeqa compañerosniyki ichapis paykunawan karinaykipaj invitasonqanku, sonqoykitaj ichapis chayman aysayta munasonqa. Chaytaqa ruwayta munawaj paykuna edadniykimanta kasqankurayku, kikin imasmanta astawan yachayta munasqaykichejrayku, chayri paykunawan khuska ashkha horasta clasesta pasasqaykirayku. Ichá hasta yuyawaj hermanosmanta nisqa paykunawan astawan igualasqaykita. Jinapis allinta qhawarikuy: Paykunawan wakin imaspi igualajtiykipis, mana paykuna jinachu kanki. Imajtinchus qanqa Jehovatapuni kusichiyta munanki. Astawan tiempota paykunawan kaspaqa, astawan paykuna jina piensanki (1 Cor. 15:33). Chayta hermanonchej Michael repararqa. Payqa tawa watata electricista kananpaj estudiarqa, practicastapis ruwarqa. Pay nin: “Semanapi 40 horasmanta astawan compañerosniywan kaj kani. Paykunaqa warmista chʼichi yuyaywan qhawaj kanku, millay musicasta uyarej kanku, millay imastataj parlaj kanku. Tiempowantaj noqapis chay imasta allillanpajña qhawasharqani”, nispa.

16. ¿Imatá yachakunchej Proverbios 13:20 versiculomanta?

¹⁶ (Proverbios 13:20 leey). Bibliaqa niwanchej imapichus rikukunanchejta mana allin amigoswan purejtinchej. Chantapis nillantaj: “Allin yachayniyoj runaswan purejqa allin yachayniyojllataj kanqa”, nispa. ¿Imatá chaymanta yachakunchej? Pikunawanchus purinchej chaykunaqa allin rinawanchejpaj yanapawasunman chayri mana allinman chayachiwasunman. Chayrayku allinniykita munajkunawan, qan jina Jehovata tukuy sonqo munakojkunawantaj amigosta ruwakuy (Sal. 101:6, 7; 119:63).

17. ¿Imatá ruwawaj mana allin amigoswan mana masichakunaykipaj?

¹⁷ Niraj astawan estudiashaspa, ¿imatá ruwawaj? Allinta qhawariy mashkha tiempotachus compañerosniykiwan kanaykita, maykamatajchus masichakunaykita. Trenton sutiyoj hermanonchej nin: “Tukuy compañerosniywan allinta apanakuni, jinapis clases pasaytaqa mana paykunawan khuskachu kani. Paykunaqa compañerosnillay kanku, nitaj amigosniychu”, nispa. Qanrí, ¿imatá ruwanki compañerosniykiwan mana anchata masichakunaykipaj? Kaykunata tapurikuy: “Colegiollapiraj kashaspa, ¿imatá ruwaj kani compañerosniywan mana anchata masichakunaypaj? ¿Imata waj jinamanta ruwanaytaj aswan allin kanman karqa? ¿Imatataj ruwayman chayta aswan sumajta ruwanaypaj?”. Kallpachakuy “allin yachayniyoj” runasllawanpuni purinaykipaj, amataj Jehovata mana munakojkunawan masichakunaykipaj.d

18. ¿Imasta tapurikunaykitaj allin kanman? (Fototawan qhawariy).

¹⁸ Sapa kuti imaynachus kashasqaykita allinta qhawaykurikuy. Kay imasta tapurikuy: “¿Compañerosniywan pisimanta pisi anchatañachu masichakushani? ¿Paykuna jinañachu parlashani, piensashani, chayri imatapis ruwashani? ¿Imaynatá Jehová qhawan compañerosniywan masichakushasqayta?” (Sal. 1:1). Compañerosniyki jinaña mana allin imasta ruwashasqaykita reparakunki chayqa cambiaypacha. Sumaj amigosniykeqa qan jina Jehovata munakojkunapuni kachunku. Chantapis amapuni qonqaychu compañerosniykiman predicariyta. Paykuna rejsisusqankurayku, paykunawantaj astawan tiempota kasqaykirayku, Jehovamanta, Bibliamantapis paykunaman willariyta atillawaj.

SUMAJTA WAKICHIKUY NIRAJ ESTUDIAYTA QALLARISHASPA

19. Niraj estudiayta qallarishaspa, ¿imatá ruwawaj wakichisqa kanaykipaj? Kikinchariy.

¹⁹ Uj orqoman wicharej runapi piensarina. Payqa yachan niraj orqoman wicharishaspa sumajta wakichikunan kasqanta. Por ejemplo sumajta qhawarikun aguantanantachus manachus, chaypaj jina ropata apakun, chantapis sutʼita yachan maymanchus chayananta. Imaschus ñanpi pasanantaqa mana yachayta atinmanchu, jinapis wakichisqa kasqanqa yanapanqa maymanchus chayanan kashan chayman chayananpaj. Astawan estudiaywanpis ajinallataj. Niraj estudiayta qallarishaspa sinchʼi creeyniyoj kay, “Diospa qosqan maqanakuna ropata tukuyninta” churakuy. Chantapis allintapuni qhawarikuy imaraykuchus estudiashasqaykita. Mana qhapaj kayta munaspachu chayri aswan sumaj kayta munaspachu estudiashanki, manachayqa tukuy ruwasqaykiwan Jehovata jatunchayta munanki (Efe. 6:11-13; 1 Cor. 9:26, 27; 10:31).

20. ¿Imaynatá ‘allinta qhawarikullasunmanpuni, creeypi sinchʼitachus manachus sayashasqanchejta yachanapaj’?

²⁰ Bibliaqa yuyaychawanchej: “Allinta qhawarikullaychejpuni, creeypi sinchʼitachus manachus sayashasqaykichejta yachanaykichejpaj. Allinta qhawarikullaychejpuni imayna runachus kasqaykichejta”, nispa (2 Cor. 13:5). Astawan estudiashaspa, ¿imaynatá chay yuyaychayman jina ruwawaj? Kay yachaqanapi yachakorqanchej chay tawa yuyaychaykunaman jina, kausayniykipi sapa kuti qhawaykurikuspa. ¿Jehovaman qayllaykuchisoj imasta ruwashallankipunichu? ¿Kallpachakushankichu kay mundoj yachaynin mana iskayrayachisunanpaj? ¿Tiempoykita allintachu apaykachashanki? ¿Hermanoswanpunichu masichakushanki, compañerosniykiwan masichakuymantataj cuidakushankichu? Chay tapuykunataqa ruwakunaykipuni kanqa escuelapi kashaspapis, trabajopi kashaspapis, chayri waj lugarpi kashaspapis. Imapi rikukojtiykipis chayri ima tiempopipis creeyniyki sinchʼi sayasqallapuni kananpaj kallpachakuy. Chayqa mana qhasichu kanqa, Jehovaqa bendecisonqapuni (Pro. 3:5, 6).