“Wawastaqa Jehová Dios herenciata jina qon”

¿IMATAJ uj ‘herencia’? Ichapis kanman familiapi japʼisqanchej herencia. Chay herenciataj kanman qolqe, wasi, chayri valorniyoj imas. Ima herenciata japʼejtinchejpis may sumajtapuni cuidanchej, valorniyojpajtaj qhawanchej.

Biblia nin: “Wawastaqa Jehová Dios herenciata jina qon”, nispa (Sal. 127:3). Cristiano tatasqa wawasninkuta qhawanku Jehovamanta may valorniyoj herenciata jina. Chayrayku necesitasqanku imasta qonku, mana onqonankupaj cuidanku, kusisqa kausakunankuta munanku, yanapankutaj Jehovawan sumaj amigos kanankupaj.

Kay tiempopi wakin tatasqa wawasninkuta mana Jehovamanta uj regalota jinachu qhawanku (Isa. 49:15; 2 Tim. 3:1-3). Wakin tatastaj wawasninkumanta mayta llakikunku. Jinapis wakin imaspi rikukusqankurayku mana wawasninkuta cuidayta atillankuchu. ¿Mayqenkunataj chay imas kanku? ¿Imaynatá Jehová munan tatas wawasninkuta yanapanankuta? ¿Imatataj tatas ruwankuman wawasninkuta allinta uywanankupaj?

¿IMASPITAJ TATAS RIKUKUNKU?

• Familiasninku, wajkunapis tanqanku ashkha wawasniyoj kanankupaj. Wakin lugarespeqa ashkha wawasniyoj kajkunata may sumajpaj llajtankupi qhawanku. Chayrayku familiaresninkuta, vecinosninkutapis tanqanku ashkha wawasniyoj kanankupaj. Chayraykulla ashkha wawasniyoj kanku, mana tukuyninkuta atiendeyta atejtinkupis, nitaj uywayta atejtinkupis.

• Aswan qhepaman imachus kananmanta llakikunku. Wakin lugarespeqa ashkha wawas wañunku mikhuna mana kasqanrayku, onqoykunasrayku, manataj jampina wasis kasqanrayku. Chayrayku ichapis yuyanku ashkha wawasniyoj kaspa ujllapis kausanantapuni. Wakintaj ashkha wawasniyoj kanku machuyajtinku wawasninku cuidanankuta yuyaspa. Chaytaj astawan rikukun maypichus gobiernomanta machituspaj mana ima yanapapis kanchu chay lugarespi.

• Mana atinkuchu pisi wawasniyojlla kayta. Wakin llajtaspeqa mana tariyta atillankuchu mana wawasniyoj kanankupaj jampista. Wakin llajtaspitaj tiyan, jinapis mana allin ruwasqaschu kanku. Chayrayku runasqa manchachikunku chay jampis onqochinanta. Wakin lugarespitaj ancha valesqa kasqanrayku mana rantikuyta atinkuchu.a

¿IMATATAJ JEHOVÁ SUYAN TATASMANTA?

Tatasqa wawasninkuman necesitasqanku imasta qonanku tiyan. Jehovaqa tatasta kamachin wawasninkuman necesitasqanku imasta qonankuta, mayor de edad kanankukama. Pay suyan sumaj trabajadores kanankuta, wawasninkuman ropata, mikhunata, wasita ima mana faltachipunankupaj. Chantapis munan wawasninkuta yachachinankuta. Chayrayku cristiano tatasqa mana wawasninkuta internadoman churankuchu. Astawanpis wiñarqonankukama paykunawan tiyakunku. Ajinamanta sumajta yachachinankupaj sapallankumantaña kausakuyta atinankupaj. Chantapis tiempochakunku sapa uj wawankuwan kanankupaj. Ajinamanta wawasninku jarkʼasqas, munasqastaj sientekunankupaj. Jehovaqa mana suyanchu tatas qhapaj kanankuta. Payqa uj wajcha qhariwarmita ajllarqa wawanta cuidanankupaj. Jinapis paykunaqa sumajta llankʼaj kanku (Mat. 13:55, 56; Luc. 2:24).

Bibliaj yuyaychasqan: “Pipis paypata kajkunaman, astawanraj familianmanta kajkunaman, imatachus necesitasqankuta mana qonchu chayqa, creeyta qhesachan. Mana creeyniyoj runamantapis aswan mana allinraj” (1 Tim. 5:8).

Jehová yachan ichapis tatas machuyapojtinku yanapata necesitanankuta. Bibliaqa nin wawasqa tatasninkuta respetanankuta. Chaytataj rikuchinku tatasninku machuyapojtinku paykunata cuidaspa (Éxo. 20:12; 1 Tim. 5:4). Jinapis Jehovaqa aswan allinpaj qhawan wawasninkuta sumajta uywayta munaj tatasta, manataj machuyapojtinku imaynatachus wawasninku cuidanankumanta llakikojkunatachu (2 Cor. 12:14).

Jehovamanta yachachiychej. Cristiano tatasqa wawasninkuman yachachinallankutaj tiyan Jehovata munakuyta, yupaychayta ima. Jehovapajqa chaymin aswan valorniyoj (Deu. 6:6, 7).

Bibliaj yuyaychasqan: “Paykunata uywaychej, Jehová Dios nisqanman jina cheqanchaspa, yachachispataj” (Efe. 6:4).

JEHOVAQA MUNAN SUMAJ TATAS KANAYKICHEJTA

Sumajta tʼukuriychej mashkha wawasniyojchus kayta munasqaykichejpi. Wawasniyoj kayta munankichej chayqa, sumajtaraj tʼukuriychej imaynachus kausayniykichej kashasqanpi. Ashkha wawasniyoj kankichej chay, ¿qolqe alcanzasonqachejchu ropapaj, mikhunapaj, yachachinaykichejpajpis? Mana alcanzasunaykichejta yuyankichej chay, qhariwarmi jina sumajta parlarikuychej mashkha wawasniyojchus kanaykichejmanta. Amataj qonqaychejchu sapa ujta Jehovaj munasqanman jina uywanaykichejmanta. Jehovaqa yachan wakin imasqa mana munasqanchejman jinapunichu llojsisqanta (Ecl. 9:11). Jinapis sumaj tatas kanaykichejpaj kallpachakunkichej chayqa, Jehová bendecisonqachejpuni.

Bibliaj yuyaychasqasnin: “Kʼuchi runaj wakichikusqanqa allinpuni llojsin. Mana allinta yuyaychakuspa imatapis ruwarpajkunataj wajchayanku” (Pro. 21:5).

“Mayqennillaykichejpis wasita ruwakuyta munan chayqa, ¿manachu ñaupajtaqa tiyaykukuspa qolqentaraj qhawarikun, wasinta tukuchananpaj kapunchus manachus chayta?” (Luc. 14:28).

Familiapi Jehovatapuni ñaupajman churaychej. Familiaykichejpi Jehovata sirviypuni aswan importante kachun. Wawasniyojña kankichej chayqa, tiempochakuychej sapa ujman Jehovata munakuyta yachachinaykichejpaj. Yanapaychej tantakuykunapi sumajta uyarinankupaj, chaywantaj yanapachikunankupaj. Familiapi Diosta yupaychanapaj tantakuyta sapa semana ruwaychejpuni, predicaytapis yachachiychej. Tukuy chay imastaqa qankunapuni tatas jina ruwanaykichej tiyan, manataj kuraj wawaykichejchu nitaj pi familiarniykichejchu. Wawasta Jehovata munakunankuta yachachinapajqa tiempochakuna tiyan, maytataj kallpachakuna tiyan. Jinapis wawasniykita tukuy sonqo Jehovata sirvisqankuta rikuspaqa mayta kusikunki

Bibliaj yuyaychasqan: “Mana imapis astawan kusichiwanchu, wawasniy cheqa kajpi purishasqankuta uyarisqaymanta nisqaqa” (3 Juan 4).b

Jehovapi atienekuychej. Wawasniyoj kaypi piensashankichej chay, chayri wawasniyojña kankichej chayqa amapuni kaymanta iskayrayaychejchu: Jehová imatachus tatas jina ruwanaykichejta nisqanqa, aswan importante tiyakunkichej chaypi runas wawasta uywaymanta imatachus yuyasqankumanta nisqaqa, chayri tata jina imatachus ruwanaykita suyasqankumantapis.

Pisi wawasnillayoj kayta ajllankichej chayqa, amapuni iskayrayaychejchu Jehovaqa machuyayniykichejpi qankunata cuidasunaykichejmanta. Wakin runasqa yuyanku wawasniyojpuni kanata. Ajinamanta machuyayninchejpi paykuna cuidanawanchejpaj. Jinapis ama chaytaqa creeychejchu. Ama llakikuychejchu machuyayniykichejpi ni pi cuidasunaykichejmanta. Jehovaqa nin pay cuidasunaykichejta. Chaytataj juntʼanqapuni (Jos. 23:14).

Bibliaj yuyaychasqasnin: “Tukuy sonqoykiwan Jehová Diospi atienekuy, amataj yachasqallaykipeqa atienekuychu. Tukuy ima ruwasqasniykipi Diosmanta yuyarikuy, paytaj allinta purinaykipaj yanapasonqa” (Pro. 3:5, 6).

“Unayqa joven karqani, kunantaj viejoña kani, jinapis ni jaykʼaj rikorqanichu Diosqa cheqan runata saqerparisqanta, nitaj wawasnintapis khuyayta tʼantata mañakushajta” (Sal. 37:25).

“Ñaupajtaqa Diospa Gobiernonta, cheqan kaynintawan maskʼallaychejpuni, chay tukuy imastataj yapata jina qosonqachej” (Mat. 6:33).

Wawasqa Jehovamanta uj sumaj regalo kanku. Tatastaj Jehovata kusichinku imatachus ruwanankuta kamachisqanta kasukuspa. Paykunaqa wawasninkuman necesitasqanku imasta qonku, sumajta cuidanku, Jehovaman qayllaykunankupajpis yanapanku. Chantapis sumajta piensarinku mashkha wawasniyojchus kanankupi. Costumbresmanta nisqa, wawasta uywaymanta imatachus runas yuyasqankumanta nisqataj, Jehovaj kamachisqanman jinapuni wawasninkuta uywanku. Chayta ruwaspataj tatasqa rikuchishanku wawasninkuta mayta munakusqankuta, ‘Diosmanta uj herenciata jinataj qhawasqankuta’.