Manaen—Mwohneki Mahs Papah Siohwa

Manaen iei emen me kin tiengla mwowe nan mwomwohdisohn Andiok ni mwehin tepin Kristian ko. E “iang Erod kaunen wehin Kalili sukuhl.” (Wiewia 13:1) Eri Manaen uhdahn loalokong oh mwein e pil tikida nan peneinei kepwehpwe ehu.

Mendahki met, Manaen pilada en wiahla Kristian men oh utung mwomwohdiso. E sohte kin nantihong en kahrehiong meteikan ren tehk ih pwehki sukuhl me e iango de eh ese me lapalap akan. Ahpw e kin doadoahk laud pwehn sewese rie Kristian kan.

En Manaen mehn kahlemeng kasalehda me en papah Siohwa kin kesempwalsang nantihong en ndandla de kepwehpwehla. Duwehte Manaen, kitail anahne mwohneki mahs atail papah Siohwa, a kaidehn song en kepwehpwehla de ndandla nan koasoandi wet. (Mad. 6:33) Patehng met, mendahki kitail kin kesempwalki sukuhl, kitail en “pilada dahme keieu kesempwal” oh tehk mwahu me soahng teikan sohte pahn kerempwahla atail kaudok ong Siohwa.—Pil. 1:​9, 10.