Tukuy Atiyniyoj Diospi atienekuna

1. ¿Ima llakiykunapitaj Job rikukorqa?

JOBQA casi tukuy imanta pierderqa, wawasninta, kapuyninta, onqoykorqa ima. Ñaupajta respetaj kanku chaykunamanta ashkhaspis niña payta respetarqankuchu. Chantapis kinsa amigosnin karqanku chaykuna, payta sonqochaj rispa parlasqankuwan astawan llakiykuchillarqanku. Munasqa warminpis sinchʼi llakisqa kashasqanrayku kayta nerqa: “Diosta maldeciytawan wañuy ari”, nispa (Job 2:9; 15:4, 5; 19:1-3). Tukuy chay llakiykunapi rikukusqanrayku, Jobqa Tukuy Atiyniyoj Jehová Dios payta munakojkunata, payta sirvejkunata jarkʼayta atisqanpi niña atienekuyta atinmanchu karqa.

2, 3. 1) Sinchʼi llakiykunapi rikukuspa, ¿imatataj yuyayta qallarisunman? 2) ¿Imastataj Job libromanta yachakusun?

² Kay tiempopi kausayqa ‘may llakiy, maytataj sajrayapun’ (2 Tim. 3:1). Chayrayku ichapis Job jina manchay sinchʼi llakiykunapi rikukusunman. Qhepan qhepanta ashkha llakiykunapi rikukuspaqa, yuyasunman mana atipayta atinanchejta, niñataj aguantayta atinanchejta. Ajinapi rikukuspa wakenqa yuyayta qallarinku Jehová mana paykunata munakusqanta, niñataj yanapayta munasqanta.

³ Qanpis ajinapi maykʼajllapis rikukorqanki chayqa ama desanimakuychu. Jobqa sutʼita yachakorqa Jehovaqa payta kasukojkunata ni jaykʼaj saqerparisqanta. Noqanchejpis ajinallatataj Jehovapi atienekuyta atinchej. Payqa yanapawasunpuni, bendeciwasunpunitaj. Chaymanta mana iskayrayanapajtaj Job libromanta astawan yachakusun, iskay imastataj astawan qhawarisun. Ñaupaj kaj, Jehovalla Aswan Patapi kaj Dios kasqanta. Iskay kaj, Jehová nisqanta juntʼananpaj tukuy atiyniyoj kasqanta. Payqa qayllallanpipuni kanapaj yanapawanchej, ajinamantataj jarkʼashawanchej.

SATANÁS CHAUPINKUMAN YAYKORQA

4. Jehovawan angeleswan cielopi tantasqa kashajtinku, ¿imataj pasarqa?

⁴ Uj pʼunchay, “angelesqa” cielopi Jehová Diospa ñaupaqenpi tantasqa kasharqanku. Bibliataj nin: “Satanaspis paykunaj chaupinkuman yaykullarqataj”, nispa (Job 1:6). Bibliata qhelqajkunamantaqa, Job librota qhelqaj ñaupaj kutirayku Satanás sutita oqharerqa Diospa enemigonmanta parlaspa. Chay suteqa niyta munan “churanakoj”. Chay tiempopaj Satanasqa manaña Diospa kasukoj wawanchu karqa. Payqa Jehovaj enemigonmanña, kasukoj angelespa enemigonkumanña, Diosta kasukoj runaspa enemigonkuman imañataj tukorqa. Jehovaqa Génesis 3:15 versiculopi imatachus nisqanpi, sutʼita rikucherqa Satanasqa niña cielopi kaj familianmantachu kasqanta. Cielopi Diospa familiantaqa uj ‘warmiwan’ kikinchakun, mayqenmantachus uj ‘miray’ rikhurinan karqa chaywan.

5. Cielopi tantakuypi imastachus nikusqanmanta, ¿imastá yachakunchej?

⁵ Jehovaqa imatachus chay tantakuypi nikusqanta Bibliapi qhelqacherqa chaymanta ashkha imasta yachakunanchejpaj. ¿Imastá yachakusunman? Chay tantakuypi imatachus Satanás nisqanpeqa sutʼita reparanchej may sajrapuni kasqanta, Diosta sirvejkunamantataj llullasta parlasqanta (Job 1:9 versiculota Apocalipsis 12:10 versiculowan kikinchay). Chantapis sonqochanawanchejpaj jina uj sumaj imata yachakullanchejtaj. Jehovaqa tukuy atiyninta apaykachan cheqanta, cheqan kajman jinapunitaj imatapis ruwananpaj. Chanta yachakullanchejtaj, Jehová tukuy atiyniyoj kasqanrayku maykamallachus wajkuna imatapis ruwanankuta saqesqanta.

JEHOVAQA NIN MAYKAMALLACHUS WAJKUNA IMATAPIS RUWANANKUTA

6. ¿Imaynatá Jehová rikucherqa chay tantakuypi imachus pasananta yachasqanta? (Job 1:7, 8).

⁶ (Job 1:7, 8 leey). Jehovaqa yacharqa imachus chay tantakuypi pasananta. Chayrayku Satanasta taporqa: “¿Rikorqankichu kamachiy Jobta?”, nispa. Arí, Jehovaqa yacharqa Satanasqa Jobta ñakʼarichiyta munasqanta. Qhawarina imaynatachus Jehová atiyninwan Jobta yanapasqanta.

7. Job 1:10, 11 nisqanman jina, ¿imatataj Satanás runasmanta nisharqa?

⁷ (Job 1:10, 11 leey). Jehovaqa Aswan Patapi kaj Dios, Tukuy Atiyniyoj Diostaj. Chayrayku payqa atiyninwan imatachus ruwananta ajllayta atin, yachantaj imata ruwaychus aswan sumaj kasqanta (Jer. 32:17; Dan. 4:35). Jinapis Satanasqa nerqa Jehovaqa atiyninta mana allintachu apaykachashasqanta. Chayta nispa nisharqa Jehovaqa Jobman, jinallataj tukuy runasmanpis, yupaychachikuyta munaspalla atiyninmanta valekuspa allin imasta qoshasqanta. Chantapis Satanasqa nishallarqataj runasqa interesraykulla Jehovata yupaychasqanchejta, nisunman imatapis japʼiyta munaspalla. Jehovarí, ¿imatá ruwarqa?

8, 9. Jehová, ¿imata ruwanantataj Satanasta mana saqerqachu, chanta imaraykutaj? (Job 1:12; dibujotawan qhawariy).

⁸ (Job 1:12 leey). Satanasqa nerqa Jobqa Jehovata mana munakusqanta. Jehovataj saqerqa chay nisqan cheqachus manachus kasqanta rikuchinanta. Jinapis tukuyninkoj ñaupaqenpi uj imata mana ruwananta nerqa. Jehovaqa Satanasman nerqa: “Payllata ama imanankichu”, nispa. Satanaspataqa mana atiynin karqachu Jehovaj nisqanta mana kasunanpaj. Payqa sí o sí chayta kasunan karqa. Kay tiempopipis Satanasqa imatachus Jehová ruwananta saqen chayllata ruwayta atin. Reparanchej jina Jehovaqa atiyninta apaykacharqa Jobta jarkʼananpaj. Rikucherqataj pay cheqan kajtapuni ruwasqanta, munakuyniyoj Diostaj kasqanta.

⁹ Satanaspa ruwasqanqa qhasi manakajpuni karqa. Imaraykuchus Jobqa Tatan Jehovata kasukullarqapuni (Job 1:22). Jinapis Satanasqa Jobta urmachiytapuni munaspa, waj imata ruwaytañataj yuyaychakorqa.

10. ¿Imaraykutaj Jehová saqerqa Satanás Jobta watejmanta ñakʼarichinanta? (Job 2:2-6).

¹⁰ (Job 2:2-6 leey). Satanasqa waj imatañataj ruwayta munarqa Jobta Jehová Diosmanta karunchachinanpaj. Satanasqa nerqa, Jobqa wañuy patapi kashaspa kausayninta salvananrayku Jehovata chejnikuyta qallarinanta, niñataj payta sirvinanta. Jehovataj Satanás pantasqa kashasqanta rikuchinanpaj, saqerqa Jobta onqoykuchinanta. Jinapis uj imata mana ruwananta nillarqataj. Pay nerqa: “Amapuni paytaqa wañuchinkichu”, nispa. Satanasqa chayta kasukunanpuni karqa. Chaypi Jehovaqa watejmanta rikuchillarqataj paylla Tukuy Atiyniyoj Kamachej kasqanta. Imajtinchus Satanasqa imatachus Jehová ruwananta saqesqallanta Jobwan ruwayta aterqa.

JEHOVAQA JOBPA LLAKIYNINTA TUKUCHERQA

11. Job 42:10-13 nisqanman jina, ¿imaynatá Jobta Jehová bendicerqa ñakʼariyninta tukuchiytawan?

¹¹ (Job 42:10-13 leey). Jobqa sutʼita rikucherqa Jehovata nipuni wasanchananta. Chayraykutaj Jehovaqa Jobpa ñakʼariyninta tukucherqa, niñataj saqerqachu Satanás ñakʼarichinallantapuni. Chaymantataj Jehovaqa Jobta jarkʼarqa, bendicerqa ima. Satanaspatatajrí mana atiynin kaporqachu Jehovata chayta ruwajta jarkʼananpaj.

12. ¿Imaynatá Jehová yanaparqa atiyninwan salvayta atisqanpi atienekoj hermanosta?

¹² Kay qhepa pʼunchaykunapi may chhika testigos sutʼita repararqanku, imaynatachus Jehová paykunata atiyninwan salvasqanta. 1945 watapi, 230 testigosta soldados obligarqanku Alemaniapi kaj carcelmantapacha mar qochakama chakipi rinankuta, chaypi paykunata wañuchinankupaj. Paykunaqa karuta rinanku karqa, may peligrosotaj karqa. Jinapis ni mayqen testigo wañorqachu. Paykunaqa chay experienciankuta qhelqarqanku, nerqankutaj Jehová paykunata salvasqanta imaynatachus kinsa hebreosta laurashaj hornomanta salvarqa ajinata. Chay kinsa hebreosqa hornomanta llojsimusqankutawan ni qʼoshñillamanpis qʼapasharqankuchu. Ajinallatataj chay testigosqa manchay sinchʼi pruebaman churasqa karqanku, jinapis creeyninkoqa astawan sinchʼiyarqa. Paykunataqa Jehová atiyninwan yanaparqa. Chantá nillarqankutaj Jehovaqa imaynatachus Danielta leonespa tʼoqonkumanta salvarqa, ajinallatataj paykunatapis salvasqanta. Chay hermanosqa chaymantapacha Jehovata wiñaypaj sirviyta munarqanku. Nerqankutaj Jehovata wiñaypaj sirviyta atisqankoqa aswan jatun bendicionpuni kasqanta (Daniel 3:27; 6:22 kikinchay).

13. Llakiykunapi kashaspa, ¿imamantataj mana iskayrayanachu tiyan? (Fotostawan qhawariy).

¹³ Ichá noqanchejpis kausayninchejpi sinchʼi llakiykunapi rikukuspa, leonespa tʼoqonkumanpis wijchʼuykuwasunman jina sientekusunman (1 Ped. 5:8-10). Ichapis desanimakusunman, yuyasunmantaj llakiykunasninchej ni jaykʼaj tukukunanta. Ajinapi kashaspaqa may sumajpuni kanman Jehovamanta yuyarikunanchej. Jehovaqa atiyninwan kay tiempopi chayri paraisopi llakiykunasninchejta chinkasqata chinkachenqa. Chaymanta amapuni iskayrayanachu. Payqa ninña maykʼajchus kay sajra mundota tukuchinanta, nitaj saqenqachu astawan tiempo pasananta.

JEHOVÁ KAMACHISNINTA MUNAKUN

14, 15. ¿Imatataj Jehová payta mana wasanchaj kamachisninrayku ruwanqa, chanta imaraykutaj? (Job 14:15; dibujotawan qhawariy).

¹⁴ (Job 14:15 leey). Tatanchej Jehovaqa payta mana wasanchajkunata maytapuni munakun. Chayrayku wañupojtinchejpis kausarichimuwasun. Paraisopi kamachisninta kausarichimojtintaj tukuypis maytapuni kusikusunchej (Isa. 65:17).

¹⁵ Jobqa llakiyninta Jehová chinkachejtinpis Satanaspa mundollanpipuni kausakorqa. Jinapis Biblia nin Jehová onqoyninmanta sanoyachisqanta, ñaupajmanta nisqataj astawanraj bendecisqanta. Jehová chay imasta ruwasqanqa, uj rikuchiy jinalla karqa Jobrayku imastachus paraisopi ruwananmanta. Ajinamanta Jehovaqa rikucherqa payta mana wasanchaj kamachisnin kusisqas kausakunankuta munasqanta. Chayrayku payqa mana wasanchaj kamachisninta paraisopi mana pantayniyoj runasman tukuchenqa, wiñaypaj kausakunankupajtaj yanapanqa (Apo. 21:3, 4). Aswan Patapi kaj Diosqa kamachisninpaj maytapuni chayta ruwayta munan. Chayta ruwananta yachayqa, llakiypi kashajtinchej mayta sonqochawanchej.

16. ¿Imaraykutaj Jehovapi atienekullasunmantaj?

¹⁶ Jobqa unaytawanraj kausakuytawan wañuporqa. Jinapis Jehová Aswan Patapi kaj Dios kasqanrayku, Tukuy Atiyniyoj Dios kasqanrayku payta kausarichimunanpaj atiyniyoj (Deu. 32:39). Jehová kamachisninta kausarichimunantaqa ni pipis jarkʼayta atinmanchu. Chaytataj maychus tiemponpi ruwanqapuni (Rom. 8:38, 39).

JEHOVAPI ATIENEKUNA

17. ¿Imajtintaj ninchej Jehovaj llajtanta Satanás mana chinkachiyta atisqanta?

¹⁷ Job libropi yachakunchej ashkha imasrayku Jehovapi atienekuyta atisqanchejta. Maytapuni Jehovaman agradecekunchej llajtanta Satanás chinkachinanta mana saqesqanmanta. Jehovaqa Aswan Patapi kaj Diospuni, imajtinchus kay tiempopi 9 millones runas jinapuni payta tukuy sonqo yupaychashanchej. Ashkha atiyniyoj gobiernos, llulla religionesta kamachejkunapis kutin kutinta tukuy atisqankuta ruwarqanku niña Jehovata yupaychananchejpaj, niñataj sumaj willaykunata willananchejpaj. Jinapis chay ruwasqankoqa qhasilla karqa, imajtinchus Jehovaqa noqanchejta yanapashawanchej (Isa. 54:17). Jehová cheqa Dios kasqanta, Satanastaj llulla, runa wañuchitaj kasqanta willajtaqa ni imapuni jarkʼayta atiwanchejchu. Ni wañuypis chayta ruwajtaqa jarkʼayta atiwasunchu, imajtinchus Jehovaqa wañupojtinchejpis kausarichimuwasun (Ose. 13:14).

18. ¿Imaraykutaj mana manchachikunanchejchu tiyan imachus aswan qhepaman pasananmanta?

¹⁸ Job libro imatachus nisqanpi tʼukurispaqa, astawan atienekunchej aswan qhepaman ima kajtinpis Jehová noqanchejwanpuni kananpi. Chayrayku amapuni manchachikunachu. Manchay ñakʼariy tiempopi Satanaswan payta apoyajkunawanqa, yuyanqanku Jehovaj llajtanqa chinkarpachiyta atinapaj jinalla kasqanta. Chayrayku chinkachinankupaj wakiykonqanku. Jinapis Jehovaqa Jobta jina atiyninwan yanapawasun, nitaj saqenqachu Satanás llajtanta chinkachinanta. Tumpamantawan Jehovaqa, Satanaspa rikhurichisqan tukuy llakiykunata chinkachenqa. Jesustaj Diablota, demoniosnintawan chinkay ukhupi 1.000 watasta wisqʼaykonqa (Luc. 8:31; Apo. 20:1-3). Tiemponmantaj Satanaswan payta apoyajkunawanqa tukuchisqa kanqanku (Apo. 20:10). Jehová Génesis 3:15 versiculopi nerqa jina, Satanaspa umanqa pʼaltarparisqa kanqa, nisunman wiñay wiñaypaj chinkachisqa kanqa (Rom. 16:20).

19. ¿Ima bendicionestataj Jehová qonqa paypi atienekojkunaman? (Dibujotawan qhawariy).

¹⁹ Maytapuni suyakushanchej paraíso chayamunallantaña, chaypeqa manaña pantaj runaschu kasunchej, kusisqataj kausakusunchej. Chaypi kausayqa yuyasqanchejmantapis aswan sumajraj kanqa. Jehovaqa nin: “Tukuy imata mosojyachishani”, nispa (Apo. 21:5). Chayqa niyta munan Satanaswan demoniosninwanqa niña ujtawan runasta ñakʼarichinawanchejta, niñataj sajra imasta ruwanapaj tanqanawanchejta. Chaytaj may sumajpuni kanqa. Kay mundoj llakiykunasnenqa chinkanqa, niñataj ujtawan imapis llakichiwasunchu. Armagedonta kausashaj pasajkunaqa ashkha milagrosta rikonqanku. Onqosqa kajkunaqa sanoyaponqanku, munasqa familiaresninchejpis amigosninchejpis kausarinponqanku. Chay tiempopeqa kusisqa, sumajtataj kausakusunchej. Tatanchej Jehovaqa qallariymantapacha ajinata kausakunanchejta munarqa.

20. ¿Imatataj ruwayta munanchej?

²⁰ Kay qhepa pʼunchaykunapi ichapis llakiykunapi rikukusunraj. Chayta aguantanapajtaj mana manchachikojkuna kananchej tiyan. Chayrayku Jehovapipuni atienekuyta munanchej, kamachejninchej kasqanraykutaj kasukuyta munanchej. Chantapis sutʼita rikuchiyta munanchej Tatanchej Jehovata mayta munakusqanchejta, Satanás imatachus Jehovamanta, kamachisninmantawan nisqantaj llulla kasqanta. Tukuy Atiyniyoj Diosninchejta kasukullasunpuni chayqa, sumaj kausayta japʼisun. Imajtinchus payqa chay kausayta kamachisninman qoyta munan, qonqapunitaj.