May

Mwurin eh ketin kapitasang sapwellime aramas akan sang kalidu nan Isip, Siohwa ketin idihada samworo kan pwehn papah nan impwal sarawio. E ketikihong mehn Lipai kan en apwalih pwukoa teikan nan impwal sarawio. Ia duwe, Siohwa kin ketin apwalih mwahu irail kan me kin papah nan impwal sarawio mwahusang irail kan me mi karanih wasao? Soh! Siohwa sohte kin ketin lipilipilki aramas. Emenemen mehn Israel kak wia kompoakepahn Siohwa me keren. Karasepe, Siohwa ketin tehk mwahu me wehio pwon kak kilang uhren depweko oh uhren kisiniei ehu me mi pohn impwal sarawio. (Eks. 40:38) Ni ahnsou me pelien depweko kin tepida mwekidla ehu wasa, pil irail kan me mi keieu dohsang impwalo kak kilang. Eri irail kak kihpene arail kepwe kan, imwarail impwal kan, oh iangih aramas ako kohkohla. (Nemp. 9:​15-23) Duwehte rahnwet, sohte lipilipil wasa me kitail kin mi ie nin sampah, Siohwa kin ketin poakohng, apwalih, oh pere kitail. w24.06 4-6 ¶10-12

Ahn Depit mour mihla nan keper. Nah pwutako Apsalom koasoanehdi en kemehla pwehn wiahla nanmwarki. (2 Sam. 15:​12, 13) Depit anahne mwadang kohkohsang Serusalem! Ni nah ladu ko ar mwesel, Depit esehda me emen anahne mihmihte Serusalem pwehn esehda dahme Apsalom koasoakoasoane en wia mwuri. Eri e kadarala nan kahnimwo Sadok oh samworo teikan pwehn wia lipoahrok kei. (2 Sam. 15:​27-29) Irail anahne uhdahn kanahieng. Depit wiahda pilahn ehu me anahne sawas rehn Sadok oh Usai, kompoakepahn Depit kan me loalopwoat. (2 Sam. 15:​32-37) Usai anahne mwomwehda me e kin utung Apsalom oh kin kihong kaweid ong ia duwen eh pahn kemehla Depit, oh met kihong Depit ahnsou mwahu en kaunopada ong mahwen. Ni Apsalom eh pwungki ahn Usai kaweido, Usai uhd padahkihong Sadok oh Apaiadar dahme wiawi. (2 Sam. 17:​8-16) Ira eri kadarala rehn Depit ahn Apsalom pilahno oh met sewese pere Depit sang keper.—2 Sam. 17:​21, 22. w24.07 4-5 ¶9-10

Ekei sapwellimen Siohwa ladu kan kin pwunodkihte sapwung kan me re wiahda mahso, mehnda ma mwohn de pil mwurin arail papidaisla. Ahpw dehr manokehla me Siohwa uhdahn ketin poakohng kitail oh ketikihda pweinen pweipwei sapahlo ong mahkpen dipatail kan. Kitail kak kamehlele me e ketin kupwurki kitail en ale sapwellime kisakis wet. Siohwa ketin kamehlelehiong kitail me mwurin atail “kapwungala mahs ire pwukat” reh, e pahn uhdahn ketin mahkohng kitail. Kitail uhdahn kalahnganki me Samatailo Siohwa sohte kin ketin tamataman atail dihp en mahs ko! Ni ahnsowohte, e kin ketin tamataman soahng mwahu kan me kitail wiahda. (Mel. 103:​9, 12; Ipru 6:10) Ma ke kin pwunodki soahng kan me ke wiahda mahso, wia uwen omw kak en medemedewe dahme ke kak wia ahnsou wet oh ahnsou kohkohdo. Ke sohte kak wekidala dahme wiawi mahso. Ahpw ke kak kapinga oh kaperenda Siohwa ahnsou wet. Oh ke kak medemedewe inou kaselel ong ahnsou kohkohdo me e ketin inoukihong uhk. w24.10 8 ¶8-9

Ni omw wadek Paipel, ke kakete mworusala pwehki ke esehda me mie soahng tohto me ke anahne kamwahwihala. Karasepe, medewehla me ehu rahno, omw wadawad en Paipelo kasalehda me ken dehr lipilipilki aramas. (Seims 2:​1-8) Ke kilang me ke kak kamwahwihala mwomwen omw wiewia ong meteikan, eri ke pilada en wiahda ekei wekidekla. Rahno mwuri ke wadek ekei iretikitik me kasalehda me e kesempwal en kanahieng dahme ke kin koasoia. (Seims 3:​1-12) Ke esehda me ekei pak ke kin nda mehkot me sohte kadek de sohte kangoang. Eri ke koasoanehdi me ke pahn kalaudehla omw kangoange meteikan ni omw koasoiong irail. Ele omw wadawad en Paipel en mwurin mwo kin pidada ken kanahieng en dehr kompoakepahnkihla sampah wet. (Seims 4:​4-12) Ke esehda me ke anahne uhdahn kanahieng dahme ke kin kilang, wadek, oh rong. Kapahieu en rahno, ele ke pahn pehm me e nohn apwal en wiahda wekidekla pwukat. Dehr mworusala. Tamataman me kitail anahne pousehlahte pwuhriong nan “mour kapw.” w24.09 5-6 ¶11-12

Sises mwahngih me Siohwa kin ketin mahmahsanih wiewia sapahrek kan me wiawihong ih. E likih me Siohwa pahn ketin kapwungala wiewia sapahrek kan ni ahnsou me konehng. Ni emen eh wiakauwe kitail, kitail kak alasang Sises oh kanahieng dahme kitail pahn koasoia. Ekei wiewia sapahrek kin tikitik, oh kitail kak pohnsehsehla. De ele kitail kak nennenlahte oh dehr nda mehkot me kakete kalaudehla kahpwalo. (Ekl. 3:7; Seims 1:​19, 20) Oh ekei pak, ele kitail anahne nda mehkot ni atail kilang emen eh lelohng wiewia sapahrek de ni atail kin uhki padahk mehlel. (Wiewia 6:​1, 2) Ma kitail pahn nda mehkot, kitail anahne song uwen atail kak en wia met ni meleilei oh wahu. Kitail pil kak alasang Sises ni atail kin mweidala pein kitail ong “Meno me kin ketin kadeikada ni pwung.”—1 Pit. 2:23. w24.11 5-6 ¶10-12

Ma aramas me wiahda dihp laudo koluhla, kitail kin uhdahn perenkihda! (Luk 15:7) Mendahki elder kan kin wia uwen arail kak en sewese me wiahda dihp laudo en koluhla, ihs me kin uhdahn sewese en wekila? Taman dahme wahnpoaron Pohl ntingihdi duwen irail pwukat: “Ele Koht pahn ketin mweidohng irail en koluhla.” (2 Tim. 2:25) Eri Siohwa a kaidehn aramas me kin sewese Kristian men en wekidala eh madamadau oh wiewia. Pohl kawehwehda soahng mwahu kan me kin wiawi mwurin emen eh koluhla. Ahn aramaso eh ese padahk mehlel kak laudla, e kak pwurehng ahneki madamadau pwung, oh kak pitsang ahn Sehdan lidip kan. Ni emen eh koluhla, elder kan pahn pousehlahte mwemweitla reh pwehn sewese kakehlaka eh pwoson, oh sewese en pousehlahte pelianda ahn Sehdan kasongosong kan oh wia dahme pwung.—Ipru 12:​12, 13. w24.08 23 ¶14-15

Pokono kohla wasa me Sises ketin kamwenge irailo, ahpw Sises oh wahnpoaron ko sohte mi mwo. Eri aramas ako douda pohn pwoht ehu oh seiloakla Kapernaum pwehn rapahki Sises. (Sohn 6:​22-24) Ia duwe, irail wia met pwehki re men kalaudehla arail sukuhlki duwen Wehio? Soh. Ihte me re mwahuki Sises en ketikihong irail pil ekei pilawa. Ia duwen atail ese met? Tehk dahme wiawi ni ahnsou me pokono diar Sises limwahn Kapernaum. Sises mahsanihong irail me re kolahng rapahki ih pwehki re anahne mwenge. Mendahki irail “kangehr lopwon en pilawa ko oh medkihla,” Sises mahsanih me mwengeo “mwenge me kin kiteila.” E ketin mahsanihong irail me re anahne doadoahk ong “mwenge me kin mihmi ong mour soutuk.” (Sohn 6:​26, 27) Sises mahsanih me Semeo pahn ketikihda soangen mwenge pwukat. w24.12 5 ¶8-9

Brother kan, pwehn kalaudehla omw koahiek en wia padahk, tehk mwahu me dahme ke kin koasoia ni omw wia padahk oh kihda kaweid ong riomw Kristian kan en kin ahnsou koaros pahrekiong Paipel. Pwehn wia met, ke anahne onopki mwahu Paipel oh neitail sawasepen Paipel kan. (Lep. Pad. 15:28) Ni omw onop, tehk mwahu ia duwen neitail sawasepen Paipel kan ar kawehwehda iren Paipel kan pwe ken kak kapwaiada ni pwung. Oh ni omw kin padahk, song en sewese aramas akan en kalaudehla arail poakohng Siohwa oh kamwakid irail en kapwaiada dahme re sukuhlki. Ke kak kalaudehla omw koahiek ma ke peki oh kapwaiada kaweid me kohsang elder koahiek kan. (1 Tim. 5:17) Elder kan anahne en kak kangoange riarail Kristian kan; ahpw re anahne ekei pak kaweid de pil panawih irail. Sohte lipilipil ma ke kin kangoange de kaweid meteikan, elder anahne kin ahnsou koaros kadek. Ma ke kin meleilei oh limpoak, oh omw padahk kin poahsoankihda Mahsen en Koht, ke pahn wiahla sounpadahk koahiek men pwehki ke pahn kahlemengih Sounpadahk Lapalapo, Sises.—Mad. 11:​28-30; 2 Tim. 2:24. w24.11 24 ¶16

Kitail kak kalinganahla Siohwa ni atail kin koasoia duwen ih. Sapwellimen Siohwa aramas akan en ‘kouliong Siohwa,’ “kapinga mware,” oh “kalohki duwen sapwellime lingan ong tohn wehi kan.” (Mel. 96:​1-3) Kitail kak kalinganahla Samatailo nanleng ni atail wia soahng pwukat koaros. (Wiewia 4:29) Kitail pil kak kalinganahla Siohwa sang ni atail patohwanohng soahng kesempwal kan rehtail. Tohnkaudok mehlel kan kin ahnsou koaros kawauwih Siohwa ni ahl wet. (Lep. Pad. 3:9) Karasepe, mehn Israel kan kin kihda mwohni oh soahng kesempwal kan pwehn sewese kauwada oh pil apwalih tehnpas sarawio. (2 Nan. 12:​4, 5; 1 Kron. 29:​3-9) Ekei sapwellimen Sises tohnpadahk ko kihda “ar dipwisou kan” pwehn sewese ih oh sapwellime wahnpoaron ko ong dahme re anahne. (Luk 8:​1-3) Oh Paipel pil kasalehda me ni ekei Kristian ko ar lelohng lehk laud ehu, riarail Kristian kan me mi wasa teikan kadarala mwohni. (Wiewia 11:​27-29) Rahnwet kitail pil kak kalinganahla Siohwa sang ni atail kin toukihda atail sawas en mwohni. w25.01 4 ¶8; 5 ¶11

Dahme sewese Kornilius en papidaisla? Kitail wadek me e kin “lemmwiki Koht iangahki tohn imwe koaros.” Oh e kin poaden kapakap ong Koht ni ngidingid. (Wiewia 10:2) Ni Piter eh lohkihong Kornilius rongamwahwo, ih oh eh peneineio pwosonla Krais oh mwadang papidaisla. (Wiewia 10:​47, 48) Kornilius uhdahn men wiahda wekidekla kan me anahn pwe ih oh eh peneineio en kaudokiong Siohwa. (Sos. 24:15; Wiewia 10:​24, 33) Kornilius kakete mweidohng eh pwukoau en kerempwa en papidaisla. Ahpw, e sohte mweidohng met en wiawi. Ia duwe, ke pahn anahne wiahda wekidekla laud kan nan omw mour pwehn papidaisla? Ma ei, Siohwa pahn ketin wia Sawasepomw. E pahn ketin kapaiaiuk ma ke koasoanehdi en doadoahngki kaweid en Paipel kan nan omw mour pwehn papah ih. w25.03 5 ¶12-13

Ma ke rong koasoi likamw kan duwen sapwellimen Koht pwihn de brother kan me kin tiengla mwowe, tamataman dahme sapwellimen Koht imwintihti kan wiahiong Sises oh tepin Kristian ko. Sises mahsanih me aramas akan pahn uhwong irail kan me kin papah Siohwa oh pahn kinehda likamw duwen irail. Oh ih met me wiewiawi rahnwet. (Mad. 5:​11, 12) Kitail sohte pahn kamehlele koasoi likamw kan ma kitail ese ihs me kin kahrehda oh mwadang wia mehkot pwehn pere kitail. Ia duwen atail kak pere pein kitail? Soikala koasoi likamw kan. Wahnpoaron Pohl kasalehda ni sansal dahme kitail anahne wia ma kitail rong koasoi likamw kan. E padahkihong Timoty en “kehkehlingkihong aramas ekei ren dehr kin . . . tehk soai likamw kan” oh en “soikala soai likamw akan.” (1 Tim. 1:​3, 4) Kitail kin soikala koasoi likamw kan pwehki kitail ese ia wasa e kohsang. Ahpw kitail kin rongete “padahk mehlel.”—2 Tim. 1:13. w24.04 11 ¶16; 13 ¶17

Miniminiongete irail kan me kin loalopwoatohng Siohwa. Koht ketin kupwurki kitail en iang riatail Kristian kan miniminpene kaudokiong ih. Kitail pahn miniminpenehte erein atail kin loalopwoatohng me mehlelo. Irail me kin kihpeseng koasoi kan me sohte pwungiong me mehlelo kin kahrehda liaktohrohr nan mwomwohdiso, eri Koht ketin kehkehlingkihong kitail en “dehr iang irail.” Pwe ma soh, pein kitail kakete tepida kamehlele soahng likamw kan oh sohla loalopwoatohng Siohwa. (Rom 16:17) Ni atail kin ese me mehlelo oh loalopwoatohngete, kitail pahn karanihte Siohwa oh atail pwoson pahn kehlailte. (Ep. 4:​15, 16) Padahk oh koasoi likamw kan me Sehdan kin doadoahngki sohte pahn pitihkitaildi, oh Siohwa pahn ketin pere oh apwalih kitail erein kahn kamakam kowahlapo. Eri, loalopwoatohngete me mehlelo, “oh Koht en popohl pahn ketiket rehmwail.”—Pil. 4:​8, 9. w24.07 13 ¶16-17

Sises kin keieu ketin sewese aramas akan me kin nsensuwedki arail wia aramas dipan kei. E ketin luke irail en wiahla sapwellime tohnpadahk. E mwahngih me uhdahn kahrepen aramas akan kin lokolok iei pwehki dihp. Eri e kin keieu ketin sewese aramas me kin lokolok pwehki dihp. E ketin doadoahngki karasaras ehu oh kawehwehda: “Aramas roson sohte anahne toahkte, ahpw irail me soumwahu me anahne.” E pil mahsanih: “Kaidehn me pwung kan me I kodohng luke, ahpw me dipan akan.” (Mad. 9:​12, 13) Ih met me Sises ketin wia. Ni kadek e ketin mahkohng dipen liho me widenki aluweluwe ko pilen mese. (Luk 7:​37-50) Sises ketin padahkihong lihen Sameria men padahk mehlel kan mendahki e mwahngih me liho kin mi rehn ohl emen me kaidehn eh pwoud. (Sohn 4:​7, 17-19, 25, 26) Aramas akan kin mehla pwehki dihp. Ahpw Koht pil ketikihong Sises manaman en kaiasada ohl, lih, oh seri kan.—Mad. 11:5. w24.08 4 ¶9-10

Ia duwen Siohwa eh pahn ketin kalinganahla mwareo ni ahnsou kohkohdo? Sang ni eh pahn ketikihdo pwuhng pahrek. Ahnsou keren e pahn ketin kasohrehla Papilon Lapalap pwehki eh wiadahr soahng suwed kan oh padahki soahng likamw kan duwen ih. (Kaud. 17:​5, 16; 19:​1, 2) Ni ahnsou me Papilon Lapalap pahn sohrala, ekei aramas kakete pilada en tepida iang kitail kaudokiong Siohwa. Eri nan Armakedon, Siohwa pahn ketin kasohrehla ahn Sehdan koasoandi koaros, oh ketikihsang koaros me kin uhwong oh lahlahwe mware, ahpw e pahn ketin doarehla koaros me kin poakohng oh peikiong oh kin men kalinganahla ih. (Mark 8:38; 2 Des. 1:​6-10) Mwurin kaimwiseklahn kasongosong me wiawi mwurin Kaundahn Krais Pahr Kido, Siohwa pahn ni unsek ketin kasarawihla mwareo. (Kaud. 20:​7-10) Ni ahnsowo, “sampah pahn direkihla marain lingaling en KAUN-O, rasehng madau eh kin direkihla pihl.” (Apak. 2:14) Ia uwen kaperen en ahnsowo me koaros me momour pahn kapinga Siohwa pwehki mwareo warohng linganla! w25.01 7 ¶15-16

Dahme pahn sewese Kristian mehn Ipru ko en dadaur pahn uhwong? Wahnpoaron Pohl men sewese Kristian kan en kilang kamwahupen en dadaurete pahn kahpwal kan. E kawehwehda me Koht ele ketin mweidohng arail pwoson en lelohng kasongosong pwehn kaiahne irail. Soangen kaiahn wet kak sewese irail en kakairada de kamwahwihala arail irair en Kristian kan me kin kaperenda Siohwa. Ni arail kin medemedewehte soahng mwahu kan me kohsang kahpwal pwukat, e pahn mengei ong Kristian mehn Ipru ko en dadaurete. (Ipru 12:11) Pohl kangoangehki Kristian mehn Ipru ko ren eimah oh dehr luwetala ni arail lelohng kahpwal kan. E warohng kaweidihkin irail met. Mwohn eh wiahla Kristian men, pein ih kin kaloke Kristian kan oh e pil kilangehr uwen laud en aramas akan ar kin wiakauwe irail. E pil ese ia duwen eh pahn dadaur pahn kalokolok. Met pwehki pein ih lelohng soangsoangen uhwong kan mwurin eh wiahla Kristian men.—2 Kor. 11:​23-25. w24.09 12-13 ¶16-17

Ehuehu rahn, karuwaru en atail doadoahk en kalohk kin laudla. Dahme kahrehda? Pwehki ahnsou mwotomwotlahr. Medewehla dahme Sises ketin kohpada duwen doadoahk en kalohk ni imwin rahn pwukat nin duwen me kileldi nan Mark 13:10. Nan pwuhken Madiu, Sises mahsanih me rongamwahwo pahn lohkiseli wasa koaros nin sampah mwohn “imwio” eh leledo. (Mad. 24:14) Imwio kin dokedoke kaimwiseklahn ahn Sehdan sampah suwed wet. Siohwa ketin koasoanedier me ‘rahno oh awao’ me mepwukat pahn wiawi. (Mad. 24:36; Wiewia 1:7) Ehuehu rahn kitail kin kerkerenlahng ahnsowo. (Rom 13:11) Lao lel ahnsowo, kitail anahne pousehlahte kalohk. Mie peidek kesempwal ehu me kitail koaros anahne medemedewe: Dahme kahrehda kitail kin kalohki rongamwahwo? Pwehki limpoak. Ni atail kin kalohk, kitail kasalehda me kitail poakohng rongamwahwo, poakohng aramas akan, oh keieu kesempwal, atail poakohng Siohwa oh mwareo. w24.05 14-15 ¶2-3

Pahpa oh nohno kan, kangoange noumw serio en medemedewe duwen soahng kapwuriamwei kan. Erein amwa alialu wasa kaselel ehu me diren tuhke de doadoahk nan mwetuwel, sewese noumw serio en kilang mwomwen kepikipik kan eh pwurupwurehng pwarada nan soahng teikan. Sewese noumw serio en wehwehki me mie emen me uhdahn loalokong wiairailda. Karasepe, soahng tohto me kitail kin kilang kin mwomwen pinipin. Saintis kan kin onopki laud mepwukat. Saintis men me adaneki Nicola Fameli kawehwehda me ni ahnsou me ke kin wadek pinipin en soahng ehu, ke pahn diarada soangsoangen nempe kei. Nempe pwukat kin kahdaneki Fibonacci sequence. Kitail kak kilang pinipin en soahng tohto nan ekei mwutumwut en usu kan, ni pwili ehu me adaneki nautilus, ni tehn tuhke kan, oh wahnrohs me adaneki sunflower. w24.12 16 ¶7

Moses, Depit, oh Sohn momour ahnsou werei. Oh mwomwen arail mour uhdahn weksang mwomwen atail mour rahnwet. Ahpw kitail duwehte irail ni soangen ahl kei. Irail kin papah Koht mehlelo oh kitail pil kin wia met. Duwehte irail, kitail kin kapakap ong Siohwa, likih ih pwehn ale sawas oh kaweid. Oh duwehte ohl pwukat, kitail pwoson me Siohwa pahn ketin kapaia irail kan me kin peikiong. Kitail en idawehn kaweid en ohl mah ko oh peikiong sapwellimen Siohwa kehkehlik kan. Ni atail kin peikiong Siohwa, e pahn ketin kapaia oh sewese kitail en pweida mwahu. Kitail pahn “mour werei,” ei, kohkohlahte! Oh kitail pahn perenki atail kaperenda Samatail limpoako nanleng, me pahn ketin kapaia kitail laudsang me kitail kak medewe.—Ep. 3:20. w24.11 13 ¶20-21

Ni mwehin tepin Kristian ko, ekei brother kan kin idihda nin duwen sounsawas kei. (1 Tim. 3:8) E mwomwen me irail me kin wia “doadoahk en sawas” me wahnpoaron Pohl ntingihdi duwe. Eri e mwomwen me sounsawas kan kin wia doadoahk kesempwal tohto pwe elder kan en kak wiahte doadoahk en padahk oh apwalih mwomwohdiso. Karasepe, sounsawas kan kakete iang sewese wiahda copy en Nting Sarawi kan de pwainda soahng kan me anahn pwehn wiahda copy pwukat. Medewehla ekei doadoahk en sawas kan me sounsawas kan kin wia nan omw mwomwohdiso. (1 Pit. 4:10) Ele irail pwukoahki apwalih nein mwomwohdiso mwohni de wasahn kalohk kan, oahte sawasepen Paipel kan ong mwomwohdiso, apwalih audio oh video, sewese irail kan me kohdo iang mihting, de sewese apwalih Wasahn Kaudok. Doadoahk pwukat koaros anahn pwe mwomwohdiso en kak soandi mwahu.—1 Kor. 14:40. w24.10 19 ¶4-5

Kitail pahn kak dadaur pahn kahpwal kan, sohte lipilipil ma laud de tikitik, ma kitail taman me Siohwa kak ahnsou koaros ketin kupwurki sewese kitail. Ih me Keieu Manaman, oh e kak ketikihong kitail kehl pwe kitail en dadaur. Eri, mie kahrepe tohto me kitail en likih Ih ni atail kin lelohng kahpwal kan. Oh ni atail kin kilang Siohwa eh ketin sewese kitail nan kahpwal tikitik kan, met kin kamehlelehiong kitail me e pahn pil ketin sewese kitail erein kahpwal laud kan. Medewehla dahme wiawihong Nanmwarki Depit pak riau me kalaudehla eh likih Siohwa. Ni ahnsou me Depit wia sounsilepen sihpw pwulopwul men, pehr men wahsang emen nein eh pahpao sihpw ko, oh ehu pak, laion men pil wahsang emen. Ni ahnsou ko, ni eimah Depit pwakih mahn ko oh doarehla sihpw ko. Ahpw Depit sohte medewe me pein ih me wia met. E ese me Siohwa me ketikihong ih kehl en wia met. (1 Sam. 17:​34-37) Eh doudouloale soahng pwukat kalaudehla eh likih me Koht ieiaso pahn ketin kakehlaka ih ni ahnsou kan mwuhr. w24.06 21 ¶5-6

Medewehla ma ke alehdi luhk en iang kamadipw ehu. Ke pahn iang towehda? Ma ke sohte ese ihs me wiahda de dahme e pilahnehda ong kamadipwo, ke pahn anahne idek reh soangen peidek kan me duwehte: “Ia wasa oh iahd me kamadipwo pahn wiawi? Aramas depe pahn iang? Ihs me pahn pwukoahki dahme wiawi ni kamadipwo? Ihs me pahn iang? Soahng dah kan me ke pilahnehda en wiawi? E pahn mie sakau en wai?” Pasapengpen peidek pwukat pahn seweseiuk en wiahda pilipil pwung. Mwurin omw esehda ire mehlel kan, medewehla mwahu duwen irairo. Karasepe, ia duwen ma ke esehda me ekei aramas me pahn iang kamadipwo sohte kin peikiong sapwellimen Siohwa koasoandi kan de pahn mie sakau en wai ahpw sohte me pahn tehk mwahu me aramas ako sohte nim daulihala? Ke medewe kamadipwo pahn kamwoarongehda wasa? (1 Pit. 4:3) Ni omw medewehlahr dahme pahn wiawi, e pahn mengei ong uhk en wiahda pilipil mwahu ehu. w25.01 15 ¶4-5

Pwehki pweinen pweipwei sapahlo, Siohwa kak ketin kamwakelehsang dipen me koluhla kan. Tehk ia duwen Paipel eh kawehwehda dahme Siohwa kin ketin wia. E uhdahn apwal en kamwakelehsang mwahi weitahta ni likou. Siohwa ketin doadoahngki karasaras wet pwehn kamehlelehiong kitail me dipatail kan kak uhdahn kamwakelda oh sohla sansal. Dihp pil kin duwehte “pweipwand.” (Mad. 6:12; Luk 11:4) Eri atail pweipwand kin lalaudla ahnsou koaros me kitail wiahda dihp. Kitail uhdahn pweipwand laud ong Siohwa! Ahpw ni Siohwa eh ketin mahkohng kitail, e kin mwomwen me e ketikihsang pweipwand me kitail wiahdao. E sohte ketin idingki me dihp kan me e ketin mahkohngehr anahne pwurehng pweipweila. Duwehte aramas emen eh kin nsenamwahula ni eh sohla eh pweipwand, kitail pil kin nsenamwahula ni Siohwa eh kin ketin mahkohng kitail. w25.02 9-10 ¶9-10

Ni pahpa nohno kan ar mahla, ele irail anahne neirail seri kan en kihong neirail mwohni de soahng teikan, oh seri tohto kin perenki kihong dahme re anahne. (1 Tim. 5:4) Ahpw pahpa nohno Kristian kan wehwehki me peren me keieu laud kin kohsang arail sewese neirail seri kan en wiahla sapwellimen Siohwa ladu, a kaidehn en apwalihada seri kan pwe seri ko en kak koadoahkihada mwohni me itar en apwalih irail. (3 Sohn 4) Ni omw kin sewese noumw seri kan en sukuhlki en pein apwalih arail anahn akan mwuhr, kasalehda me ke kin likih Siohwa. Sangete arail tikitik, kasalehiong irail kesempwalpen doadoahk laud. (Lep. Pad. 13:4; Ep. 4:28) Ni arail kekeirda, sewese irail en wia uwen arail kak nan sukuhl. Pahpa nohno kan kak wia roporop pwehn diar kaweid kan en Paipel oh sewese neirail seri kan en wiahda pilipil mwahu kan duwen soangen sukuhl dah me re pahn ale. Dahme pahpa nohno kan anahne akadeiong iei en sewese neirail seri kan en koahiekla pwe ren kak pein apwalih arail anahn kan oh pil ahneki ahnsou en kalohk, de pil pioneer. w25.03 30-31 ¶15-16

Aiseia irelaud 65 audaudki dahme Siohwa ketin kawehwehda duwen ia pahn mwomwen mour ong irail kan me pahn mi nan soangen paradaiso. Kokohp wet tepin pweida nan pahr 537 Mwohn Krais. Ni ahnsowo, mehn Suhs kan me koluhla saledeksang arail sensel nan Papilon oh pwurala nan uhdahn sapwarail. Siohwa ketin kapaiahda sapwellime aramas ako oh sewese irail en onehda sapahl kahnimw en Serusalem me ohlahr pwehn pwurehng kaselella oh tehnpas sarawio en pwurehng wiahla arail wasahn kaudok ong Siohwa nan Israel. (Ais. 51:11; Sek. 8:3) Keriaun ahnsou me kokohpo pweida tepida nan pahr 1919 ni ahnsou me sapwellimen Siohwa tohnkaudok kan nan atail ahnsou saledekla sang Papilon Lapalap. Irair en popohl oh minimin me rasehng paradais eri tepida ekisekis kohpeseng nan sampah pwon. Sounkalohki Wehio ngoang kan wiahda mwomwohdiso tohto oh kasalehda irair kaselel kan en Kristian. Ohl oh lih akan me mahso kin lemei oh kin wia tiahk samin kan “pwuhriong nan mour kapw me wiawihda nin duwen kupwuren Koht.” w24.04 20-21 ¶3-4

Nan ekei sahpw, aramas akan kin kasik me pahpa nohno kan de aramas laud teikan me pahn pilada ahn me kiripw kan nan peneinei ar pwoud. Nan pil ekei sahpw, tohn peneinei de kompoakparail kan kin rapahkihong me kiripw men eh pwoud mwahu oh eri koasoanehdi me ohlo oh liho en tuhpene pwehn kilang ma ira men tepida date. Ma kowe me re peki en koasoanehdi meh riemen en date de pwopwoudida, medemedewe dahme ohlo oh liho kin mwahuki oh anahne. Ma ke medewe me mie emen me kak wiahla ahn kompoakepahmwo de kisehmwo pwoud mwahu, eri esehla mwahu aramaso, eh irair kan, oh keieu kesempwal, ma e ahneki nanpwungmwahu keren rehn Siohwa. Nanpwungmwahu keren rehn Siohwa kin uhdahn kesempwal sang mwohni, sukuhl laud, de pwukoa me aramaso ahneki. Ahpw tamataman me brother oh sister kiripwo iei me pahn keieu pilada ma ira men pwopwoudla. w24.05 23 ¶11

Kitail kak sewese meh riemen me kin date sang ni dahme kitail kin nda de sohte nda. Ekei pak kitail anahne kaunda pein kitail oh dehr nda mehkot. (Lep. Pad. 12:18) Karasepe, ele kitail men padahkihong meteikan ma meh riemen tepidahr date, ahpw ira me men wia met. Kitail en dehr lipahnede de kauwe ira. (Lep. Pad. 20:19; Rom 14:10; 1 Des. 4:11) Pil ehu, kitail anahne kanahieng en dehr nda de idek peidek kan me kak kahrehiong ira en medewe me ira anahne pwopwoudla. Ia duwen ma meh riemen pilada en sohla date? Kitail en dehr idek peidek kan me pid ira de kapwukoahki emen ira pwehki ara sohla date. (1 Pit. 4:15) Ma meh riemen pilada en sohla date, kitail en dehr medewe me ira wiahda pilipil sapwung. Ahpw ara date kin sewese ira en wiahda pilipil mwahu. Ele ira nsensuwedkihte pilipil me ira wiahdao. Eri kitail kak rapahki ahl akan en sewese ira. w24.05 31 ¶15-16

Ehu kahpwal keieu laud me ele kitail kin lelohng iei ahnsou me tohn atail peneinei de kompoakepatail keren men kohkohsang Siohwa. (Mel. 78:40) Uwen laud en atail poakohng aramaso, ih pil uwen apwal en dadaur pahn irairo. Ma ke lelohng soangen irair wet, ahn Sadok mehn kahlemeng en loalopwoat kak kakehlakaiuk. E loalopwoatohngete Siohwa ni kompoakepah kereno Apaiadar pilada en sohla loalopwoat. Met wiawi ni Nanmwarki Depit eh mahla oh kereniong mehla. Nah pwutako Adonaisa song en wiahla nanmwarki mendahki Solomon iei me Siohwa ketin kupwurki en nanmwarkihla. (1 Kron. 22:​9, 10) Apaiadar pilada en sewese Adonaisa. (1 Nanmwarki 1:​5-8) Ni eh wia met, kaidehn ongete Depit oh Sadok me Apaiadar sohla loalopwoatohng ahpw pil ong Siohwa! Daulih sounpar 40, Sadok oh Apaiadar kin doadoahkpene nin duwen samworo kei.—2 Sam. 8:17; 15:29; 19:​11-14. w24.07 6 ¶14-15

Kitail kak kamehlele me en pousehlahte pere kitail sang kasongosong kin ahnsou koaros mwahu ong kitail. Ni atail kin mour ni ahl me Siohwa ketin kupwurki, kitail pahn ahneki peren laudsang atail “perenki dihp ahnsou mwotomwot.” (Ipru 11:25; Mel. 19:8) Met pwehki kitail wiawihda en mour pahrekiong kupwure. (Sen. 1:27) Ni atail ahneki mour me kin kaperenda Siohwa, kitail pahn ahneki nsenmwakelekel oh pahn kak ehu rahn mour kohkohlahte. (1 Tim. 6:12; 2 Tim. 1:3; Sud 20, 21) Ei mehlel, “paliwar me luwet.” (Mad. 26:41) Ahpw met sohte wehwehki me kitail sohte kak wiahiong mehkot atail luwet kan. Siohwa ketin kupwurki ketikihong kitail kehl me kitail anahne. (2 Kor. 4:7) Ahpw tehk me ih kehlo met me Koht ketikihda me “laudsang dahme aramas ahneki.” Ahpw keieu, kitail anahne wia uwen atail kak koaros pwehn pelianda kasongosong. Siohwa pahn ketikihong kitail kehl laud ni ahnsou me kitail anahne. (1 Kor. 10:13) Ei, sang ni sapwellimen Siohwa sawas, kitail kak pousehlahte pere kitail sang kasongosong. w24.07 19 ¶19-21

Wahnpoaron Pohl padahkihong Timoty, pil emen elder, mahsen kan en iren rahn en rahnwet pwe en panawih irail kan me wiahda dihp. Pohl sohte ndinda me irail anahne panawih me wiahda dihp laudo mwohn mwomwohdiso pwon. Ahpw, e koasoakoasoia irail kan me eseier sapwung dah me wiawi. Ele ekei irail pein kilang dahme wiawi, de ele aramaso padahkihong irail dahme e wiao. Elder ko pahn ni elen loalokong padahkihong irail pwukatte me irail apwalialahr irairo oh me me wiahda dihp laudo aleier peneu. Ekei pak, me tohto nan mwomwohdiso esehier me emen wiahda dihp laud ehu, de ele re pahn esehda duwen met. Nan soangen irairo, irail kan “me kilang” kin pidada mwomwohdiso pwon. Eri elder men pahn pakairkihong mwomwohdiso me brother men de sister men ale peneu. Dahme kahrehda? Pohl koasoia: “Pwe en wia mehn kataman ehu ong meteikan” pwe ren dehr wiahda dihp laud. w24.08 23-24 ¶16-17

Kitail en kin soupisengkihte atail papah Siohwa lao lel ni imwi. Me keidi kan anahne pousehlahte mwasamwasahn pwe irail en “wisiksang,” de Sises en ketikiniraildalahng nanleng. (Mad. 24:40) Irail kin kasikasik arail pahn “pokonpene” rehn Sises nanleng. Mwurin mahwen en Armakedon, irail pahn wia sapwellimen Sises lih kamwohd nan kapwopwoud en Sihmpwulo. (2 Des. 2:1) Ahnsoun sapwellimen Sises kadeik kerendohr, ahpw kitail sohte anahne perki. Ma kitail kin lelepekte, Samatail limpoako nanleng pahn ketikihong kitail “kehl me laudsang dahme aramas ahneki” pwe kitail en “kakohng . . . kesihnen mwohn Nein-aramas.” (2 Kor. 4:7; Luk 21:36) Sohte lipilipil ma atail koapworopwor iei en mi nanleng de nin sampah, kitail pahn kaperenda Samatailo ma kitail kin tehk mwahu kaweid kan me kohsang sapwellimen Sises karasaras ko. Oh pwehki Siohwa uhdahn ketin kadek, adatail kan pahn ‘ntingdi nan pwuhk’ en mour.—Dan. 12:1; Kaud. 3:5. w24.09 25 ¶19-20

Duwehte me Sounmelkahkao wia, ke pil kak powehdi omw madamadau sapwung kan. Ia duwen? Tamataman soahng mwahu kan me ke ahneki, iangahki sapwellimen Siohwa kapai oh tamataman me irail kan me sohte kin papah Siohwa sohte kin alehdi sapwellime sawas. Ong pali laud me sohte kin papah Siohwa, en ahneki mour nsenamwahu met iei me irail kin keieu kesempwalki pwehki sohte arail koapworopwor ong ahnsou kohkohdo. Ahpw ong kowe, Siohwa ketin inoukihda kapai kan me uhdahn siksang dahme ke kak medewe. (Mel. 145:16) Pil medewehla met. Ke sohte pahn kak uhdahn ese ia pahn mwomwen omw mour rahnwet ma ke wiahda ehu pilipil tohrohr. Ahpw mie mehkot me ke kak uhdahn kamehlele: Ni omw wiahda pilipil kan pwehki omw poakohng Koht oh meteikan, ke pahn ahnsou koaros alehdi soahng kan me pahn kahrehiong uhk peren laud. w24.10 27 ¶12-13