Leejkunaj tapuyninku

¿Maykʼajtaj naciones nenqanku “tukuy imapis allillan, ni imamanta llakikuna kanchu” nispa?

Reciellanraj Torremanta Qhawaj revistapi sutʼinchakorqa,a Jehovaqa tumpamantawan ‘chunka wajraspa’ sonqonkuman, nisunman tukuy gobiernospa sonqonkuman churananta “munayninta” ruwayta. ¿Imataj chay munay? Atiyninkutawan gobiernonkutawan ‘puka millay phiña animalman’ qonanku, nisunman Naciones Unidasman. Chay millay phiña animalqa sutikullantaj ‘millay phiña animalpa lantin’ (Apo. 13:14, 15; 17:3, 16, 17). Chaymantataj ‘chunka wajraswan’, millay phiña animalwanqa chay atiyta japʼiytawan tukuynin llulla religionesta chinkachenqanku. Chanta, ¿maykʼajtaj naciones nenqanku “tukuy imapis allillan, ni imamanta llakikuna kanchu”b nispa? ¿Niraj llulla religiones chinkachisqa kashajtinchu chayri chinkachisqa kasqankutawanchu? (1 Tes. 5:3).

Mana yachanchejchu maykʼajpunichus “tukuy imapis allillan, ni imamanta llakikuna kanchu” nispa ninankuta. Chaytachus allinta yachasunman chayqa, mana necesitasunmanchu “rijchʼarisqallapuni” kayta, imaynatachus Jesús discipulosninman ashkha kutispi yuyaycharqa ajinata (Mat. 24:42; 25:13; 26:41). Allinta ukhuncharina tesalonicensesman cartanpi imatachus apóstol Pablo Diospa yuyaychasqanman jina nisqanta.

Pablo nerqa: “Maypachachus runas nishanqanku, ‘tukuy imapis allillan, ni imamanta llakikuna kanchu’ nispa, chaypacha paykunaj tukukuyninkoqa ujllata chayamonqa”, nispa (1 Tes. 5:2, 3). Publicacionesninchejpeqa Pabloj nisqanmanta ashkha kutista kay jinata sutʼinchakorqa: Nacionesqa nenqanku “tukuy imapis allillan, ni imamanta llakikuna kanchu” nispa, manchay ñakʼariy tiempo qallarerqonanpajña kashajtin. Manchay ñakʼariy tiempotaj qallarin Jatun Babilonia chinkachisqa kasqanwan, nisunman mundontinmanta tukuy llulla religiones chinkachisqa kasqankuwan. Sutʼinchakullarqataj chay nisqankoqa uj señal jina kananta manchay ñakʼariy tiempo qallarinanpajña kashasqanta yachananchejpaj.

Jinapis chayta aswan sumajta qhawaykuriytawan kay jinapis entiendekullanmantajsina: Ichapis llulla religiones chinkachisqa kasqankutawan “tukuy imapis allillan, ni imamanta llakikuna kanchu” nispa nenqanku. ¿Imajtintaj chayta ninchej? Wakin tapuykunata ukhuncharina.

¿Imaynatá llulla religiones guerrasman chhapukunku? Jatun Babiloniamanta, nisunman ‘atiyniyoj khuchi warmimanta’ parlaspa Biblia nin: “Chay llajtapeqa tarikorqa […] jallpʼapi wañuchisqa karqanku chay tukuyninkoj yawarninpis”, nispa (Apo. 17:1, 5; 18:24). May chhika watastaña atiyniyoj khuchi warmeqa guerrasta apoyan, chʼajwasta rikhurichin, may chhika runastataj wañuchicherqa. Chayrayku mana allin kausaytachu apamun, manachayqa guerrastawan chʼajwasllatawan. Jina kajtin, ¿Jatun Babiloniata tukuchiytawanchu naciones nenqanku “tukuy imapis allillan, ni imamanta llakikuna kanchu” nispa? Ichapis, pero mana sutʼita yachanchejrajchu.

Gobiernos “tukuy imapis allillan, ni imamanta llakikuna kanchu” nispa nisqankutawan, ¿imataj kanqa? Pablo nerqa: “Chaypacha paykunaj tukukuyninkoqa ujllata chayamonqa”, nispa (1 Tes. 5:3). Sichus naciones niraj llulla religiones chinkachisqa kashajtinku “tukuy imapis allillan, ni imamanta llakikuna kanchu” nispa ninkuman chayqa, uj tiemporaj pasanan kanman paykunapis chinkachisqa kanankupaj. Jinapis apóstol Pabloqa nerqa tukukuyninkoqa ujllata chayamunanta. Chayrayku ichapis nacionesqa llulla religionesta chinkachiytawanraj nenqanku: “Tukuy imapis allillan, ni imamanta llakikuna kanchu”, nispa.

Diospa llajtanrí, ¿tʼukonqachu naciones chinkachisqa kasqankumanta? Pablo nerqa: “Qankunarí hermanosníy, mana suwas jina laqhapichu kashankichej, chay pʼunchay ujllata taripasunaykichejpajqa”, nispa (1 Tes. 5:4). Sichus llulla religionesraj chinkachisqa kanqanku, chaymantataj naciones “tukuy imapis allillan, ni imamanta llakikuna kanchu” nispa nenqanku chayqa, Jehovaj llajtanqa sutʼitaña reparanqa nacionesqa chinkachisqa kanankupajña kashasqankuta. Nacionestajrí reciellanraj chayta nisqankurayku tʼukonqanku tukukuyninku suwa jina ujllata chayamusqanmanta.

¿Ima kanantataj suyashanchej? Tumpamantawanqa ‘chunka wajraswan’ millay phiña animalwan, tukuy atiyta japʼisqankuwan llulla religionesta chinkachenqanku. Ajinamanta manchay ñakʼariy tiempo qallarenqa. Yachallanchejtaj nacionesqa “tukuy imapis allillan, ni imamanta llakikuna kanchu” nispa ninankuta. ¿Maykʼajtaj chayta nenqanku? Ujqa kanman kay: Ichapis chayta nenqanku niraj llulla religiones chinkachisqa kashajtinku. Iskay kajtaj kanman kay: Ichapis nacionesqa “tukuy imapis allillan, ni imamanta llakikuna kanchu” nispa nenqanku llulla religiones chinkachisqa kasqankutawan. Jinapis suyakunallanchej tiyan imaynapunichus kananta yachanapaj. Ashkha profeciasqa juntʼakushajtinraj aswan allinta entiendekun, wakintaj juntʼakusqantawanraj (Juan 12:16 versiculowan kikinchay).

Jinapis aswan importanteqa mana maykʼajchus “tukuy imapis allillan, ni imamanta llakikuna kanchu” nispa ninankuta yachaychu, manaqa Jehovata tukuy sonqo sirvillaypuni. Chayrayku “rijchʼarisqa, yuyayninchejpitaj kana”. Ajinamanta ima pasajtinpis sumaj wakichisqas kasunchej (1 Tes. 5:6).