Estudianallatapunichus manachus allinta ajllana

1, 2. 1) ¿Imatá jóvenes ajllananku tiyan? 2) ¿Imamantá parlashanchej “astawan estudiay” nispa? (“Mana qonqanapaj” nisqata qhawariy).

JOVEN kanki chayqa ashkha kutistachá kayta tapusorqanku: “¿Imatá kausayniykiwan ruwanki?”, nispa. Kausayninchejpeqa Jehovata tukuy tiemponchejwan sirviypuni aswan sumajqa. Jinapis kausanapajqa trabajakunapuni tiyan (2 Tes. 3:10). Ichapis piensarerqankiña imapichus aswan qhepaman trabajanaykita.

² Wakin jovenesqa trabajota tariyta atinankupaj, colegiota tukuytawan astawan estudiaytaa ajllanku. Chayta ruwanankupajtaj tatasninkuwanraj parlariyta yachanku. Ichá qanpis piensarerqanki astawan estudianaykipichus manachus, chantá imatachus estudianaykipipis. Kay yachaqanapeqa Bibliamanta ashkha yuyaychaykunata qhawarisun, chaytaj yanapasonqa allinta ajllanaykipaj. Kay yachaqana jovenespaj kajtinpis, piskunachus astawan estudiayta munashanku chaykunatapis yanapallanmantaj. Tataspis kay yachaqanapi kaj yuyaychaykunawan yanapachikullankumantaj wawasninkuta yanapanankupaj.

¿ESTUDIALLANKIPUNICHU?

3. ¿Imaraykutaj wakin cristianos astawan estudiayta ajllankuman?

³ Wakin lugarespeqa colegiota tukuytawan manaña astawan estudiaspapis, mantienekunapaj jina uj trabajota tariyta atikullan. Wakin lugarespitaj sumaj pagasqa trabajitota chayri sumaj horarioyoj trabajitota tarikunapajqa astawan estudiana tiyan. Chayqa ichapis uj cristianota yanapanman astawan predicananpaj, Diospa llajtanpipis waj jinasmanta yanapakuyta atinanpaj. Jinapis astawan estudiayta munajkunaqa chayman tiemponkuta, kallpankuta, qolqenkuta ima churananku kanqa, wakin imaspitaj rikukonqanku.

4. ¿Pitaj ajllanan tiyan uj cristiano astawan estudianallantapunichus manachus? (Sutʼinchaynintawan qhawariy).

⁴ Bibliaqa nin: “Sapa uj ruwananta juntʼanan tiyan”, nispa (Gál. 6:5). Chayrayku mayor de edadña kaj cristianosqa, sapa uj ajllananku tiyan astawan estudianallankutapunichus manachus.b Jinapis juchʼuy wawasmantaqa tatasninku encargados kanku wawasninkuta estudiachinankumanta (Efe. 6:1). Chantapis wawasninkuta sumajta yanapananku tiyan. Ajinamanta wiñajtinku astawan estudianankutachus manachus allinta ajllanankupaj (Pro. 22:6).

5. ¿Maykʼajtaj uj cristiano ajllanan tiyan astawan estudianantachus manachus, chanta imaraykutaj? (Fototawan qhawariy).

⁵ ¿Maykʼajtaj uj cristiano ajllanan tiyan astawan estudianantachus manachus? Jovenesqa niraj colegiota tukuchashaspa ajllananku kanman astawan estudianankutachus manachus. Jinapis allin kanman aswan ñaupajtaña chaymanta tatasninkuwan parlarinanku. Ajinamanta tiemponku kanqa khuska chaymanta astawan investiganankupaj, imastachus estudiayta atisqantapis qhawarinankupaj. Chantapis imatachus estudiayta munasqankuman jina, chayri imaspichus trabajayta munasqankuman jina, atinkuman colegiollapiraj kashaspa wakin materiasta astawan estudiayta. Jinapis, ¿niraj colegiota tukuchashaspapunichu astawan estudiaytachus manachus ajllananku tiyan? Mana (Pro. 21:5). Wakin jovenesqa colegiota tukuytawan uj trabajota maskʼakunku, precursor kaytapis qallarinku. Chay tiempopitaj piensarinku astawan estudianankutachus manachus. Wakin jovenestaj aswan qhepamanraj chayta ajllanankuta ninku.

6. ¿Imataj yanapasonqa astawan estudianallaykitapunichus manachus allinta ajllanaykipaj?

⁶ ¿Imataj yanapasonqa astawan estudianallaykitapunichus manachus allinta ajllanaykipaj? Jehovawan chaymanta parlariy (Sant. 1:5). Chantapis kay iskay imasta ruwawaj: Ñaupaj kaj, kayta tapurikuy: “¿Imaraykutaj astawan estudiayta munani?” (Sal. 26:2). Iskay kaj, piensariy imatachus estudiayta yuyashanki chay, imaspichus allin kananta imaspitajchus mana allinchu kananta (Pro. 14:15). Chay iskay imasmanta astawan parlarina.

¿IMARAYKUTAJ ASTAWAN ESTUDIAYTA MUNANKI?

7. ¿Imatataj tapurikunaykipuni kanman, chanta imaraykutaj?

⁷ Astawan estudiayta piensashanki chayqa, kayta tapurikuypuni: “¿Imaraykutaj astawan estudiayta munani?” Ashkhasqa astawan estudiayta ajllanku gustasqan trabajota tarinankupaj, chayri sumaj sueldoyoj kayta munaspa. Chaytaj mana juchachu (1 Tim. 5:8). Jinapis Bibliaqa yuyaychawanchej qhapajyaymanta, qolqepi atienekuymanta allinta qhawarikunata (Pro. 23:4, 5; 1 Tim. 6:8-10; 1 Juan 2:17). Qhapajyayta munaspa, chayri jatunpaj qhawachikuyta munaspa astawan estudiayta munashanki chayqa, qhasilla kanqa, mana kusisqachu kanki, Jehovamantapis karunchakapuwaj.

8, 9. 1) ¿Imaynatataj cristianos astawan estudiayta qhawananchej tiyan? (Mateo 6:33). 2) ¿Imatá yachakunchej hermananchej Josefina, Morine, Iris ima imatachus nisqankumanta?

⁸ Kausayninchejpeqa Jehovata sirviypuni aswan importante (Mat. 22:37, 38; Fili. 3:8). Jina kajtin, ¿imaynatataj astawan estudiayta qhawananchej tiyan? Uj yanapata jina. Chayqa yanapanawanchej tiyan kausayninchejpi Jehovatapuni ñaupajman churaspa tukuy sonqo sirvinapaj (Mateo 6:33 leey).

⁹ Qhawarina imachus wakin cristianosta yanapasqanta astawan estudiaymanta Jehová jina yuyanankupaj. Chilemanta hermananchej Josefina nin: “Jehovata astawan sirviyta atinaypaj jina uj trabajota tarikuyta munarqani. Chayrayku chayta ruwanaypaj jina uj imata estudiarqani. Allintapuni qhawarikorqani mana estudiosniychu kausayniypi aswan ñaupajpi kananpaj, manaqa imatachus Jehovapaj ruwayta munasqay”, nispa. Morine sutiyoj hermanaqa peluquera kananpaj uj watata estudiarqa. Imaraykuchus chayta estudiasqanmanta pay nin: “Maypichus astawan yanapa necesitakun chaypi sirviyta munarqani. Chayrayku chaypi yanapanawanpaj peluqueriata estudiayta ajllarqani. Estudiayta tukuytawankamataj trabajarqanipacha, qolqesitutataj tantakuyta qallarerqani waj ladoman yanapakoj ripunaypaj. Waj ladoman ripusqaytawantaj imatachus estudiasqay yanapawarqa chay rato trabajitota tarikunaypaj”, nispa. Hermananchej Irismantañataj parlarina. Payqa aswan unayta estudiarqa dentista kananpaj. Pay nin: “Astawan estudiayqa wakin imaspi yanapawasunman. Jinapis ni jaykʼaj cheqamantapuni kusisqa kanapaj yanapawasunchu. Kayta ama qonqanachu: Jehovata kausayninchejpi ñaupajman churasun chayqa, cheqamantapuni kusisqa kasun, tukuy ima necesitasqanchejtaj kapuwasunpuni”, nispa. Arí, Jehovatapuni kausayninchejpi ñaupajman churajtinchejqa, wiñaypaj kusisqa kausakunapaj jina allin imasta ajllasun.

IMATACHUS ESTUDIAYTA MUNASQAYKITA ALLINTA QHAWAYKURIY

10. ¿Imaynatá Deuteronomio 32:29 yanapawasunman astawan estudianatachus manachus ajllanapaj?

¹⁰ Ichapis yachankiña imatachus estudianaykita. Jinapis allin kanman waj opcionestawan qhawaykurinayki. Ichapis qhawaykuriwaj estudiayta munashanki chayman rijchʼakoj imasta, chayri waj imasta (Proverbios 18:17 versiculowan kikinchay). Kay tiempopeqa waj jinasmantapis estudiayta atikullantaj. Por ejemplo internetnejta. Chantapis qhawarillawajtaj mana astawan estudiaspalla necesitasqayki imaspaj ganakuyta atinaykitachus manachus. Finlandiamanta hermananchej Johannaqa colegiota tukuytawan manaña astawan estudiarqachu. Pay nin: “Colegiota tukuytawan precursora karqani, wakin diasllatataj trabajakoj kani. Ashkha imaspi trabajakorqani, repararqanitaj Jehovaqa necesitasqanchejta qowasqanchejtapuni”, nispa. Kayta amapuni qonqaychu: Astawan estudiayta ajllajtiykipis, imata estudiayta ajllajtiykipis, chayri niña estudiayta ajllajtiykipis wakin imaspi allin risonqa, wakin imaspitaj mana. Kayta tapurikuy: “¿Imataj aswan ashkha kanqa, allin imaschu chayri mana allin imaschu?” (Deuteronomio 32:29 leey; 1 Cor. 10:23). Chay tapuyman kutichinapaj wakin imasta qhawarina.

11. ¿Imaraykutaj allin kanman piensarinayki sapa semana mashkha horastachus estudianaykipi? (Fotostawan qhawariy).

¹¹ Horario. ¿Sapa semana mashkha unaytataj clasesta pasanki, practicasta ruwanki, tareastapis? ¿Tiempoyki kanqachu Jehovapaj ruwanasniykita juntʼanaykipaj, wasipi ruwanasniykipajpis? (Fili. 1:10). Estudiaspa mayta saykʼusqaykirayku, ¿niñachu kallpayki kanqa sapallaykipi Bibliata estudianaykipaj, chayri tantakuykunapaj wakichikunaykipajpis? Indiamanta Jeroz sutiyoj hermanonchej ajinapi rikukorqa. Pay nin: “Estudiashaspaqa manaña predicaj riyta atillarqanichu. Reunionesmanpis wakin kutis faltakoj kani, niñataj sumajtachu atiendej kani. Kunanqa sutʼita reparani chay chhika tiempoyta, kallpaytapis estudiayman churasqayqa qhasipuni kasqanta”, nispa. Jinapis wakin imasta estudiayqa mana ashkha tiempopajchu, nitaj ashkha tareas kanchu. Mozambiquemanta hermananchej Rabecaqa kusisqa kashan imatachus estudiayta ajllakusqanmanta. Pay nin: “Sapa día iskay horallata estudiarqani. Chaytaj yanapawarqa precursora regularllapuni kanaypaj”, nispa.

12. ¿Ima tapuykunataj yanapasonqa tiempoykita aswan sumajta aprovechanaykipaj? (Eclesiastés 12:1).

¹² ¿Mashkha unaytataj estudianayki kanqa? ¿Mashkha killaspitaj chayri mashkha wataspitaj estudiayta tukunki? ¿Tiempoykita allintachu apaykachanki chayri usuchillankichu? (Efe. 5:15-17). Imatachus estudiasqayki, ¿yanapasonqachu joven kashaspa Jehovapaj astawan llankʼanaykipaj, atikojtenqa paypaj tiempo juntʼasqata llankʼanaykipaj? (Eclesiastés 12:1 leey). ¿Imatachus estudiayta munasqaykita aswan pisi tiempollapi estudiayta atiwajchu? Por ejemplo estudianapaj wakin lugarespi chayri institutospi, universidadesmanta nisqa ichapis aswan pisi tiempollapi, pisi qolqellawantaj trabajanaykipaj uj oficiota yachakuwaj. Chilemanta hermanonchej Mario nin: “Iskay watasllata estudiarqani. Chaytaj universidadmanta nisqa aswan barato karqa. Clasesniy semanapi tawa diaslla kasqanrayku, estudiashaspa precursor kayta aterqani”, nispa.

13. ¿Imaspitaj rikukunkuman waj lugarman estudiaj ripojkuna?

¹³ ¿Maypitaj estudianayki kanqa? Ichá imatapis estudiayta tariwaj wasiykimantapacha rinaykipaj jinalla. Jinapis waj llajtaman ripuspa estudianayki kajtinrí, chayri universidad kikinpi tiyakuspa estudianayki kajtinrí, ¿imá pasanman? Familiaykimanta karuman ripuspa mana testigo familiaresniykiwan chayri mana testigo runaswan tiyakunki chayqa, Jehovamanta karunchakapuwaj (Pro. 22:3; 1 Cor. 15:33). Mozambiquemanta Matiasqa uj watallata estudiarqa, pisi qolqellawantaj. Jinapis chayta ruwasqanmanta arrepientekun. Pay nin: “Chay wataqa uj internadopi tiyakorqani, sapa diataj juchaman tanqasqa karqani. Nipuni munaymanchu ni pipis familianmanta karuman ripuspa estudiamunantaqa”, nispa. Rusiamanta uj hermanataj nin: “Estudiashaspaqa tatasniywan khuska tiyakorqani, manataj waj estudianteswan khuskachu. Chaytaj yanapawarqa mana juchaman urmanaypaj, waj imasmantapis jarkʼasqa kanaypaj”, nispa. Chantapis ichá internetnejta estudiayta atiwaj.

14. ¿Imaynatá Lucas 14:28 yanapasunkiman allinta ajllanaykipaj?

¹⁴ ¿Mashkha qolqetataj gastanayki kanqa? Wakin imasta estudiayqa pisi qolqellapaj, wakinpitaj gobierno pagan. Ajina kajtenqa mana ashkha qolqeta gastaspalla sumajta yachakuyta atiwaj uj trabajota tarinaykipaj jina. Jinapis wakin kutisqa astawan estudiay ashkha qolqepaj. Chantapis ichá astawanraj gastanayki kanqa. Por ejemplo ichapis uj profesorta contratanayki kanqa, estudiayta munashanki chayman yaykunaykipaj astawan wakichisunanpaj. Wakin runasqa estudianankupaj ashkha watasta manuchakunku. Mozambiquemanta Adilsonqa, imatachus ajllasqanmanta mayta arrepientekun. Pay nin: “Familiayqa tawa watasta estudiosniyta paganankurayku mana allintachu mikhorqanku, ni necesitasqanku imastapis rantikuyta aterqankuchu”, nispa. Chayrayku allin kanman kay imasta tapurikunayki: “Imatachus estudiayta munasqay, ¿mashkha qolqepajtaj? ¿Familiaypis chayri noqapis pagayta atisqaykuchu? ¿Waj imata estudiaymanchu mana ashkha qolqeta gastaspalla?” (Lucas 14:28 leey). Kaytapis tapurikullawajtaj: “Manukusaj chay, ¿mashkha tiempopitaj pagasaj? ¿Estudiayta tukuytawan uj trabajota tariyta atillasajchu mantienekunaypaj, manusniytapis pagayta atinaypaj jina?” (Pro. 22:7).

15. ¿Imaraykutaj niraj imatapis estudiayta ajllashaspa allintaraj qhawarinanchej tiyan trabajo kanantachus manachus?

¹⁵ ¿Imatachus estudiasqaykipaj trabajo kanqachu? Tiyakunki chaypi chayri maymanchus tiyakoj ripuyta munashanki chaypi, imapichus astawan trabajo kasqanpi piensariy. ¿Imatachus estudiayta munasqaykipaj trabajo kanqachu? Wakin carreraspeqa astawan teoriallata yachachinku, nisunman imastachus ruwanallata ninku, manataj practicasta ruwachinkuchu, nisunman mana yachachinkuchu imaynatachus chay estudiashasqankuman jina trabajayta (Col. 2:8). Indiamanta uj hermana nin: “Empresaspeqa trabajadoresta maskʼanku trabajanankupajpacha. Imatachus estudiasqaypitaj imaynatachus trabajayta mana yachachiwarqankuchu, chayrayku estudiasqaymanta mana trabajota tarerqanichu”, nispa. Wakin carreraspitaj sumajta yachachinku imaynatachus imatapis ruwayta, jinapis trabajoñataj chaypaj mana kanchu. Ajinapi rikukorqa República Centroafricanamanta Sublime sutiyoj hermanonchej. Payqa aire acondicionadosta arreglananpaj estudiarqa. Pay nin: “Tiyakuni chaymanta runasqa paykunalla imatapis arreglarqokunku, chayrayku mana trabajota tariyta atillanichu”, nispa.

16. ¿Imaraykutaj allin kanman imatachus estudiasqaykiwan imaspichus trabajanaykipi piensarinayki?

¹⁶ Piensarillaytaj imatachus estudiasqaykiwan imaspichus trabajayta atinaykita. ¿Chay trabajo gustasonqachu? (Ecl. 3:12, 13). ¿Maypitaj, chanta pikunawantaj trabajanayki kanqa? ¿Peligrosochu kanqa? Pikunawanchus trabajanki chaykuna, ¿aswan sumajkunapuni kayta munaspa anchatachu matʼisonqanku? ¿Mashkhatataj pagayta yachanku? Chay ganasqaykiwan, ¿mantienekuyta atillankichu? ¿Estudianallaykipunichu kanqa chayllapipuni trabajanaykipaj? Chantapis, ¿chay trabajowan kausayniykipi Diospa Gobiernonta ñaupajman churayta atillankipunichu? (Ecl. 12:13). Trabajo pisiyajtenqa mana munasqanchej trabajota ajllayta atisunchu. Jinapis aswan qhepaman trabajota tarinaykeqa, imatachus kunan estudiayta ajllanaykimanta kashan. Indiamanta hermananchej Tabithaqa sojta killasta sirayta yachakorqa. Pay nin: “Sirayta yachakuyta ajllarqani, imajtinchus yacharqani chayqa precursora kanaypaj yanapanawanta. Chaypaj trabajoqa kanpuni, ima horariopichus trabajaytapis ajllayta atini, nitaj ashkha qolqewanchu chaypi trabajayta qallarinay tiyan”, nispa. Ajinapunitaj karqa, imatachus yachakusqanqa yanaparqa mantienekunanpaj, precursora kananpaj ima.

17. 1) ¿Imatawantaj ruwawaj sumajta ajllanaykipaj? 2) ¿Bibliamanta ima yuyaychaykunataj yanapasunkiman sumajta ajllanaykipaj? (“Yanapasunanpaj jina Bibliaj yuyaychaykunasnin” nisqa recuadrota qhawariy).

¹⁷ Kay yachaqanapi astawan estudiaymanta ashkha imasta qhawaykurina kasqanta yachakorqanchej. Jinapis, ¿imatawantaj ruwawaj sumajta ajllanaykipaj? Uj imata estudiayta piensashanki chayqa, ichapis tapurikamuwaj maypichus chayta estudianku chay lugarpi chayri internetpi paginankuman yaykuwaj astawan investiganaykipaj. Chantapis estudiayta munashanki chay carrerapaj trabajo kashasqantachus manachus qhawaykuriy. Tapurikullawajtaj chay carrerata estudiarqanku chaykunata, chayri estudiasqankumanta trabajashanku chaykunata (Pro. 13:10). Paykunata tapuriy chayta estudiay chayri chaypi trabajay imaspichus allin kasqanta, imaspitajchus mana allinchu kasqanta. Chantapis kusisqas Jehovata sirvishanku chay hermanoswan chaymanta parlarillawajtaj (Pro. 15:22). Ichapis paykunaqa imatachus estudiaymanta chayri imapichus trabajanaykimanta mana yuyasqayki imasta yuyaycharisonqanku.

18. ¿Imatataj mana qonqanachu tiyan?

¹⁸ Yachakorqanchej jina, astawan estudiayqa wakin imaspi allin, wakin imaspitaj mana. Chayrayku imatachus ruwayta munasqaykita allinta qhawaykuriy. Chaymantapis Jehovawan parlariy. Kayta ama qonqaychu: Astawan estudiaspa ichá aswan qolqesituyoj kajtiykipis, Jehovawan amigos kaspalla cheqamantapuni kusisqa kanki (Sal. 16:9, 11). Jehovaqa tukuy kamachisninta cuidanpuni colegiota tukuytawan astawan estudiajtinkupis chayri manapis (Heb. 13:5). Jinapis astawan estudiayta ajllankiña chay, ¿imataj yanapasonqa estudiashaspa Jehovamanta mana karunchakunaykipaj? Chayta qhepan yachaqanapi yachakusun.