March

Mie koasoiepen Paipel kan duwen aramas pwung kan me wiahla aramas sapwung. Karasepe Nanmwarki Solomon. E ese duwen Siohwa oh ia duwen eh pahn kaudokiong, oh Siohwa ketin kapaiahda laud. Ahpw mwuhr, Solomon tepida kaudokiong koht likamw kan. Dipe ko kahrehiong Siohwa en ketin engiengda laud oh kahrehda wehin Israel en lokolongki erein sounpar epwiki kei. Ni ahnsou me Solomon mehla, Paipel mahsanih me e “kommoaldi rehn seme mehn mahs ako,” iangahki ohl lelepek kan duwehte Nanmwarki Depit. (1 Nan. 11:​5-9, 43; 2 Nan. 23:13) Ahpw ia duwe, mwomwen eh seridio wehwehki me e pahn iasada? Paipel sohte mahsanih. Kaiasada wia kisakis ehu sang atail Koht limpoako. E kin ketikihong irail kan me e kupwurki ren ahneki ahnsou mwahu en papah ih kohkohlahte. (Sohp 14:​13, 14; Sohn 6:44) Ia duwe, Solomon pahn alehdi soangen kisakis wet? Siohwa me ketin mwahngih; kaidehn kitail. Ahpw kitail ese me Siohwa pahn ketin wia dahme pwung. w24.05 4 ¶9

Ni atail inoukihong Siohwa atail mour, kitail kin wiahla emen me lukodohng nan eh impwalo. Mie soahng koaros me kitail anahne pwehn pousehlahte kakehlailih atail nanpwungmwahu rehn Siohwa, oh kitail kompoakepahnki irail kan me pil lukodohng nan sapwellimen Siohwa impwal. Sapwellime impwal sohte kin mi wasa ehute. Sapwellimen Siohwa impwal kin mi wasa sohte lipilipil me sapwellime ladu lelepek kan mi ie. (Kaud. 21:3) Ahpw ia duwen me lelepek kan me melahr? Irail wiahte irail kan me Siohwa ketin lukehiong nan eh impwal? Ei! Dahme kahrehda kitail kak nda met? Pwehki Siohwa ketin tamatamante irail. Sises mahsanih: “Duwen me melahr akan ar pahn iasada, Moses pil kasalehda nan koasoipen tuhke tekateko, ni eh patohwan ekerki Siohwa ‘Koht en Eipraam oh Koht en Aisek oh Koht en Seikop.’ Ih Koht emen, kaidehn Koht en me melahr akan, ahpw Koht en me momour akan, pwe irail koaros kin momouriong ih.”—Luk 20:​37, 38. w24.06 3-4 ¶6-7

Sadok kohla Epron ni eh wahda nah dipwisoun mahwen kan oh onopada en pei. (1 Kron. 12:38) E men iang Depit mahwen oh pere Israel sang arail imwintihti kan. Ele Sadok sohte uhdahn koahiek en pei nin duwen sounpei men. Ahpw ih ohl emen me uhdahn eimah. Ia wasa samworou Sadok sukuhlki en uhdahn eimah? E kin ese ohl tohto me kehlail oh eimah. Ele e sukuhlsang arail mehn kahlemeng. Karasepe, ahn Depit mehn kahlemeng en eimah ni eh “kahluwa mehn Israel kan nan mahwen,” kahrehiong mehn Israel koaros en men wiahkihla ih nanmwarki. (1 Kron. 11:​1, 2) Depit kin ahnsou koaros likih Siohwa en ketin sewese ih mahweniong eh imwintihti kan. (Mel. 138:3) Sadok pil sukuhlsang ohl eimah kan me duwehte Sehoiada oh nah pwutako Penaia, iangahki kaunen keinek 22 me kin utung Depit.—1 Kron. 11:​22-25; 12:​26-28. w24.07 3 ¶5-6

Sohl en Tarsus kin lemei oh kaloke sapwellimen Krais tohnpadahk kan. Pali laud en Kristian kan ele medewe me e sohte pahn wekila. Ahpw Sises mwahngih me Sohl kak wekila oh koluhla. Ih oh Semeo ketin mwahngih irair kaselel kan en Sohl. Sises mahsanih: “I piladahr ohl menet.” (Wiewia 9:15) Sises pil ketin doadoahngki manaman ehu pwehn kahrehiong Sohl en koluhla. (Wiewia 7:58–8:3; 9:​1-9, 17-20) Sohl, de Pohl, koluhla oh wiahla Kristian men. Sises ketikihong ih pwukoahn wia wahnpoaron. Pohl kin kalapw koasoia ia uwen eh kalahnganki me Siohwa oh Sises ketin kasalehiong ih kadek oh kalahngan. (1 Tim. 1:​12-15) Ehu pako, Pohl rongada me nan mwomwohdisohn Korint, re mweidohng ohl emen me wiahda tiahk samin me pid wia nsenen pwopwoud en mihmihte nan mwomwohdisou. Ia duwen eh apwalihala met? E wia met ni ahl ehu me kasalehiong kitail ia duwen Siohwa eh ketin kasalehda limpoak ni eh panawih sapwellime ladu kan oh kasalehda kadek kalahngan ni arail koluhla. Oh kitail pahn sukuhlki ia duwen atail kak alasang ih. w24.08 13 ¶15-16

Siohwa ketin ekisekis kasansalehda ia duwen aramas soh unsek kan ar kak karanihala ih. Eipel, keriemen en nein Adam oh Ihp pwutak iei tepin aramas me pwoson Siohwa mwurin uhwong me wiawi nan Ihden. Pwehki Eipel poakohng oh men kaperenda oh pil karanihala Siohwa, e wiahda meirong ehu. Eipel iei sounsilepen sihpw men, eri e ale ekei nah sihmpwul ko oh meirongkihong Siohwa. Ia duwen Siohwa eh ketin mwekidki met? E ketin “kupwurehla Eipel oh kupwurperenkihda eh meirongo.” (Sen. 4:4) Siohwa kin ketin kupwurperenki meirong en irail kan me poakohng oh likih—me duwehte Noha. (Sen. 8:​20, 21) Pwehki eh ketin kupwurperenki meirong pwukat, Siohwa ketin kasalehda me aramas dipan kan kak ale sapwellime kupwuramwahu oh karanihala. w24.08 3 ¶5-6

Ele kitail kin uhdahn medengkihla oh pwunodkihda laud mwekid sapahrek ehu. (Deud. 28:34) Ladu lelepek kan, duwehte Sohp oh Apakuk, pil ahneki soangen pepehmohte. (Sohp 6:​2, 3; Apak. 1:​1-3) E sohte sapwung en ahneki soangen pepehm pwukat. Ahpw kitail anahne kanahieng mwomwen atail kin mwekidki kahpwal pwukat pwe kitail en dehr wiahda mehkot sapwung oh kalaudehla kahpwalo. Ni aramas akan ar sohte alehdi kalokepen arail wiewia sapahrek kan, kitail kakete tepida medewe ma mie kamwahupen atail kin wia dahme pwung. Medewehla sounmelkahkao me kin kilang aramas suwed kan ar wiakauwe aramas mwahu kan ahpw re mwomwen kin nsenamwahuki arail mour. E koasoia: “Iei duwen met iren me suwed akan. Re kin paiamwahu.” (Mel. 73:12) E uhdahn pwunodkihda wiewia sapahrek kan oh medewe me sohte katepen eh kin papah Siohwa. E koasoia: “I song en dehdehkihla irair apwal wet, ahpw e inenen apwal ong ie.”—Mel. 73:​14, 16. w24.11 3 ¶5-7

Kitail kin kalinganahla Siohwa pwehki kitail kin wauneki ih. Mie kahrepe tohto me kitail kin waunekihki. Siohwa iei me keieu manaman; sohte irepen sapwellime manaman. (Mel. 96:​4-7) Sapwellime erpit laud kin sansalda sang ni soahng kan me e ketin wiahda. E ketikihong kitail mour oh soahng koaros me kitail anahne pwehn momour. (Kaud. 4:11) E kin ketin loalopwoat. (Kaud. 15:4) Soahng koaros me e kin ketin wia kin pweida, oh e kin ahnsou koaros ketin kapwaiada sapwellime inou kan. (Sos. 23:14) Ihme kahrehda soukohp Seremaia koasoiahki Siohwa: “Sohte emen me duwehte komwi nanpwungen me loalokong koaros en wehi kan de nanpwungen ar nanmwarki kan”! (Ser. 10:​6, 7) Ei mehlel, kitail ahneki kahrepe mwahu en wauneki Samatailo nanleng. Ahpw kitail sohte kin waunekihte Siohwa, kitail pil kin poakohng ih. Oh, kahrepe me keieu laud iei, kitail kin kalinganahla Siohwa pwehki kitail uhdahn poakohng ih. w25.01 3 ¶5-6

Irail kan me kin uhwong Koht, kin song en wekidala soahng mwahu kan en sapwellime pwihn ong ni me suwed. Karasepe, kitail sukuhlkihsang nan Paipel me Siohwa kupwurki kitail en mwakelekel, atail tiahk en mwakelekel, oh en kaudokiong ni ahl me e ketin kupwurki. E ketin mahsanih me mehmen me kin wiewia me suwed oh sohte men wekidala eh wiewia, sohte kak wia kisehn mwomwohdiso. (1 Kor. 5:​11, 12; 6:​9, 10) Kitail kin peikiong kehkehlik en Paipelo. Ahpw pwehki kitail kin peikiong kehkehlik wet, irail me kin uhwong kitail kin nda me kitail sohte kin poakohng aramas oh me kitail kin kadeik irail oh sohte pwungki emen me weksang kitail. Kitail anahne wehwehkihla ihs me kin uhdahn uhwong kitail. Tepilo kin kihpeseng soahng likamw kan duwen atail pwihn. Ih me “semen likamw.” (Sohn 8:44; Sen. 3:​1-5) Eri kitail pahn kasik me Sehdan pahn doadoahngki atail imwintihti kan pwehn kihpeseng soahng likamw kan duwen sapwellimen Siohwa pwihn. w24.04 10-11 ¶13-14

Pil mwurin kahn kamakam kowahlapo eh tepida, ekei me kilang kasohrlahn “Papilon Lapalap” pahn kakete tamanda me erein sounpar tohto, Sounkadehdehn Siohwa kan kin koasoia me met pahn wiawi. Ia duwe, ekei me kilang mwekid pwukat wiawi pahn kakete wekidala audepen mohngiongirail? (Kaud. 17:5) Ma met wiawi, e pahn duwehte dahme wiawi nan Isip ni mwehin Moseso. Taman me “pokon en ekei aramas” iangala mehn Israel ko kohkohsang Isip. Ekei irail pwukat ele tepida pwosonla Siohwa ni ahnsou me irail kilang Kalokolok Eiseko me Moses koasoia duwe pweida. (Eks. 12:38) Ma mehkot duwehte met pahn wiawi mwurin kasohralahn Papilon Lapalap, ia duwe, kitail pahn medewe me e sohte pwung pahrek me aramas akan kak iangkitailla mwohnte Armakedon? Uhdahn soh! Kitail men duwehte Samatailo nanleng me ketin “diren kalahngan oh kadek, me sohte kin mwadang lingeringerda, oh me diren limpoak lapalap oh loalopwoat mehlel.”—Eks. 34:6. w24.05 11 ¶12-13

Dahme kakete wiawi ma kitail uhdihsang kolokol “koasoandi en padahk mehlel”? Medewehla karasaras ehu. Ni mwehin wahnpoaron ko, ekei Kristian ko kihpeseng koasoi pwoat me dene rahn en Siohwa leledohr. Ele mie kisinlikou ehu, me aramas ako medewe me wahnpoaron Pohl me ntingihedi, me koasoia duwen met. Ekei Kristian ko nan Deselonika sohte wiahda ahnsou en tehkada ire mehlel kan, ahpw re kamehlele koasoi likamwo oh pil koasoiaseli. Koasoi likamw pwoatet sohte pahn pitihiraildi ma irail tamatamante soahng kan me Pohl padahkihong irail ni ahnsou me e mihmihte rehrail. (2 Des. 2:​1-5) Pohl kaweidki Kristian ko ren dehr kamehlele soahng koaros me re rong. Oh pwehn sewese irail ong ahnsou kohkohdo, Pohl kaimwisengkihla nah kisinlikowo mahsen pwukat: “Ngehi Pohl, ni pein mengin pehiet, I kadarewei ei rahnmwahu. Ih mwomwen ei kin nting nan kisinlikou koaros pwe kumwail en ese me ngehi me ntingihedi.”—2 Des. 3:17. w24.07 12 ¶13-14

Kristian mehn Ipru kan anahne dadaurete ni arail kin papah Siohwa pwehki irair en Sudia susuwedla. Mendahki ekei irail lelohng kalokolok laud mahso, tohtohn irail sohte lelohng met. Eri wahnpoaron Pohl katamankihong irail en kaunopada ong pil ekei kalokolok kan oh pil onopada en lelepekte lao mehla, duwehte me Sises ketin wia. (Ipru 12:4) Mehn Suhs tohto uhdahn lemei oh lingeringerki aramas tohto ar wialahr Kristian kei. Sounpar keite mwowe, mehn Suhs daulih 40 “kahukihla me re pahn riahla ma re pahn kang de nim mehkot mwohn arail kemehla Pohl.” (Wiewia 22:22; 23:​12-14) Mendahki aramas akan pahn kailongki oh kaloke irail, Kristian ko anahne pousehlahte tuhpene ong kaudok, kalohki rongamwahwo, oh ahnekihte pwoson laud. w24.09 12 ¶15

Sohn wia kompoakepahn Sises keren men oh pil sapwellime wahnpoaron. (Mad. 10:2) Sohn kin kalapw iang Sises kalohk oh kilang manaman kan me e ketin wia. E pousehlahte loalopwoat ong Sises erein ahnsou apwal akan. E kilang Sises ketin kamakamala oh kilang ih mwurin eh ketin iasada. E pil kilang mwomwohdisohn Kristiano kekeirda. Sohn mourki ahnsou werei pwehn kilang rongamwahwo eh “lohkseli wasa koaros nin sampah.” (Kol. 1:23) Ni ahnsou me Sohn uhdahn mahla, e ahneki pai kaselel en ntingihada pwuhken Kaudiahl. (Kaud. 1:1) Sohn pil ntingihada ehu pwuhken Rongamwahu ko. Oh e pil ntingihada kisinlikou siluh me met adaneki keieu, keriau, oh kesiluh en Sohn. E ntingihada nah kesiluh en kisinlikou ong Kristian lelepek men me ede Kaius, me e kin poakohng duwehte nah seri. (3 Sohn 1) Dahme ohl lelepek menet ntingihada kangoange sapwellimen Sises tohnpadahk kan koaros leledo atail ahnsou. w24.11 12 ¶15-16

Ohl pwopwoud men me poakohng eh pwoud kin kesempwalki. E kin wiahki ih kisakis kaselel ehu sang rehn Siohwa. (Lep. Pad. 18:22; 31:10) Pwehki met, e kin kadekohng oh wauneki, pil ni ahnsou me ira wia nsenen pwopwoud. E sohte pahn lemeiong, idingkihong en wia mehkot me kahrehiong en soansuwedki, de me pahn kauwehla eh nsenmwakelekel ni ara wiewia nsenen pwopwoud. E pahn pil nantihong ahneki nsenmwakelekel mwohn Siohwa. (Wiewia 24:16) Ohl pwopwoud kan, kumwail kak tehk mwahu me Siohwa ketin mwahngih oh kalahnganki amwail nannanti en wauneki amwail pwoud ni soahng koaros me kumwail nda oh wia. Koasoanehdi teng en wauneki sang ni omw dehr wia soahng kan me pahn kamedekihala oh sang ni omw kin kadekohng, wauneki, oh kasalehiong me ke poakohng. Eri ni omw wia met, ke kin kasalehiong me ke poakohng oh kalahnganki. Wauneki omw pwoudo, oh ke pahn pere omw nanpwungmwahu me keieu kesempwal—omw nanpwungmwahu rehn Siohwa.—Mel. 25:14. w25.01 13 ¶17-18

Sapwellimen Siohwa ladu kan kin inengieng kalohki rongamwahwo oh met kahrehda irail en weksang irail kan me dene irail Kristian kei. Dahme kak sewese kitail en ahnekihte de pil kalaudehla atail ngoang nan kalohk? Kitail kak sukuhlsang sapwellimen Sises mehn kahlemeng ong ia duwen atail en kalohk ni ngoang. Ni eh ketiket sampah, Sises sohte ketin uhdihsang eh doadoahk laud pwehn kalohk ong aramas akan. Ni mehlel, e ketin kalaudehla eh ngoang ni ahnsou me sapwellime doadoahk en kalohko kereniong nek. Nan sapwellime karasaraso, Sises ketin kapahrekiong sapwellime doadoahk soumwet en kreip men me doadoahk laud erein sounpar siluh pwehn apwalih tuhke pik pwoat, ahpw tuhkeo sohte kapwarehda wa. Ni mwohmwohte, Sises pil ketin kalokalohk ong mehn Suhs kan erein sounpar siluh, ahpw pali laud en irail sohte wiahla sapwellime tohnpadahk. Ahpw Sises sohte ketin uhdihsang kalohk ong irail. E ketin duwehte soumwet en kreipo me koapworopworkihte me tuhkehn piko pahn kapwarehda wa. (Luk 13:​6-9) Atail sukuhlki dahme e ketin padahngki oh pil alasang dahme e ketin wia pahn sewese kitail en ahnekihte ngoang rahnwet. w25.03 14-15 ¶1-4

Ia duwen ma ke medewe me mie emen me kakete wia omw pwoud mwahu? Ke pahn mwadangete ndaiong ih omw pepehm? Paipel mahsanih me aramas loalokong men kin esehda mwahu soahng kan mwohn eh mwekid. Eri mwohn omw ndaiong emen omw pepehm, e pahn wia elen loalokong en wiahda ahnsou pwehn esehda mwahu mwomwen eh tiahk oh wiewia. Ia duwen omw kak esehda mwahu mwomwen emen ni ahl me sohte nohn sansal? Ni mihting kan de ni ahnsoun patehng meteikan mwemweit, ele ke tehkada soahng kei duwen ahn aramaso nanpwungmwahu rehn Siohwa, mwomwen ih, de eh tiahk kan. Ihs me e kin kompoakepahnki, oh dahme e kin mwahuki koasoia? (Luk 6:45) Eh mehn akadei kan duwehte ahmw? Ke kak idek rehn elder kan nan eh mwomwohdisou de rehn Kristian koahiek teikan me uhdahn ese ih. (Lep. Pad. 20:18) Ke kak idekda duwen soangen aramas dah ih de duwen eh irair kan. (Rud 2:11) Ni omw kin tehkada mwahu mwomwen emen, tehk kanahieng me ken dehr kahrehiong en soansuwedkihda. Wauneki eh pepehm, dehr kin ahnsou koaros mihmiseli wasa me e kin mi ie de nantihong en diarada soahng koaros duwen ih. w24.05 22 ¶7-8

Elder kan kin kahlemengih Sises oh sohte kin mwadang en pilada me aramaso sohte men koluhla. Ele ekei pahn koluhla ni ahnsou me elder kan tepin tuhwong irail. Ahpw ele ekei pahn anahne ahnsou laud. Eri ele elder kan kin koasoanehdi en tuhwong aramaso tohtohsang pak ehu. Mwein mwurin arail tepin tuhpeneo, Kristian me wiahda dihp laudo pahn tepida medemedewe kanahieng dahme re padahkihong. Ele e pahn kasalehda aktikitik oh peki Siohwa en ketin mahkohng ih. (Mel. 38:18) Eri ni arail pahn pwurehng tuhpene, ele eh madamadau pahn weksang ahnsou me re tepin tuhpeneo. Pwehn sewese me wiahda dihp laudo en koluhla, elder kan kin kasalehda kadek oh wehwehki eh pepehm. Irail kin kapakapki Siohwa en ketin kapaiahda arail nannanti oh koapworopworki me riarailo pahn pwurehng ahneki madamadau pwung oh koluhla.—2 Tim. 2:​25, 26. w24.08 22-23 ¶12-13

Siohwa sohte ketin kupwurki emen en kasohrala! E kupwurki me dipan akan en pwurehng ale sapwellime kupwuramwahu. (2 Kor. 5:20) Ihme kahrehda Siohwa kin ketin ahnsou koaros kangoange sapwellime ladu kan me kohkohsang ren koluhla oh pwurodo reh. Elder kan nan mwomwohdiso kin iang Siohwa doadoahk pwehn sewese irail kan me wiahda dihp laud en koluhla. (Rom 2:4; 1 Kor. 3:9) Mie peren laud nanleng ni ahnsou me dipan men kin koluhla! Pein Samatailo nanleng, Siohwa ketin pehm soangen peren wet ahnsou koaros me emen sapwellime sihpw salongala pwurodo nan mwomwohdiso. Atail limpoak ong Siohwa kin pousehlahte kekeirda ni atail kin doudouloale sapwellime limpoak, mahk, oh kadek kalahngan.—Luk 1:78. w24.08 31 ¶16-17

Ma Sises ketin mweidohng aramas ko ren wiahiong ih nanmwarki, e pahn iang pidada palien koperment en Suhs, me mi pahn kaundahn Rom. Sises “ketidahla pohn nahnao.” Eri mendahki kasongosong sang meteikan, e sohte ketin iang pidada palien koperment kan. Met uhdahn wia mehn kasukuhl kesempwal ong kitail! Ei mehlel, aramas akan sohte pahn peki kitail en wiahda manaman pwehn kihda mwenge de kamwahwihala me soumwahu, de wiahla arail nanmwarki. Ahpw irail kak peki kitail en iang usada emen me irail medewe pahn wia kaun mwahu men. Ahpw, sapwellimen Sises mehn kahlemeng sansal. E sohte iang pidada palien koperment kan, oh pil mahsanih: “Ei wehi kaidehn kisehn sampah wet.” (Sohn 17:14; 18:36) Kristian kan anahne alasang sapwellimen Sises madamadau oh wiewia. Kitail kin utung Wehio, padahkihong aramas akan, oh kapakapki en ketido.—Mad. 6:10. w24.12 4 ¶5-6

Ni omw kin onop, medewe ia duwen omw kak doadoahngki nan omw mour dahme ke sukuhlki. Karasepe, kahlemengih sapwellimen Siohwa pwung pahrek nan omw wiewia ong meteikan. Kahlemengih sapwellimen Sises limpoak ong Semeo oh meteikan sang ni omw kin men wia dahme Siohwa ketin kupwurki oh sewese meteikan mehnda ma met pahn kahrehiong omw mour en apwalla. Oh pil kahlemengih Sises sang ni omw kin kalohk ong meteikan pwe irail en pil ahneki ahnsou mwahu en esehla soahng kapwuriamwei kan me Siohwa ketin wiewiahiong aramas akan oh kasalehda arail pwoson pweinen pweipwei sapahlo. Ni atail kalaudehla atail wehwehki oh kalahnganki pweinen pweipwei sapahlo, atail limpoak ong Siohwa oh sapwellime Ohlo pahn pil laudla. Oh pwehki atail poakohng ira laudla, ara limpoak ong kitail pahn pil laudla. (Seims 4:8) Eri, pousehlahte doadoahngki soahng koaros me Siohwa ketikihong kitail pwehn kalaudehla atail sukuhlki duwen pweinen pweipwei sapahlo. w25.01 25 ¶16-17

Iren rahnen rahnwet kak kawehwehdi: “Komw ketikihsang dipei kan koaros mwohn silangomwi.” Met wehwehki me Siohwa kin ketin kesehla dipen me koluhla kan oh sohte kin pwurehng tehk. Met pil kak wehwehki: “Komw ketin kahrehiong dipei kan en mwomwen me e sohte wiawi.” Paipel pil kasansalehda met ni eh doadoahngki ehu karasaras me kileldi nan Maika 7:​18, 19. Iretikitik pwukat kasalehda me Siohwa kin ketin kesehla dipatail kan oh kakihrala nan kepin madau. Mahso, sohte emen kak kihdahsang mehkot me kihrlahr nan kepin madau. Paipel kadehdehda ni sansal me ni Siohwa eh ketin mahkohng kitail, e kin ketikihsang douluhl dipatail kan eri kitail solahr anahne suwedki. Nin duwen me Depit koasoia, uhdahn “meid pai irail akan me aleier mahkpen arail wiewia suwed kan oh diparail kan pweipweila.” (Rom. 4:7) Met uhdahn mahk mehlel! w25.02 9 ¶7-8

Nan sampah rahnwet, mie paradais ehu ni lokaiahn karasaras me aramas tohtohie kin soupisengki arail wiewia soahng mwahu tohto. Aramas rar rar kei me mi loale kin ahneki popohl mehlel. Irail kan me mieier nan soangen paradais wet koasoanedier teng en dehr kohkohsang. Irail pil men aramas tohtohie en iang irail mi nan soangen irair tohrohr wet. Irair dahieu me? Iei irair en popohl oh minimin me rasehng paradais ehu me kitail kin kaudokiong Siohwa. Nan soangen irair wet, kitail kin ahneki nanpwungmwahu meleilei rehn Siohwa oh rehn emenemen. Ni ahl kapwuriamwei ehu, Siohwa ketin wiahda irair en popohl ehu nan ahn Sehdan sampah me diren suwed, keper oh kailok. (1 Sohn 5:19; Kaud. 12:12) Atail Koht limpoako ketin mwahngih duwen koasoandi en mwehi wet eh kin kamedekihala aramas akan oh eri ketikihong kitail perepatail pwe kitail en kak pousehlahte papah ih ni peren. Sapwellime Mahsen kawehwehda irair en popohl oh minimin wet me rasehng paradais nin duwen ‘wasahn ruk’ oh “mwetuwel ehu me diren pihl.” (Ais. 4:6; 58:11) Pwehki sapwellimen Siohwa kapai, irail kan me mi nan soangen paradais wet kin nsenamwahu oh sohte perki mehkot erein imwin rahn apwal pwukat.—Ais. 54:14; 2 Tim. 3:1. w24.04 20 ¶1-2

Ma ke men pwopwoudida, ele ke kin kapakapki duwen met. Mehlel, Siohwa sohte ketin inoukihda en ketikihong emen eh pwoud. Ahpw e ketin nsenohki omw pepehm oh anahn kan, oh e kak ketin seweseiuk erein omw rapahki omw pwoud mwahu. Eri pousehlahte padahkihong ih omw pepehm oh ineng kan. (Mel. 62:8) Kapakapki kanengamah oh erpit. (Seims 1:5) Mehnda ma ke sohte mwadang diar emen me pahn wia omw pwoud mwahu, Siohwa ketin inoukihda en pousehlahte apwalihekin iuk omw anahn akan. (Mel. 55:22) Ahpw ke anahne kanahieng pwe omw rapahki omw pwoud mwahu en dehr wiahla mehkot keieu kesempwal ong uhk. (Pil. 1:10) Nsenamwahu mehlel sohte kin poahsoankihda ma ke pwopwoud de kiripw, ahpw e kin poahsoankihda omw nanpwungmwahu rehn Siohwa. (Mad. 5:3) Oh ni omw kiripw, ele ke ahneki saledek laud en kalaudehla omw doadoahk en kalohk. (1 Kor. 7:​32, 33) Doadoahngki mwahu ahnsowo. w24.05 21 ¶4; 22 ¶6

Ia uwen werei me kumwa en date? Ma kumwa kin mwadang en wiahda pilipil kan, met kin kalapw imwila suwed. (Lep. Pad. 21:5) Eri amwa date anahne ahnsou me itar pwehn esehla mwahu emenemen. Ahpw, amwa date en dehr pil nohn reirei. Paipel pil mahsanih: “Ni ahnsou me omw koapworopwor kin ohla, mohngiongomw pil kin ohla.” (Lep. Pad. 13:12) Dahme meteikan kak wia ni meh riemen ara date? Kitail kak luke ira en iang kitail mwenge, kaudok en peneinei, de kohla mwemweit. (Rom 12:13) Ele ke iang ira kohseli, iang ira nan sidohsa, de luke irahla imwomwo pwe ira en dehr kelehpw. (Kal. 6:10) Ma meh riemen peki rehmw ken kin iang ira, wiahki met pwais kaselel ehu. Dehr mweidohng ira en uhdahn kelehpwla, ahpw ken pil ese me ira anahne ahnsou en koasoakoasoipene. w24.05 30 ¶13-14

Elder kan kin song esehda pilipil dah kan me aramaso wiahda mwohn eh wiahda dihp laud. Karasepe, dahme kaluwetehla eh nanpwungmwahu rehn Siohwa? E uhdihsang kaukaule onop Paipel de sohla iang kalohk? E sohla kin kaukaule kapakap ong Siohwa? E sohla pelian ineng sapwung kan? Ihs me e kin werekiong? Mehn kamweit dah kan me e kin pilada? Ia duwen pilipil pwukat eh kamwakid eh madamadau oh ineng? E wehwehki ia sapwellimen Siohwa pepehm ong dahme e wiahdao? Elder kan kak idek rehn aramaso peidek kan me pahn sewese en medemedewe soahng kan me kaluwetehla eh nanpwungmwahu rehn Siohwa oh kahrehiong en wiahda dihp laud. Irail kin wia met ni elen kadek oh sohte kin idek peidek oaritik kan me re sohte anahne ese. (Lep. Pad. 20:5) Patehng met, elder kan kakete doadoahngki karasaras ehu pwehn sewese aramaso en medewe eh wiewia kan oh pohnese me e sapwung. Mwein arail tepin tuhpeneo, aramaso pahn tepida nsensuwedkihla pilipil kan me e wiahda oh mwomwen eh madamadau. E pil kakete koluhla. w24.08 22 ¶9-11

Sises ketin ngoangki kalohki “rongamwahu en Wehin Koht” pwehki e mwahngih me ih doadoahk wet me Koht ketin kupwurki en wia. Ong Sises, en kalohki rongamwahwo iei doadoahk me keieu kesempwal nan eh mour. Pil ni eh doadoahk en kalohko pahn imwisekla, e ketin seiloak “sang ehu kahnimw lel ehu kahnimw oh sang ehu kisin kahnimw lel ehu kisin kahnimw” pwehn padahk ong meteikan. (Luk 13:22) E pil ketin kaiahnehda ekei tohnpadahk pwehn iang ih kalohki rongamwahwo. (Luk 10:1) Pil rahnwet, kalohki rongamwahwo iei doadoahk me keieu kesempwal me Siohwa oh Sises ketin kupwurki kitail en wia. (Mad. 24:14; 28:​19, 20) Kitail kak kalaudehla atail ngoang nan kalohk sang ni atail kin kilangwohng aramas akan ni ahlohte me Siohwa kin ketin wia. E ketin kupwurki aramas tohto en rong rongamwahwo oh mwekidki. (1 Timoty 2:​3, 4) Pwehki met, Siohwa ketin sewese kitail en kamwahwihala mwomwen atail kin koasoiong aramas akan duwen met. Mehnda ma aramas akan sohte mwekidki ahnsou wet, ele irail pahn ahneki ahnsou en wia met mwohn kahn kamakam kohwahlapo imwisekla. w25.03 15-16 ¶5-7

Emenemen Kristian anahne doadoahngki dahme e sukuhlkihsang Paipel pwehn pilada dahme e pahn wiahiong emen me mwomwohdiso kihsang nanpwungarail. Ekei ele sohte pahn suwedki ar rahnmwahwih de kasamwo aramaso ma e iang towehda mihting. Ahpw, kitail sohte pahn koasoakoasoiong ih werei de patehng ih wia soahng teikan. Ekei kakete medewe, ‘Kaidehn Paipel mahsanih me Kristian men me rahnmwahwih soangen aramaso kin utung eh wiewia suwed kan?’ (2 Sohn 9-11) Ahpw, ire wet kasalehda me aramas menet wia emen me kesehla oh uhwongada kaudok mehlel de emen me song en kahrehiong meteikan en wia dahme Paipel mahsanih me sapwung. (Kaud. 2:20) Eri ma aramaso kin padahngki padahk me uhwongada kaudok mehlel de kangoange meteikan en wia soahng suwed teikan, elder kan sohte pahn koasoanehdi en mwemweitla reh. Ahpw, aramaso kak koluhla. Lao met wiawi, kitail sohte pahn rahnmwahwih de luke en iang towehda mihting en mwomwohdiso. w24.08 30-31 ¶14-15

Mwurin Sises eh ketin kamwengehla pokon ehu, e padahkihong sapwellime wahnpoaron ko en douda pohn pwoht ehu oh pwurala Kapernaum oh e ketidahla pohn nahnao, pwehn soikala pokono ar songosong en kasapwiladahng nanmwarki. (Sohn 6:​16-20) Erein wahnpoaron ko ar seiseiloak, mie melimel laud ehu wiawi me kahrehda ilok laud. Eri Sises ketila rehrail oh alialu kohla pohn sehdo. Oh e ketin luke wahnpoaron Piter en pil iang ih alu pohn sehdo. (Mad. 14:​22-31) Ni ahnsou me Sises ketida pohn pwohto, melimelo uhdi. Tohnpadahk ko pwuriamweila oh koasoia: “Komwi me uhdahn Sapwellimen Kohto!” (Mad. 14:33) Ahpw e kapwuriamwei me tohnpadahk ko koasoia met mwurin eh alu pohn sehdo, a kaidehn mwurin eh ketikihda pilawao ni manaman. Tehk dahme Mark ntingihedi ahnsowohte: “[Wahnpoaron ko] uhdahn pwuriamweikihla, pwe re sohte wehwehki kasukuhl sang manaman en lopwon en pilawao.” (Mark 6:​50-52) Tohnpadahk ko sohte wehwehki me Siohwa ketikihongehr Sises manaman en wia laudsang en ketikihda pilawa. w24.12 5 ¶7

Kitail kak kasalehda atail kalahnganki sapwellimen Siohwa limpoak sang ni atail wia uwen atail kak nan wihk kan mwohn oh mwurin Katamano pwehn kasalehiong Siohwa uwen atail kalahnganki pweinen pweipwei sapahlo. Ni atail pilahn en iang Katamano, kitail pil kak luke meteikan en iang. Kawehwehiong irail ko me ke luke dahme pahn wiawi ni Katamano. E pahn pil sawas en kasalehiong irail kisin kasdo ko Dahme Kahrehda Sises Ketin Pwoula? oh Tamataman Pwoulahn Sises nan jw.org. Elder kan en tehk mwahu me re luke irail me sohla iang kalohk oh mihting. Medewehla nanleng oh sampah eh pahn perenda ma ekei sapwellimen Siohwa sihpw salongala kan pwurodo nan sapwellime pelin sihpw! (Luk 15:​4-7) Ni Katamano, kitail sohte men rahnmwahwihte riatail Kristian kan ahpw kitail pil men rahnmwahwih irail me kapw kan de me wereila sohla iang towehda. Kitail men irail en pehm me kitail perenki kasamwo irail!—Rom 12:13. w25.01 31 ¶15

Mie ehu irair kaselel me keieu kamwakid Siohwa en ketin poaronehdo Sises pwehn pwoukinkitailla. Met iei sapwellime limpoak ong kitail. (Sohn 3:16; 1 Sohn 4:9) Siohwa ketin poaronehdo sapwellime Ohlo pwehn pwoukinkitailla pwehki e ketin kupwurki kitail en mour kohkohlahte oh pil wiahla kisehn sapwellime peneinei. Medewehla met: Ni Adam eh dipada, e sohla wia kisehn sapwellimen Siohwa peneinei. Pwehki met, kitail sohte wia kisehn sapwellime peneinei ni ahnsou me kitail ipwidi. Ahpw pwehki pweinen pweipwei sapahlo, Siohwa ketin mahkohng dipatail kan oh pahn ehu rahn ketin wiahkihla eh peneinei koaros me kin pwoson oh peikiong ih. Pil ahnsou wet kitail kak ahneki nanpwungmwahu keren rehn Siohwa oh pil rehn riatail Kristian kan. Ei mehlel, Siohwa uhdahn ketin poakohng kitail!—Rom 5:​10, 11. w25.01 21 ¶6

Ele ke pil pwungki me pweinen pweipwei sapahlo uhdahn kisakis kaselel ehu! (2 Kor. 9:15) Pwehki Sises ketin meirongkihla moure, ke kak ahneki nanpwungmwahu keren rehn Siohwa Koht. Ke pil kak ahneki koapworopwor en mour soutuk. Ia uwen eh konehng me kitail en kasalehda atail kalahnganki pweinen pweipwei sapahlo oh pil Siohwa me ketikihda met pwehki e uhdahn ketin poakohng kitail! (Rom 5:8) Pwehn sewese kitail en kin kalahngankihte oh dehr manokehla dahme Siohwa oh Sises ketin wiahda ong kitail, Sises ketin kehkehlingki me kitail en kin iang towehda Kataman en eh pwoula pahr koaros. (Luk 22:​19, 20) Nan pahret, Katamano pahn wiawi Niepeng, April 2, 2026. Kitail koaros pilahn en iang towehda. Kitail pahn uhdahn paiekihda ma kitail wiahda ahnsou erein wihk kan mwohn oh mwurin Katamano pwehn doudouloale dahme Siohwa oh Sapwellimeo ketin wiahda ong kitail. w25.01 20 ¶1-2

Ke kak pousehlahte sukuhlki duwen Siohwa Koht oh Krais Sises ara poakohng kitail ma ke kin doudouloalehte dahme ira ketin wiahiong kitail. Ele erein wihk kan mwohn oh mwurin Kataman en pahret, ke kak wadek kanahieng pwuhken Rongamwahu ko. Dehr wadekala irelaud tohto ahnsoukiste. Ahpw wadek ni wawai oh rapahki kahrepe teikan me kitail en poakohngki Siohwa oh Sises. Ma ke wereilahr nan padahk mehlel, ele ke kin medewe ma miehte soahng kapw kan me ke kak sukuhlki duwen sapwellimen Koht pwung pahrek, limpoak, oh pweinen pweipwei sapahlo. Ni mehlel, e pahn ahnsou koaros mie soahng kapw kan me kitail kak sukuhlki. Eri wadek oh onopki soahng kaselel kan me mi nan neitail sawasepen Paipel kan. w25.01 24-25 ¶13-15