Ia Duwen Omw Pahn Kasalehda me Ke Kalahnganki Pweinen Pweipwei Sapahlo?

1-2. Dahme meirong en Siseso pahn kamwakid kitail en wia, oh dahme kahrehda? (2 Korint 5:​14, 15) (Pil kilang kilel.)

MA MIE me kapituhkasang nan ihmwo me rengkidi, ke sou pahn pehm me ke pweipwandohng aramaso me doarehla omw mour? Mehnda ma meteikan pil pitila, ele ke pahn men pein padahkihong aramaso ia uwen omw kalahnganki oh me ke sohte pahn manokehla dahme e wiahiong uhk.

² Duwehte me iren onop en mwoweo koasoia, kitail anahne emen en kapitkitailsang dihp oh mehla. Oh ih met me Siohwa ketin wia. E ketikihda sapwellime Ohlo pwehn kak ketin mahkohng dipatail kan, ketikihong kitail koapworopwor en unsekla ni ahnsou kohkohdo, oh en ahneki nanpwungmwahu keren reh. Imwilahn met, kitail ahneki koapworopwor en mour kohkohlahte nan sapwellimen Siohwa sampah kapw. Sises ketin kasalehda sapwellime limpoak laud ong aramas ni eh meirongkihla eh mour ong kitail. Oh e pil ketin poakohng aramas akan mwohn eh ketidihdo nin sampah. (Lep. Pad. 8:​30, 31) Wahnpoaron Pohl ntingihedi me “limpoak en Krais me kin kamwakid kitail laud.” (Wadek 2 Korint 5:​14, 15.) Met wehwehki me kitail anahne kasalehda me kitail kalahnganki sapwellimen Sises limpoak oh dehr manokehla dahme e ketin wiahiong kitail.

3. Dahme kahrehda mwomwen omw kasalehda omw kalahnganki meirong en Siseso ele pahn weksang ahn meteikan?

³ Ia duwen omw pahn kasalehda me ke kalahnganki pweinen pweipwei sapahlo? Omw pasapeng kakete weksang ahn emen tohrohr. Pwehn karasahda dahme kahrehda, medewehla aramas silimen me pahn seiloakla wasa ehute, ahpw wasa me emenemen irail pahn kohsang wekpeseng. Ahl me re pahn keid ie pwehn lella wasao wekpeseng. Ia omw mehn akadei? Iei en kasalehda me ke kalahnganki pweinen pweipwei sapahlo. Ahpw mwomwen omw pahn kasalehda omw kalahnganki met ele pahn weksang ahn meteikan. Mwomwen omw kasalehda me ke kalahnganki pweinen pweipwei sapahlo pahn pidada ma kowe: (1) tohnsukuhl en Paipel men, (2) Kristian men me papidaislahr, de (3) emen me solahr kin iang mwomwohdiso papah Siohwa. Iren onop wet pahn koasoia ia duwen omw kak kasalehda omw kalahnganki pweinen pweipwei sapahlo ma kowe emen irail pwukat.

TOHNSUKUHL EN PAIPEL KAN

4. Ia sapwellimen Siohwa pepehm ong tohnsukuhl en Paipel kan?

⁴ Ma ke kin onopki Paipel, medewehla met: Ke men sukuhlki duwen Siohwa oh padahk kan en Paipel. Met kasalehda me Siohwa kupwurki ken wiahla kompoakepah oh kin ketin seweseweseiuk ken wia met. (Sohn 6:44; Wiewia 13:48) “Siohwa me kin ketin kasawih nan mohngiong en aramas.” Met wehwehki me e kin ketin mwahngih omw nannanti en sukuhlki duwen ih, oh kupwurperenki kilang me ke wiahda wekidekla kan nan omw mour pwehn kaperenda ih. (Lep. Pad. 17:3; 27:11) Pweinen pweipwei sapahlo pil kahrehda ken kak ahneki nanpwungmwahu keren rehn Siohwa. (Rom 5:​10, 11) Dehr manokehla met.

5. Ia duwen tohnsukuhl en Paipel kan ar kak doadoahngki kaweido nan Pilipai 3:16?

⁵ Ma kowe tohnsukuhl en Paipel men, ia duwen omw kak kasalehda me ke kalahnganki pweinen pweipwei sapahlo? Ehu ahl iei en wia dahme Pohl padahkihong mehn Pilipai ko: “Sohte lipilipil uwen atail kekeirda, kitail en pousehlahte kekeid ni pwung ni soangen ahl wet.” (Pil. 3:16) Eri dehr mweidohng emen de mehkot en kauhiukedihsang en pousehlahte weweid nan ahl me kolahng mour.—Mad. 7:14; Luk 9:62.

6. Dahme tohnsukuhl en Paipel kan kak wia ma re apwalki kapwaiada padahk en Paipel ehu? (Deuderonomi 30:​11-14) (Pil kilang kilel.)

⁶ Ia duwen ma ke apwalki kamehlele padahk en Paipel ehu me ke ahpwtehn sukuhlkihdi? Roporopki duwen met oh kapakapkihong Siohwa en ketin seweseiuk ken wehwehkihla mwahu. (Mel. 86:11) Ma ke kin apwalkihte wehwehki padahko, dehr nohn pwunodki ahnsou wet oh dehr uhdihsang onopki Paipel. Ele ke pahn wehwehkihla mwahu mwuhr. Ia duwen ma ke apwalki kesehla tiahk ehu me sohte kin pahrekiong Paipel? Ma iei, tamataman me sohte lipilipil dahme Siohwa ketin kupwurki sang kitail, e sohte pahn “nohn apwal” en wia. Ke kak wia dahme kin kaperenda ih. (Wadek Deuderonomi 30:​11-14.) Oh Siohwa ketin inoukihda en seweseiuk. (Ais. 41:​10, 13; 1 Kor. 10:13) Pousehlahte song en peikiong Siohwa. Dehr nohn medewe dahme apwal ong uhk, ahpw medewe duwen soahng mwahu kan koaros me Siohwa ketin wiahiong uhk, ahpw mehlel me e ketin poaronehdo sapwellime Ohlo pwehn pwoukinuhkla. Ni omw poakohng Siohwa eh lalaudla, ke pahn kilang me “sapwellime kehkehlik kan me sohte apwal.”—1 Sohn 5:3.a

7. Dahme me pwulopwul kan me tikida nan padahk mehlel kak medemedewe?

⁷ Ia duwen kumwail me pwulopwul kan me tikida nan padahk mehlel? Kumwail pil wia tohnsukuhl en Paipel kei. Ni mehlel, kumwail me nein amwail pahpa nohno tohnsukuhl en Paipel me keieu kesempwal. Paipel mahsanih: “Kumwail karanihala Koht, oh e pahn ketin karanihala kumwail.” (Seims 4:8; 1 Kron. 28:9) Ni omw kin tiengla mwowe pwehn karanihala Siohwa, e pahn pil ketin karanihiukala. Kaidehn pwehki ke tikida rehn omw pahpa nohno me wia Sounkadehde kei me kahrehda Siohwa kin ketin nsenohkin uhk. E kin ketin nsenohkin uhk pwehki e kupwurki ken wiahla kompoakepah keren. Oh dahme Siohwa ketin wiadahr pwe ken kak ahneki nanpwungmwahu keren reh? E ketikihda sapwellime Ohlo. Dehr manokehla kisakis kesempwal wet me e ketikihong uhk. (Rom 5:​1, 2) Mwohn Katamano, medewe laud duwen dahme Siohwa oh Sises ketin wiahda ong uhk. Eri medewehla soangen mour dah me ke men ahneki oh mehn akadei dah kan me ke kak pein wiahda pwehn kasalehiong Siohwa omw kalahngan.b

KRISTIAN KAN ME PAPIDAISLAHR

8. Ia duwen emen me papidaislahr eh kasalehdahr eh kalahnganki pweinen pweipwei sapahlo?

⁸ Ma ke papidaislahr, ke kasalehdahr ni soangen ahl tohto me ke kin kalahnganki pweinen pweipwei sapahlo. Karasepe, ke wekidalahr omw mour pwehn kaperenda Siohwa oh wiahla kompoakepah keren. Ke kin peikiong sapwellimen Sises kehkehlik en kalohki rongamwahwo oh padahkihong meteikan duwen Siohwa oh Sises. Ke inoukihong Siohwa omw mour oh papidaisla. Ele meteikan kin kalokeiuk pwehki ke kin papah Siohwa. (2 Tim. 3:12) Ahpw ke kin pousehlahte papah Siohwa ni lelepek, oh met kasalehda me ke poakohng Siohwa oh kalahnganki pweinen pweipwei sapahlo.—Ipru 12:​2, 3.

9. Dahme Kristian kan me papidaislahr anahne kanaiehng?

⁹ Nin duwen Kristian kei me papidaislahr, kitail anahne kanaiehng dahme kak wiawihong kitail. Kitail kakete tepida sohla kalahnganki pweinen pweipwei sapahlo. Ia duwen met eh kakete wiawi? Medewehla dahme wiawihong Kristian ko nan Episos. Sises ketin kapingahki arail dadaurete. Ahpw e mahsanihong irail: “Iet me I suwedki rehmw, ke keselahr limpoak me ke ahneki mahso.” (Kaud. 2:​3, 4) Dahme Sises mahsanih kasalehda me Kristian men kakete tepida wia soahng kan ong Koht pwehki e ahnla, a kaidehn sang ni limpoak. Soangen aramas menet kin kapakap, kohla towehda mihting kan, oh kalohk ihte pwehki e ahnla wia met. Limpoak solahr kin kamwakid ih. Dahme ke kak wia ma ke pehm me omw limpoak ong Siohwa solahr kehlail duwehte mahso?

10. Ia duwen omw kak kapwaiada dahme Pohl padahkihong Timoty en wia? (1 Timoty 4:​13, 15)

¹⁰ Wahnpoaron Pohl padahkihong Timoty en “medemedewe mwahu” oh “poadidiong wia” uwen eh kak nan eh kaudok ong Siohwa. (Wadek 1 Timoty 4:​13, 15.) Ke pil kak medewe dahme ke kak wia pwehn kolokolete omw ngoang en kaudok ong Siohwa. (Rom 12:11) Karasepe, ele ke kak kalaudehla omw ahnsou pwehn kaunopada ong mihting kan. Met pahn seweseiuk ken rong mwahu ni omw mi wasao. De ni omw onopki Paipel, ele ke kak kohla wasa ehu me ke kak kelehpwla oh kak mengei en medewe dahme ke sukuhlki. Met pahn seweseiuk ken uhdahn paiekihda sang pein omw onop. Duwehte omw anahne kihong tuwi ni kisiniei ehu pwehn lullulte, ke anahne pousehlahte wia soahng kan me duwehte mepwukat pwehn kalahngankihte pweinen pweipwei sapahlo oh soahng teikan kan koaros me Siohwa ketikihong uhk. Erein wihk kan mwohn Katamano, ke pil kak medewe duwen soahng mwahu kan me ke perenki pwehki kowe emen Sounkadehdehn Siohwa. Ni mehlel met pahn seweseiuk ken uhdahn kalahnganki pweinen pweipwei sapahlo, me kahrehda ke kak wia kompoakepah keren rehn Siohwa.

11-12. Ma ekei pak ke pehm ke solahr ahneki ngoang duwehte mahso, met wehwehki me Siohwa solahr ketikihong uhk sapwellime ngehn sarawi? Menlau kawehwehda. (Pil kilang kilel.)

¹¹ Ma erein ahnsou ehu ke sohla ahneki ngoang en papah Siohwa duwehte mahso, met sohte wehwehki me Siohwa sohla ketikihong uhk sapwellime ngehn sarawi. Tamataman dahme wahnpoaron Pohl ntingkilahng mehn Korint ko duwen eh doadoahk en kalohk: “Mehnda ma kaidehn sang ni pein nsenei me I wiahki met, I pil ahnekihte pwukoa doadoahk ehu me kohieng ie.” (1 Kor. 9:17) Ia wehwehn eh koasoio?

¹² Ekei pak Pohl sohte kin ahneki ineng en kalohk. Ahpw e kin pousehlahte kalokalohk mendahki dahme e pehm ahnsowo. Ke pil kak wia duwehte. Koasoanehdi teng en wia dahme pwung mehnda ma ke sohte ahneki ineng en wia met. Eri kapakapki “ineng oh kehl en wia met.” (Pil. 2:13) Pousehlahte wia soahng kan me kin seweseiuk ken mihmi karanih Siohwa. Eri ke kak kamehlele me mwurin ahnsou kis omw limpoak ong Siohwa pahn pwurehng kehlailla oh ke pahn pwurehng ahneki ngoang.

13. Ia duwen atail kak pousehlahte kasawih ma kitail “mi nan pwoson”?

¹³ Ekei pak, e mwahu en medewe mwomwen atail mour duwehte me Pohl koasoia nan 2 Korint 13:5: “Kumwail pousehlahte kasawih ma kumwail kin mi nan pwoson; de pousehlahte kadehdehda soangen aramas dah kumwail.” Karasepe, ke kak pein idek rehmw: ‘I kin mwohneki mahs Wehio nan ei mour?’ (Mad. 6:33) ‘Ei pilipil ong mehn kamweit kasalehda me I kailongki me suwed?’ (Mel. 97:10) ‘I kin miniminiong oh wiahda popohl rehn riei Kristian kan?’ (Ep. 4:​2, 3) Katamano wia ahnsou mwahu en medewe duwen soahng pwukat. Ni atail kin medewehla dahme Siohwa oh Sises ketin wiahiong kitail, kitail pahn men kasalehiong Siohwa atail kalahngan oh kasalehda me kitail kin momour pwehki Krais a kaidehn ong pein kitail, duwehte me Pohl koasoia.c

ME SOLAHR KIN IANG MWOMWOHDISO PAPAH SIOHWA

14. Dahme kakete kahrehiong ekei Kristian kan en sohla karanih mwomwohdiso?

¹⁴ Ekei riatail kan solahr kin towehda mihting kan, ekei pak pil mwurin ar papah Siohwa ni lelepek erein sounpar tohto. Dahme kahrehda? Ekei kin nohn pwunodki kahpwal en ehuehu rahn oh pehm me re sohte ahneki kehl en papah Siohwa. (Luk 21:34) Ele ekei kin mworusala pwehki dahme emen nan mwomwohdiso nda de wia. (Seims 3:2) Pil ekei kin wiahda dihp laud oh sohte men peki sawas. Sohte lipilipil ia kahrepe, dahme ke kak wia ma ke solahr kin iang mwomwohdiso papah Siohwa? Dahme pweinen pweipwei sapahlo oh sapwellimen Siohwa oh Sises limpoak kak kahrehiong uhk ken men wia?

15. Ia duwen Siohwa eh kin ketin kasalehda me e kin nsenohki irail kan me solahr iang mwomwohdiso papah Siohwa? (Esekiel 34:​11, 12, 16)

¹⁵ Medewehla sapwellimen Siohwa pepehm ong irail kan me solahr kin iang mwomwohdiso papah ih. E sohte kin ketin engiengda oh likidmelieirailla. Ahpw e kin ketin rapahki irail kan me duwehte sihpw salongala kei. E kin ketin kamwenge oh sewese irail en pwurodo reh. (Wadek Esekiel 34:​11, 12, 16.) Ia duwe, Siohwa kak ketin wiahiong uhk soahngohte? Ei! Omw wadek iren onop wet kasalehda me ke men kaperenda ih. Siohwa kin ketin mwahngih soahng mwahu kan rehmw ni eh kin ketin seweseiuk ken esehla ih oh wiahla kisehn sapwellime aramas. E pil kin ketin mwahngihete soahng mwahu kan rehmw oh kupwurki ken pwurodo nan mwomwohdiso.

16. Dahme kak sewese sihpw salongala men en pwurodo rehn Siohwa? (Pil kilang kilel.)

¹⁶ Kisin pwuhko Pwurodo Rehn Siohwa koasoia mahsen kangoang pwukat: “Ken kamehlele me Siohwa pahn ketin ieiang uhk ni omw pahn pwurodo reh. E pahn ketin seweseiuk ken kak powehdi omw pwunod, ken kamwahwihala omw pepehm en nsensuwed kan, oh ken diar popohl nan omw madamadau oh mohngiong me kohsang omw ahneki nsenmwakelekel. Eri ele ke pahn pwurehng men iang iengomw tohnkaudok kan papah Siohwa.” Pil tamataman me elder kan kin ngoangki seweseiuk. Irail kak “duwehte wasahn ruk ehu sang kisinieng, wasahn ruk ehu sang melimel.” (Ais. 32:2) Se ese me ke men kasalehiong Siohwa omw kalahnganki pweinen pweipwei sapahlo. Eri pein idek rehmw, ‘Dahme I kak wia met pwehn pwurodo rehn Siohwa?’ (Ais. 1:18; 1 Pit. 2:25) Karasepe, ke kak iang towehda mihting nan Wasahn Kaudok? Ke kak koasoiong emen elder kan oh padahkihong me ke anahne sawas pwehn pwurodo rehn Siohwa? Ele e pahn koasoanehdi emen en onop Paipel rehmw erein ahnsou ehu. Ke kak kamehlele me Siohwa pahn ketin kapaia soahng koaros me ke wia pwehn pwurodo reh oh omw kasalehda omw kalahnganki pweinen pweipwei sapahlo.

DAHME KE PAHN WIA?

17-18. Ia duwen atail kak doadoahngki atail ahnsou ni pwung mwohn Kataman en pahret?

¹⁷ Sises mahsanih me Siohwa ketin poaronehdo ih pwehn ketikihda moure “pwe mehmen me kin kasalehda eh pwoson ih en dehr mwomwla ahpw en ahneki mour soutuk.” (Sohn 3:16) Pwehki Sises pwoukinkitailla, Siohwa kak ketin kasaledekkitailsang dihp oh mehla. Kitail sohte men sohla kalahnganki pweinen pweipwei sapahlo. (Rom 3:​23, 24; 2 Kor. 6:1) Rahn kei mwohn Katamano, wiahda ahnsou en medewehla limpoak me Siohwa oh Sises ketin kasalehda. Met pahn kamwakid kitail en kasalehda atail kalahnganki ara limpoak.

¹⁸ Ia duwen omw pahn kasalehda omw kalahngan? Omw pasapeng kakete weksang ahn meteikan. Ahpw ke kak kamehlele me Siohwa pahn ketin kapaia omw nannanti ni omw iang iengomw tohnkaudok rar kei me “solahr momourki pein irail” ahpw momourki Sises “me pwoukinirailla.”—2 Kor. 5:15.