Iusim Pablik Phone for Duim Olketa Bible Study

Wanfala Jehovah’s Witness wea nem blo hem Daiane, hem wanfala full-taem evangelizer lo Brazil. Wanday, taem hem sharem Bible message lo telephone, hem story witim wanfala young marit couple wea interest. Tufala talem Daiane dat tufala bae muv go lo wanfala isolate vilij, wea no garem electricity or Internet. And no eni Jehovah’s Witness stap lo there tu. For olketa continue witim Bible discussion blo olketa, couple hia givim Daiane namba blo wanfala pablik telephone lo datfala vilij, and thrifala evriwan agree lo wanfala day and taem wea olketa markem for story.

Daiane ringim datfala pablik phone lo taem wea olketa markem, and couple hia ansa! Insaed tufala week afta datwan, thrifala taem nao tufala discussion Bible witim Daiane thru lo phone.

Afta datwan, datfala couple no ansarem nao olketa kol blo hem. Daiane no discourage, hem continue for ringim datfala pablik phone thrifala taem lo week, and hem preach witim eni person wea ansarem datfala phone. From datwan, Daiane hem startim olketa Bible study witim pipol lo datfala vilij.

Wanday, taem Daiane and hasband conductim Bible study witim wanfala young man lo pablik phone hia, wanfala church leader lo datfala vilij herem discussion blo olketa. Hem kam standap saed lo datfala Bible student mekem hem savve herem gud conversation blo olketa. Then datfala church leader ask for hem story witim Daiane and hasband blo hem. Hem barava enjoyim wat hem herem and hem tu laek for studyim Bible!

Gogo, Daiane and hasband blo hem conductim sixfala Bible study lo datfala vilij, thru lo phone, includim datfala church leader. Samfala lo olketa student hia gohed for attendim olketa Christian meeting thru lo datfala sem pablik phone. Wanfala lo olketa even wakem wanfala bench mekem olketa Bible study hia garem ples for sidaon taem olketa study.

Daiane and hasband blo hem hapi tumas for garem datfala opportunity for tufala spredim Kingdom message lo datfala remote vilij. Daiane sei: “Jehovah savve mekem eniwan for herem gud nius, nomata olketa stap lo isolate ples.”