Hem Comfortim Olketa Narawan Nomata Hem Garem Olketa Health Issue

Clodean, wea hem wanfala Jehovah’s Witness and hem stap lo South Africa, hem admit lo hospital for wanfala big surgery. Bikos hem garem samfala complication, olketa sei hem garem samfala difren option wea hem mas chusim saed lo treatment blo hem. Bifor and afta hem operate, hem experiencem fatigue, pain, and stress. Klosap ten weeks bihaen hem go bak lo haos, hem still no savve sidaon. And bikos lo COVID-19 pandemic, hard for eniwan savve visitim hem.

From Clodean no laek for letem situation blo hem mekem hem feel daon, hem askem God for strongim hem for comfortim others. So taem hem fit for sidaon lelebet, hem ringim sista blo neiba blo hem wea studyim Bible witim olketa Witness bifor bat then hem stop. Clodean storyim olketa encouraging point from Bible witim hem, and datwan motivatim datfala woman for laek study moa. Clodean explainim tu olketa benefit wea hem bae kasem if hem attendim olketa Christian meeting, and lo semtaem explainim hao for connect kam witim kongregeson lo videoconference. Datfala woman hem connect kam lo meeting and even koment tu lo wanfala kwestin-and-ansa part lo program.

Then Clodean story tu witim young sista blo datfala Bible student, wea barava interest tu for studyim Bible. Then hem mentionim lo Clodean abaotem olketa narawan wea maet interest for studyim Bible. Wat nao result? Clodean startim Bible study witim nara fofala woman moa. Bat story no end lo there!

From Clodean willing for helpem others, hem able for startim Bible study witim nara tenfala woman moa. So during lo pandemic, hem study witim total blo 16-fala woman! Samfala lo olketa evritaem attendim olketa Christian meeting thru lo videoconference. Bikos Clodean hem gohed busy for helpem others, datwan mekem hem no focus tumas lo own situation blo hem. Hem sei dat bikos Jehovah, wea hem “God blo evri comfort” gohed for comfortim hem during lo olketa hard taem blo hem, datwan mekem hem fit for comfortim tu olketa narawan.—2 Corinthians 1:3, 4.

Wat nao feeling blo olketa student blo Clodean abaotem wat olketa lanem? Wanfala sei: “Study hem benefitim mi lo staka difren wei. Bat main benefit mi kasem nao mi savve lo nem blo God. Datwan helpem mi for garem klos frenship witim Jehovah.” And first woman wea Clodean ringim, distaem hem redi for baptaes. Evriting hia mekem Clodean for barava hapi. And distaem hem barava recover nao from surgery blo hem.