April

Pwe kitail en alehdi kapai kan sang uduk oh ntahn Sises, kitail anahne pwoson pweinen pweipwei sapahlo. (Ep. 1:7) Irail kan me Sises ketin kahdaneki “sihpw teikan” sohte kin oh sohte konehng tungoale pilawa oh wain me kin kohda ni Sak en Soutik en Kauno nan pahr koaros. (Sohn 10:16) Ahpw, irail kin paiekihda arail tungoale, ni karasaras, “pilawahn mour.” Irail kin wia met sang ni arail kasalehda arail pwoson meirong en pweinen pweipwei sapahlo me Sises ketikihda oh soahng kaselel kan me met kin kahrehda en kak wiawi. (Sohn 6:53) Weksang met, irail kan me anahne tungoale pilawao oh waino kin kadehdehda me irail wia kisehn inou kapw lapo oh ahneki koapworopwor en iang kaunda nan Wehio nanleng. Eri, sohte lipilipil ma kitail iang me keidi kan de sihpw teikan, kitail koaros anahne pwoson laud pweinen pweipwei sapahlo pwe kitail en kak mour kohkohlahte. w24.12 12 ¶14; 13 ¶16

Erein Sak en Soutik en Kauno, Sises ketikihong sapwellime wahnpoaron ko pilawa me sohte doal ihs oh mahsanihong irail me pilawao kin wehwehki kahlape. Ih eri ketikihong irail waino oh mahsanih me e kin wehwehki “ntahn inou lapo.” (Mark 14:​22-25; Luk 22:20; 1 Kor. 11:24) E ketin kahdaneki met “inou lap kapwo,” oh irail kante me pahn iang Sises kaunda Wehin Koht me iang kisehn inou lap wet. (Ipru 8:​6, 10; 9:15) Dahme Sises mahsanih ni Sak en Soutik en Kauno kin dokedoke “kisin pwihn sihpw.” Sapwellime wahnpoaron lelepek ko me iang ih ahnsowo iei me tepin wiahla kisehn pwihn tikitik wet. Irail pwukat me pahn iang Sises mi nanleng. w24.12 11 ¶9-10

Emen kompoakepahn Sises ko pangala ih. Mwuri sapwellime imwintihti kan salihedi, kanamenekih, oh karaunehki soahng kan me e ketin sohte wia. Irail kadeikada me Sises ketin warohng kamakamala oh irail pil kaloke ih. Sounpei ko kahluwalahng ni wasahn kamakamalao oh pasurda ni tuhkehn kalokolok ehu. Ni lelepek, Sises ketin dadaur pahn weirek laud oh lokolok. Ahpw, lokolok me Siohwa ketin sapwellimanki laudsang me Sises ahneki ni eh mahsanih sapwellime Ohlo eh wie lokolok. Siohwa ketin sapwellimanki kehl oh manaman pwehn kauhdi sapwellimeo en dehr lokolok, ahpw e sohte ketin wia met. Siohwa uhdahn ketin poakohng sapwellimeo, eri dahme kahrehda e ketin mweidohng en lokolok oh pwoula? Pwehki Siohwa ketin poakohng kitail. Sapwellimen Sises meirong iei mehn kadehde keieu laud me Siohwa ketin poakohng uhk. E ketin tounmeteikihla sapwellime Ohl kompoako oh ketin dadaur pahn lokolok laud pwehn doareiukasang dihp oh mehla. (1 Sohn 4:​9, 10) Ei, e ketin kupwurki sewese emenemen kitail en pelianda dihp oh kana! w24.08 6 ¶13-14

Kitail kak wehwehkihla mwahu ia uwen laud en Siohwa eh ketin poakohng kitail ma kitail kin medewehla uwen weirek laud me e sapwellimanki ni eh mahsanih sapwellime Ohlo eh lelohng lokolok. Sehdan nda me dene sohte ladu en Koht emen pahn loalopwoatohngete Ih ni ahnsou me apwal en wia met. Pwehn kadehdehda me Sehdan likamw, Siohwa ketin mweidohng Sises en lelohng lokolok laud mwohn eh pwoula. (Sohp 2:​1-5) Siohwa ketin mahsanih aramas ako ar kapailoke Sises, sounpei kan keme, oh pasuradahng ni tuhkehn kalokoloko. Ih eri pil mahsanih sapwellime Ohl kompoako pwoula ni ahl ehu me uhdahn kamedek. (Mad. 27:​28-31, 39) Siohwa sapwellimanki manaman en kauhdi soahng pwukat koaros en wiawi. (Mad. 27:​42, 43) Ahpw ma e ketin wia met, eri Sises sohte pahn kak toukihda moure nin duwen pweinen pweipwei sapahl ehu oh e sohte pahn mie atail koapworopwor. Eri Siohwa ketin mweidohng Sapwellimeo en dadaur pahn lokolok lao e pwoula. w25.01 22 ¶7

Rahno iei Nisan 16, pahr 33. Sapwellimen Sises tohnpadahk ko nsensuwed oh masepwehk. Meh riemen kohkohsang Serusalem oh kohkolahng Emaus. Ira kasikasik me Mesaiao pahn wiahiong mehn Suhs kan soahng mwahu kan ahpw met e melahr. Ahpw, mehkot kapwuriamwei wiawi. Ohl emen tuhwong ira oh iang irahda. Tohnpadahk ko ndaiong ih duwen soahng suwed kan me wiawihong Sises. Eri ohlo tepida koasoia soahng kan me ira sohte pahn manokehla. E ketin kawehwehda dahme kahrehda Mesaiao anahne lokolok oh mehla ni eh kawehwe “tepisang Moses oh Soukohp ako koaros.” Ni ohl silimeno ar lella Emaus, irail tehkada me ohl menet iei Sises me Koht ketin kaiasada! (Luk 24:​13-35) Sises ketin pwarohng sapwellimen tohnpadahk ko pak tohto erein rahn 40 ko mwohn eh ketidahla nanleng. Sises ketin kangoange sapwellime tohnpadahk ko me nsensuwed oh masepwehk. Oh irail perenda oh ahneki eimah en kalohki oh padahngki rongamwahu en Wehio. w24.10 12 ¶1-3

Seri men pahn kin wie kekeirda, ahpw ahn emen nanpwungmwahu rehn Siohwa sohte kin pein kekeirda. Karasepe, Kristian kan nan Korint alehda rongamwahwo, papidaisla, alehdi sapwellimen Koht manaman, oh sukuhlki soahng tohto sang wahnpoaron Pohl. (Wiewia 18:​8-11) Ahpw sounpar kei mwurin arail papidaisla, me tohto rehrail soakoahiekte. (1 Kor. 3:2) Pwehn koahiekla, keieu kitail anahne kakairada ineng en koahiekla. Irail kan me ‘perenki arail soakoahiek,’ de men wiewiahte aramas soakoahiek, sohte pahn koahiekla. (Lep. Pad. 1:​22, NW) Kitail sohte men duwehte aramas laud men me kin soikala pwukoa kan oh men arail pahpa oh nohno en wiahiong ih eh pilipil. Ahpw kitail men pwukoahki oh tehk mwahu me pein atail nanpwungmwahu rehn Siohwa en pousehlahte kekeirda. Ma ke kin nannantihte pwehn koahiekla, kapakapkihong Siohwa en ketin ‘kakehlakahda omw ineng en wia soahng koaros me e ketin kupwurki.’—Pil. 2:13. w24.04 4 ¶9-10

Ni Siohwa eh kin ketin kadeik aramas akan, ni kadek e kin ketin kasalehiong kitail ia sapwellime pepehm. (Esek. 33:11) Siohwa sohte pahn ketin kasohrehla douluhl emen, ihte ma mie kahrepe mwahu en ketin wia met. E kin ketin diren kadek kalahngan oh kin kasalehda met ahnsou me kak. Dahme kitail ese duwen aramas akan me sohte pahn iasada? Paipel kihda ekeite karasepe kan. Sises ketin kasalehda me Sudas Iskariot sohte pahn iasada. (Mark 14:21; pil kilang Sohn 17:12) Sudas uhdahn ese me dahme e wiao uhwong Siohwa oh sapwellime Ohlo. Ahpw e wia. (Mark 3:29) Duwehte met, Sises mahsanih me ekei kaunen pelien lamalam kan me uhwong ih pahn mehla oh sohte ahneki koapworopwor en kaiasada. (Mad. 23:33) Oh wahnpoaron Pohl kehkehlingki me irail kan me kesehla oh uhwongada kaudok mehlel oh sohte koluhla sohte pahn kaiasada.—Ipru 6:​4-8; 10:29. w24.05 4 ¶10-11

Ni atail kin karanihete Siohwa, Sehdan sohte kak wia mehkot me kak kauweikitailla kohkohlahte. (1 Sohn 3:8) Nan sampah kapwo, Siohwa pahn ketin pousehlahte pere kompoakepah lelepek kan kaidehn keper kante me kak kauwehla arail nanpwungmwahu reh ahpw pil sang mehla. (Kaud. 21:4) E uhdahn wia pai kaselel ehu en wia emen me lukodohng nan sapwellimen Siohwa impwal. Kitail kak ahneki nanpwungmwahu keren reh me kak poatopoat. (Esek. 37:27) Dahme kitail anahne wia ma kitail men wiahte tohn sapwellime impwal? Ma emen lukeiukla ni imweo, ke pahn men wia soahng kan me pahn kaperenda ih. Duwehte met, kitail uhdahn men ese dahme Siohwa ketin kupwurki sang irail kan me men wiahte tohn sapwellime impwal. Atail poakohng Siohwa kin kamwakid kitail en wia uwen atail kak koaros “en uhdahn kaperenda ih.” (Kol. 1:10) Kitail en dehr manokehla ihs ih oh ahnsou koaros wauneki ih. Atail wauneki pahn sewese kitail en soikala wiewia kan me pahn kansensuwedihada. Kitail kin uhdahn inengieng “peikiong atail Koht ni karakarahk.”—Maika 6:8. w24.06 4 ¶8-9

Siohwa ketin padahkihong Eipraam en meirongkihla nah pwutako Aisek. Ele met uhdahn kapwunodehda Eipraam. Ahpw e peikiong Siohwa. Ni ahnsou me Eipraam kereniong kemehla nah pwutako, Koht ketin kauhdi. Siohwa ketin mwahngih me Eipraam pahn medengki ma e kemehla pein nah pwutako. Mehn kahlemeng wet padahkihong kitail dahme Siohwa pahn ketin wia mwuhr. Siohwa uhdahn ketin kupwurki ketikihda sapwellime Ohlo nin duwen meirong ehu. Ih uwen laud en Siohwa eh ketin poakohng aramas akan. (Sen. 22:​1-18) Ni ahnsou me Siohwa ketikihong mehn Israel ko Kosonnedo, e ketin mahsanihong irail en meirongki mahn akan pwehn ale mahkpen diparail. (Lip. 4:​27-29; 17:11) Meirong pwukat kasalehda me Siohwa pahn ketikihda meirong ehu me mwahusang me pahn uhdahn doarehsang aramas akan dihp. Koht ketin mahsanihong sapwellime soukohp ko en ntingihdi duwen kadaudoko me inoupe mie. Irail kawehwehda me sapwellimen Koht Ohlo pahn lelohng lokolok oh kamakamala pwehn doarehla aramas akan—pil kowe—sang dihp oh mehla!—Ais. 53:​1-12. w24.08 4 ¶7-8

Ni omw kin wadek ekei iretikitik, medewe ia duwen omw kak kapwaiada. Ni omw wadek ekei wasa nan Mahsen Koht, pein idek rehmw, ‘Ia duwen ei kak kapwaiada ire wet rahnwet de ahnsou kan mwuhr?’ Karasepe, medewehla me ke wadekehr 1 Deselonika 5:​17, 18. Mwurin omw wadek iretikitik pwukat, ke kak uhdi oh medewe ia uwen omw kin kalapw kapakap oh ia uwen omw kin poadidi en kapakap. Ke pil kak medemedewe soahng kan me ke kin kalahnganki. Mwein ke pilada me ke pahn kalahngankihong Siohwa soahng siluh. Ma ke pil wiahda minit keite pwehn medemedewe iren mehn kasukuhl kan sang Paipel, met pahn seweseiuk en wehwehki Mahsen en Koht oh kapwaiada dahme e mahsanih. Oh ma ehuehu rahn ke kin doadoahngki dahme ke wadek sang nan Paipel, kedekedeo e pahn kamwahwihala omw papah Siohwa. w24.09 4-5 ¶9-10

Siohwa ketin kapikkitailda en ahneki koahiek tohrohr ehu. Siohwa ketin kapikkitailda en perenki kihkihwei sang atail kin ale. Kitail kin nsenamwahu ni ahnsou me kitail kin kak sewese riatail Kristian kan. Oh kitail kin peren ni arail kin kasalehda me irail kalahnganki. Ahpw, mehnda ma irail kalahnganki de soh, kitail kak perenki me kitail wia dahme pwung. Dehr manokehla me sohte lipilipil dahme ke kin kihwei, “KAUN-O pahn kak en kasapahldohng komwi uwe ieu me laudsang!” (2 Kron. 25:9) Eri dahme ke kin kihong meteikan sohte kak laudsang dahme Siohwa kak ketikihong uhk. Oh ni Siohwa eh kin katingih kitail, ih met me keieu laud. Eri, kitail en koasoanehdi teng en pousehlahte kahlemengih Samatailo nanleng me kin ketin kadek sapan. w24.09 31 ¶20-21

Siohwa kin ketin kadek kalahngan oh kin poakehla aramas. (Mel. 103:13; Ais. 49:15) E kin ketin mwahngih ni atail medekla. (Sek. 2:8) E kin ketin sewese kitail en esehla oh kompoakepahnkihla Ih. (Mel. 25:14; Wiewia 17:27) Oh e kin ketin aktikitik; e “kin ketin mahsendihdo [“maliedi,” NW] oh ireirong nanleng oh sampah. E kin ketin pwekada me semwehmwe kan sang nanpwel.” (Mel. 113:​6, 7) Pwehki kahrepe pwukat koaros, kitail kin men kalinganahla atail Koht lapalapo. Kitail kin kalinganahla Siohwa pwehki kitail men meteikan en esehla ih. Me tohto sehse dahme mehlel duwen Siohwa. Dahme kahrehda? Pwehki Sehdan karotongelahr arail madamadau sang ni eh kihpeseng likamw kan duwen Ih. (2 Kor. 4:4) Sehdan pil kamehlelehiong aramas akan me Siohwa kin ketin engieng pahrail, sohte kin ketin nsenohki irail, oh kin ketin kahrehda lokolok laud ong tohnsampah. Ahpw kitail ese dahme mehlel duwen atail Koht! Kitail ahneki ahnsou mwahu en padahkihong meteikan dahme mehlel duwen Koht oh sewese irail en pil kalinganahla.—Ais. 43:10. w25.01 3 ¶6-7

Mendahki sapwellimen Koht Ohlo Sises unsek oh wiahda manaman kapwuriamwei kan, Sehdan kin doadoahngki ekei aramas pwehn kihpeseng soahng likamw tohto duwen ih. Karasepe, kaunen pelien lamalam kan kin padahkihong aramas akan me manaman me Sises kin ketin doadoahngki kohsang rehn “kaunen ngehn suwed kan” pwehn kausasang ngehn suwed rehn aramas akan. (Mark 3:22) Ni ahnsou me Sises ale kopwung, kaunen pelien lamalam ko karaunehki me e lahlahwe oh kamwakid pokono en kemehla. (Mad. 27:20) Mwuhr, ni sapwellimen Krais tohnpadahk ko ar kin kalohki rongamwahwo, irail kan me kin uhwong “kamwoarongehda mehn liki kan” pwe ren kaloke Kristian ko. (Wiewia 14:​2, 19) Me pid Wiewia 14:​2, Kahn Iroir en December 1, 1998, koasoia: “Mehn Suhs pwukat me kin uhwong Kristian akan sohte kin itarki pein irail te en uhwong padahk en Kristian akan, ahpw irail kin song en kahrehong mehn liki kan koaros en pil uhwong Kristian akan.” Rahnwet, Sehdan kin ‘pitipitihete sampah pwon.’ w24.04 11 ¶15-16

Ahn emen pahn mour kohkohlahte sohte kin poahsoankihda iahd me e mehla. Siohwa kin ketin wia Sounkopwung unsek men. Sapwellime pilipil kan kin ahnsou koaros pwung oh pahrek. (Mel. 33:​4, 5) Kitail kak uhdahn kamehlele me “Sounkopwung en sampah pwon” pahn ketin wia dahme pwung. E pil pwung en nda me ahn emen pahn mour kohkohlahte sohte kin poahsoankihda wasa me e kin kousoan ie. Siohwa sohte pahn ketin kadeikada aramas tohtohie nin duwen “kuht” kei pwehki re kousoan nan sahpw kan me re sohte kak sukuhlki duwen rongamwahu en Wehio. (Mad. 25:46) Sounkopwung en sampah pwon me kin ketin kadeik ni pwung kin uhdahn ketin nsenohki aramas pwukat laudsang atail kak nsenohki irail. Kitail sehse ia duwen Siohwa eh pahn ketin kamwakid soahng kan erein kahn kamakam kowahlapo. Ele ekei irail pwukat pahn ahneki ahnsou mwahu en sukuhlki duwen Siohwa, pwosonla ih, oh uhki ih ni ahnsou me e pahn ketin kasarawihala mware mwohn wehi kan koaros.—Esek. 38:16. w24.05 12 ¶14-15

Sapwellimen Siohwa aramas akan kin perenki sawaspene. (2 Kor. 8:4) Ahpw ekei pak, re kin anahne eimah pwehn wia met. Karasepe, ni mahwen ehu eh wiawi, elder kan kin ese me riarail Kristian kan anahne kangoang, sawas, oh kak alehdi neirail Paipel oh sawasepen Paipel kan, oh pil kanarail mwenge, likou, oh wasa me ren kousoan ie. Elder kan poakohng riarail Kristian kan. Ihme kahrehda re kin sewesehki dahme re anahne, pil ni ahnsou kan me uhdahn keper en wia met. Erein ahnsou apwal pwukat, e kesempwal kitail en kin peik pwe kitail en kak miniminpene. Peikiong kaweid me kohsang ohpis en Sounkadehdehn Siohwa me kin apwalih omw wasa. (Ipru 13:17) Elder kan anahne kaukaule tehk koasoandi kan ong ia duwen arail pahn kaunopada oh dahme re pahn wia ma kahpwal ehu pwarada. (1 Kor. 14:​33, 40) En eimah ahpw kanahieng. (Lep. Pad. 22:3) Mwekid ni loalokong. Dehr wia mehkot me keper. Likih Siohwa. E kak ketin seweseiuk ken sewese riomw Kristian kan ni ahl me sohte keper. w24.07 4 ¶8; 5 ¶11

Nanmwarki Depit ese Siohwa oh kin koapworopworki. Ni ahnsou me Nanmwarki Sohl oh imwintihti teikan kin songosong en kemehla Depit, e kapakap ong Siohwa oh peki sawas. Mwurin Koht eh ketin sapengala eh kapakapo oh kapitala ih, Depit koasoia: “KAUN-O ketin ieias!” (Mel. 18:46) Ia wehwehn ahn Depit koasoio? Ehu pwuhk koasoia me Depit kin kasalehda eh likih Siohwa “nin duwen koht ieias emen me kin ahnsou koaros ketin sewese sapwellime aramas akan.” Ei, Depit ese me eh Kohto kin ketin mwahngih dahme kin wiawihong oh kin kupwurki sewese ih. Met kangoange Depit en pousehlahte papah oh kapinga Siohwa. (Mel. 18:​28, 29, 49) Atail uhdahn kamehlele me Siohwa iei me Koht ieias kak sewese kitail en papah ih ni ngoang. Kitail pahn ahneki kehl pwehn dadaurete pahn kahpwal kan oh pil kahrepe mwahu en pousehlahte doadoahk laud nan sapwellime doadoahk. Kitail pil pahn koasoanehdi teng en karanihete Siohwa. w24.06 20-21 ¶3-4

Dahme kitail kak sukuhlkihsang dahme wahnpoaron Pohl ntingkilahng mehn Deselonika ko? Ni ahnsou me kitail kin rong soahng ehu me sohte pwungiong dahme kitail sukuhlkier sang nan Paipel de ni atail rong koasoi kapwuriamwei ehu, kitail anahne doadoahngki erpit. Nan Soviet Union mahso, mie pak ehu me atail imwintihti kan kihong riatail Kristian kan kisinlikou ehu me dene e kohsang atail poasen kaun. Kisinlikowo kangoange ekei brother ko en wiahda ehu pwihn tohrohr likin sapwellimen Siohwa pwihn. Kisinlikowo mwomwen uhdahn mehlel. Ahpw e sohte pitihedi brother lelepek ko. Irail ese me audepen kisinlikowo sohte pwungiong dahme re sukuhlkier. Rahnwet, irail kan me kin uhwong padahk mehlel kin ekei pak doadoahngki Internet oh social media pwehn song en kapingada de katohrekitailpeseng. Kitail en dehr “mwadang pingida,” ahpw kitail kak pere pein kitail ni atail kin medewe kanahieng ma dahme kitail rong de wadek kin pwungiong me mehlelo me kitail sukuhlkiher.—2 Des. 2:2; 1 Sohn 4:1. w24.07 12 ¶14-15

Pilipil me keieu kesempwal me emen kak wiahda iei en inoukihong Siohwa eh mour oh wiahla kisehn sapwellime peneinei. Siohwa ketin kupwurki koaros en wia met. Dahme kahrehda? E ketin kupwurki irail en ahneki nanpwungmwahu reh oh mour kohkohlahte. (Deud. 30:​19, 20; Kal. 6:​7, 8) Ahpw, Siohwa sohte kin ketin idingkihong aramas en papah ih. E ketin mweidohng emenemen en pein pilada dahme e pahn wia. Ia duwen ma Kristian papidaisla men kauwehla sapwellimen Koht kosonned oh wiahda dihp laud? Ma e sohte koluhla, mwomwohdiso anahne kihsang ih nanpwungarail. (1 Kor. 5:13) Ahpw mehnda ma e sohla wia kisehn mwomwohdiso, Siohwa kin uhdahn ketin kupwurki me aramaso en koluhla oh pwurodo reh. Ni mehlel, ehu kahrepe kesempwal me e ketikihdahki pweinen pweipwei sapahlo iei pwe en kak ketin mahkohng irail kan me koluhkihla diparail kan. Siohwa uhdahn wia Koht limpoak men me kin ketin kangoange irail kan me wiahda dihp laud ren koluhla.—Sek. 1:3; Rom 2:4; Seims 4:8. w24.08 14 ¶1-2

Ni ahnsou me Sohn ntingihdi kesiluhwen nah kisinlikou, ekei aramas kin padahngki padahk likamw kan oh kahrehda kahpwal laud nan mwomwohdiso. Ahpw meteikan kin pousehlahte “weweid ni me mehlelo.” Re kin peikiong Siohwa oh kin “weweid nin duwen sapwellime kehkehlik kan.” (2 Sohn 4, 6) Kristian lelepek pwukat sohte kin kaperendahte Sohn ahpw pil Siohwa. (Lep. Pad. 27:11) Ia mehn kasukuhl ong kitail? Lelepek kin wahdo peren. (1 Sohn 5:3) Karasepe, kitail kin peren pwehki kitail kin kaperenda Siohwa. Siohwa kin uhdahn ketin kupwurperenkihda atail kin soikala dahme sapwung oh peikiong sapwellime kehkehlik kan. Tohnleng kan nanleng pil kin perenda. (Luk 15:10) Kitail pil kak diar peren ni atail kilang riatail Kristian kan ar kin lelepekte. (2 Des. 1:4) Oh ni ahnsou me ahn Sehdan sampah pahn kasohrala, kitail pahn perenki me kitail loalopwoatohngete Siohwa. w24.11 12 ¶17-18

Ia uwen werei me ke anahne esehla mwahu duwen emen mwohn omw ndaiong ih omw pepehm? Ma ke mwadang ndaiong ih omw pepehm, ele e pahn medewe me ke sohte kin medewe mwahu soahng kan mwohn omw wiahda omw pilipil. (Lep. Pad. 29:20) Ma aramaso esehda me ke men esehla ih, ahpw ke awih ahnsou werei pwehn ndaiong omw pepehm, eri e kakete medewe me ke kin pweiek en wiahda omw pilipil. (Ekl. 11:4) Tamataman me mwohn omw pahn koasoiong emen, ke sohte anahne pilada me ke pahn pwoudiki. Ahpw ke anahne uhdahn kamehlele me ke kakehr pwopwoud oh me e kakete wia omw pwoud mwahu men. Ahpw ia duwen ma ke esehda me mie emen me men eseiukala? Ma ke sohte men esehla ih, song en kasalehda met ni sansal sang omw wiewia kan. E sohte pahn wia mwekid kadek ehu ma ke kahrehiong aramaso en medewe me kumwa kakete tepida date ma met sohte pahn wiawi.—Ep. 4:25. w24.05 22-23 ¶9-10

Me keidi lelepek kante me Sises pahn ketin kasamwolong nan Wehin nanleng. Me keidi men me sohte kin mwasamwasahn sohte pahn iang “me pilipildahr” kan. (Mad. 24:31) Oh koaros me ahneki koapworopwor en mour kohkohlahte nin sampah pil anahne pousehlahte mwasamwasahn oh lelepekte. Kitail eselahr mwahu duwen Siohwa, eri kitail likih me soahng koaros me e kin ketin wia kin pwung. Kitail sohte kin pwunodki ma Siohwa ketin pilada en keiehdi ekei me lelepek kan nan atail ahnsou. Kitail tamanda dahme Sises mahsanihki duwen tohndoadoahk kan me doadoahk sang awa kaeisek ehu nan sapwellime karasaras en mwahto. (Mad. 20:​1-16) Irail kan me kodohng doadoahk nan mwahto ni soutik pil alehdi uwen pweipweiohte me irail kan me tepida nimenseng alehdi. Duwehte met, sohte lipilipil iahd me keidi kan pilipilda, irail pahn alehdi ketingparailo nanleng ma irail kin lelepekte. w24.09 24 ¶15-17

Sises ketin wiahda mehn kahlemeng unsek duwen atail pahn dadaur pahn wiewia sapahrek. Aramas tohto, iangahki pein eh peneinei, kin wiakauwe. Kiseh kan koasoia me e sahliella, kaunen pelien lamalam ko koasoia me manaman me e ketin doadoahngki kohsang rehn ngehn suwed kan, oh sounpei en Rom kan kapailoke, kaloke, oh kemehla. (Mark 3:​21, 22; 14:55; 15:​16-20, 35-37) Ahpw Sises ketin dadaur pahn wiewia sapahrek pwukat koaros oh soh mwahn wiahda sapwung kis. Dahme kitail kak sukuhlkihsang sapwellime mehn kahlemeng? (1 Pit. 2:​21-23) Sises ketin wiahda mehn kahlemeng unsek ong kitail en idawehn ni atail lelohng wiewia sapahrek. E mwahngih iahd me e pahn ketin nennenla oh iahd me e pahn ketin mahsen. (Mad. 26:​62-64) Ekei pak ni meteikan ar karaunlikamwih, e kin ketin nennenlahte. (Mad. 11:19) Ni eh kin mahsen, e sohte kin ketin kasarowe de lokaia lemei ong irail me kin kaloke ih. w24.11 4-5 ¶9-10

Medewehla me ke kihong emen me ke poakohng kisakis kesempwal ehu me kaselel oh katapan. Ke pahn nsensuwedla ma aramaso kihlong nan kapined ehu oh sohla pwurehng taman! Ahpw, ke pahn perenda ma e doadoahngki mwahu omw kisakiso oh kasalehda eh kalahnganki. Ia duwen karasaras wet eh dokedoke sapwellimen Siohwa kisakis en pweinen pweipwei sapahlo? Siohwa ketikihdo sapwellime Ohlo pwehn pwoukinkitailla. Eri Siohwa kin uhdahn kupwurperenki ni atail kin kasalehda atail kalahnganki kisakis kesempwalo oh sapwellime limpoak me kamwakid en ketikihda pweinen pweipwei sapahlo! (Sohn 3:16; Rom 5:​7, 8) Ele sounpar kei douwehr powe, kitail kakete tepida sohla kalahnganki pweinen pweipwei sapahlo. Ahpw, ma kitail sohla kalahnganki pweinen pweipwei sapahlo, e pahn duwehte atail kihong kisakis kaselelo me Koht ketikihong kitail, wasa ehu me kitail sohte kak kilang de medewe duwe. Pwe met en dehr wiawi, kitail anahne kalapw medewe duwen soahng koaros me Koht oh Krais ketin wiadahr ong kitail. w25.01 26 ¶1-2

Brother men me kak wiahla elder men “kaidehn ohl emen me ahpwtehn pwosonla.” Mendahki ke sohte anahne papidaisla erein sounpar tohto, ke anahne ahnsou pwehn wiahla Kristian koahiek men. Duwehte Sises, ke anahne aktikitik oh perenki papah Siohwa ni soangsoangen ahl akan. Ke pahn kin kanengamah oh awih Siohwa en ketikihong uhk ekei pwukoa nan mwomwohdiso. (Mad. 20:23; Pil. 2:​5-8) Ke kak kadehdehda me ke kin “loalopwoat” sang ni omw mour ni ahl me Siohwa ketin kupwurki oh idawehn kaweid me kohsang sapwellime pwihn. Paipel mahsanih me sounapwalih kan anahne koahiek en padahk. Ia duwe, met wehwehki me ke anahne wia padahk kaselel kan? Soh. Kaidehn elder kan koaros kin uhdahn mai en padahk, ahpw ni arail kin kalohk oh mwemweitla rehn meteikan, re anahne en kak doadoahngki mwahu Paipel pwehn padahkih oh kangoange riarail Kristian kan. w24.11 23-24 ¶14-15

Ma ke diarada ire ehu nan Paipel me ke sohte uhdahn wehwehki, wia roporop. Oh erein rahno pwon, doudouloale dahme ke onopki oh sukuhlki duwen Siohwa, Sapwellimeo, oh ara limpoak ong uhk. (Mel. 119:97) Dehr mworusala ma ke sohte diar mehkot kapw de kaperen ahnsou koaros me ke mwohndiong wadawad de wia roporop. Medewehla me kowe emen sounrapahki kohl. Ni kanengamah, sounrapahki kohl kan kin doadoahngkihla awa de rahn tohto mwohn arail diar kohl, pil kohl me keieu tikitik. Ahpw irail kin nannantihte pwehki kohl ko koaros kesempwal ong irail. Ahpw me kesempwal sang kohl iei soahng kapw koaros me kitail kin sukuhlki sang nan Paipel. (Lep. Pad. 8:10) Eri, kanengamah oh idawehnte omw koasoandi en wadawad en Paipel.—Mel. 1:2. w25.01 24-25 ¶14-15

Siohwa ketin kasik me kitail en kin men mahkohng irail kan me kin kamedekeikitailla. (Mel. 86:5; Luk 17:4; Ep. 4:32) Ele kitail kin uhdahn nsensuwedkihla dahme emen nda de wiahiong kitail, ahpw mehlel ma aramaso wia kompoakepatail keren men de tohn atail peneinei. (Mel. 55:​12-14) Ekei pak, kitail kin uhdahn lingeringer de medekla me kahrehda e mwomwen me kitail dokdi. (Lep. Pad. 12:18) Ele kitail kin song ekihla de pohnsehsehla atail medeko. Ahpw atail wia met kakete duwehte atail dokdi ahpw mweidohng naipo en mihmihte nan ohlao. Duwehte met, kitail sohte kak kasik me atail medeklao pahn mwahula ma kitail pohnsehsehla. Ni emen eh kansensuwedihkitailla, ele kitail kin tepte lingeringer. Paipel mahsanih me kitail kin kakete lingeringerkihda soahng ehu. Ahpw e pil katamankihong kitail en dehr mweidohng atail lingeringer en kaunkitailda. (Mel. 4:4; Ep. 4:26) Dahme kahrehda? Pwehki atail lingeringer sohte kin imwila mwahu. (Seims 1:20) Tamataman me nin tapio, kitail kakete lingeringerda, ahpw kitail kak pilada ma kitail pahn lingeringerte de sohla lingeringer. w25.02 15 ¶4-6

Sises ketin wiahda karasaras ehu me kasalehda me e sohte wia elen loalokong en nekidala mwohni ahpw sohte “kepwehpwe mwohn silangin Koht.” (Luk 12:​16-21) Sohte me ese dahme pahn wiawi lakapw. (Lep. Pad. 23:​4, 5; Seims 4:​13-15) Nin duwen sapwellimen Krais tohnpadahk kei, kitail ahneki ehu soangen kahpwal. Sises mahsanih me kitail anahne onopada en “pwilikihdi” atail dipwisou koaros ma kitail men wiahla sapwellime tohnpadahk. (Luk 14:33) Met wiawihong tepin Kristian ko nan Sudia. Irail pwungki en pwilikihdi soahng koaros me re ahneki ni peren. (Ipru 10:34) Nan atail ahnsou, mie riatail Kristian tohto me sohla arail doadoahk de kepwe kan pwehki re sohte kin utung palien politik kan. (Kaud. 13:​16, 17) Dahme sewese irail? Irail uhdahn likih sapwellimen Siohwa inowo: “I sohte pahn mweisang uhk oh I sohte pahn keseiukala.” (Ipru 13:5) Eri, kitail kin wia dahme kitail kak pwehn kaunopada dahme kitail anahne ong ahnsou kohkohdo, oh ma mehkot wiawi ni atail sohte kasik, kitail kin likih sapwellimen Siohwa sawas. w25.03 29 ¶13-14

Siohwa sohte ketin kasik me kitail en pein kekeirda oh koahiekla. E ketikihong kitail sounsilepe kan oh sounpadahk kan nan mwomwohdiso en Kristian me kin sewese kitail en “wiahla aramas laud” kei oh “uhdahn koahiekla duwehte Krais.” (Ep. 4:​11-13) Siohwa pil ketikihda sapwellime manaman pwehn sewese kitail en ahneki “sapwellimen Krais madamadau.” (1 Kor. 2:​14-16) Patehng met, Koht ketin kaweid ntingdahn pwuhken Rongamwahu pahieu ko pwehn kasalehiong kitail mwomwen ahn Sises madamadau, koasoi, oh wiewia kan erein eh ketiket nin sampah. Sang ni atail kin kahlemengih sapwellimen Sises madamadau oh wiewia kan, kitail kak wiahla Kristian koahiek kei. Ahpw pwe kitail en kekeirda oh koahiekla, kitail pil anahne “doula sangehr tepin padahk kan duwen Krais.” w24.04 4-5 ¶11-12

Rahn koaros kitail anahne wiahda pilipil kan. Ekei kin mengei en wiahda, duwehte dahme kitail pahn kang nimenseng de iahd me kitail en meir. Ahpw nan ekei irair, e kin apwal en wiahda pilipil. E kakete kamwakid atail roson, atail nsenamwahu, irail kan me kitail poakohng, de atail kaudok. Kitail men wiahda pilipil kan me pahn mwahuong kitail oh atail peneinei. Keieu kesempwal, kitail en koapworopworki me atail pilipil kan pahn kaperenda Siohwa. (Rom 12:​1, 2) Kahk kesempwal me ke anahne wia pwehn wiahda pilipil pwung ehu iei esehda ire mehlel kan. Dahme kahrehda met kesempwal? Medewehla emen me kohla rehn toahkte men pwehki e ahneki soumwahu laud ehu. Ia duwe, toahkteo pahn wiahda pilipil ehu ong wini dah me e pahn kihong me soumwahwo ni eh saikinte kilang de idek reh peidek kan? Uhdahn soh. Ke pil pahn wiahda pilipil mwahu kan ma ke medewe mahs ire mehlel kan me dokedoke omw irairo. w25.01 14 ¶1-3

Dahme kitail ese duwen sapwellimen Siohwa kadek kalahngan? Ia duwen eh ketin kasalehdahr me e “sohte kin ketin kupwurki emen en kasohrala”? (2 Pit. 3:9) Medewehla sapwellime kadek me e ketin kasalehiong ekei irail kan me wiahda dihp laud kan. Nanmwarki Depit wiahda dihp laud kan, me duwehte kamwahl oh kemehla aramas. Ahpw Depit koluhla, eri Siohwa ketin kadek kalahngan oh mahkohng. (2 Sam. 12:​1-12) Nanmwarki Manase wiahda dihp laud tohto erein pali laud en eh mour. Ahpw, mendahki eh uhdahn suwed, Siohwa ketin kasalehiong Manase mahk kalahngan pwehki eh uhdahn koluhla. (2 Kron. 33:​9-16) Mehn kahlemeng pwukat katamankihong kitail me Siohwa kin ketin kasalehda kadek kalahngan ahnsou koaros me e ketin mwahngih me mie kahrepen en wia met. E pahn ketin kaiasada soangen aramas pwukat pwehki irail ese me re wiahda dihp laud kan oh eri koluhla. w24.05 4 ¶12