¿Imaynatá mana testigo familiaresninchejta yanapasunman?

1, 2. Bibliamanta yachakuyta qallarejtinchej, ¿imatá yuyankuman familiaresninchej?

UJ PACHA Jesusman uj runa qayllaykuspa nerqa discipulon kayta munasqanta. Jesustaj nerqa: “Familiasniykiman willamuy imastachus Jehová Dios qanrayku ruwasqanta”, nispa (Mar. 5:19). Ima sumaj willaytapis yachaspaqa familiaresninchejman willaytapuni munanchej. Jesustaj chayta yacharqa, chayraykutaj chayta nerqa.

² ¿Imaynataj kasharqanchej Bibliata estudiayta qallarispa? Yachakusqanchejtaqa willariytapunichá munarqanchej familiaresninchejman. Jinapis wakin familiaresninchejqa chay willasqanchejmanta ichapis phiñakorqanku. Chayri ichapis Bibliamanta familiaresninchejman parlarishaspa mana allinta yuyaychakuspalla parlarerqanchej, chaytaj paykunata phiñacherqa. Ajinapi rikukuspapis, atisunman Jehová Diosninchejta tukuy sonqollapuni kasukuyta, familiaresninchejwanpis allinta apanakuyta. Kay yachaqana chaypaj yanapawasun.

3. ¿Imatá kay yachaqanapi qhawarisun?

³ Kay yachaqanapi tawa imasta qhawarisunchej: 1) Mana testigo familiaresninchejta khuyakusqanchej, ¿imaynatá yanapawanchej paykunata munakunapaj, paykunawan pacienciarikunapajpis manaraj Jehovamanta yachakuyta munajtinkupis? 2) ¿Imatá ruwasunman sonqonchejta nanachinawanchejpaj jina parlajtinku chayri imatapis ruwajtinku? 3) ¿Imaynatá familiaresninchejta yanapanman pacienciakusqanchej, aswan qhepaman Jehovamanta yachakunankutapis suyasqanchej? 4) ¿Imaynatá paykunata munakusqanchejta rikuchisunman?

KHUYAKUSQANCHEJRAYKU YANAPARINA

4. ¿Imatá Jesús ruwarqa runas willasqanta mana uyarejtinku?

⁴ Jesusqa willasqanta mana uyarejtinkupis mana saykʼuspa paykunata yanapallarqapuni. Payqa uva huertayoj runawan kikinchakorqa. Chay runaqa tukuy imata ruwasqa higo sachʼan poqonanpaj (Luc. 13:6-9). Kay kikinchaymanta parlashajtin, Jesusqa kinsa wata kurajtaña judiosta yanapasharqa discipulosnin kanankupaj. ¿Imaraykutaj paykunawan pacienciakullarqapuni? Payqa yacharqa imaynatachus kausakusqankuta, chayrayku paykunamanta khuyakorqa.

5. ¿Imaraykú Jesús judiosmanta khuyakorqa?

⁵ Jesusqa judiosmanta khuyakorqa religionta kamachejkuna Diosta rejsinankupaj mana yanapasqankurayku. Rikorqa judiosqa “mana michejniyoj ovejas jina” kasqankuta (Mar. 6:34). Payqa yacharqa Jerusalenpi tiyakojkunamanta casi tukuyninkupuni mana creesqankurayku wañunankuta. Chayrayku wañupunanpaj pisi diasllaña faltashajtin Jerusalenmanta waqarqa (Luc. 19:41-44). Noqanchejpis Jesús jina sonqoyoj kaspa, khuyakuspa ima familiaresninchejta yanapayta munasunchej Jehovata rejsinankupaj.

6. ¿Imaraykú familianchejwan pacienciakunanchej tiyan? (Gálatas 6:9).

⁶ (Gálatas 6:9 leey). Familiaresninchej manaraj Diosmanta yachayta munajtinkupis paykunawan pacienciakuna, ‘mana saykʼuspataj allin kajta ruwanallapuni’. Runasqa mana chay ratochu creenciasninkuta cambiayta atinku, nitaj chay ratochu Diospi creeyta qallarinku. Noqanchejpis ñaupajtaqa “kay mundopi mana suyakuyniyoj, mana Diosniyojtaj” kasharqanchej (Efe. 2:12). Chayllapi uj hermano pacienciawan yanapariwarqanchej Jehovamanta yachakunanchejpaj. Noqanchejpis kikillantatajchá familianchejta yanapayta munasunman.

SONQONCHEJTA NANACHINAWANCHEJPAJ JINA PARLAJTINKU CHAYRI RUWAJTINKU

7. ¿Imaraykutaj Jesuspa hermanosnin paypi mana creerqankuchu?

⁷ Jesuspa hermanosnenqa ichapis yacharqanku Galileapi milagrosta ruwasqanta (Luc. 4:14, 22-24). Jinapis qallariypeqa mana paypi creerqankuchu (Juan 7:5). Bibliaqa mana ninchu imaraykuchus mana creesqankuta, jinapis willan judiosqa iskay imasrayku mana Jesusta qhatiyta munasqankuta. Wakenqa ichapis runa masinkuta manchachikusqankurayku (Juan 9:18-22). Wakin judiostaj Jesusta wawamantapacha rejsisqankurayku mana creeyta atillarqankuchu pay Mesías kasqanta (Mar. 6:1-4). Ichá hermanosninpis ajinallatataj yuyarqanku. Familianchejwanpis ichá jinallataj kanman.

8. ¿Imajtintaj familianchej noqanchejmanta mana allintachu yuyankuman?

⁸ Piensarina imajtinchus sonqonchejta nanachinawanchejpaj jina parlasqankuta chayri ruwasqankuta. Jesuspa familianqa payta “locoyapun” nerqanku, hermanosninpis ichá paykunallawantaj kasharqanku (Mar. 3:21). ¿Imaraykú chayta nerqanku? Bibliaqa nin Jesús runasman willashajtin mikhurikunanpajpis mana tiempoyoj kasqanta (Mar. 3:20). Chayrayku ichapis familianqa chayllapiña sayasqanta yuyarqanku. Familianchejpis ichá noqanchejmanta kikillantataj yuyankuman. Sichus ajinata yuyashasqankuta reparanchej chayqa, allin kanman ruwasqanchejwan parlasqanchejwan mana jinachu kasqanta rikuchinanchej.

9. ¿Imataj familiaresninchejta yanapanman Jehovaj testigosninmanta yuyasqankuta cambianankupaj? (1 Pedro 3:1, 2; fotostawan qhawariy).

⁹ Ruwasqanchej noqanchejmanta parlachun. Familiaresninchejwan kʼachas kajtinchej, paykunata munakojtinchej ichapis paykunaqa Jehovaj testigosninmanta niña pantasqatachu yuyankuman (1 Pedro 3:1, 2 leey). Ichapis uj hermanaj qosan mana testigochu kanman. Chayrayku hermana reunionesman rejtin, predicacionmanpis llojsejtin ichapis sapallan qhepakunman chayri phiñakunman. ¿Imatá hermana ruwanman qosan mana ajinata sientekunanpaj? Ichapis horarionta cambianman qosanwan karikunanpaj. Qosan ocupasqa kashajtin chayri wasimanta llojsejtin predicaj llojsinman. Chayta ruwajtin qosanqa kusikonqa, Jehovaj testigosninmanta yuyasqantapis cambianman.

10. ¿Imaynatá Jesús jina ruwasunman noqanchejmanta mana allinta parlajtinku?

¹⁰ Imata niwajtinchejpis ama chay rato kutichikunachu. Jesustaqa nej kanku “kay runaqa anchata mikhun, vinomanta wañusqataj” nispa. Jesustajrí mana kutichikorqachu, astawanpis paykunata nerqa ruwasqanpi reparanankuta ajinapunichus manachus kasqanta (Mat. 11:19). Chantapis imaynatachus kausakusqanpi sutʼita rikucherqa waj imaswanpis kusirikusqanta (Juan 2:2, 6-10 versiculoswan kikinchay). Noqanchejpis familiaresninchej imata niwajtinchejpis, mana kutichikunanchejpunichu tiyan. Aswan allin kanman imaynatachus kausasqanchejwan kusisqa kasqanchejta rikuchinanchej, ajinamanta paykunallataj reparanqanku mana predicacionllapichu sayasqanchejta. Imaynatachus kausasqanchejta rikuspa, cuentata qokonqanku noqanchejmanta mana allin imasta uyarisqanku llulla kasqanta.

PACIENCIAKUNA, SUYAKUNALLAPUNITAJ ASWAN QHEPAMAN JEHOVAMANTA YACHAKUNANKUTA

11. ¿Imaynatá Jesús hermanosninta qhawarqa?

¹¹ Bibliaqa nin Jesús hermanosninwan pacienciakusqanta. Jesús Canapi ñaupaj kutirayku milagrota ruwashajtin ichapis hermanosnin chaypi kasharqanku (Juan 2:11, 12). Pero ni chaywanpis paypi creerqankuchu. Jesustajrí paykunataqa mana ladoncharparqachu. Bibliapi willawanchej kinsa watasninman jina, Jesusqa kʼachamanta hermanosninwan parlasqanta (Juan 7:5-8).

12. ¿Imajtintaj suyakushallanchejpuni familianchej Jehovata sirviyta atinankutaraj?

¹² Kunallanraj sutʼinchakusqanpi yachakunchej Jehovaqa manchay khuyakuyniyoj kasqanta. Chayrayku suyakunallapuni familiaresninchej Jehovata sirviyta atinankutaraj. Llulla religiones chinkachisqa kajtinku, ichapis familiaresninchej yuyarikonqanku chay pasananta willasqanchejta (Apo. 17:16).a Chayrayku manchay ñakʼariy tiempo qallarejtin atinkumanraj Jehovata sirviyta. Kay tiempopipis familianchej llakiykunapi rikukojtinku, tukuy atisqanchejta yanaparina. Paykunawan kʼachas kajtinchej, munakuyninchejtapis rikuchejtinchej ichapis Jehovamanta yachakuyta munankuman.

MUNAKUSQANCHEJTA RIKUCHINA

13. Jehovata sirvispa ocupasqa kaspapis, ¿imatataj mana yuyachiyta munanchejchu?

¹³ Jehovata sirvispa ocupasqa kaspapis, ama familiaresninchejta yuyachinachu paykunapaj mana tiempoyoj kasqanchejta, niñataj paykunata munakusqanchejta (Mat. 7:12). Mana ajinata yuyachinapaj imatachus ruwananchejta qhawarina.

14, 15. ¿Imaynatá mana testigo familiaresninchejman munakusqanchejta rikuchisunman? Annaj kausayninmanta parlariy.

¹⁴ Paykunawan parlarinapuni. Familianchejta munakusqanchejta rikuchinapaj imaynachus riwasqanchejta willarinapuni. Amigosninchejwan karikushaspa chayri vacacionman rispa mensajitota aparichisunman, wakin fotitostawan. Uj regalitota jaywarisunman chayri uj cartitata apachisunman, ajinamanta paykunawan allinta kausakunanchejpaj. Chay imasta ruwaspa paykunata munakusqanchejta rikuchisunchej.

¹⁵ Armeniamanta hermana Annamanta parlarina. Familianwanqa khuskapuni karikoj kanku, astawanqa diachakuspi, waj fiestitaspipis. Testigoman tukojtinñataj familiaresnenqa paymanta llakikorqanku. Yuyarqanku manaña ñaupajta jinachu khuska karikunankuta, kausayninpis mana allinman tukunanta. ¿Imatá Anna ruwan? Pay nin: “Visitarishaspaqa willarinipuni imaynachus rishawasqanta, imastachus ruwasqaytapis. Chantapis paykunata wasiyman wajyarini, amigosniytapis rejsichini. Chayrayku casi tukuynin familiay amigosniyta rejsinku, kusikunkutaj paykunawan karikuspa”. Anna nillanpuni: “Familiaresniymanta ashkhasqa kusisqa kasqayta niwanku, manañataj anchata noqamanta llakikunkuchu”.

16. ¿Imaynatá Jesús rikucherqa hermanon Santiagomanta mana qonqapusqanta? (Sutʼinchaynintawan qhawariy).

¹⁶ Paykunamanta llakikusqanchejta rikuchina. Jesusqa hermanon Santiagomanta mana qonqakorqachu. Chayrayku kausarimuytawan payman rikhurerqa (1 Cor. 15:7). ¿Imaynataj Santiago kashanman karqa Jesús mana paymanta qonqapusqanta yachaspa? Ichapis chaypiraj repararqa Jesús Mesiaspuni kasqanta. Chaymantataj ichá familianman usqhayllata willamorqa paykunapis chayta reparanankupaj (Hech. 1:14).b

17. ¿Imaynatá Romanos 12:15 nisqanman jina ruwasunman? (Fototawan qhawariy).

¹⁷ (Romanos 12:15 leey). Llakiypipis kusiypipis familianchejwan khuskapuni kana. Chayta ruwajtinchej noqanchejmanta manaña pantasqatachu yuyankuman.c Ujnin familianchejpata wawitan nacekojtin felicitarisunman, uj regalitotapis jaywarisunman kusikusqanchejta rikuchinapaj. Pinillanpis wañupojtintaj sonqocharisunman, tarjetitata aparichisunman, waj jinamantapis yanaparisunman. Chantapis amapuni qonqapunachu familiaresninchejman escribiyta, wajyariyta, visitariytapis, astawanraj llakiypi rikukojtinku.

18. ¿Imaynatá Andrés jina ruwasunman?

¹⁸ Hermanosman presentarina. Andresqa Jesús Mesías kasqanta reparaytawankama hermanon Pedrota maskʼaj rerqa, paymantaj Jesusta rejsicherqa (Juan 1:40-42). ¿Imaynatá Andrés jina ruwasunman? Ichapis wakin kuti familiaresninchejta invitarisunman tantakuykunasninchejman chayri hermanoswan khuska mikhurikunapaj. Ajinamanta reparanqanku testigosqa tukuy runas jinallataj kasqanchejta, kʼachas, munakuyniyojtaj.

19. ¿Imaynataj familianchejwan kananchej tiyan wakin imasta ruwasqanchejta mana entiendewajtinchejpis? (1 Pedro 3:15).

¹⁹ (1 Pedro 3:15 leey). Familiaresninchejqa ichapis mana entiendellanqankuchu wakin imasta imaraykuchus mana ruwasqanchejta. Jinapis yuyarikonqankupuni paykunata munakusqanchejta, respetasqanchejta ima. Manaña paykunawan fiestasninkupi, costumbresninkupi khuska kajtinchejpis, mayta agradecekuwasun paykunawan waj kutispi khuska karikunapaj tiempochakusqanchejmanta. Chayrayku ichapis visitarisunman, khuska paykunawan mikhurisunman, regalitostapis waj kutispi jaywarisunman.

FAMILIARESNINCHEJ JEHOVATA SIRVINANKUTA SUYANALLAPUNI

20. ¿Imaynatá yanapawasunman Santiagomanta yachakuy?

²⁰ Santiagoqa Jesús kay jallpʼapi kashajtin mana acompañarqachu. Jinapis aswan qhepaman discipulonman tukorqa (Gál. 1:18, 19; 2:9). Payqa maytachá yachakorqa Jesús kay jallpʼapi yachachisqanmanta. Chayrayku Jehovaj yuyaychasqanman jina uj cartata qhelqarqa. Chay cartanpitaj parlarqa imatachus Jesús Orqopi yachacherqa chayman rijchʼakoj imasllatataj.d

21. ¿Imaraykutaj mana saykʼuspa familiaresninchejta yanapanallapuni tiyan?

²¹ Familiaresninchejwan kʼachas kanapaj, paykunata munakunapaj tukuy atisqanchejta kallpachakojtinchejpis, ichá nipuni cambiankumanchu, nitaj Jehovamantapis yachakuyta munankumanchu. Jinapis, ¿imajtintaj paykunawan kʼachasllapuni kananchej tiyan? Kʼachas kaspaqa Jehová jina, Jesús jinataj khuyakushanchej (Luc. 6:33, 36). Ichapis tiempowanqa paykunata munakusqanchejrayku noqanchejmanta manaña kikintachu yuyanqanku. Jehovamanta imastachus willasqanchejtapis ichá yuyarikonqanku. Familiaresninchejwan kʼacha kanapaj, paykunata yanapanapajpis tukuy atisqanchejta kallpachakullasunpuni chayqa, ichá ima ratollapis Jehovata sirviyta qallarenqanku. Chaytaj maytapuni kusichiwasun.