¿Pitaj juchayoj ñakʼarinanchejpaj?

Llakiykuna kananpaj mana Dioschu juchayoj chay, ¿pitaj juchayoj? ¿Imaraykú may chhika runas yarqhaymanta wañushanku? ¿Imaraykutaj wajchayay, guerras, onqoykuna, jatuchaj llakiykuna ima tiyan? Bibliaqa kinsa imasrayku sufrisqanchejta nin.

1. Runasqa paykunallapi yuyanku, imatapis paykunallapaj munanku, wajkunatataj chejnikunku. “Runaqa tukuy tiempo runa masinta chakisnin uraman churan, chaytaj runallata ñakʼarichin” (Eclesiastés 8:9). Ashkha runasqa mayta sufrinku runa masillankutaj ñakʼarichisqankurayku.

2. Mana suyashajtillanchej ima llakiypis chayamuwasunman. Biblia nin: “Desgracia tiempopis, mana yuyasqallamanta ima llakiypis tukuyninkuman chayan”, nispa (Eclesiastés 9:11). Ni mayqenninchej yachanchejchu ima ratochus, maypitajchus accidentakunanchejta. Wakin kutistaj, mana yuyaychakuspalla imatapis ruwasqanchejrayku chayri pantasqanchejrayku ima llakiypipis rikhurisunman.

3. Kay mundota Diablo kamachishan. Bibliaqa sutʼita niwanchej, ‘mundontin Diabloj makinpi kasqanta’ (1 Juan 5:19). Diabloqa qallariypi uj kʼacha ángel kaspapis, mana “cheqa kajpi sinchʼita sayarqachu” (Juan 8:44). Waj angelespis sajra munayninkuta ruwayta munasqankurayku Satanasman ujchaykukorqanku. Ajinapi supaykunaman chayri demoniosman tukorqanku (Génesis 6:1-5). Diospa contranta oqharikusqankumantapacha, Diablowan sajra angelesninwanqa runasta imaymanamanta ñakʼarichishanku. Chaytaj kay tiempopi astawan rikukushan. Diabloqa phiñasqa kasqanrayku “jallpʼapi kaj tukuy runasta chʼaukiyashan”. Chayrayku Biblia nin: “Ay jallpʼamanta”, nispa (Apocalipsis 12:9, 12). Satanasqa manchay sajra, runasta sufrichispa kusikun. Pay juchayoj llakiykuna kananpaj, manataj Diosninchejchu.

TʼUKURINA: Diabloqa manchay sajra, mana sonqoyojtaj. Chayrayku kʼacha runasta ñakʼarichin. Diosninchejtaj ni jaykʼaj chayta ruwanmanchu. Imajtinchus Biblia nin: “Diosqa munakuymin”, nispa (1 Juan 4:8). Chayrayku “Diosqa ni imarayku mana cheqan kajtaqa ruwanmanchu” (Job 34:10).

Jinapis ichá ninki: “¿Maykʼajtaj Diosninchej Satanasta chinkachenqari?”, nispa. Yachakunchej jina, Jehová Diosninchejqa sajra kajta chejnikun, llakikojtinchejtaj paypis llakikullantaj. Biblia niwanchej: “Diosqa qankunamanta llakikun, chayrayku tukuy llakiyniykichejta makinman saqepuychej”, nispa (1 Pedro 5:7). Diosninchejqa mayta munakuwanchej, atiyniyojtaj tukuy llakiykunata chinkachinanpaj. Chaymanta qhepan yachaqana parlashan.a