Diosqa yanapashawanchejña
Diosqa cuerponchejta sapallanmanta sanoyayta atinanpaj jina ruwarqa. Chayrayku khuchurpakojtinchej, rasmillarpakojtinchej, chayri imallawanpis tʼojsirpakojtinchej, cuerponchejqa sanoyapunanpaj chay rato trabajan. Ñaupajtaqa yawarta sayachin, chantá tʼiriykuchin, ajinamantataj aycha qaranchej sanoyayta qallarin.
TʼUKURINA: Diosninchej cuerponchejta sapallanmanta sanoyapunanpaj jina ruwan chayqa, may phutisqa kashajtinchej yanapallawasunmantaj mana anchata llakikunapaj. Salmo 147:3 versiculota qhelqajqa, Diosmanta nerqa: “Sonqo pʼakisqa runasta sanoyachin, nanasqasninkuta jampispa vendaykun”, nispa. ¿Imaynapí yachasunman Diosninchej pʼakisqa sonqonchejta jampinantapuni?
¿IMATÁ BIBLIA YACHACHIWANCHEJ?
Diosqa niwanchej: “Ama manchachikuychu, noqa qanwan kashani. Ama llakikuychu, noqa Diosniyki kani. Noqa kallpachasqayki, noqa yanapasqayki. Justiciata ruwaj paña makiywan japʼisqayki”, nispa (Isaías 41:10). Jehová Diosninchej munakuwasqanchejta yachayqa, sonqonchejta tiyaykuchin, llakiykunata atipanapajtaj kallpachawanchej. Apóstol Pabloqa chay “sonqo tiyaykuyta” Dios qowasqanchejta nerqa, “mayqentachus runas mana entiendeyta atinkuchu chayta”. Chantá nillarqataj: “Tukuy imapaj kallpayoj kani, Dios atiyta qowasqanrayku”, nispa (Filipenses 4:4-7, 9, 13).
Bibliaqa Jehová Diospa nisqanpi atienekunapaj yanapawanchej. Apocalipsis 21:4, 5 niwanchej imastachus Dios ruwananta, chantá imaraykuchus paypi atienekunata ima.
Diosqa runaspa “ñawisninkumanta tukuy waqayta pichanqa”. Llakiyninchej wakinpaj mana sinchʼichu kajtinpis, Jehová Diosqa tukuy llakiyninchejta, nanayninchejta ima chinkachenqa.
Tukuy atiyniyoj Diosninchejqa, cielopi “kamachina tiyanapi” tiyaykonqa. Payqa manaña ujtawan ñakʼarinanchejta saqenqachu, necesitajtinchejtaj yanapawasun.
Jehová Diosninchejpa nisqanqa, “atienekunapaj jina”, “cheqataj”. Diosqa mana llullakunchu, chayta yachayqa imatachus nisqanta juntʼananpaj uj garantía jina.
“‘Payqa ñawisninkumanta tukuy waqayta pichanqa, manañataj wañuy kanqachu, nitaj llakiypis, nitaj waqaypis, nitaj nanaypis. Chay ñaupaj kaj imasqa chinkapunña’, nispa. Kamachina tiyanapi tiyasqa kajqa nerqa: ‘Tukuy imata mosojyachishani’, nispa. Nillarqataj: ‘Qhelqay, kay palabrasqa atienekunapaj jina kanku, cheqataj kanku’, nispa” (Apocalipsis 21:4, 5).
Diostaqa ruwasqasninnejta, Biblianejta ima rejsisunman. Diospa ruwasqasnenqa, chʼinllamanta niwanchej payman qayllaykunanchejta. Bibliatajrí sutʼimanta niwanchej: “Diosman qayllaykuychej, paytaj qankunaman qayllaykamusonqachej”, nispa (Santiago 4:8). Hechos 17:27 versiculotaj niwanchej: Diosqa “mana karupichu kashan sapa ujninchejmanta”, nispa.
Diosninchejta astawan rejsispaqa, pay qanmanta llakikusqantapuni yachanki (1 Pedro 5:7). Chayta yachay, ¿yanapasunkimanchu?
Japonmanta Taro sutiyoj runamanta parlarina. Maman Diosmanta yachachejtinpis, Taroqa may sajra runaswan ujchaykukusqa. Chay runasqa Japonpi wajkunata wañuchisqankumanta, waj sajra imastawan ruwasqankumanta rejsisqa karqanku. Taro nin: “‘Diosqa chejnikuwanchá’ nej kani. Rejsisqasniy wañojtinkutaj, juchaymanta Dios castigashawasqanta piensaj kani, astawanraj familiasniy chayri amigosniy wañojtinkoqa”. Taroqa chay sajra runaswan purisqanrayku, “mana khuyarikoj sajra runaman” tukorqa. Pay nin: “Yuyarisqa kanaypaj may rejsisqa runata wañuchiyta munarqani, joventaj wañupuyta munarqani”, nispa.
Ajinapi Tarowan señoranwan Bibliata estudiayta qallarisqanku. Taroqa Bibliamanta yachakusqanman jina, kausayninta cambiarqa, rijchʼayninpis niña millaychu karqa. Taroj warmin nin: “Qosay cambiasqanqa mana creenapaj jina karqa”, nispa. Kunanqa Taro nin: “Diosqa kanpuni, sapa ujninchejmantataj llakikun. Payqa mana munanchu pipis wañunanta, astawanqa munan payman kutirikunanchejta. Diosmanqa tukuy imata willakuyta atinchej. Paytaj ni pi jina sumajta entiendewanchej. Jehová Diosqa pisimantawan tukuy llakiyta, nanayta, problemasta ima chinkachenqa. Kunanpis tukuy imaymanamanta yanapashawanchej. Payqa noqanchejmanta mayta llakikun, sonqo pʼakisqa kashajtinchejpis kallpachawanchej” (Salmo 136:23).
Tarotaqa Bibliamanta yachakusqan yanaparqa. Noqanchejtapis Diosninchej tukuy llakiyninchejta pisimantawan chinkachinanta yachayqa, aswan sumaj kausayta suyakunapaj yanapawanchej. Chantapis kunanña kusisqa kausakunapaj yanapawanchej. Kay mundo llakiykunamanta juntʼa kajtinpis, Dios munakuwasqanchejta yachayqa mayta yanapawanchej.