Ia Duwen Atail Kak Pousehlahte Kompoakepahnki Riatail Kristian kan

1. Ia wasa me kitail kak diar kompoakepah mehlel kan?

MOUR ni imwin rahn pwukat kak uhdahn kapwunod. Ahpw e pahn ehute apwalla ma sohte kompoakepatail mehlel kan. Siohwa ketin mwahngih duwen met, eri e ketin kapaiahkin kitail kompoakepah mehlel kan nanpwungen sapwellime aramas akan! (Mel. 119:63) Kitail wia kisehn peneinei ehu me kin kaudokiong Siohwa oh poakohng emenemen.

2. Soangen kompoakepah dah me kitail men wia ong riatail Kristian kan?

² Kitail sohte kin men ekiste esehla riatail Kristian kan. Ahpw kitail men wiahla kompoakparail keren oh loalopwoat kei. Kitail wia kisehn peneinei ehu me kin poakohng Siohwa oh Sises, oh soangen limpoak wet kin kaminiminkitailpene. (Sohn 13:35) Ahpw soangen nanpwungmwahu wet sohte kin pein wiawi. Kitail anahne doadoahk laud pwehn karanihala emenemen. Oh pwehki kitail koaros soh unsek, ekei pak kitail pahn ahneki kahpwal kan.

3. Dahme kahrehda e kakete apwal ong kitail en pousehlahte kompoakepahnki riatail Kristian kan?

³ Ni mehlel, ele kitail kin karanih ekei riatail Kristian kan sang ekei. Dahme kahrehda? Ele pwehki dahme kitail mwahuki kin duwepenehte de pil mwomwen atail madamadau oh wiewia kin duwepenehte. Ahpw kitail pahn kakete apwalki pousehlahte kompoakepahnki riatail Kristian teikan. Ekei pak, kitail kakete sohte pwungkipene mehkot oh met kak kahrehda en apwal ong kitail en karanihala emenemen. Mwein uwen mwomwen atail madamadau oh wiewia eh wekpeseng, kitail pil sohte kin perenki patpene. Oh ekei pak e kak apwal ong kitail en karanihte riatail Kristian men ni eh lokolongki soumwahu en war de pepehm. Nan iren onop wet, kitail pahn koasoiapene ia duwen mehn kahlemeng en Sises eh kak sewese kitail en pousehlahte kompoakepahnki riatail Kristian kan ni atail lelohng kahpwal kan. Ahpw, keieu kitail pahn sukuhlki ia duwen atail kahlemengih Siohwa eh kak sewese en karanihte riatail Kristian kan.

EN KAHLEMENGIH SIOHWA KIN SEWESE KITAIL EN KARANIHTE RIATAIL KRISTIAN KAN

4. Ia duwen atail kak kakehlaka atail nanpwungmwahu?

⁴ Pwehn kakehlaka atail nanpwungmwahu rehn riatail Kristian kan, kitail anahne tehk arail irair mwahu kan. Ehu ahl en tamataman arail irair mwahu kan iei sang ni atail kin patehng irail. Wahnpoaron Pohl kin uhdahn men patehng rie Kristian. Oh e ntinglahng mehn Deselonika ko oh nda: “Se wia uwen at kak koaros en pwarowei rehmwail.” (1 Des. 2:17) Me tohto pehm me ahl me keieu mwahu en kakehlaka arail nanpwungmwahu iei sang ni arail kin wiahda ahnsou pwehn tuhwong oh koasoiong kompoakparail kan. Kitail ahneki ahnsou mwahu tohto en wia met sang ni atail kin doadoahkpene nan kalohk, iang towehda mihting oh kapokon kan. Ahpw kitail kakete tehkada me en mihmihte rehn emen sohte wehwehki me kitail sohte pahn ahneki kahpwal kan me kakete kaluwetehla atail nanpwungmwahu.

5. Dahme kak sewese kitail en pousehlahte kompoakepahnki meteikan ni ahnsou me e apwal en wia met? Menlau kihda ehu karasaras. (Kolose 3:12)

⁵ Sapwellimen Koht irair kaselel kan kak sewese kitail en pousehlahte kompoakepahnki meteikan ni ahnsou me e apwal en wia met. (Wadek Kolose 3:12.) Oh ni atail kin kakairada irair en aktikitik, kanengamah, kadek, oh poakehla meteikan, kitail pahn kak powehdi kahpwal kan oh kolokolete atail nanpwungmwahu. Pwehn karasahda met, duwehte misihn en sidohsa ehu eh kin anahne oil pwehn kak doadoahk mwahu, kitail pil anahne kakairada sapwellimen Koht irair kaselel kan pwehn kak ehupene. Met kitail pahn tehkpene kahpwal siluh me kak kahrehda en apwal ong kitail en pousehlahte kompoakepahnki riatail Kristian kan. Oh ong ehuehu kahpwal pwukat, kitail pahn koasoiapene ia duwen atail kahlemengih sapwellimen Sises aktikitik, kanengamah, kadek, oh poakehla meteikan eh kak sewese kitail en pousehlahte wia kompoakepah mehlel kei ong meteikan.

NI AMWA SOHTE PWUNGKIPENE MEHKOT

6. Dahme kahrehda e kakete apwal en kompoakepahnkihte emenemen ni amwa sohte pwungkipene mehkot?

⁶ Dahme kahrehda met wia kahpwal ehu? Ni meh riemen ara sohte pwungkipene mehkot, emenemen kin kalapw kamehlele me eh madamadauo me pwung. Medewehla brother riemen me sohte pwungkipene ahl me keieu mwahu en koasoanehdi ara pwihn en kalohk. Emenemen kamehlele me eh madamadauo mwahusang ahn meteio. Nan irair wet, ara sohte pwungkipene mehkot tikitik kakete laudla oh kak kahrehiong en apwal ong ira en kompoakepahnkihte emenemen. Ira kakete tepida nsenohki en kin pwung laudsang ara nanpwungmwahu. Ma ira sohte koasoiapene kahpwalo oh kamwahwihala, ira kakete lingeringerda pahn emenemen. Ekisekis, ira kakete tepida sohla tehk emenemen, oh mwuri uhdihsang kompoakepahnki emenemen—ihte pwehki ara sohte pwungkipene mehkot tikitik.

7. Ia duwen Sises eh ketin padahkihong sapwellime tohnpadahk ko me re anahne aktikitik pwehn kak kapwungala dahme re sohte pwungkipene?

⁷ Kahlemengih sapwellimen Sises aktikitik. Sises ketin padahkihong sapwellime tohnpadahk ko me re anahne aktikitik pwehn kak kapwungala dahme re sohte pwungkipene. Erein ahnsou ehu, wahnpoaron ko kin akahkamaiki ihs me keieu lapalap nanpwungarail. Pwehn wekidala madamadau wet me uhdahn kehlail rehrail, Sises ketin padahkihong irail me re anahne wiahki meteikan lapalapasang irail. (Mad. 20:​25-28) Ei, e ketin padapadahkihong irail ia duwen arail pahn kin aktikitik. Pil nipwongo mwohn eh pwoula, Sises ketin “wiadahr mehn kahlemeng ehu” ong irail sang ni eh kasalehda aktikitik oh wia doadoahk en lidu men—widen patehn neirail ko. (Sohn 13:​3-5, 12-16) Sang ni eh ketin wia met, e kasalehiong irail ia duwen arail kak pousehlahte ahneki nanpwungmwahu rehn emenemen. Ma irail kin wiahki meteikan lapalapasang irail, met pahn mengei ong irail en pwungki ahn meteikan madamadau pil ni ahnsou me arail madamadau weksang ahn meteikan. E pahn pil mengei ong irail en kompoakepahnkihte emenemen ni ahnsou me re sohte pwungkipene mehkot.

8. Ia duwen aktikitik eh kak seweseiuk ken pousehlahte kompoakepahnki riomw Kristian kan ni amwa sohte pwungkipene mehkot? (Kolose 3:13) (Pil kilang kilel kan.)

⁸ Ia duwen omw kak pousehlahte kompoakepahnki riomw Kristian kan? Aktikitik kak seweseiuk ken pohnsehsehla mehkot tikitik me ke sapwungki oh mahkohng meteikan. (Wadek Kolose 3:13.) Ma ke kin aktikitik, ke pahn pousehlahte kompoakepahnki meteikan oh dehr kin lingeringerda ni omw sapwungki mehkot. (Mel. 4:4) Ni atail kin ndahla mehkot me kin kamedekihala emenemen, tamataman me kitail koaros kin ndahla soahng kan me kitail kin koluhkihla mwuhr. (Ekl. 7:​21, 22) Pein idek rehmw, ‘I kin kesempwalki en pwung laudsang en kolokolete at nanpwungmwahu?’ Ke kak pilada en pwungki en aramas teio eh madamadau. Oh ke kak ahneki popohl sang ni omw pilada en dehr medemedewe de pwurehng koasoiahda dahme ke sapwungkio.

9. Ia duwen aktikitik eh pahn seweseiuk ni ahnsou me ke apwalki kapwungala sawehwe ehu? (Lepin Padahk 17:9)

⁹ Aktikitik pil kak seweseiuk ni ahnsou me ke apwalki kapwungala sawehwe ehu. Dehr akamai pwehn song en kadehdehda me dahme ke medeweo me pwung. (Wadek Lepin Padahk 17:9; 1 Kor. 6:7) Tamataman me ke men pousehlahte kompoakepahnki riomw Kristiano. Me tohto kin kak wia met sang ni arail kin koasoiong meteio ni kadek pwehn kapwungala sawehweo. (Mel. 34:14) Ke kak nda: ‘Kita kin ese emenemen sangete rahnteio. Mie mehkot sapwung me ke men kita en koasoiapene?’ Onopada pwehn kasalehda wasa me ke sapwungo, pohnese ma ke kansensuwedihala kompoakpahmwo, oh pekimahk reh. Oh ma riomw brother de sistero pil pekimahk rehmw, kasalehda aktikitik oh mahkohng. (Luk 17:​3, 4) Tamataman me omw mehn akadei iei en kapwungala sawehweo oh kolokolete amwa nanpwungmwahu, a kaidehn en kasalehda ihs me pwung oh sapwung.—Lep. Pad. 18:24.

NI AMWA MADAMADAU OH WIEWIA EH WEKPESENG

10. Dahme kak kahrehda en apwal ong kitail en pousehlahte kompoakepahnki riatail Kristian kan?

¹⁰ Dahme kahrehda met wia kahpwal ehu? Kitail kakete apwalki pousehlahte kompoakepahnki riatail Kristian kan me arail madamadau oh wiewia weksang atail. Ele en ekei tiahk oh wiewia kin kalidorih kitail. Ekei kakete sehse patehng oh pil koasoiong meteikan pwehki mwein mie me wiakauwe irail mahso de re tikida nan tiahk ehu me aramas akan sohte kin kasalehda arail pepehm de re kin perenki koasoi. De mwein kitail wekpeseng pwehki emen kin perenki patehng meteikan, a meteio kin namenek.

11. Dahme sewese Sises en kak ketin pousehlahte kompoakepahnki irail kan me arail madamadau oh wiewia weksang sapwellime?

¹¹ Kahlemengih sapwellimen Sises kanengamah. E kin ketin pousehlahte kompoakepahnki irail kan me arail madamadau oh wiewia weksang sapwellime. Karasepe, wahnpoaron Seims oh Sohn kasalehda me ira men kesempwalsang meteikan ni ara peki dehu kesempwal kan nan Wehio. (Mark 10:​35-37) Weksang met, Sises ni aktikitik ketin kohkohsang sapwellime dehu lapalapo nanleng iangahki doadoahk kesempwal kan me e kin wia pwehn ketidihdo nin sampah. (Pil. 2:​5-8) Medewehla ia uwen arail madamadau ar wekpeseng. Ahpw, Sises kin ketin kanengamahiong Seims oh Sohn oh pil meteikan.

12. Dahme sewese Sises en kin ketin kanengamahiong kompoakepah kan?

¹² Sises sohte ketin kasik kompoakepah kan ren ahneki madamadau pwung ahnsou koaros. E mwahngih me Seims oh Sohn duwehte tohnpadahk tohto me kin nohn kesempwalki dehu kan. (Mark 9:34) Sises pil ketin tikida nan soangen tiahkohte. Ni ahnsowo, kaunen pelien lamalam kan kin kangoange aramas akan en kesempwalki dehu kan oh pil en ndandla. Eri Sises kak ketin wehwehki en sapwellime tohnpadahk ko madamadau. Mendahki met, e kin ketin kanengamahiong irail, kihong irail ahnsou pwe ren kihsang madamadau en aklapalap oh en kesempwalsang meteikan, me re kin ekisekis kakairada erein sounpar tohto.—Mark 10:​42-45.

13. Ia duwen kanengamah eh pahn sewese kitail en pousehlahte kompoakepahnki riatail Kristian kan? (Episos 4:2)

¹³ Ia duwen omw kak pousehlahte kompoakepahnki riomw Kristian kan? Kalaudehla omw kanengamah sang ni omw kin song en pohnese tiahk de wiewia me riomw Kristian kan ahneki me kin kalidorihiuk. (Lep. Pad. 14:29) Kitail koaros ahneki irair oh wiewia me wekpeseng, oh pali laud en soahng pwukat sohte wia sapwung kei, ahpw e kin kasalehdahte soangen aramas dah kitail. Eri kitail anahne kalahnganki ni meteikan ar kin kanengamahiong kitail. (Wadek Episos 4:2.) E pil kesempwal kitail en mendahkihla meteikan ar weksang kitail. Karasepe, medewehla ia uwen eh apwal ong emen me kin namenek en patehng oh koasoiong meteikan. Ahpw kitail pil anahne kanengamahiong emen me kin perenki patehng oh koasoiong meteikan ahnsou koaros. Kitail sohte kak kasik en wia kompoakepah keren kei rehn koaros, ahpw kitail anahne tamataman me Kristian kan me arail madamadau oh wiewia uhdahn wekpeseng, kak doadoahkpene.

14. Dahme atail kanengamah pahn sewese kitail en kilikilangete?

¹⁴ Kanengamah pahn sewese kitail en kilikilangete irair mwahu en riatail Kristian kan. Ni atail wia met, kitail sohte pahn mweidohng soahng kan me kitail wengkipeseng en wia mehkot me pahn kauhkitaildihsang en kompoakepahnki emenemen. Karasepe, Seims oh Sohn kasalehda roporop ni ara men alehdi dehu laud. Ahpw ara pekipeko kasalehda me ira kamehlele me Wehio pahn uhdahn ketido. Sises mwahngih duwen met oh ketin kesempwalki ara pwoson. Ni atail kin rapahki soahng mwahu kan duwen kompoakepatail kan, kitail kin kahlemengih Sises oh pil Semeo, Siohwa.

15. Ihs me kak sewese kitail en pousehlahte kompoakepahnki irail kan me arail madamadau oh wiewia weksang atail?

¹⁵ Kesempwalsang mepwukat koaros, kitail kak kapakapohng Siohwa pwehn ketin sewese kitail en pousehlahte kompoakepahnki irail kan me arail madamadau oh wiewia weksang atail. Song en medewehla irair kan me kak kahrehiong uhk ken lidorkihda aramaso oh kapakapki duwen met mwohn eh wiawi pwe ken kak ahnekihte meleilei. Tamataman me Siohwa, nin duwen Sounkapikpatail, ketin mwahngih me kitail koaros wekpeseng. Eri ni omw kin kapakap, kamehlele me Siohwa ketin mwahngih dahme ke anahne pwe ken pousehlahte dadaur. Oh ni omw pehm me e apwal ong uhk ken kanengamahte, peki Siohwa en ketikihong uhk ngehn sarawi pwehn seweseiuk kaunda omw pepehm oh wiewia.—Luk 11:13; Kal. 5:​22, 23.

NI RIATAIL KRISTIAN KAN AR KIN LOKOLOK

16. Soangen kahpwal dah kan me kitail kakete lelohng ni riatail Kristian kan ar kin lokolok?

¹⁶ Dahme kahrehda met wia kahpwal ehu? Ni riatail Kristian kan ar lokolongki soumwahu en war de pepehm, re kakete nda de wia soahng kan me kalidorih kitail. Karasepe, ele re pahn kin men kelehpwla, mwadang en lingeringerda, de pil wia soahng kan me kitail sohte kasik. Re pil kakete nda oh wia soahng kan me kamedekeikitailla. (Sohp 6:​2, 3) Mwein met pwehki re kin lelohng kahpwal kan me kitail sohte ese duwe. Kahrehda e sohte pahn mengei ong irail en wia dahme kitail medewe me re anahne wia.

17. Dahme ke sukuhlkihsang dahme Sises ketin wiahiong ohl maskuno, Pardimeus?

¹⁷ Kahlemengih sapwellimen Sises kadek oh poakehla meteikan. Sises kin ketin kadekohng oh poakehla irail kan me kin lokolok, pil iangahki irail kan me e saikinte tuhwong. Karasepe, medewehla duwen sapwellime wiewia ong ohl maskuno Pardimeus. Ni eh rongada me Sises ketiket wasao, Pardimeus tepida wer pwe Sises en kak tehk ih. Ekei nan pokono kin ndaiong Pardimeus en dehr katairong. Ahpw e ehute kalaudehla eh weriwer pwehki e men Sises en kamwahwihala ih. Mwein ekei nan pokono lidorkihda dahme Pardimeus wiao. Ahpw Sises ketin ‘poakehla’ Pardimeus oh kupwurki sewese. (Mad. 20:34; Mark 10:​46-52) E mahseniong Pardimeus ni kadek oh kapingahki eh pwoson. Oh Sises ketin wiahda manaman ehu sang ni eh ketin sewese Pardimeus en pwurehng kilangada wasa.

18. Ia pahn mwomwen omw wiewia ong kompoakepahmw kan me kin lokolok? (1 Deselonika 5:14)

¹⁸ Ia duwen omw kak pousehlahte kompoakepahnki riomw Kristian kan? Kasalehda kadek oh poakehla meteikan. Irair pwukat pahn seweseiuk ken kin meleilei oh “kansenamwahwih” riomw Kristian kan me kin lokolongki soumwahu en war de pepehm. (Wadek 1 Deselonika 5:14.) Tamataman me kompoakepah mehlel men kin ahnsou koaros onopada pwehn sawas, ahpw mehlel “ni ahnsoun apwal.” (Lep. Pad. 17:17) Kompoakepah mehlel men kin poakehla irail kan me kin lokolok. E pil kin wia uwen eh kak koaros pwehn sewese irail en kehlail oh ahneki meleilei, koasoia soahng kan me pahn kangoange irail, oh sewesehkin irail dahme re anahne.

19. Ia duwen atail kak kasalehda kadek oh poakehla meteikan? (Pil kilang kilel kan.)

¹⁹ Ia ekei ahl mwahu en kasalehda kadek oh poakehla meteikan? Ei mehlel, ke sohte kak kamwahwihala en kompoakepahmwo eh soumwahu en war de pepehm. Ahpw ke kak song en wehwehki eh irair kan ni uwen omw kak. (Mad. 7:12; 1 Pit. 3:8) Rong kanahieng ni eh koasoiaiong uhk duwen eh irairo. Oh ma konehng, song en ndaiong mehkot me pahn kansenamwahwih. (Lep. Pad. 12:25) Kanahieng en dehr medewe me ke ese soahng koaros duwen eh irairo. (Lep. Pad. 18:13) Nantihong kanengamahiong oh dehr kasik mehkot laud sang reh.—Ep. 4:32.

20. Soangen kompoakepah dah me ke men wia?

²⁰ Kitail kin kesempwalki kompoakepah mehlel kan me kitail ahneki nan sapwellimen Siohwa pwihn. Ahpw kitail koaros soh unsek oh tohto kitail lelohngehr soahng suwed kan nan atail mour. Ihme kahrehda kitail koaros kin ekei pak wia de nda soahng kan me kin kamedekihala meteikan. Eri kitail kin uhdahn kalahnganki ni riatail Kristian kan ar kin aktikitik, kanengamah, kadek, poakeikitailla, oh pilada en pousehlahte kompoakepahnki kitail. Oh kitail pil men wia uwen atail kak koaros pwehn wia soangen kompoakepah wet ong meteikan.