Karanihte Siohwa Erein Omw Iang Sukuhl Laud

1-2. (a) Ma ke pilada en iang sukuhl laud, dahme ke anahne pousehlahte wia? (b) Ia wehwehn en “pousehlahte kekeid ni pwung ni soangen ahl wet”? (Pilipai 3:16)

EKEI sapwellimen Siohwa ladu kan pilada ren iang sukuhl laud mwurin ar kanekehla sukuhl me koperment anahne ren iang. Ele re pehm me sukuhlo kak sewese irail en diar doadoahk me kak pwain arail anahn akan oh sewese ren papah Siohwa ni uwen me re kak. Ma ke pilada en iang sukuhl laud, dahme ke kak wia pwehn tehk mwahu me ke karanihte Siohwa? (Seims 4:8a) Ke lelohngehr irair kan erein omw iang sukuhl me ele kahrehda e apwal ong uhk ken lelepekohngete Siohwa, ahpw ke powehdier. Met ke pahn anahne “pousehlahte kekeid ni pwung ni soangen ahl wet”—me iei en pousehlahte papah Siohwa ni lelepek duwehte me ke wiahier.—Wadek Pilipai 3:16.

² Lepin lokaiahn Krihs me kawehwehdi “kekeid ni pwung ni soangen ahl wet” kin kalapw kadoadoahk nan mahwen pwehn kawehwehda sounpei kan ar kin irekla oh karis kohwei. Ma ke pilada en iang sukuhl laud, ke pahn anahne iang riomw Kristian kan pousehlahte ‘karis kohkohwei mwowe’ sang ni omw wia soahng kan me pahn kahrehiong uhk ken karanihte Siohwa. Ke men omw nanpwungmwahu reh en kehlailla a kaidehn luwetala. Iren onop wet pahn koasoia mehn kasukuhl en Paipel pahieu me pahn seweseiuk. Ke eseier mehn kasukuhl pwukat. Ke doadoahngkier mahso oh ke pahn pousehlahte wia met erein omw iang sukuhl laud oh pil mwurin omw kanekehla omw sukuhl.

POUSEHLAHTE WIA SOAHNG KAN ME PAHN KAHREHIONG UHK KEN KARANIHTE SIOHWA

3. Kahpwal dah me ke ele pahn lelohng ma ke iang sukuhl laud?

³ Dahme kakete wiawi. Sukuhl laud kak kahrehiong uhk ken uhdahn kedirepwkihla soahng tohto ehuehu rahn. Oh pwehki ke men pweida nan omw sukuhl, ele ke kak tepida kesempwalikihla omw sukuhlo sang omw papah Siohwa. Ke pil kakete tepida sohla iang mihting, kalohk, wia pein omw onop, oh pil kapakap.—Kaud. 2:4.

4. Dahme kak seweseiuk ken “wia soahng tohto nan doadoahk en Kauno”? (1 Korint 15:58)

⁴ Wadek 1 Korint 15:58. Pwe pwaisikel ehu en mwekid kohwei, ke anahne pahd mehn tiati ko. Ni soangen ahlohte, ke anahne pousehlahte “wia soahng tohto nan doadoahk en Kauno” pwe omw nanpwungmwahu rehn Siohwa en kehlailte. Ei mehlel, uwen ahnsou me ke doadoahngki pwehn wia mepwukat kin kesempwal, ahpw kahrepen omw wia mepwukat pil uhdahn kesempwal. Omw papah Siohwa iei me keieu kesempwal nan omw mour, a kaidehn en iang sukuhl laud. (Mad. 22:37) Sister pwulopwul men me adaneki Samantha koasoia, “I koasoanehdi me ma ei sukuhlo pahn kerempwahla ei papah Siohwa, I pahn uhdihsang sukuhl.”

5. Dahme ke kak wia pwehn pwerisek nan sapwellimen Siohwa doadoahk?

⁵ Dahme ke kak wia mwohn omw tepida iang sukuhl laud. Tehk mwahu me ke pahn pousehlahte mwohneki mahs Siohwa nan omw mour. Pein idek rehmw, ‘Dahme I pahn wia pwehn tehk mwahu me I kin kaukaule kaunopada oh iang towehda mihting kan, kalohk, oh wadek Paipel?’ (Sos. 1:8; Mad. 28:​19, 20; Ipru 10:25) Ke pil kak pein idek rehmw, ‘Ia duwen ei kin wiahda ahnsou ong soahng pwukat ahnsou me I kin iang sukuhlo?’ Ma ke medewe me mie soahng me ke kak wia me weksang mahso, dahme ke kak kamwahwihala met? Koasoanehdi teng en pwerisek nan sapwellimen Siohwa doadoahk erein omw iang sukuhl laud. E kesempwal me ke men pweida nan omw sukuhl. Ahpw dehr doadoahngkihla omw ahnsou laud ong met me pahn kahrehda en sohla omw ahnsou oh kehl laud en pousehlahte papah Siohwa.a—Mad. 6:24.

6. Peidek dah kan me ke kak pein idek rehmw pwehn kilang ma ke kin keieu kesempwalki Siohwa nan omw mour? (Pil kilang kilel.)

⁶ Mwurin omw tepida iang sukuhl, kaukaule wiahda ahnsou ehuehu sounpwong pwehn pein kasawihiuk. Pwehn wia met, ke kak pein idek rehmw: ‘I kin kalapw sohte iang de pwandasang mihting? I kin kalapw medemedewe ei homework erein mihting kan? I tepida iangete mihting kan nan videoconference?’ Ke pil kak pein idek rehmw: ‘I sohla kin kalapw kapakap oh wadek Paipel duwehte mahs? I kin iang kalohk ihte pwehki I anahne oh I kin men en nekier?’ Ma ke sapengki ‘ei’ ong peidek ehu de tohtohsang, eri mwadang wiahda wekidekla kan. Dehr mweidohng omw sukuhlo en kahrehiong uhk ken sohla mwohneki mahs Siohwa nan omw mour.

“PERE OMW KOAHIEK EN MADAMADAU”

7. Ia duwen omw iang sukuhl laud eh kak kamwakid mwomwen omw kin madamadau?

⁷ Dahme kakete wiawi. Ekei kasukuhl kan me ke ale kakete padahngki “erpit en sampah oh widing mwahl,” me duwehte padahk me dene sohte Koht oh padahk me dene mour pein miehla oh aramas kohsang mahn. (Kol. 2:8) Oh pil, dahme ke sukuhlki nan ekei class kak kahrehiong uhk ken likih pein uhk a kaidehn Siohwa. Brother pwulopwul men koasoia: “Re sohte kin padahngkihte koahiek kapw kan, ahpw re pil kin padahngki mwomwen at pahn kin madamadau oh met kin kalapw weksang sapwellimen Siohwa madamadau. Karasepe, re kin padahngki me ihte ahl me se kak ahneki mour nsenamwahu iei sang ni at pahn likih pein at koahiek. Met kahrehda ien tepida medewe me I sohte anahne sapwellimen Siohwa sawas. I apwalkihla likih ih nan soahng koaros.”

8. Dahme kahrehda e kesempwal en “pere omw koahiek en madamadau”? (Lepin Padahk 5:​1, 2)

⁸ Wadek Lepin Padahk 5:​1, 2. Paipel katamankihong kitail en ‘pere atail koahiek en madamadau.’ Kitail kin pere mehkot ni ahnsou me emen kin song en kauwehla de kihsang rehtail. Sehdan oh eh sampah kin ahnsou koaros song en wekidala omw madamadau. (1 Pit. 5:8) Mwomwen en aramas madamadau oh pepehm duwen dahme pwung de sapwung, duwen mour eh miehla, oh ma Koht uhdahn ketin ieias kak kaluwetehla omw pwoson. Sounpadahk kan oh meteikan ele kak song en kahrehiong uhk ken medewe me arail madamadau duwen mepwukat kin mwahusang madamadau teikan. Ahpw ni mehlel, arail madamadau kan wia “mehkot pweipwei rehn Koht.”—1 Kor. 3:​18-20.

9. Dahme ke kak wia pwehn pere omw koahiek en madamadau?

⁹ Dahme ke kak wia mwohn omw tepida iang sukuhl laud. Tehk mwahu me ke kamehlele me dahme Paipel kin padahngki iei me mehlel mwohn omw tepida iang sukuhl laud. Pein idek rehmw soangen peidek pwukat: ‘Dahme kahrehda I kamehlele Koht? Ia duwen ei ese me Paipel iei Mahsen en Koht? Dahme kamehlelehiong ie me e mwahu en mour pahrekiong dahme Paipel kin mahsanih me pwung de sapwung sang dahme aramas akan koasoia?’ E pil kak sawas ken medewehla duwen ahnsou me ke kin iang sukuhlo. Pein idek rehmw: ‘I kin tepida medewe ma Koht uhdahn ketin ieias oh me ketin kapikada mehkoaros ni meteikan ar kin nda me re kamehlele padahk me dene mour pein miehla oh aramas kohsang mahn? I kin men wia ekei soahng sapwung kan me iengei tohnsukuhl kan kin wiewia?’ Ma omw pasapeng ‘ei’ ong ehu de peidek pwukat koaros, dahme ke kak wia met pwe ken uhdahn kamehlele me dahme Paipel kin padahngki iei me mehlel oh e kin ahnsou koaros wia kamwahupomw? Koasoanehdi teng ken pere omw madamadau erein omw iang sukuhl laud.—2 Tim. 2:​16-18.b

10. Ia duwen omw kak pousehlahte pere omw koahiek en madamadau?

¹⁰ Pil mwurin omw tepida iang sukuhl laud, kaukaule wiahda ahnsou pwehn pein idek rehmw: ‘I kin tepida medewe me dahme meteikan wia sohte suwed mendahki re sohte kin wia dahme Siohwa ketin mahsanih me pwung? I kak kasawihada ni ahnsou me kasukuhl ehu padahngki madamadau en aramas a kaidehn me mehlelo? I uhdahn kamehlele me Wehin Koht kelehpw kak kamwahwihala en aramas akan kahpwal?’ Pwehn pere omw koahiek en madamadau, pousehlahte wadek Mahsen en Koht oh doudouloale oh kapwaiada dahme ke sukuhlki. Omw wia met pahn sewese kakehlaka omw kamehlele padahk mehlel.—1 Tim. 4:15.

DOADOAHNGKI MWAHU OMW AHNSOU

11. Dahme kahrehda e kakete apwal ken doadoahngki mwahu omw ahnsou erein omw iang sukuhl laud?

¹¹ Dahme kakete wiawi. Sukuhl laud pahn kihsang omw ahnsou laud ahpw mehlel ni ahnsou me ke anahne onop ong des kan me ke pahn ale de mie project kan me ke anahne kanekehla. Ma ke sohte doadoahngki mwahu omw ahnsou, ke kakete pwunodada oh kin uhdahn kalapw pwangada. Eri e uhdahn kesempwal ken pil wiahda ahnsou pwehn apwalih mwahu omw roson.

12. Soahng dah kan me ke anahne wiahda ahnsou ong? (Episos 5:​15, 16)

¹² Wadek Episos 5:​15, 16. E kak apwal ong uhk ken ‘doadoahngki mwahu omw ahnsou.’ Met pwehki mie soahng tohto me ke anahne wia. Karasepe, ke anahne onop ong omw class ko, ahpw kesempwalsang met en mie omw ahnsou ong omw peneinei oh riomw Kristian kan nan omw mwomwohdiso. (Mel. 133:1; Lep. Pad. 18:1) Oh me keieu kesempwal, ken wia soahng kan me pahn seweseiuk ken karanihte Siohwa. (Mad. 6:33) Ele ke pil anahne wia soahng kan pwehn sewesehki omw peneinei oh pil mie omw doadoahk. Eri ke anahne apwalih mwahu omw roson sang ni omw kin kommoal mwahu oh pil eksersais. (Ekl. 4:6; 1 Tim. 4:8) Pwehn wia soahng pwukat koaros, ke anahne doadoahngki mwahu omw ahnsou.

13. Dahme ke kak wia pwe ken doadoahngki mwahu omw ahnsou?

¹³ Dahme ke kak wia mwohn omw tepida iang sukuhl laud. Paipel mahsanih me koasoandi mwahu kin uhdahn pweida. (Lep. Pad. 21:5) Eri wiahda koasoandi mwahu mwohn omw tepida iang sukuhl laud. Ele ke kak medewehla ahnsou me ke kin iang sukuhlo oh pein idek rehmw: ‘I kin kak wiahda ahnsou pwehn wia soahng kesempwal koaros?’ Ma ke pehm me ke kak wia mwahusang mahso, dahme ke kak kamwahwihala met? Tehk mwahu me ke wiahda koasoandi mwahu pwe ken dehr pehm me sohte omw ahnsou en wia soahng koaros.c

14. Peidek dah kan me kak seweseiuk ken pein kasawihiuk?

¹⁴ Erein omw iang sukuhl laud, kaukaule pein kasawihiuk. Pein idek rehmw: ‘Ei koasoandi kan kin mweidohng ien kin kommoal mwahu oh pil eksersais? Miehte ei ahnsou en patehng riei Kristian kan? I kin kak kanekehla ei homework ni ahnsou me I koasoanehdi? Ma soh, met pwehki mie soahng tohto me I anahne wia de pwehki I kin kalapw pwand en wia met? Kompoakepahi kan oh ei peneinei kan pehm me I anahne wiahda wekidekla kan?’ Ma ke pehm me ke anahne wiahda wekidekla kan de kin anahne kapwaiada omw koasoandi kan, eri mwadang wia met. Ele ke pil kak koasoiong meteikan me kin ese doadoahngki mwahu arail ahnsou.—Lep. Pad. 11:14.

POUSEHLAHTE “IEIANG ME LOALOKONG”

15. Kahpwal dah me ke kakete lelohng erein omw iang sukuhl laud?

¹⁵ Dahme kakete wiawi. Erein omw iang sukuhl laud, iengomw tohnsukuhl kan ele pahn lukeiuk ken iang irail mwurin sukuhl. Ke pil kakete men nda ‘ei.’ Ele met pwehki kumwail ehu sounpar, dahme kumwail perenki duwepenehte, oh ke kin mihmi rehrail erein ahnsoun sukuhl. Ke pil kakete pehm me ke duwehte irail laudsang ekei iengomw tohnkaudok kan. Ahpw, ke anahne kanaiehng. Mendahki ke kin mi rehn iengomw tohnsukuhl kan nan classroom, ke weksang irail pwehki ke kin men kaperenda Siohwa a irail soh. Ma ke kin kalapw mi rehrail, ke kakete tepida ahneki arail madamadau. (1 Kor. 15:33) Ih met me wiawihong brother men me adaneki Michael, me ale kasukuhl me pid lioal erein sounpar pahieu. E koasoia, “Laudsang awa 40 nan wihk koaros, I kin mi rehn iengei tohndoadoahk kan me kin lokaia suwed, rong koul kan me sohte konehng Kristian kan ren rong, oh sohte kin wauneki lih. I tepida medewe me dahme re kin koasoia oh wia sohte suwed.”

16. Dahme Lepin Padahk 13:20 padahkihong kitail?

¹⁶ Wadek Lepin Padahk 13:20. Paipel kehkehlingkihong kitail me werek suwed kak kahrehda kahpwal. E pil mahsanih me “mehmen me kin ieiang me loalokong pahn loalokongla.” Iren mehn kasukuhlo sansal: Irail kan me kitail kin patehng kin kamwakid kitail en wia me mwahu de me suwed. Eri pilada kompoakepahmw me kin poakohng Siohwa duwehte me ke kin wia oh me men ken ahneki nsenamwahu mehlel.—Mel. 101:​6, 7; 119:63.

17. Dahme ke kak wia pwehn soikala werek suwed?

¹⁷ Dahme ke kak wia mwohn omw tepida iang sukuhl laud. Tehk ia uwen ahnsou me ke pahn doadoahngki pwehn patehng iengomw tohnsukuhl kan oh ia uwen omw pahn karanihala irail. Sounkadehde men me adaneki Trenton koasoia: “I kin kadekohng iengei tohnsukuhl kan ahpw I sohte kin patehng irail mwurin sukuhl. Irail wiahte iengei tohnsukuhl, a kaidehn kompoakepahi keren kei.” Dahme ke pahn wia pwehn tehk mwahu me ke sohte kin doadoahngkihla ahnsou laud en patehng iengomw tohnsukuhl kan de pil nohn karanihala irail? Pwehn sapengala peidek wet, pein idek rehmw: ‘Ia duwen ei kin tehk mwahu me I kin wia met ahnsou me I kin iang sukuhlo?’ Ma ke pehm me ke kak wia mwahusang mahso, dahme ke kak kamwahwihala met? Koasoanehdi teng en pousehlahte “ieiang me loalokong” oh dehr kin nohn patehng irail kan me sohte kin poakohng Siohwa.d

18. Peidek dah kan me ke anahne pein idek rehmw? (Pil kilang kilel.)

¹⁸ Erein omw iang sukuhl, kaukaule pein idek rehmw: ‘I kin nohn karanih iengei tohnsukuhl kan? Ei koasoi, madamadau, de mwekid kin tepida duwehla arail? Ia sapwellimen Siohwa pepehm duwen ei kompoakepahnki iengei tohnsukuhl kan?’ (Mel. 1:1) Ma ke tehkada me ke anahne wiahda wekidekla kan, eri mwadang wia met. Tehk mwahu me kompoakepahmw keren kan iei irail kan me poakohng Siohwa duwehte me ke kin wia. Oh pil, dehr pweiek en kalohk ong iengomw tohnsukuhl kan. Pwehki re eseiuk oh kin patehng uhk nan sukuhl, ke ahneki ahnsou mwahu en padahkihong irail duwen Siohwa oh Paipel.

KE KAK POUSEHLAHTE KAPERENDA SIOHWA EREIN OMW IANG SUKUHL LAUD

19. Ia duwen omw kak kaunopada pwehn powehdi kahpwal kan me ke kakete lelohng erein omw iang sukuhl laud? Menlau kihda ehu karasaras.

¹⁹ Medewehla duwen karasaras wet: Aramas emen me kin aluhla wasa doh kin anahne tehk mwahu soahng kei mwohn e tepida alu. Karasepe, mendahki e sohte ese kahpwal koaros me e pahn kakete lelohng, e kin tehk mwahu me e kehlail, e doadoahngki likou me konehng, oh e ahneki mehn akadei—e ese wasa me e pahn kohla ie. Ke pil kak wia duwehte met erein omw iang sukuhl laud. Pousehlahte kakehlaka omw nanpwungmwahu rehn Siohwa, “pwuhriong tehtehn mahwen koaros sang rehn Koht,” oh tamataman kahrepen omw men iang sukuhl laud. Omw mehn akadei iei ke men kaperenda Siohwa nan soahng koaros me ke kin wia a kaidehn en kepwehpwehla de wiahla aramas emen me kesempwal nan sampah.—Ep. 6:​11-13; 1 Kor. 9:​26, 27; 10:31.

20. Ia duwen omw kak ‘pousehlahte kasawih ma ke kin mi nan pwoson’?

²⁰ Paipel kangoangehkin kitail en ‘pousehlahte kasawih ma kitail kin mi nan pwoson; de pousehlahte kadehdehda soangen aramas dah kitail.’ (2 Kor. 13:5) Ke kak wia met erein omw iang sukuhl laud. Ia duwen? Sang ni omw kin kaukaule tehk ma ke kin wia soahng pwukat: Ke kin pousehlahte wia soahng kan me pahn kahrehiong uhk ken karanihte Siohwa? Ke kin pere omw koahiek en madamadau sang erpit en sampah? Ke kin doadoahngki mwahu omw ahnsou? Ke kin kompoakepahnki iengomw Kristian kan oh soikala werek suwed? Ke anahne idek rehmw peidek pwukat sohte lipilipil ma ke mi imwen sukuhl, wasahn doadoahk, de wasa teikan. Koasoanehdi teng ken kakehlaka omw pwoson nan soangsoangen irair me ke kin lelohng. Ke kak uhdahn kamehlele me Siohwa pahn ketin kapaia omw nantihong wia met.—Lep. Pad. 3:​5, 6.