Ia Duwen Atail Kak Loalopwoatete ni Atail Lelohng Kahpwal

1-2. Dahme wiawi erein Sises eh ketin padapadahk nan Kapernaum?

“PADAHK pwoatet meid nohn kapwuriamwei; ihs me kak rong?” (Sohn 6:60) Ih met me sapwellimen Sises tohnpadahk tohto ndahki dahme Sises mahsanih erein eh ketin padapadahk nan Kapernaum. Pwe Sises mahsanih: “Ma kumwail sohte pahn tungoale uduken Nein-aramas oh nim ntah, kumwail sohte ahneki mour.” E pil doula mahsanih: “Mehmen me kin tungoale udukei oh nim ntahi kin ahneki mour soutuk oh I pahn kaiasada ih ni imwilahn rahn.”—Sohn 6:​53, 54.

² Kahrehda tohnpadahk tohto sohla idawehn Sises. Ia duwe, met pwehki re sohte douluhl kin pwoson ih? E mwomwen me ekei ahneki pwoson pwehki mwohnte met eh wiawi, re kilang dahme Sises ketin wia oh re nda: “Met iei uhdahn Soukohpo me pahn pwarodohng sampah.” (Sohn 6:14) Eri e sansal me tohnpadahk ko kin pwoson Sises. Ahpw ni ahnsou me e ketin padahngki mehkot me re sohte kak wehwehki, re sohte loalopwoatohng ih.

3. Dahme wahnpoaron ko wia oh dahme kahrehda? (Pil kilang kilel.)

³ Ahpw wahnpoaron ko loalopwoatohng Sises. Ni ahnsou me Sises keinemwe ma re pil men iang kohkohla, Piter sapengki: “Maing Kaun, ihs me se pahn kohla reh? Komw sapwellimanki mahsen en mour soutuk. Se kamehlelehier oh eseier me Sapwellimen Koht me Sarawio komwi.” (Sohn 6:​68, 69) Piter oh wahnpoaron ko ele sohte uhdahn wehwehki ia wehwehn sapwellimen Sises mahsen ko ni eh mahsanih me ren tungoale uduke oh nim ntah. Ahpw re pilada en loalopwoatohngete Sises. Dahme kahrehda? Pwehki re uhdahn kamehlele me Sises iei “Sapwellimen Koht Krais.”—Luk 9:​20, 35.

4. Dahme kakete kasonge atail loalopwoat ong Siohwa?

⁴ Mie soangen irair kan me kakete kasonge atail loalopwoat ong Siohwa. Karasepe, dahme kitail pahn wia ma atail pwihn wekidala mwomwen atail kin wehwehki iren Paipel ehu de mwomwen atail kin kalohk? De dahme kitail pahn wia ma kitail apwalki en wehwehki kahrepen Siohwa eh ketin mweidohng kitail en lokolongki kahpwal laud ehu? Atail pwoson pil kak lelohng songosong ma kompoakepatail Kristian keren men kamedekeikitailla de emen me kitail wauneki wiahiong kitail wiewia sapahrek.

5. Dahme kahrehda kitail anahne kakehlaka atail pwoson? Menlau kihda ehu karasaras. (Kolose 1:23)

⁵ Pwehn karasahda kesempwalpen en ahneki poahsoan kehlail ong atail pwoson, medewehla duwen ihmw ehu me wiawihda nan wasa ehu me rerrer en sahpw kin kalapw wiawi. Poahsoan en soangen ihmw wet kin anahne kehlail pwehn dehr mweredi. Duwehte met, pwe kitail en kak powehdi soahng kan me kak kasonge atail pwoson, me duwehte dahme kitail koasoiapenehr nan parakrap en mwoweo, poahsoanpen atail pwoson anahne kehlail. Ma kitail kin kangkakehlaka poahsoanpen atail pwoson, kitail pahn pousehlahte wia sapwellimen Siohwa ladu loalopwoat oh kehlail kei ni atail lelohng kahpwal kan.—1 Kor. 15:58; wadek Kolose 1:23.

6. Dahme sewese wahnpoaron ko ren loalopwoatohngete Sises?

⁶ Dahme sewese wahnpoaron ko ren loalopwoatohngete Sises ni me tohto ar sohla idawehn ih? Wahnpoaron ko kamehlele me Siohwa ketin warohng arail kaudok pwehki ih me Sounwiepen mehkoaros; me Sises iei sapwellimen Koht Ohlo me sapwellimanki “mahsen en mour soutuk”; oh me Siohwa kin ketin utung dahme Sises kin ketin wiewia. Mie soahng tohto me kitail sukuhlkiher duwen Siohwa me kak sewese kitail en loalopwoatohngete ih ni atail lelohng kahpwal akan. Kitail pahn koasoiapene soahng siluh: (1) Siohwa iei Sounkapikpen mehkoaros. (2) Siohwa ketin kaweid ntingdahn Paipel. (3) Siohwa kin ketin utung sapwellime aramas akan rahnpwukat. Ma kitail uhdahn kamehlele padahk mehlel siluh pwukat, kitail pahn loalopwoatohngete Siohwa ni mehkoaros.

SIOHWA IEI SOUNKAPIKADA

7. Dahme Kaudiahl 4:11 katamankihong kitail, ahpw dahme kakete wiawi ni atail lelohng kahpwal kan?

⁷ Wadek Kaudiahl 4:11. Ire wet katamankihong kitail me Siohwa me ketin kapikada mehkoaros. Met wia kahrepe kesempwal ehu kitail en kaudokiong ih. Oh ni atail kin doudouloale duwen uwen eh ketin manaman, kitail kin kamehlelehla me e kak ketin doareikitailsang atail kahpwal akan koaros. Ahpw Sehdan kadirehkilahr sampah wet likamw kan me kin kahrehiong aramas akan ren peikasalki ma Koht ketin mie. Ekei saintis pil kin nda me dene mour pein miehla. Ma kitail sohte kamehlelehiong pein kitail me Siohwa iei Sounkapikada oh me e ketin poakohng kitail, kitail kakete tepida peikasalki me e ketin mie oh me e pahn ketin sewese kitail ni atail lelohng kahpwal kan.—Ipru 11:6.

8-9. Dahme ke anahne wia ma ke tepida peikasalki me Siohwa iei Sounkapikada? (Pil kilang kilel.)

⁸ Ma ke tepida peikasalki me Siohwa iei Sounkapikada, eri mwadang wia mehkot. Rapahki ire kan nan neitail sawaspen Paipel kan duwen kahrepen omw kak kamehlele me Siohwa me ketin kapikada mehkoaros. Ke kak diar ire kan me kak kakehlaka omw pwoson nan kisin pwuhk ko Was Life Created? oh The Origin of Life—Five Questions Worth Asking. Ke pil kak diar mehn kadehde teikan nan pali me oaralape “Was It Designed?” nan jw.org. Sister pwulopwul men nan United States me adaneki Jessica, koasoia: “Mwurin ei wadek kisin pwuhko Origin of Life, e sansal ong ie me mie mehn kadehde me mie emen me erpit me kapikkitailda. I eseier met, ahpw pwuhko sewese ien kalaudehla ei kamehlele duwen met.” Me tohto pil paiekihda ni arail wadek iren mehn kasukuhl 6 oh 7 en pwuhko Pereperenki Mour Kohkohlahte! Mwein ke wadekehr mepwukat. Ahpw e sou pahn mwahu ken pwurehng wadek?

⁹ Karasepe, ke kak pein onopki duwen ire mehlel kan me kadehdehda me Koht ketin mie. Omw wia roporop pahn seweseiuk en kakehlakahda omw pwoson me Siohwa ketin mie oh pil seweseiuk wehwehkihla mwahu duwen ih. (Rom 1:20) Patehng met, ke pil pahn kak doadoahngki dahme ke sukuhlki pwehn sewese meteikan me kakete peikasalki ma Koht ketin mie. Ire kesempwalo: Siohwa ketikidahr mehn kadehde tohto me kasalehda me ih me Sounkapikada.

Nebula: IAC/RGO/David Malin Images; fish and car: Mercedes-Benz USA; plane: Kristen Bartlett/University of Florida

SIOHWA KETIN KAWEID NTINGDAHN PAIPEL

10. Dahme kahrehda Paipel uhdahn kesempwal ong kitail? (2 Timoty 3:​16, 17)

¹⁰ Wadek 2 Timoty 3:​16, 17. Paipel iei sapwellimen Siohwa mahsen ong aramas akan. E kin sapengala peidek kesempwal kan nan mour oh padahkihong kitail ia kupwuren Siohwa oh dahme e ketin kupwurki kitail en wia. Kitail kamehlele me Siohwa me ketin kaweid ntingdahn Paipel, kahrehda Paipel wia pwuhk me keieu kesempwal nan atail mour. Kitail men tehk mwahu me kitail wehwehki sapwellime Mahsen oh kin wia uwen atail kak koaros en kapwaiada.

11. Dahme kamehlelehiong uhk me Koht me ketin kaweid ntingdahn Paipel?

¹¹ Dahme kahrehda kitail kamehlele me Siohwa me ketin kaweid ntingdahn Paipel? Mie kahrepe tohto. Mahsen en Koht kin pwungohng poadopoad. (Luk 3:​1, 2) E pil kin kawehwehda ni pwung duwen kepikipik kan. (Sohp 26:7) Paipel iei pwuhk me keieu kohpeseng nan sampah mendahki Sehdan kin pwurupwurehng song en kasohrehla. Mpen ohl 40 ntingihedi Paipel oh e ntingdi mpen sounpar 1,600; ahpw dahme re kin ntingihedi kin pwungpene. E audaudki kaweid me kin mwahu sangete mahs leledo met, oh e sewesehier me rar kei rahnpwukat nan arail mour en ehuehu rahn. (Lep. Pad. 13:20; 15:21; Mad. 7:12) Patehng met, kokohp en Paipel tohto pweidahier oh met kadehdehda duwen likilik en Paipel. (Sos. 23:14) Eri kitail kak uhdahn kamehlele me Koht me ketin kaweid ntingdahn Paipel!

12. Dahme kitail anahne wia ma kitail tepida peikasalki me Koht me ketin kaweid ntingdahn Paipel?

¹² Dahme kitail anahne wia ma kitail tepida peikasalki me Koht me ketin kaweid ntingdahn Paipel? Kitail anahne kapakapkihong Siohwa oh padahkihong duwen atail pepehm, peki sapwellime sawas, oh mwuri wia roporop. Tehk dahme brother pwulopwul men me adaneki Jordan, me tikida nin duwen Sounkadehde men, koasoia: “I sohte kin mwadangete kamehlele soahng koaros me aramas ndahng ie. I kin anahne pein tehk me dahme I kamehlele kin mehlel. Ni mehlel, e kin miehte ahnsou me I kin peikasalki soahng kan. Ahpw ni met eh kin wiawi, I kin wia uwen ei kak koaros en wia roporop nan neitail sawaspen Paipel kan pwehn sapengala ei peidek kan.” Ni atail kin pousehlahte kakehlaka atail kamehlele me Siohwa me ketin kaweid ntingdahn Paipel, kitail pahn kakehlakahda poahsoanpen atail pwoson.—1 Kor. 3:​12, 13.

SIOHWA KIN KETIN UTUNG SAPWELLIME ARAMAS AKAN RAHNPWUKAT

13. Dahme kitail anahne wia ma kitail tepida peikasalki duwen ihs me wia sapwellimen Koht aramas akan rahnpwukat?

¹³ Ma kitail tepida peikasalki me Sounkadehdehn Siohwa kan me Siohwa kin ketin doadoahngki rahnpwukat, kitail anahne mwadang wia mehkot. Karasepe, kitail kak medewe duwen pasapengpen peidek pwukat: ‘Ihs me kin uhdahn nantihong pwe ren mour pahrekiong dahme Paipel mahsanih? Mehnia pwihn me arail padahk kan kin uhdahn poahsoankihda Paipel?’ (2 Tim. 4:​3, 4) ‘Ihs me kin wia kupwuren Siohwa rahnpwukat?’—Mad. 7:​20, 21.

14. Ia duwen Koht eh kin ketin doadoahngki Sounkadehdehn Siohwa kan pwehn kapwaiada Madiu 24:14?

¹⁴ Me pid wia kupwuren Koht rahnpwukat, kitail kak pein idek rehtail, ‘Ihs me kin wia doadoahk en kalohk me Sises ketin kohpada pahn wiawi erein imwin rahn akan?’ (Mad. 24:14) Pasapengo uhdahn sansal. Koht kin ketin doadoahngki sapwellime aramas akan—Sounkadehdehn Siohwa kan—pwehn wia doadoahk en kalohk. Kitail kelehpw kin kalohki rongamwahu en Wehin Koht nan sahpw daulih 240. Kitail wiahkier doadoahk wet dauliher sounpar 100 pahn kaundahn Wehio. Doadoahk en kalohk kin ahnsou koaros wia doadoahk me keieu kesempwal ong sapwellimen Koht aramas akan.—Mad. 28:​19, 20.

15. Ia duwen Sounkadehdehn Siohwa kan ar kin sewese kasarawihala mwaren Koht rahnpwukat? (Madiu 6:9; Aiseia 43:10)

¹⁵ Wadek Madiu 6:9 oh Aiseia 43:10. Kitail kin pohlki adaneki Sounkadehdehn Siohwa kan. Pali laud en aramas akan nan sampah rahnpwukat sehse me mwaren Koht iei Siohwa. Ahpw kitail wiahier doadoahk laud pwehn kapwurehiong mwar wet nan Paipel duwehte me ntingdier nin tapio. Oh mwar wet pwarada daulih pak 7,000 nan Paipel—Kawehwehn Sampah Kapw.

16. Dahme kahrehda kitail kak nda me Sounkadehdehn Siohwa kan kin peikiong kehkehliko nan Sohn 13:​34, 35? (Pil kilang kilel.)

¹⁶ Wadek Sohn 13:​34, 35. Rahnpwukat aramas tohto sohte kak ehupene oh re kin kailongki meteikan. Ahpw sapwellimen Siohwa aramas akan weksang irail. Kitail kin uhdahn poakohng emenemen oh miniminpene. Kitail kohsang soangsoangen wasa kan nan sampah oh mwomwen atail tikida pil wekpeseng; ahpw kitail kin wia uwen atail kak koaros en ahneki popohl oh limpoak nanpwungatail. Ni ahnsou me ke seiloak, mie pak me ke mwemweitla ni ehu mwomwohdiso? Ma ke wia met, tehk duwen limpoak oh miniminpenehn riatail Kristian kan. Met pahn kasansalehda me Siohwa kin uhdahn ketin doadoahngki sapwellime Sounkadehde kan pwehn kapwaiada kupwure rahnpwukat. Oh atail tamataman met kak sewese kitail en loalopwoatohngete Siohwa ni atail lelohng kahpwal kan.

DEHR KOHKOHSANG SIOHWA

17-18. Soangen kahpwal dah kan me kitail kakete lelohng, ahpw dahme kitail kak nda ni soh peikasal?

¹⁷ Kitail kin momour erein ahnsou apwal oh keper, kahrehda imwin rahn pwukat uhdahn pahn apwal ong kitail koaros. (2 Tim. 3:​1, 13) Oh kitail pil kakete lelohng soangen irair apwal teikan. Sapwellimen Koht pwihn kakete wiahda pilipil kan me kitail sohte nohn wehwehki. De riatail Kristian men kakete wia mehkot me kamedekeikitailla. Mwein kitail sohte pahn kak mwadang kamwahwihala atail kahpwalo de kitail pil saikinte wehwehki kahrepen mehkot eh kin wiewiawi.

¹⁸ Mehnda ma kitail kin nsensuwedkihla de pwunodkihda dahme wiewiawihong kitail, kitail kak ahnsou koaros loalopwoatohng Siohwa. Dahme kahrehda? Pwehki kitail ese me ih me Sounkapikada, Paipel iei sapwellime Mahsen, oh me Sounkadehdehn Siohwa kan iei sapwellime aramas akan. Duwehte dahme Piter patohwanohng Sises, kitail pil kak patohwanohng Siohwa: “Ihs me se pahn kohla reh? Komw sapwellimanki mahsen en mour soutuk.”