Bautizakunaykikama ñauparillaypuni

1. 1) Bautizakojtinchej, ¿ima bendicionestataj japʼinchej? 2) ¿Imatá kay yachaqanapi yachakusun?

¿JEHOVAMAN kausayniykita qopunkiñachu, chanta bautizakunkiñachu? Chayta ruwankiña chayqa may sumajpuni. Chayta ruwashaspaqa llimphu sonqoyoj kayta Diosmanta mañakorqanki (1 Ped. 3:21). Chantapis bautizakusqaykirayku sumaj ejemplo kanki manaraj bautizakojkunapaj. ¿Manaraj bautizakunkichu chayrí? Qanpis Jehovata munakunkichá, munaynintapis ruwaytachá munanki. Yachankiña juchasniykimanta perdonasqa kanaykipaj, Diospa ñaupaqenpi allinpaj qhawasqa kanaykipajpis bautizakunaykipuni kasqanta (Hech. 2:38-40). Ajina kajtinpis ichá ima jarkʼashasunkiman. Kay yachaqana mayta chaypaj yanapasonqa. Kay yachaqanapi kay imasta qhawarisun: 1) ¿Imaraykutaj wakin manaraj bautizakuyta munankuchu? 2) ¿Imajtín mana qonqakunanchejchu tiyan tukukuy pʼunchay may qayllitapiña kashasqanta? 3) Bautizakunapaj mana ancha tiempota suyasunchu chay, ¿ima bendicionestataj japʼisun?

¿IMARAYKÚ WAKINKUNA MANA BAUTIZAKUYTA MUNANKURAJCHU?

2. ¿Imaraykutaj wakinkuna manaraj bautizakuyta munankuchu?

² Wakinkunaqa Jehovata sirviyta munaspapis manchikunku bautizakuyta. Ichapis wakenqa yuyanku ni jaykʼaj Diosta kusichiyta atinankuta. Sichus qanpis ajinata yuyashanki chayqa, Bibliamanta wakin textosta leeriwaj. Maypichus nin Diosqa mana perfectos kananchejtachu suyasqanta, astawanqa atisqanchejman jina aswan sumajnin kajta qojtinchej mayta kusikusqanta (Sal. 103:13, 14; Col. 3:23). Sichus churanakusunankuta manchikushanki chaytaj, Jehovamanta yanapata mañakuy salmista jina ninaykipaj. Pay nerqa: “Jehová Diosqa noqawan kashan, mana manchikusajchu. ¿Imanawanqataj runari?”, nispa (Sal. 118:6).

3. ¿Imajtintaj wakinkuna manaraj bautizakuyta munankuchu? (Dibujotawan qhawariy).

³ Wakenqa manaraj bautizakuyta munankuchu Bibliamanta manaraj sumajtachu yachasqankuta yuyaspa. Jinapis bautizakunapaj, ¿tukuy imatapunichu Bibliamanta yachakunanchej tiyan? Mana. Carceleromanta, familianmantawan parlarina. Pablowan Silaswan carcelpi kashajtinku Jehovaqa jallpʼata sinchʼita kharkaticherqa paykunata kacharichinanpaj. Chaypi carceleroman familianmanwan predicarqanku. Carcelerowan familianwanqa ichapis repararqanku Dios chay milagrota ruwasqanta kamachisninta kacharichinanpaj. Chay chʼisi ashkha imasta Jehovamanta, Jesusmantawan yachakorqanku, “chay ratopachataj paywan tukuy familianwan bautizakorqanku” (Hech. 16:25-33). Qanpis, ¿Jehovata rejsinkiñachu? ¿Tukuy sonqochu payta munakunki? ¿Bibliaj qallariy yachachiykunasninta yachankiñachu? ¿Juchasniykimanta arrepientekunkiñachu? ¿Jehovata kasukuytachu munanki? Jina kajtenqa, bautizakunaykipaj wakichisqaña kanki (Mar. 12:30).

4. ¿Imaraykutaj wakinkuna mana bautizakuyta munallankutajchu? (Fototawan qhawariy).

⁴ Wakenqa Diosta kusichiyta munaspapis mana bautizakuyta munankuchu, ashkha imasta saqenanku kasqanta yuyasqankurayku. Arí, imata ruwanapis facilchus kanqa manachus chayta qhawarikunanchejpuni tiyan (Luc. 14:27-30). Jinapis wakenqa Jehovata sirvinankupaj imastachus saqenallankupi anchata yuyanku. Ajinapi rikukorqa Candace. Wawamantapacha testigo familiapi uywakojtinpis, mana testigo kayta munarqachu. Aswan qhepamantaj watejmanta Bibliata estudiarqa. Pay nin: “Yacharqani imatachus ruwanay kasqanta Jehovata kusichinaypaj. Jinapis imaswanchus kusirikusqayqa mayta gustawaj. Chayrayku mana faciltachu chay imasta qonqayta atiyman karqa”, nispa. Wakintaj yuyanku Jehovaj kamachiykunasninta mana kasukuyta atinankuta. Paykunaqa ninku: “Bautizakuytawan pantaykuyman chayrí, congregacionmantapis orqhochikuyman”, nispa. Qantapis chay imas llakichishasunki chay, ¿imatá ruwawaj?

5. Bautizakuyta manchikushanchej chay, ¿imapitaj piensarisunman? (Mateo 13:44-46).

⁵ Imallatapis rantikuyta munaspaqa, mana mashkhachus valesqallantachu qhawanchej, manachayqa imayna sumajchus kasqantapis. Valesqanmantapis aswan sumajraj kasqanta reparanchej chayqa, chay rato rantinchejpacha. Kikillantaj bautizakuywanpis. Mana mashkhatachus cambianallanchejpichu yuyananchej tiyan, manachayqa bautizakuspa imayna sumajchus kausayninchej kananpi Jehovawan sumaj amigos kajtinchej. Jesusqa iskay kikinchaykunawan chayta yachachiwarqanchej (Mateo 13:44-46 leey). Sapa kikinchayninpi, uj runa tukuy imasninta vendemusqa imatachus tarisqanta rantinanpaj, chay tarisqan may valorniyoj kasqanrayku. Qanpis Diospa gobiernonmanta cheqa kajta tarerqanki, chaytaj manchay valorniyojpuni. Jinapis ichá anchata yuyashanki bautizakunaykipaj ashkhataraj cambianayki kasqallanpi. Jina kajtin Jesuspa kikinchaykunasninpi piensariy. Ichá kay tapuykunapi tʼukuriwaj: “¿Creenichu Diospa gobiernonmanta sumaj willaykuna may valorniyoj kasqanta? ¿May valorniyojpajchu qhawani Jehovawan amigos kayta, wiñaypaj kausakuyta suyakushasqanchejta, Jehová qowasqanchej familiatapis?”. Chay tapuykunaman kutichispa reparasunchej imastawanchus ruwananchej kasqanta bautizakunanchejpaj.

6. ¿Imataj yanapawasunman sonqonchej llampʼuyananpaj?

⁶ Jesusqa ujnin kikinchayninpi tarpoj runamanta parlarqa. Chaypitaj nerqa Diospa Gobiernonmanta mujoqa, imaymana sonqoyoj runasman chayasqanta. Mana tukuychu kikin sonqoyoj kasqankurayku wakenqa mana ñaupariyta atinkuchu. Wakintajrí Diospa gobiernonmanta sumaj willaykunata sumaj sonqowan japʼikunku, yachakusqankuman jinataj kausanku (Luc. 8:5-15). Sichus qanpis iskay sonqolla kashanki chayqa ama saykʼuychu. Diosninchej yanapasonqa mosoj sonqoyojman tukunaykipaj, ajinamanta yuyaychasqanta japʼikunaykipaj. Paymanta mañakuy sonqoykita llampʼuyachinanta, ajinamanta Gobiernonmanta mujitu qanpi poqonanpaj (Eze. 18:31; 36:26).

7, 8. ¿Imajtintaj wakin jóvenes mana bautizakunkurajchu? (Fototawan qhawariy).

⁷ ¿Imajtintaj wakin jóvenes Jehovata munakuspapis manaraj bautizakunkuchu? Wajkunawan inkitachikusqankurayku. Wakin profesoresqa alumnosninkuta yachachinku millayta kausaypis, Diospa chejnisqan imasta ruwaypis mana juchapunichu kasqanta. Jinapis chayman jina ruwayqa mana allinman chayachisunkiman (Sal. 1:1, 2; Pro. 7:1-5). Joven, ¿imatá ruwawaj mana chay trampapi urmanaykipaj? Salmista jina ruway. Payqa Jehovata nerqa: “Yuyarichisqasniykipi tʼukurisqayrayku yachachiwajkunamantapis aswan yachayniyoj kani”, nispa (Sal. 119:99).

⁸ Yachakusqanman jina wakin testigo tatasqa mana reparakuspalla wawasninkuta jarkʼashanku bautizakunankupaj. Paykunaqa anchata yuyanku wawasninku sumaj profesionniyoj kanankupi, sumaj trabajoyoj kanankupi. Chayri mana wawasninkuta kallpachankuchu Jehovapaj astawan llankʼanankupaj. Joven, ¿reparankichu tatasniyki qantapis mana yanapashasusqankuta? Ichá chaymanta paykunawan parlariwaj. Kayta amapuni qonqaychu, ima edadniyoj kaspapis Jehovaj amigon kayta atiwaj (Pro. 20:11).

9. ¿Imajtintaj wakinkuna manaraj bautizakunkuchu?

⁹ Wakenqa bautizakunankupaj wakichisqaña kajtinkupis, piwan khuska bautizakuyta munaspa manaraj bautizakunkuchu. Ichapis ujnin amigonku chayri ujnin familiarninku nin suyarinanta khuska bautizakunankupaj. Chaytaj mana juchachu. ¿Jinapis chayraykuchu manaraj bautizakunan kanman? Yuyarikuna kausayninchejta Jehovaman qopuypis, bautizakuypis sapa ujninchejmanta kasqanta (Rom. 14:12).

AMA QONQANACHU TUKUKUY QAYLLITAPIÑA KASQANTA

10. ¿Imajtintaj wakinkuna manaraj bautizakuyta munankuchu?

¹⁰ ¿Imajtintaj wakinkuna mana bautizakuyta munallankutajchu? Yuyanku ashkharaj tiempo kasqanta tukukuy pʼunchay chayamunankama. ¿Ajinata yuyay allinchu? Jesusqa discipulosninta nerqa: “Qankunapis wakichisqapuni kaychej, noqaqa mana suyasqaykichej horapi jamusaj”, nispa (Luc. 12:40).

11. Jehovata astawan rejsispa, ¿imatataj ruwayta munanchej chanta imaraykutaj? (Salmo 119:60).

¹¹ Jehovaman kausayninchejta qopunchej, bautizakunchej ima payta, kamachiykunasnintapis munakusqanchejrayku. Jehovata astawan rejsispaqa astawan reparanchej maytapuni munakuwasqanchejta, kamachiykunasnintaj allinninchejpajpuni kasqanta. Chayrayku kasukuytapuni munanchej (Salmo 119:60 leey). Santiago nisqanman jinataj, mana yachanchejchu imachus kausayninchejwan qʼaya kananta. Chayrayku kunanña Jehovaj kamachiykunasninta kasukuyta munanchej. Ichapis manaña tiempo kanqachu “imachus allin kasqanta” ruwananchejpaj. Chayrayku kunan tiempo kashan Jehovaj munayninta ruwanapaj (Sant. 4:13-17).

12. ¿Imatá uva huertayoj kikinchaymanta yachakunchej?

¹² Ichapis wakinkunaqa kay jinata yuyankuman: “Jesusqa uva huertayoj kikinchayninpi nerqa wakin peonesqa uj horallataña trabajasqankuta. ¿Nichu paykunaqa diantinta llankʼajkuna jinallataj kikin pagota japʼerqanku?”, nispa. Arí, kikin pagollatataj japʼerqanku. Jinapis, ¿imajtintaj uj horallataña trabajarqanku? Paykunallataj nerqanku: “Mana pipis minkʼakuwaykuchu”, nispa. Paykunaqa mana qhellaschu karqanku. Pipis minkʼakunman karqa chayqa, diantinta trabajankuman karqa. Chayrayku trabajanankupaj minkʼakusqankutawankama chay ratopacha trabajaj rerqanku (Mat. 20:1-16). Kunanpis Jesusqa minkʼakuwanchej discipulosnin kananchejpaj, predicacionpipis yanapakunanchejpaj. Noqanchejtaj uyariytawankama kasukuna.

13. ¿Imatataj yachakunchej Lotpa warminmanta?

¹³ Wakenqa yuyanku tukukuy pʼunchay chayamunanpajña kashajtin aswan facilta cambiayta atinankuta. Chayrayku manaraj bautizakunkuchu. Jinapis chaypachaqa aswan dificilraj kanqa Jehovata sirvinapaj cambiosta ruway. Jesusqa chayta yachasqanrayku discipulosninta nerqa: “Lotpa warminmanta yuyarikuychej”, nispa (Luc. 17:31-35). Lotpa warmenqa sumajta yacharqa Sodomawan Gomorrawan tumpitamantawan chinkachisqaña kananta. Jinapis mana atillarqachu kapusqan imasta saqeyta (Gén. 19:23-26). Chayqa yuyarichillawanchejtaj salvakunapaj punkoqa mana wiñaypajchu kicharisqa kananta. Diospa churasqan pʼunchay chayamojtin wiñaypaj llavewan llaveykusqa kanqa (Luc. 13:24, 25).

14. ¿Imajtintaj Bibliaj profeciasnin juntʼakushasqanta sumajta reparananchej tiyan?

¹⁴ Kay mundopi imaschus pasashasqanqa rikuchiwanchej, tukukuy pʼunchaymanta parlaj profecías juntʼakushasqantaña. Jinapis wakin profeciaspa nisqantaqa ichapis mana tiyakunchej chaypi rikushanchejchu. Jinapis chay imas waj lugarespi pasashasqanta uyareyqa, yanapawanchej usqhayllata kausayninchejta cambianapaj, bautizakunapaj ima. Pedroqa ñaupa tiempomanta cristianosta nerqa: ‘Tukuy imaj tukukuynenqa qayllaykamunña. Chayrayku wakichisqapuni kaychej, nisunman rijchʼarisqapuni kaychej’, nispa (1 Ped. 4:7, sutʼinchaynin). Chaywanqa Jerusalenwan templonwan thuñisqa kananmantasina parlasharqa. Jinapis chay cristianosqa Jerusalenmanta karupi tiyakorqanku. Chayrayku Jerusalén llajta thuñisqa kasqanta mana rikorqankuchu (1 Ped. 1:1). Jinapis chay profecía juntʼakusqanta yachaspa, Jehová tukuy ima nisqanta juntʼananpi astawan atienekorqanku. Kikillantataj noqanchejpis yachanchej Bibliaj profeciasnin juntʼakushasqanta. Chayqa rikuchiwanchej tukukuy pʼunchay qayllitapiña kashasqanta. Chaytaj yanapawanchej wakichisqaspuni kanapaj, bautismoman chayanapaj ima.

15. ¿Imaynatataj Jehovaj pʼunchayninta suyakunanchej tiyan? (2 Pedro 3:10-13).

¹⁵ Iskay kaj cartanpi Pedroqa cristianosman nerqa imaynatachus ‘Jehovaj pʼunchayninta’ suyanankuta, nisunman tukukuy pʼunchayta. Chay pʼunchay chayamunanpaj unayraj faltajtinpis, Pedroqa chay tiempomanta cristianosman nerqa chay pʼunchayta ‘ama qonqaspa’ suyanankuta, nisunman ‘mayta munaspa’ (2 Pedro 3:10-13 leey, sutʼinchaynin). Noqanchejpis mana qonqananchejchu tiyan chay pʼunchay qayllitapiña kashasqanta, chayamunallantañataj munashanchej. Chayrayku tukuy atisqanchejta kallpachakunchej, ‘Diosta tukuy sonqo yupaychasqanchejta ruwasqasninchejwan rikuchinanchejpaj’. Jehovataj mayta kusikun chayta ruwajtinchej. ¿Nichu astawanraj kusikunman kausayninchejta payman qopojtinchej, bautizakojtinchej ima?

KALLPACHAKUY BAUTIZAKUNALLAYKIPAJÑA

16. ¿Imaraykutaj kunanña tiempo kashan bautizakunapaj? (2 Corintios 6:1, 2; fotostawan qhawariy).

¹⁶ Bautismoman chayanapajqa kunan tiempo kashan (2 Corintios 6:1, 2 leey). Etiopiamanta eunuco runapi piensarina. Paymanqa Felipe predicarerqa. Sumaj willaykunata entiendeytawantaj reparakorqa bautizakuyta atisqantaña. Chayrayku chay rato bautizakorqa. Payqa mana nerqachu: “Astawanraj yachakuyta munayman, waj mayu kallanqa bautizakunaypaj”, nispa. Astawanpis Felipeta taporqa: “¿Imajtintaj mana bautizakuymanchuri?”, nispa (Hech. 8:26, 27, 35-39). Bautizakuytawantaj eunucoqa ‘kusisqa ñanninta riporqa’.

17. ¿Imaynatá Jehová yanapawasun ñauparinapaj?

¹⁷ Bautizakunaykipaj imapis jarkʼashasunki chayqa, Jehová yanapasonqa payman qayllaykunaykipaj, paywantaj sumaj amigos kanaykipaj (Rom. 2:4). Sichus bautizakuyta manchikushanki, ancha difícil kasqanta yuyashanki, chayri mana wajkuna yanapashasunkuchu chayqa, Jehová yanapasonqa. Bautizakuytawantaj maytapuni kusikunki Diospa ñaupaqenpi llimphu sonqoyoj kasqaykimanta, reparankitaj saqesqayki imasqa qhasi manakajllaña kasqanta (Fili. 3:8, 13). Jehovaqa sumaj imasta qonanta nin kausayninkuta payman qopuspa bautizakojkunaman. Chay jamoj imas juntʼakunantataj kusisqa suyakunki (Hech. 3:19).