Hem Sapraes lo Result blo Ministry blo Hem

Desicar wanfala singol mami laek for duim moa samting lo ministry, so hem kamap regular pioneer. Hem stap lo Venezuela, wanfala kantri wea feisim staka economic problem. Nomata olsem, hem disaed for start pioneer, and hem nao wat hem duim. Hem barava hapi for duim datwan, bat then COVID-19 pandemic hem start.

Lo start blo COVID-19 pandemic, Desicar faendem hard for duim ministry blo hem bikos lo olketa niu challenge wea kamap. Leta raeting hem wanfala challenge for hem. And for iusim videoconferencing lo ministry hem no isi tu bikos Internet service barava expensive lo ples wea hem stap. Hem sei: “Mi barava feel nogud bikos wantaem nomoa, ministry hem no olsem nao hao mi duim bifor, and mi feel olsem mi no wanfala gud regular pioneer.”

Then lo January 2021, branch office blo Olketa Jehovah’s Witness lo Venezuela appruvim wanfala spesol preaching campaign. Olketa mekem arrangement witim samting olsem 60 radio station and 7-fala television channel for broadcastim olketa Bible tok wea olketa selectim for faevfala weekend lo datfala month. Olketa Witness kasem encouragement for invaetem olketa wea interest for tune in lo olketa channel hia. Branch provaedem tu olketa kwestin and scripture wea join witim each tok, mekem olketa brata and sista savve iusim lo olketa leta raeting and phone conversation. And branch encouragem olketa for iusim text message for duim ministry, wea datwan tu hem wanfala niu method for duim preaching for staka Witness lo Venezuela.

Desicar hapi for tek part lo datfala campaign. Nomata hem no duim text messaging enitaem for preach, hem disaed for traem. Bat hem needim help. Hem sei: “Mi no savve gud lo technology.” So Desicar askem dota blo hem for teachim hem, and taem hem savve lelebet, Desicar redi nao for share lo datfala campaign.

Taem hem iusim text message for invaetem olketa frens blo hem for lisin lo olketa prerecorded tok hia. Hem sapraes lo result blo ministry blo hem. Staka lo olketa wea hem contactim lisin lo olketa tok hia and askem staka kwestin. Olketa narawan wea no fit for tune in for lisin lo olketa tok hia, olketa askem Desicar abaotem wat nao tok hia storyim. Desicar sei: “Mi redyim wanfala summary lo note buk blo mi and mi sharem witim olketa. No enitaem mi garem winim 5 return visit insaed wanfala month, bat lo end datfala campaign, mi reportim 112 return visit!”a

Desicar invaetem tu wanfala sista blo hem wea no Witness, wea olketa stay lo sem ples for lisin lo olketa tok hia wea kamap lo radio. Desicar sei: “Mi sapraes dat sista blo mi agree. And each Sunday lo 8:00 a.m., mi go lo apartment blo hem, and mifala lisin tugeta. Hem garem staka kwestin during and afta lo program.” Hem attendim tu Memorial blo dae blo Jesus thru lo videoconferencing, and hem allowim Desicar for iusim Internet connection blo hem for duim ministry.

Desicar sei: “Mi barava thankiu lo Jehovah, and olketa kongregeson elder for wei wea olketa encouragem mi. Olketa helpem mi for hapi moa lo ministry blo mi.” (Jeremiah 15:16) Desicar continue for pioneer and hem followap lo olketa wea interest wea hem contactim olketa thru lo text message.