¿Imaraykú bautizakunapuni tiyan?

1. ¿Imaynatá yachanchej bautismo may importante kasqanta?

PILLAPIS bautizakojtin maytapuni kusikunchej. Chaytaj ajina karqa ñaupa tiempomanta cristianos primera vez tantakusqankumantapacha. Chay tantakuytaj ruwakorqa Pentecostés 33 watapi. Chay kutipi ashkha runas bautizakorqanku. Apóstol Pedrotaj uj discursota qorqa, sutʼincharqataj bautismoqa may importantepuni kasqanta (Hech. 2:38, 40, 41). Tiemponmantaj apóstol Pablo qhelqarqa ‘bautismosmanta yachachiykunaqa’ ‘Cristomanta qallariy yachachiykuna’ kasqanta (Heb. 6:1, 2). Chaypi reparanchej Biblia bautismomanta yachachisqanqa may importante kasqanta, chayrayku chay yachachiyta may sumajta entiendenanchej tiyan.

2. ¿Imaraykutaj bautismomanta sumajta entiendenanchej tiyan?

² Pillapis wasita ruwayta munajqa, mana urmaykunanpaj sumaj cimientosniyojta ruwanan tiyan. Ajinallatataj noqanchejpis ruwananchej tiyan manaraj bautizasqa kajtinchejpis chayri unayña bautizasqa kajtinchejpis. Sichus creeyninchej sinchʼi sayasqa kananta munanchej chayqa, Bibliaj yachachiykunasninta sumajta entiendenanchej tiyan. Chay yachachiykunaqa creeyninchejpaj sumaj cimientos jina. Bibliaj ujnin yachachiynintaj bautismo kashan. Chayrayku kay yachaqanapi kay tapuykunasman kutichisun: ¿Imataj niyta munan bautismo? ¿Imaynatá bautismo ruwakun? ¿Imaraykutaj Tata Diospa sutinpi, Wawanpa sutinpi, espíritu santoj sutinpiwan bautizakunchej?

¿IMA NIYTÁ MUNAN BAUTIZAKUY CHANTA IMARAYKÚ MAY IMPORTANTE?

3. ¿Imatá rikuchinchej bautizakuspa?

³ Bautizakuspaqa kay imasta wajkunaman rikuchinchej: 1) Jehovamanta, Jesucristomantawan yachakusqanchejpi creesqanchejta. 2) Juchasninchejmanta arrepientekusqanchejta. 3) Jehovata sirvinapaj kausayninchejta cambiasqanchejta. 4) Jesusnejllata salvacionta tariyta atisqanchejta. 5) Oracionpi Jehovaman kausayninchejta qopusqanchejta, llajtanwan khuska munayninta ruwananchejpaj. Jehovaman kausayninchejta qopuytawantaj bautizakorqanchej. Ajinamanta wiñay kausayman apaj ñanta puriyta qallarerqanchej.

4. ¿Ima niytá munan yakuman chinkaykuchiwasqanchej? (Fotostawan qhawariy).

⁴ Bautizawajtinchej yakuman chinkaykuchiwanchej,a chaymantataj orqhowanchej. Bautizakuspaqa pʼampasqa jina karqanchej, chaymantataj kausarichisqa jina karqanchej (Colosenses 2:12 versiculowan kikinchay). ¿Imaraykú bautismota chaywan kikinchanchej? Yakuman chinkaykuchiwasqanchejqa rikuchin ñaupa kausayninchejta saqepusqanchejta, yakumanta orqhowasqanchejtaj rikuchin mosoj kausayniyoj kasqanchejta, chaymantapachataj Jehovaj munayninta ruwananchejta.

5. ¿Imapí rijchʼakun bautizakunanchejpaj wakichikusqanchej Noé arcata ruwasqanman? (1 Pedro 3:18-21).

⁵ (1 Pedro 3:18-21 leey). Bautizakunapaj wakichikusqanchejqa Noé arcata ruwasqanman rijchʼakun. Sichus Jehovamanta pisi tiempollaraj yachakushanki chayqa, ichapis yuyanki bautizakunaykipaj ashkha imastaraj ruwanayki kasqanta. Chayraykutaj yuyawaj arcata ruway jina ancha difícil kasqanta. Jinapis, ¿tukuy chay imasta ruwanaykipunichu tiyan? Arí. Noepi tʼukurina. Jatun Parapi salvakunanpaj, ¿imatá ruwanan karqa? Dios kamacherqa imaynatachus arcata ruwananta, chay kamachisqantataj maychus kajsitutapuni kasukunan karqa. Noerí, ¿kasukorqachu? Arí, “payqa Dios nisqanman jinapuni ruwarqa” (Gén. 6:22). Payqa chayta ruwarqa creeyniyoj kasqanrayku, Jehová yanapasqanrayku ima. Qanpis bautizakunaykipaj imatachus Dios mañasusqanta juntʼayta atinkipuni.

6. ¿Imatá Pedro niyta munasharqa “bautismomin qankunatapis salvashasunkichej” nispa?

⁶ Apóstol Pedroqa 21 versiculopi nerqa: “Bautismomin qankunatapis salvashasunkichej”, nispa. Chaywan mana nisharqachu yakuman chinkaykuchisqa kaspalla salvasqa kayta atisqanchejta, nillataj nisharqachu juchasninchejta llimphuchasqanta. Juchasninchejmantaqa Jesuspa yawarnillan llimphuchawanchej (1 Juan 1:7). Chanta, ¿imaraykutaj bautizakunanchejpuni tiyan? Jehová kamachiwasqanchejrayku. Chantapis bautismoqa yanapawanchej Diosmanta ‘llimphu sonqoyoj kayta mañakunapaj’. Cristo wañusqanraykutaj Jehová may kusiywan juchasninchejta perdonawanchej. Ajinamanta salvasqa kayta atinchej, nisunman wiñay kausayta japʼiyta atinchej. Chayrayku apóstol Pedro nerqa: “Bautismomin qankunatapis salvashasunkichej”, nispa.

¿IMAYNATÁ BAUTISMO RUWAKUN?

7. ¿Imaynatá bautismo ruwakunan tiyan?

⁷ ¿Imaynatá bautismo ruwakunan tiyan? Bibliaqa yakuman chʼultiykunallata nin, waj imastataj mana sutʼinchanchu. Jinapis wakin yuyaychaykunasta qowanchej. Chay yuyaychaykunastaj bautizakojkunata yanapan imaynatachus bautizakushaspa vistikunankuta yachanankupaj, chaypi kajkunapis imatachus ruwanankuta chayri mana ruwanankuta yachanankupaj (1 Cor. 14:40; 1 Tim. 2:9). Bautismotaqa ancianospuni ruwayta yachanku, jinapis bautizajkunataqa mana jatunchananchejchu tiyan (1 Cor. 1:14, 15). Bautismoqa ashkha runaspa ñaupaqenpipis pisi runaspa ñaupaqenpipis kikillantaj valen (Hech. 8:36).

8. ¿Imastá tapunku bautizakojkunata, chanta imaraykutaj chayta tapunku? (Hechos 2:38-42; fototawan qhawariy).

⁸ Bibliaqa niwanchej cristianos ‘runasman willananchej kasqanta salvasqa kanapaj’. Chayqa niyta munan creeyninchejta rikuchiy (Rom. 10:9, 10; Biblia de estudio nisqapi chay versiculoj sutʼinchayninta leeriy, “declaras públicamente”). Chaytataj ruwayta atinchej bautizakusqanchej diapi. Yachakunchej jina, salvakunapajqa bautizakunanchejpuni tiyan. Chayrayku bautizakojkunaqa, bautizakushanku chay día kay iskay tapuykunaman kutichinanku tiyan: 1) “¿Juchasniykimanta pesachikunkiñachu, kausayniykitapis Jehová Diosman qopunkiñachu, creenkitajchu Diosninchejqa Jesusta kachamusqanta salvanawanchejpaj?”. ¿Imatataj kay tapuy rikuchin bautizakojkunamanta? Bautizakunankupaj imastañachus ruwasqankuta. Pedroqa casi kikillantataj nerqa Pentecostespi tantasqa runasman. 2) “¿Yachankichu bautizakuspaqa Jehovaj testigonña kanaykita, Diospa llajtanmantaj yaykusqaykita?”. Kay tapoyqa yuyarichiwanchej Jehovaman kausayninchejta qopusqanchejwan juntʼanapajqa, japʼikunanchej tiyan Jehová llajtannejta yuyaychawasqanchejta, hermanosninchejwan khuskataj Jehovata sirvinanchej tiyan ñaupa cristianos jina (Hechos 2:38-42 leey). Piskunachus chay iskay tapuyman arí nispa kutichinku chayqa, bautizakuyta atinku.

9. ¿Imatá tukuy ruwananchej tiyan Diospa ñaupaqenpi allinpaj qhawasqa kananchejpaj?

⁹ Manaraj Jehovamanta yachakushaspa ichapis allin kajta ruwaspa kausakoj kanchej, nitaj jatun juchasta ruwarqanchejchu. Chayri ichapis tatasninchej testigos kanku, Jehovata munakuytataj yachachiwarqanchej. Ajina kajtin, ¿juchasninchejmanta arrepientekunanchejpunichu tiyan? Chanta, ¿bautizakunanchejpunichu tiyan Diospa ñaupaqenpi allin qhawasqa kananchejpaj? Arí, yuyarikunanchej tiyan nacekusqanchejmantapacha juchasapas kasqanchejta, chaytaj Diosmanta karunchawasqanchejta (Sal. 51:5). Jinapis Jehovata rejsisqanchejmantapacha manaña noqanchej munasqanchejtachu ruwanchej, astawanqa paypa munasqanta ruwayta qallarinchej. Chayta ruwaytawanqa arrepientekuyta atinchej ñaupa kausayninchejmanta. Chaymantapachataj Diosta kusichinapaj jina kausayta qallarinchej, ajinamanta bautizakuyta atinchej (Hech. 3:19).

10. ¿Imatá ruwanayki tiyan waj iglesiapi bautizakorqankiña chay?

¹⁰ Waj religionpi bautizasqaña kanki chayqa, ¿watejmantachu Jehovaj testigon jina bautizakunayki tiyan? Arí, imaraykuchus chaypacha Jehovatapis Jesustapis niraj allintachu rejserqanki. Oracionpi Diosman kausayniykita qopojtiykiñapis, munayninta ruwanaykita nejtiykiñapis, chay kutipeqa manaraj allintachu yacharqanki Diospa munayninmanta. Ajina karqa ñaupa tiempopipis. Apóstol Pabloqa Efesopi wakin runasta tarerqa, paykunataj bautizakusqanku Jehovata mana allinta rejsispalla. Pablotaj yanaparqa watejmanta bautizakunanku kasqanta entiendenankupaj (Hech. 19:1-5).b Kikillantaj kay tiempopipis, Jehovapaj bautismo valenanpajqa allintaraj Diospa munayninta rejsinanchej tiyan.

“TATA DIOSPA SUTINPI, WAWANPA SUTINPI, ESPÍRITU SANTOJ SUTINPIWAN”

11. ¿Imataj niyta munan “Tata Diospa sutinpi, Wawanpa sutinpi, espíritu santoj sutinpiwan” bautizakuy? (Mateo 28:18-20).

¹¹ Jesusqa nerqa mosoj discipulosnin bautizakunankuta “Tata Diospa sutinpi, Wawanpa sutinpi, espíritu santoj sutinpiwan” (Mateo 28:18-20 leey). ¿Imatá niyta munarqa “sutinpi” nispa? Bibliapeqa suti nispa niyta munan imayna qhawasqachus uj runa kasqanta. Chay niyta munallanmantaj pillapis ima puestoyojchus chayri ima autoridadniyojchus kasqanta. Chayrayku, ¿ima niytá munan pejpa “sutinpi” imatapis ruway? Niyta munan atiyniyoj kasqanta reparasqanchej (Mateo 10:41 versiculowan kikinchay; Biblia de estudio nisqapi chay versiculoj sutʼinchayninta leeriy, “porque es profeta”). Chayrayku Jehovaj sutinpi, Jesuspa sutinpiwan bautizakuspaqa, rikuchinchej imatapis kamachinankupaj derechoyoj, atiyniyojtaj kasqankuta yachasqanchejta. Espíritu santoj sutinpi bautizakuspataj rikuchinchej espíritu santowan pusachikusqanchejta. Chayta astawan ukhuncharina.

12. ¿Ima niytá munan Tata Diospa sutinpi bautizakuy? (Apocalipsis 4:11; fototawan qhawariy).

¹² Tata Diospa sutinpi. Mana iskayrayanchejchu Jehová Tatanchej kasqanmanta, pay kausayta qowasqanchejmanta, Tukuy Atiyniyoj Dios kasqanmanta, tukuy imatapis pay ruwasqanmanta (Apocalipsis 4:11 leey). Yachanchej mañakusqanchejtapis uyariwasqanchejta. Chantá orakushaspa, wajkunaman paymanta parlashaspapis mana manchikuspa, respetowantaj sutinta oqharinchej (Sal. 65:2). Jinapis mana chayllatachu yachananchej tiyan. Pentecostés pʼunchaypi Pedrota uyarejkunaqa Jehovata rejserqankuña. Jinapis entiendenanku karqa Jesucristonejllata Dios salvawasqanchejta (Rom. 5:8).

13. ¿Ima niytá munan Wawanpa sutinpi bautizakuy? (Fototawan qhawariy).

¹³ Wawanpa sutinpi. Chaytaj niyta munan Jesús Diospa kʼata Wawan kasqanmanta mana iskayrayasqanchejta, jinallataj “ñan” kasqanmantapis. Paynejllata Jehovawan sumaj amigos kayta atinchej (Juan 14:6). Chantapis creenchej Jesús noqanchejrayku wañusqanta wiñaypaj kausakunanchejpaj. Chayta yachaytaj aysawanchej sapa día pay jina ruwanapaj, manataj bautizakunchej chay diallachu (1 Juan 2:6). Chayrayku pay jina tukuy sonqo predicaj llojsinchej, manataj saqenchejchu ni ima jarkʼanawanchejta (Luc. 4:43). Qhatiykachasqa kaytapis aguantanchej Diosta tukuy sonqo kasukuyta munasqanchejrayku (2 Tim. 3:12). Chantapis Jesusta respetanchej “congregacionpa uman” kasqanrayku, tukuy sonqotaj kasukunchej pikunatachus pay churan ñaupajman apanawanchejpaj, cuidanawanchejpaj ima chaykunata (Efe. 4:8, 11, 12; 5:23).

14. 1) ¿Imataj niyta munan espíritu santoj sutinpi bautizakuy? (Fototawan qhawariy). 2) ¿Imaynasmantawantaj bautizasqa kanku ajllasqa cristianos? (“¿Imaynasmantawantaj bautizasqa kanku ajllasqa cristianos?” nisqa recuadrota qhawariy).

¹⁴ Espíritu santoj sutinpi. Chayqa niyta munan espíritu santomanta Biblia nisqanta japʼikusqanchejta. Bibliaqa nin mana uj runa jinachu kasqanta, nitaj trinidad partechu kasqanta. Astawanqa Diospa atiynin kasqanta nin. Chantapis yachanchej espíritu santo profetasta, Bibliata qhelqajkunatapis yanapasqanta. Chayrayku Bibliata leenchejpuni, chayman jinataj kausakunchej (2 Ped. 1:20, 21). Chantapis kallpachakunchej mana jatun juchasta ruwananchejpaj. Jatun juchasta ruwasunman chayqa manaña espíritu santota japʼisunmanchu, nitaj saqesunmanchu congregación espíritu santota japʼinanta (Efe. 4:30).

15. ¿Imata ruwanapajtaj kallpachakunanchej tiyan?

¹⁵ Sichus qan bautizasqaña kanki chayqa, kallpachakullaypuni ‘bautismosmanta yachachiykunata’ allinta entiendenaykipaj.c Jehovaman kausayniykita qopushaspa, bautizakushaspapis imastachus nisqaykita juntʼallaypuni. Manaraj bautizakunkichu chayrí, ¿imataj jarkʼashasunkiman bautizakunaykipaj? Qhepan yachaqanapi parlasun imatachus bautizakunaykipaj ruwanayki kasqanta.