Bautizakusqaykitawan jamoj llakiykunapaj wakichikuy

1, 2. ¿Imaynatá jamoj problemaspaj wakichikusunman? Kikinchariy.

KAY Satanaspa mundonpeqa problemas kanqapuni. Jesuspis discipulosninman nerqa: “Wajkunata juchaman urmachejkunaqa kanqankupuni” nispa (Mat. 18:7). Reparanchej jina, kausayninchejpeqa problemaspi rikukusunpuni, ichá hasta hermanosninchejwanpis. Chayrayku ñaupajmantaña chaypaj wakichikunanchej tiyan.

² Kaywan kikincharina. Jehovaj llajtanqa sapa kuti yuyarichiwanchej ima desastre naturalpajpis wakichikunanchejta. ¿Imaynatá wakichikunchej? 1) Averiguanchej tiyakunchej chaypi ima desastre naturalchus kayta atisqanta. Chaytataj astawanraj ruwanchej chay lugarman reciellanraj tiyakoj ripuspa. 2) Ima desastre naturalchus kayta atinanta yachaspaña, chaypaj jina wakichikunchej (Pro. 21:5). Kikillantataj piensarisunman ima problemaschus bautizakusqanchejtawan kananpi. Chantataj kunanmantaña wakichikusunman chay problemas kajtin imatachus ruwanapaj. Ajinamanta chay problemas kajtin aguantayta atillasun, nitaj Jehovamanta karunchakusunchu (Sal. 17:5). Qhawarina kinsa imaspi rikukuyta atisqanchejta, imaynatachus chaypaj wakichikuytapis.a

UJ HERMANO SONQONCHEJTA NANACHIWAJTINCHEJ

3. ¿Imapitaj congregacionpi rikukusunman?

³ ¿Yuyarikunkichu ñaupaj kutipi Jehovaj testigosninpa tantakuyninkuman risqaykimanta? Ichapis repararqanki hermanospura mayta munanakusqankuta, chaytaj reparachisorqa cheqa religiontapuni tarisqaykita (Juan 13:35; Col. 3:12). Ajina karqa hermananchej Blancawan.b Jinapis nipuni yuyarqachu bautizakusqantawan uj problemapi rikukunanta. ¿Imataj pasarqa? Pay nin: “Uj hermana maytapuni sonqoyta nanachiwarqa. Mana chayllachu, wajkunapajpis mayta rimakuspa purej. Yachakorqani Jehovaj testigosnenqa mayta kallpachakusqankuta tukuywan allinta kausakunankupaj, munakuyniyojtaj kanankupaj. Chayrayku nipuni yuyarqanichu chay pasanawanta”, nispa. Arí, hermanosqa tukuy atisqankuta ruwanku sumaj cristianos kanankupaj, jinapis pantaj runasllapuni kanku (Efe. 4:23, 24; 1 Juan 1:8). Chayrayku mayqen hermanollapis parlasqanwan chayri ruwasqanwan ima ratollapis sonqonchejta nanachiwasunmanpuni (Sant. 3:8). Ajina kajtintaj wakenqa sienterpakuspa Jehovamanta karunchakapunku.

4. ¿Imatataj kunanmantaña ruwasunman uj hermano sonqonchejta nanachiwajtinchej wakichisqaña kanapaj? (Efesios 4:32).

⁴ Mayqen hermanopis sonqonchejta nanachiwasunpuni. ¿Imatataj kunanmantapachaña ruwasunman wakichisqa kanapaj? Kunanmantaña Efesios 4:32 (leey) nisqanman jina ruwanapaj kallpachakusunman. Kʼachas kanapaj, may khuyakuyniyoj kanapaj tukuy atisqanchejta kallpachakusun chayqa, mana piwanpis qhasita phiñanakusunchu. Kallpachakuna sonqonchejta nanachiwanchej chaykunata perdonanapajpuni. ¿Imataj chaypaj yanapawasunman? Yuyarikuna mashkha kutitañachus Jehovamanta perdonta mañakusqanchejta, paytaj mana michʼakuspa perdonawasqanchejta (Mat. 6:12). Mashkha kutitañachus perdonawasqanchejpi tʼukurisun chayqa, noqanchejpis wajkunata perdonayta atillasun.

5. Pillapis sonqonchejta nanachiwajtinchej, ¿ima yuyaychaytaj yanapawasunman? (Proverbios 19:11; fotostawan qhawariy).

⁵ (Proverbios 19:11 leey). Bibliaqa nin pillapis sonqonchejta nanachiwajtinchej yachayniyojc kananchejta. Yachayniyoj kaspaqa mana phiñarparikullasunchu. Hermananchej Rima uj mashkha watasllaraj bautizasqa kashan. Chay texto imaynatachus yanapasqanmanta nin: “Hermanos sonqoyta nanachinawankupaj jina imatapis ruwajtinku, chay rato yuyarikuni imatachus Proverbios 19:11 nisqanta. Tʼukurini imaynachus chay hermanospa kausayninku kasqanpi, imaspichus ñaupajta rikukusqankupi, imajtinchus chayta ruwawasqankupipis. Chantapis kallpachakuni paykunawan predicaj llojsinaypaj, ajinamanta astawan rejsini”, nispa. Allinpuni kanman hermanosninchejta kunanmantaña sumajta rejsinanchej, entiendenanchej ima. Ajinamanta maykʼajllapis sonqonchejta nanachiwajtinchej perdonayta atillasun.

6. ¿Imataj yanapawasun congregacionpi sumaj amigosniyoj kanapaj?

⁶ ¿Imatataj ruwasunman congregacionpi sumaj amigosniyoj kanapaj? Hermanosta rejsisqanchejman jina kallpachakuna allin ruwasqasninkutapuni reparanapaj (Proverbios 10:12 versiculowan kikinchay; Rom. 12:10; Fili. 2:2, 3). Hermanonchej Markqa kunallanraj bautizakorqa. Hermanosta rejsisqanman jinataj pantasqasninkuta astawan sutʼita repararparqa. ¿Imatá ruwarqa chayrayku mana Jehovamanta, nitaj hermanosmantapis karunchakunanpaj? Pay nin: “Juchʼuy imitaspi pantasqasnillankuta anchata qhawashasqani. Nitaj reparashasqanichu chay pantasqetasninkoqa mana imapischu kasqanta Jehovata mana yupaychaj runaspa ruwasqasninkuwan kikinchasqaqa. Ajinamanta repararqani noqaraj yuyayniyta cambianay kasqanta, hermanospa allin ruwasqasninkutataj reparanay kasqanta”, nispa. Sichus noqanchejpis ajinallatataj ruwasunchej chayqa congregacionpi sumaj amigosniyoj kasunchej.

SAQESQANCHEJ IMASTA YUYARIKOJTINCHEJ

7. ¿Imaspi rikukuspataj saqesqanchej imasta faltachasunman?

⁷ Jehovaj testigonman tukuspaqa maytachá kusikorqanchej Satanaspa mundonmanta llojsipusqanchejmanta. Chayrayku nichá yuyallasunmanpischu chay imasta faltachananchejta. Jinapis llakiykunapi rikukuspaqa Jehovata sirvinapaj imastachus saqepusqanchejmanta yuyarikusunman, faltachasunman ima (Números 11:4-6 versiculoswan kikinchay). Wakin hermanosqa manchay sumaj trabajosta saqeporqanku, chay trabajollaman tukuy tiemponkuta churasqankurayku. Wakintaj rikorqanku Bibliamanta yachakuyta qallarisqankurayku imaynatachus sumaj amigosninku paykunamanta karunchakapusqankuta. Wakintaj uj viciota saqeporqanku chaywan kusikoj kanku chaypis. Maytachá Jehová llakikunman uj cristiano chay imasman kutiyta munaspa paymanta karunchakapojtin. ¿Imatá kunanña ruwasunman ni jaykʼaj ajinapi rikukunapaj?

8. ¿Imatataj Abrahanmanta Saramantawan yachakunchej?

⁸ Jehovaj ñaupa tiempo kamachisnenqa ashkha imasta saqellarqankutaj. Sichus chay yuyarisqalla kankuman karqa chayqa faltachayta atinkuman karqa. Abrahanwan Sarawanqa Jehovata kasukusqankurayku sumaj perqasniyoj qhapaj llajta Urta saqeporqanku, toldo wasispitaj tiyakamorqanku (Heb. 11:8, 9). Paykunaqa Ur llajtapi imayna sumajtachus kausakusqankuta ichapis yuyarikoj kanku. Sichus chay saqesqanku imas “piensarisqalla kankuman karqa chayqa”, Ur llajtaman kutipuyta munankuman karqa. Pero, ¿chay piensarisqallachu karqanku? Mana, astawanpis ima sumaj imastachus Jehová aswan qhepaman qonanta nisqanpi piensarqanku (Heb. 11:15, 16).

9. ¿Imaynatataj Pablo qhawarqa saqesqan imasta? (Filipenses 3:7, 8, 13).

⁹ Apóstol Pablopis Jehovata sirvinanrayku ashkha imasta saqerqa. Payqa niraj cristianoman tukushaspa judiospa Leyninkuta sumajta estudiarqa, yachachejnintaj sumaj rejsisqa karqa, Gamaliel sutiyoj (Hech. 22:3). Chayrayku Pabloqa atinman karqa judiospa religionninkupi sumaj kamachej kayta (Gál. 1:13, 14). Jinapis sumaj willaykunata japʼikusqanrayku tukuy chay imasta saqeporqa. Chay kutimantapacha, ¿aswan sumajtachu kausakorqa? Mana. Paytaqa judiosllataj mayta chejnikorqanku, maqarqanku, carcelmanpis wisqʼaykorqanku (2 Cor. 11:23-26). Chay llakiykunasnillanpichus yuyanman karqa chayqa, ichapis ninman karqa kausaynenqa niraj cristiano kashajtin aswan sumaj kasqanta. Jinapis mana chay yuyayllachu karqa. Astawanpis Jesuspa discipulon kasqanmanta mayta agradecekorqa, ima sumaj imastachus aswan qhepaman japʼinanpitaj yuyarqa. Chay bendicionespi tʼukurispataj payqa sutʼita yacharqa tukuy ima saqesqanqa mana qhasichu kasqanta (Filipenses 3:7, 8, 13 leey).

10. ¿Imaspitaj sapa kuti piensarinanchej tiyan? (Marcos 10:29, 30; fotostawan qhawariy).

¹⁰ ¿Imatá yachakunchej? Imastachus saqepusqanchejpi piensashanchej chayqa, yuyarikuna imaraykuchus chay imasta saqepusqanchejta (Ecl. 7:10). Jehovata rejsisqanchejrayku ima sumaj bendicionestachus japʼisqanchejpi piensarina. Tukuyta Kamachej Jehová Diosninchejwan sumaj amigos kanchej (Pro. 3:32). Chantapis jatun familiayoj kanchej, chay familianchejpajtaj may munasqa kanchej (Marcos 10:29, 30 leey). Mana chayllachu, aswan qhepaman sumaj kausay kanantapis suyakushallanchejtaj (Isa. 65:21-23). Jehovata sirvisqanchejrayku ima sumaj imaschus kapuwasqanchejpi sapa kuti piensarisun chayqa, mana saqesqanchej imasta faltachasunchu.

11. ¿Imatataj Rosemarymanta yachakunchej?

¹¹ Hermananchej Rosemarymanta parlarina. Payqa 50 watas kurajniyojña bautizakorqa. Pay nin: “Qallariypeqa Navidadta ruwayta mayta faltachaj kani. Navidadpipuni familiaywan khuska karikoj kani, regalostapis jaywarej kani. Wawasqa Navidad sachʼitaj muyuyninpi kusisqas regalosninkuta qhawaykoj kanku. Chayta rikuspataj maytapuni kusikoj kani”. ¿Imataj yanaparqa manaña chay imasta faltachananpaj? Pay nillanpuni: “Navidadpi ruwaj kani chay imasta waj fechaspi ruwaj churakorqani. Sapa wata waj fechaspi familiayta tantaykuni, regalosta jaywani, sapa ujninkutataj nini imaraykuchus mayta munakusqayta”. ¿Imapiwantaj Rosemary rikukorqa? Pay nin: “Bibliamanta yachakojtiy amigosniy saqerpariwarqanku. Wakin kuteqa paykunata faltachaj kani, sapaytaj sientekorqani”.d ¿Imatá Rosemary ruwarqa? Ashkha hermanaswan predicaj rinanpaj kallpachakorqa. Pay nin: “Ajinamanta ashkha hermanaswan amigas ruwakorqani. Paykunatataj mayta munakuni, jatunpajtaj qhawani”, nispa. ¿Imatá Rosemarymanta yachakunchej? Ichá noqanchejpis niraj Jehovata rejsishajtinchej imaschus kusichiwaj kanchej chay imasta faltachanchej. Jina kajtin yuyarikuna aswan sumaj imasraj kapuwasqanchejta, chaykunataj mayta kusichiwasqanchejta (Fili. 4:8, 9). Jehovaqa imastachus saqesqanchejmanta aswan ashkhatarajpuni qowanchej. Chaytataj amapuni qonqakunachu.

JEHOVAMANTA KARUNCHAKOJTINKU

12. ¿Imataj astawanraj llakichiwasunman?

¹² Jehovaj testigonman tukusqanchejtawan maytachá kusikorqanchej kay sajra mundota saqesqanchejmanta, Jehovaj llajtanmantaj yaykusqanchejmanta. Chaypeqa cheqanta yachachikun, tukuytaj allin kajta ruwanankupaj kallpachakunku (Isa. 65:14). Jinapis wakin kutis ichá yachanchej uj hermano jatun juchapi urmasqanta, chayri congregacionmanta orqhosqa kasqanta (1 Cor. 5:13). Hermana Samar nin: “Reciellanraj bautizasqa kashajtiy uj anciano jatun juchata ruwarqa, congregacionmantataj orqhosqa karqa. Chayta yachaspa casipuni Jehovamanta karunchakorqani. Nipuni creerqanichu uj anciano Jehovaj contranpi, congregacionpa contranpipis juchallikunanta”, nispa. Yachanchej tukuy hermanos Jehovata munakusqankuta, tukuy sonqotaj payta kasukuyta munasqankuta (1 Cor. 13:4, 7). Jinapis sapa wata wakin hermanos congregacionmanta orqhosqa kanku. Chaytaj astawanraj llakichiwasunman amigonchej, familiarninchej, chayri respetasqanchej hermano kajtin.

13. ¿Imaynatá wakichikusunman pinillanchejpis Jehovamanta karunchakojtin mana noqanchejpis karunchakunapaj?

¹³ Ichapis ujnin amigonchej chayri ujnin familiarninchej Jehovamanta karunchakapunman. ¿Imaynatá kunanmantaña wakichikusunman chay pasajtin mana noqanchejpis Jehovamanta karunchakapunapaj? Jehovaman kʼaskaykunallapuni (Sant. 4:8). Yuyarikunataj Jehovataqa mana wajkuna sirvisqankuraykullachu sirvisqanchejta. Familianchejpi, congregacionpipis orakunchejpuni, Bibliatapis estudianchejpuni. Jinapis sapa ujninchej orakunanchej tiyan, Bibliatapis leenanchej tiyan (Sal. 1:2; 62:8).

14. ¿Imatá apóstol Pedromanta yachakunchej? (Juan 6:66-68).

¹⁴ Apóstol Pedroj kausayninpis mayta yanapawasunman. Uj kuti Jesusta ashkha discipulosnin saqerparerqanku nisqanta mana entiendesqankurayku. Ichá Pedropis manallataj chay nisqanta entienderqachu. Pero, ¿imatá ruwarqa? (Juan 6:66-68 leey). Payqa mana chay ujkuna jinachu Jesusta saqerparerqa. Imajtinchus yacharqa Jesús cheqantapuni yachachisqanta. Ajinallatataj noqanchejpis yachanchej Jehovaj llajtanqa cheqan kajtapuni yachachisqanta. Chayrayku wajkuna Jehovamanta karunchakojtinkupis, noqanchejqa mana karunchakunchejchu. Cheqa kajta mayta munakusqanchejrayku Jehovata tukuy sonqo kasukunchej. Samar nillanpuni: “Yuyarikunipuni wakinkuna pantaykojtinkupis mana tukuy congregacionchu ajina kasqanta, nitaj Diospa llajtanchu mana allinta yachachishasqanta. Jehovaqa jatun juchasta ruwasqankuta nipuni allinpajchu qhawan”.

15. ¿Imatá Emilymanta yachakuwaj?

¹⁵ Hermananchej Emilymanta parlarina. Bautizakusqanmanta semanitallanman maman paykunata saqerparerqa, congregacionmantapis orqhosqa karqa. Emily nin: “Nipuni yuyarqanichu mamay chayta ruwananta. Mana jaykʼajpis chay jina jatun llakiypi rikukorqanirajchu. Mamayta mayta faltachani”, nispa. ¿Imataj Emilyta yanaparqa? Pay nillantaj: “Mana sapallaychu kashani. Tatay mayta yanapawan, jinallataj congregacionmanta hermanospis. Paykunaqa familiay jinallataj kanku. Tukuypis llakiykunasniyojpuni kanchej. Chayrayku ujchasqapuni kananchej tiyan, purajmantataj kallpachanakunanchej tiyan”, nispa (1 Ped. 5:9). Kunanña congregacionpi sumaj amigosta ruwakusunman, nitaj problemas chayamojtinrajchu. Chayrayku kallpachakuna hermanosta aswan sumajta rejsinapaj. Ajinamanta imapis pasajtin mana sapanchejchu sientekusunchej.

16. ¿Imatataj yuyarikunapuni tiyan? (Fototawan qhawariy).

¹⁶ Chantapis yuyarikunapuni Jehovaqa pikunatachus munakun chaykunata cheqanchasqanta (Heb. 12:6). Payqa munan congregacionmanta tukuy orqhosqa kajkuna kutinpunankuta (2 Ped. 3:9). Chayrayku ujnin amigonchej chayri ujnin familiarninchej congregacionmanta orqhosqa karqa chayqa, ancianosqa tukuy atisqankuta yanaparenqanku Jehovaman kutinpunanpaj (2 Tim. 2:24, 25).

17. ¿Imamantataj seguros kashanchej?

¹⁷ Yachakunchej jina bautizakusqanchejtawan ichapis wakin imaspi rikukusunman. Jinapis ama llakikunachu. Imapi rikukojtinchejpis atisunpuni Jehovata tukuy sonqo sirviyta. Chaypajtaj kunanmantaña sumajta wakichikusunman. Amataj qonqakunachu Jehovaqa ni pi jina sumajta yanapanawanchejta. Payqa ñaupajpi yanapawarqanchejña, yanapallawasunpunitaj (1 Ped. 5:10). Kallpata qowasunchejpuni ima llakiytapis aguantayta atinanchejpaj. Sichus Jehovawan yanapachikusunpuni chayqa, mana imapis paymanta karunchawasunchu (Sal. 119:165; Rom. 8:38, 39).