Diosninchej llakiykunata chinkachenqaña

Ñaupa tiempopi Habacuc sutiyoj runa nerqa: “Jehová Diosníy, ¿maykʼajkamataj yanapata mañakuspa qhaparikamusqaykiri? ¿Maykʼajtaj uyariwankiri? ¿Maykʼajkamataj mañakusqayki sajra kajmanta libranawaykitari? ¿Maykʼajtaj imallatapis ruwankiri?”, nispa (Habacuc 1:2, 3). Habacucqa mana pisi creeyniyoj kasqanraykuchu Diosman chayta nerqa. Payqa cheqan runa karqa, Diospis payta allinpaj qhawarqa. Chayrayku Diosqa payman nerqa ñakʼariykunata tukuchinanpaj uj tiempota señalasqantaña (Habacuc 2:2, 3).

Llakiypi kashajtinchej chayri familianchejmanta pillapis ñakʼarejtin, ichá ninchej: “¿Maykʼajtaj Dios kay llakiyta tukuchenqari?”, nispa. Bibliatajrí niwanchej: “Jehová Diosqa mana latʼuchu nisqanta juntʼananpaj, wakin runas yuyanku jinaqa. Astawanpis qankunawan pacienciakun. Mana munanchu ni pi chinkachisqa kananta. Astawanqa munan tukuy arrepientekunankuta”, nispa (2 Pedro 3:9).

¿MAYKʼAJTAJ LLAKIYKUNA CHINKANQA?

Diosqa pisimantawan tukuy llakiykunata chinkachenqa. ¿Imaraykú chayta ninchej? Jesusqa “kay mundoj” tukukuyninpi imaschus kananta willarqa, chaykunatataj “kay tiempomanta” runas rikunankuta nerqa (Mateo 24:3-42). Jesuspa nisqanqa kay tiempopi juntʼakushan. Chaytaj rikuchiwanchej Diosninchej llakiykunata chinkachinantapuni.a

Jehová Diosqa llakiykunata chinkachinanpaj atiyniyoj. Jesustaj kay jallpʼapi kashaspa chayta rikucherqa. Imastachus Jesús ruwasqanmanta parlarina.

Jatuchaj llakiykuna. Uj pacha, Jesuswan apostolesninwan Galilea mar qochanta rishajtinku, sinchʼi loco wayra oqharikorqa. Canoankutaj yakuman chinkaykusharqaña. Jesusrí wayrata kʼamerqa, qochatapis nerqa: “‘¡Chʼin kay! ¡Ama qhollchoqeyaychu!’, nispa. Wayrataj tiyaykorqa, may chʼintaj karqa” (Marcos 4:35-39). ¿Imatá Jesuspa ruwasqan rikuchiwanchej? Paypis Jehovapis atiyniyoj kasqankuta chinkachinankupaj: sinchʼi wayrasta, loco parasta, terremotosta, waj jatuchaj llakiykunata ima (Colosenses 1:15, 16).

Onqoykuna. Jesusqa ciegosta, suchusta, tʼuku onqoyniyojkunata, lepra onqoyniyojkunata, waj onqoyniyojkunatawan sanoyacherqa. Chaytataj ashkha runas rikorqanku. Bibliaqa Jesusmanta nin: “Tukuy onqosqastapis sanoyacherqa”, nispa (Mateo 4:23, 24; 8:16; 11:2-5).

Yarqhay. Jesusqa iskay kutispi may chhika runasman mikhucherqa. Dios payman atiyta qosqanrayku uj chhika mikhunata ashkhaman tukucherqa (Mateo 14:14-21; 15:32-38).

Wañuy. Jesusqa Diospa atiyninwan kinsa runasta wañuymanta kausaricherqa. Chaykunamanta ujtaj, tawa diastaña wañusqa kasharqa (Marcos 5:35-42; Lucas 7:11-16; Juan 11:3-44).