Wauneki en Meteikan Pilipil

1-2. Dahme kahrehda ekei pak atail pilipil kan kin weksang ahn meteikan?

MIE pak me aramas kauweiuk pwehki pilipil me ke wiahda? A mie pak me ke kadeik riomw Kristian men pwehki pilipil me e wiahda? Mwein pali laud en kitail pahn sapengki ‘ei’ ong peidek riau pwukat.

² Kitail sohte pahn pwuriamweikihla me ekei pak atail pilipil kan kin weksang en riatail Kristian lelepek teikan arail pilipil. Dahme kahrehda? Pwehki kitail koaros wekpeseng. Emenemen kitail kin mie pein eh madamadau. Wasa oh peneinei me kitail tikida loale oh soahng kan me kin wiawihong kitail nan atail mour kin kamwakid mwomwen atail madamadau. Ahpw mendahki atail madamadau kan kin weksang ahn meteikan, kitail en dehr mweidohng met en kauwehla popohl oh minimin nan mwomwohdiso.—Ep. 4:3.

3. Dahme kakete kahrehiong kitail en kadeik riatail Kristian men pwehki pilipil me e wiahda?

³ Ni ahnsou me riatail Kristian men kin wiahda pilipil ehu me kitail sapwungki, kitail kakete medewe me kitail anahne ndaiong en wekidala eh pilipilo, de kitail kakete pehm me kitail anahne ndaiong meteikan me eh pilipilo sapwung. Ele kitail men sewese ih pwehki kitail nsenohki. Kitail kin poakohng riatail Kristian kan, oh kitail men ren nsenamwahu. (Lep. Pad. 17:17) Ihme kahrehda kitail sohte men kilang irail wiahda pilipil ehu me re pahn koluhkihla mwuhr de me kak kauwehla arail nanpwungmwahu rehn Siohwa.

4-5. Dahme kitail pahn wia ma riatail Kristian men pilada en wia mehkot me weksang dahme kitail pahn wia?

⁴ Ia duwe, kitail anahne koasoiaiong riatail Kristian men atail madamadau ma kitail sapwungki eh pilipil? Ekei pak kitail anahne wia met, ahpw ekei pak soh. Karasepe, ma kitail diarada me e medemedewe en wia mehkot me pahn kauwehla kehkehlik en Paipel ehu, eri pwehki kitail poakohng ih, kitail anahne song en sewese ih en kapwungala eh madamadau. (Lep. Pad. 27:​5, 6) Ahpw dahme kitail pahn wia ma en riatail Kristian men pilipil weksang atailo, ahpw sohte kauwehla ehu sapwellimen Koht kosonned ko? Paipel kihong kitail pasapengo: Kitail en ‘dehr kadeik irail kan me ar madamadau weksang atail.’—Rom 14:1.

⁵ Ahpw kitail pahn kakete apwalki wauneki eh pilipilo. Nan iren onop wet, kitail pahn koasoiapene kahrepen atail anahne wauneki pilipil kan me meteikan wiahda oh ia duwen atail kak wia met. Ahpw keieu, kitail pahn koasoiapene ekei irair kan me pidada pilipil kan me emenemen kin pein wiahda me kakete kahrehiong kitail en kadeik riatail Kristian kan.

DAHME KAHREHDA KITAIL KAKETE KAUWE PILIPIL KAN ME METEIKAN WIAHDA?

6-7. Ia ekei karasaras kan me kakete kahrehiong kitail en medewe me meteikan wiahda pilipil sapwung?

⁶ Duwehte me kitail koasoiapenehro, pwehki mwomwen atail tikida de dahme kin wiawi nan atail mour, kitail kin kalapw medewe me mehkot anahne wiawi ni soangen ahl ehu. Oh kitail kin kakete medewe me meteikan pil kin ahneki soangen madamadau me kitail kin ahneki. Ahpw ele met sohte mehlel. Kitail pahn koasoiapene karasaras kei. Karasaras 1: Mwohn brother men sukuhlki padahk mehlel, eh pahpao kin kamamsakau. Eri ni kamadipw ehu, brothero kilang Kristian kei wie niminim sakau. Ih eri nsensuwedkihla oh ndaiong irail me dahme re wiewiao sapwung. Karasaras 2: Sister men ahneki soumwahu laud ehu ahpw e mwahula. Mwuhr, e diarada me pil emen sister ahneki soangen soumwahwohte. Sistero men sewese ih kahrehda e ngihtehtehkiong en ale epwelpen winiohte me e ale. Mwein e ndaiong en kang soangen mwenge ehu, de ale soangen wini de epwelpen wini ehu. Karasaras 3: Brother men kin iang pelien lamalam likamw ehu mahso. Oh e sohte douluhl men pwurehng pidada pelien lamalamo. Ni ahnsou me e esehda me rie Kristian men iang mehla ehu nan imwen sarawi ehu, e uhdahn nsensuwedla.a

⁷ Kitail pahn koasoiapene pil ekei karasaras. Karasaras 4: Brother men tikida erein ahnsou me pali laud en aramas kin medewe me e sohte konehng ohl akan en kareireila arail alis, de e sohte konehng lih akan en rausis oh towehda mihting kan, kapokon kan de iang kalohk. Brothero ese duwen kaweid kapw sang ladu lelepek me pid duwen met, ahpw e pousehlahte ndindaiong koaros me brother kan en dehr kareireila arail alis oh sister kan en dehr rausis ni arail pahn iang kalohk, mihting, oh kapokon kan. Karasaras 5: Elder men ese brother men me ale sukuhl laud oh mwuhr uhdihsang papah Siohwa. Met brother pwulopwul men nan en eldero mwomwohdiso pil men iang ale sukuhl laud. Eldero pwunodkihda met oh song en kahrehiong brother pwulopwulo oh eh pahpa nohno en wekidala arail madamadau.

8. (a) Dahme kak kahrehiong pahpa nohno men en tepida kadeik pahpa nohno teikan? (b) Dahme kakete wiawi ma kitail kauwe dahme meteikan kin wia?

⁸ Kitail pahn koasoiapene irair ehu me pidada pahpa nohno kan. Karasaras 6: Nin duwen pahpa nohno men, ke kin doadoahk laud pwehn kakairada noumw seri kan “ni kaiahn oh kaweid en Siohwa.” (Ep. 6:4) Ahpw pahpa nohno Kristian teikan kin mwomwen mweidohng neirail seri kan en wia soahng tohto sang dahme ke kin mweidohng noumw seri kan ren wia. Karasepe, re kin mweidohng neirail seri kan en pwand en pwurodo ni imwarailo, mwadongki video game kan me sohte kasalehda tiahk lemei, de naineki cellphone ni arail tikitikte. Met kahrehiong noumw serio en pehm me ke nohn kin kakos oh mwein kin idek: “Dahme ke sohte duwehkihte ahn iengeio pahpa nohno?” Ma met wiawi, ke kakete tepida kauwe pahpa nohno teikan. Ni mehlel, ni ahnsou me Kristian teikan kin wiahda pilipil kan me kitail sapwungki, kitail kakete nsensuwedkihla oh tepida kadeik irail. Karasepe, kitail kakete sapwungki mwomwen arail kin doadoahngki mwohni, ia uwen dod en arail kin seiloakla mwemweit, de mehn kamweit kan me re pilada. Ahpw kitail en dehr mweidohng atail pepehm en kesempwal sang atail miniminpene nan mwomwohdiso.

9. Mehn akadei dah me kitail koaros ahneki, oh dahme kitail anahne kanahieng en dehr wia? (Pil kilang kilel.)

⁹ Mwein kitail kin wiahda pilipil kan me weksang en riatail Kristian kan, ahpw met sohte wehwehki me ehu pilipil kin pwung sang pilipil teio. (Rom 14:5) Ni ahnsou me Paipel kin padahkihong kitail en “ahneki madamadauteieu,” met wehwehki me kitail koaros anahne peikiong sapwellimen Siohwa kosonned kan, ahpw e sohte wehwehki me atail pilipil kan koaros anahne duwepenehte. (2 Kor. 13:11) Kitail kak karasahiong met pilipil kan me kitail kin wiahda ni atail pahn seiloakla wasa ehu. E kin kalapw mie soangsoangen ahl akan me kin kohla wasa ehute. Oh kitail kin pilada ahl me kitail mwahuki oh me keieu mwahu ong kitail. Ni ahlohte, kitail koaros kin wiahda pilipil kan me wekpeseng, ahpw atail mehn akadei duwepenehte: Kitail men kaperenda Siohwa. Ihme kahrehda kitail sohte kin kadeik pilipil kan me meteikan wiahda.—Mad. 7:1; 1 Des. 4:11.

DAHME KAHREHDA KITAIL EN WAUNEKI PILIPIL KAN ME METEIKAN WIAHDA?

10. Nin duwen me Seims 4:12 mahsanih, dahme kitail sohte ahneki pwuhng en wia oh dahme kahrehda?

¹⁰ Paipel kihda kahrepe kei me kitail en wauneki pilipil kan me meteikan wiahda. Medewehla ekei kahrepe kan. Kitail sohte ahneki pwuhng en kadeik pilipil kan me meteikan wiahda. (Wadek Seims 4:12.) Siohwa iei Sounwiahda Kosonned oh Sounkopwung pwung men. Ih kelehpw me sapwellimanki pwuhng en ketikihda koasoandi kan oh kosonned kan pwe kitail en kin idawehn nan atail mour. Eri riatail Kristian akan kin pein pwukoahki arail pilipil mwohn silangin Siohwa, a kaidehn kitail. (Rom 14:10) Kitail sohte ahneki pwuhng en kadeik de kauwe pilipil kan me meteikan wiahda ni ahnsou me mepwukat weksang atail koasoandi de madamadau.b

11. Ia duwen atail kak sawaspene pwehn kolokol minimin nan mwomwohdiso? (Pil kilang kilel.)

¹¹ Siohwa ketin kupwurki sapwellime tohnkaudok kan en miniminpene, a kaidehn ren uhdahn duwepenehte. Ni mehlel, Siohwa ketin kupwurperenki me kitail koaros kin wekpeseng! Kitail kak kilang mehn kadehde wet nan sapwellime kepikipik kan. Karasepe, sohte mweremweren sinoh riau kin duwepenehte. Oh medewehla duwen aramas akan. Mendahki aramas daulih welilik kin mihmi sampah, sohte meh riemen kin duwepenehte. Siohwa ketin kapikkitailda en wekpeseng. Oh e sohte ketin kupwurki kitail en wiawihda ni soangen mwohmw ehute. Ahpw e ketin kupwurki kitail en miniminpene. Eri kitail en pwungki ni meteikan ar wia soahng kan me weksang dahme kitail pahn wia oh dehr nsensuwedkihla. Ong kitail, en mie miniminpene nan mwomwohdiso kin kesempwal sang dahme kitail kin mwahuki.—Rom 14:19.

IA DUWEN ATAIL PAHN KIN WAUNEKI MADAMADAU EN METEIKAN

12-13. Dahme kitail anahne tamataman ma kitail pehm me emen wiahda “sapwung ehu”? (Kalesia 6:1; pil kilang koakono “Ni Omw Sapwungki Pilipil me Meteikan Wiahda.”)

¹² Ni meteikan ar wiahda pein arail pilipil kan. Pein idek rehmw, ‘Ia duwe, aramaso pahn wiahda “sapwung ehu,” de e wiahte mehkot ni ahl ehu me weksang mwomwen ei pahn wia?’ Ma e pahn wiahda mehkot me uhwong Paipel, pein idek rehmw, ‘Ia duwe, ngehi me kak koasoiaiong ih duwen met, de emen tohrohr, me duwehte elder men?’ Ma kowe me kak koasoiong aramas menet, eri wia met ni kadek. (Wadek Kalesia 6:1.) Ahpw pali laud en ahnsou, aramas men sohte kin wia mehkot sapwung, ahpw ihte e wia ni ahl ehu me weksang dahme kitail kin wia. Ma ih met me wiawi, dehr peikasalki dahme e wia, de kauwe eh pilipilo. Wauneki eh pwuhng en pein wiahda eh pilipil, oh dehr kadeik ih.—Rom 14:​2-4.

¹³ Medewehla karasaras wet: Ma ke iang kompoakepahmw men kohla ni restaurant ehu, ia duwe, ke pahn ngihtehtehkiong ih en oahte soangen mwengeohte me ke oahte? Soh. Ke pahn wauneki eh pwuhng en pilada dahme e men kang. Pwe dahme e pilada, ih me pahn kang a kaidehn kowe. Oh ke sohte pahn men kompoakepahmwo en pilehng uhk soangen mwenge ehu me e mwahuki, ahpw en mweidohng uhk ken pein pilada dahme ke mwahuki. Ni soangen ahlohte, kitail kak kasalehda atail wauneki meteikan sang ni atail kin mweidohng irail en pein wiahda arail pilipil kan oh sohte idingkihong irail atail madamadau.

14. Ni omw kin wiahda pilipil kan, dahme ke kak wia pwehn kolokol popohl rehn riomw Kristian kan? (1 Korint 8:​12, 13)

¹⁴ Ni ahnsou me ke kin pein wiahda omw pilipil kan. Ke kak kalaudehla miniminpene sang ni omw pahn nantihong dehr kansensuwedihala meteikan. (Wadek 1 Korint 8:​12, 13.) Ekei pak, mwein ke ese me pilipil ehu me ke pahn wiahda “kin mweimwei,” ahpw ma pilipil wet pahn kansensuwedihada riomw Kristian men, ia duwe, e pahn “kin wia kamwahu” ehu?c (1 Kor. 10:​23, 24) Nan soangen irairo, kitail en dehr ihte medewe, ‘I kak wia dahme I mwahuki.’ E pahn mwahu en medewe duwen pepehm en meteikan. (Rom 15:1) Ahpw ia duwe, kitail sou ahpwtehn nda me meteikan anahne wauneki pilipil kan me kitail pein wiahda? Ei. Irail anahne wauneki atail pilipil kan duwehte atail kin wauneki arail pilipil kan. Ahpw kitail anahne pil tamataman kaweid en Paipel me kileldi nan Rom 12:18 me mahsanih: “Wia uwen amwail kak pwe kumwail en ahneki popohl rehn aramas koaros.” Eri kitail anahne wia uwen atail kak en kolokol popohl rehn meteikan oh dehr kansensuwedihirailda.

15. Ia duwen elder kan ar kak sewese mwomwohdiso ren miniminpenehte? (1 Korint 4:6)

¹⁵ Elder kan kin wauneki pilipil kan me meteikan kin wiahda. Elder kan kin sewese mwomwohdiso ren miniminpenehte ni ar sohte kin wiahda kosonned kan me pidada soahng kan me brother oh sister kan kin kak pein pilada. Oh re sohte kin “daulihala soahng kan me ntingdier” nan Paipel. (Wadek 1 Korint 4:6.) Met pil wehwehki me re sohte pahn nda soahng kan me sohte pahrekiong kaweid kan me poahsoandahsang Paipel me ntingihdi nan neitail sawasepen Paipel kan. Oh pil ni ahnsou me riarail Kristian kan kin peki arail sawas, elder kin kanahieng en dehr ndaiong dahme re medewe me pwung en wia. Re kin kihda kaweid sang Mahsen en Koht.—Ais. 48:​17, 18.

16. Ia duwen elder men eh kak kasalehda me e wauneki pilipil kan me pwihn en elder kan wiahda?

¹⁶ Elder men pil kin wauneki pilipil me pwihn en elder kan kin wiahda. Mwurin pwihn en elder kan ar kapakapkier ngehn sarawi, tehkpeneier oh kapwaiadahr kaweid en Paipel, oh pil wiadahr pilipil ehu, emenemen elder anahne utung pilipilo mendahki ma eh madamadau weksang dahme pilipildahro. (Ep. 5:17) Elder kan pil kin tehk mwahu me re kin idawehnte dahme mi nan Paipel oh nan neitail sawasepen Paipel kan oh re sohte kin wekidala pwehn pwungiong arail madamadau. Karasepe, elder men sohte pahn ale sentence ehu sang nan neitail sawasepen Paipel ehu pwehn kadehdehda me eh madamadau me pwung, oh pohnsehsehla soahng teikan me mi nan iren onopo.

17. Ia kamwahupen atail kin wauneki pilipil kan me meteikan kin wiahda?

¹⁷ Duwehte me kitail sukuhlkier, kitail wekpeseng. Emenemen kitail kin mie pein eh madamadau oh soahng kan me e mwahuki. Ahpw soangen wekpeseng wet kin wia mehkot mwahu! Pwehki wasa kan me kitail kohsang oh atail irair kan kin wekpeseng, met kin sewese mwomwohdiso en wia wasa kaselel oh kansenamwahu ehu. Eri kitail sohte kin mweidohng soahng kan me kitail wengkipeseng en katohrekitailpeseng, ahpw kitail kin kolokol popohl. Kitail kin kanahieng kitail en dehr kansensuwedihada meteikan. Kitail kin wauneki pilipil kan me meteikan kin pein wiahda. Ni atail kin wia met, kitail pahn ale ketingpen atail nanti. Atail mwomwohdiso pahn nsenamwahu oh miniminpenehte.—Mel. 133:1; Mad. 5:9.