Iusim Bible Principle for Trainim Konsens blo Iu

1-2. (a) Wanem present nao God givim for Adam and Eve? (b) Wat nao tufala shud duim for showim tufala appreciatim datfala present?

OLKETA animal duim samting followim nomoa hao Jehovah creatim olketa, so olketa no savve ting raonem samting. Staka machine waka followim computer program wea olketa man setim finis. Bat iumi olketa man no olsem. God creatim iumi witim wanfala spesol present, wea hem barava spesol lo iumi olketa Christian. Datfala present hem free will, wea hem ability for mekem own disison and choice lo laef. Bible storyim dat God creatim first man Adam lo image blo hem, or followim olketa wei blo hem. (Gen. 1:​26, 27) Jehovah creatim Adam and Eve witim ability for mekem own disison.

² Jehovah no givim Adam and Eve wanfala long list blo olketa law. Hem talem tufala nomoa for lukaftarem earth, fulimap earth witim olketa pikinini, and for respectim raet blo Hem for markem olketa limit lo wat hem allowim olketa for duim. (Gen. 1:28; 2:​16, 17) Wat nao Adam and Eve shud duim for showim tufala appreciatim God wea givim free will olsem present for tufala? Bikos lo evriting wea Jehovah givim lo tufala, tufala shud obeyim olketa komand wea tufala kasem bikos tufala lovem Jehovah and laek for mekem hem hapi.—Prov. 23:15.

3. Hao nao Adam and Eve iusim free will wea God givim lo tufala?

³ Olsem Bible storyim, Adam and Eve no iusim free will wea tufala garem lo wisefala wei. Bat, tufala disaed for no obeyim Jehovah. Datfala disison wea tufala mekem showim tufala no lovem Jehovah and no appreciatim wat hem duim, bat tufala tingim tufala seleva nomoa. (Gen. 3:​1-7) Nogud samting wea kamaot from datfala disison hem still affectim iumi distaem.—Rom. 5:12.

4. (a) Olsem Galatians 6:5 storyim, wat nao iumi evriwan mas duim? (b) Wat nao nara present wea iumi bae storyim lo disfala article?

⁴ Laef blo iumi distaem hem barava hard. Each day, iumi need for mekem staka disison. (Readim Galatians 6:5.) Samfala disison hem isi for mekem, bat samfala disison hem no isi. Hao nao iumi savve mekem disison wea Jehovah bae hapi lo hem? First samting, iumi mas luksavve dat iumi needim help blo Jehovah. (Prov. 16:3; Jer. 10:23) Nomata Jesus hem perfect, hem luksavve dat hem needim help blo God. (Heb. 5:7) So haomas moa iumi man wea no perfect? Iumi barava needim help blo God winim Jesus. Distaem bae iumi storyim nara present wea God givim wea bae helpem iumi for mekem olketa gud disison, hem nao konsens blo iumi.

WAT NAO KONSENS?

5. (a) Wat nao konsens? (b) Hao nao konsens savve helpem iumi? (Romans 2:​14, 15)

⁵ Konsens hem samting wea God putim insaed lo iumi for helpem iumi savve lo wat hem stret and no stret. Even wanfala person wea no savve lo law blo God hem garem konsens. (2 Cor. 4:2) Konsens blo iumi hem olsem wanfala judge insaed lo iumi wea savve accusim iumi, or mek excuse if wat iumi tingim and duim hem gud or nogud. (Readim Romans 2:​14, 15.) Konsens blo iumi savve warnim iumi for no duim wat iumi savve hem rong. (1 Sam. 26:​8-11) Or hem savve encouragem iumi for duim wat iumi savve hem stret. Just bikos iumi garem free will, datwan no minim evri disison wea iumi mekem hem acceptable lo Jehovah. Konsens blo iumi shud helpem iumi for luksavve lo difference between gud disison and nogud disison.

6. Why nao konsens blo iumi no savve evritaem helpem iumi for mekem gud disison?

⁶ Bat sorre samting nao, konsens blo iumi no savve evritaem helpem iumi. From iumi no perfect, konsens blo iumi tu no perfect. Hao iumi growap, culture blo iumi, and olketa rong samting wea iumi laekem savve spoelem konsens blo iumi. Bible sei dat konsens savve kamap “wik,” “no klin,” “olsem samting wea hot iron hem bonem,” or even “guilty.” (1 Cor. 8:12; Titus 1:15; 1 Tim. 4:2; Heb. 10:22) Kaen konsens olsem bae no savve helpem iumi for mekem gudfala disison. Hem olsem wanfala scale wea no accurate wea olketa need for fixim. So iumi mas waka hard for gohed trainim konsens blo iumi mekem hem gohed waka gud. (1 Pet. 3:16) Hao nao iumi savve duim datwan?

HAO FOR TRAINIM KONSENS BLO IUMI

7-8. (a) Wat nao bae helpem iumi for trainim konsens blo iumi? (b) Hao nao olketa Bible principle helpem iumi for mekem olketa gud disison? Storyim example. (Lukim tu piksa.)

⁷ Hao nao iumi savve trainim konsens blo iumi? Iumi mas readim Bible evritaem and lane abaotem olketa samting wea Jehovah sei hem stret and no stret. Wei for studyim olketa law blo God bae helpem iumi for understandim tingting blo hem. Bat, olsem iumi storyim lo article bifor diswan, olketa specific law savve helpem iumi lo samfala situation nomoa. Dastawe iumi mas ting raonem tu olketa principle, bikos hem savve helpem iumi for understandim tingting and feeling blo Jehovah abaotem olketa samting wea law no storyim.—Isa. 55:9.

⁸ Iumi savve comparem journey blo iumi lo laef witim wei for wakabaot lo wilderness. Imaginim wanfala wilderness wea no garem klia road for wakabaot followim, or wea no garem eni road saen. Iumi maet savve lo direction for kasem destination blo iumi sapos iumi lukluk lo position blo sun and olketa star. Bat wanfala map wea garem samfala specific landmark bae hem moa helpful winim datwan. Kaen map olsem savve helpem iumi for sure dat iumi wakabaot followim raet direction and bae hem helpem iumi for luksavve taem iumi go difren from datfala direction. Destination blo iumi lo laef, hem for mekem Jehovah hapi. Bible hem olsem datfala map wea givim iumi specific direction. Olketa Bible principle hem olsem olketa landmark wea stap followim road. Wei for followim olketa principle hia bae helpem iumi for kasem destination blo iumi.

9. Wat moa nara help wea Romans 9:1 storyim wea bae helpem iumi for trainim konsens blo iumi?

⁹ For trainim gud konsens blo iumi, iumi needim holy spirit blo God for helpem iumi. (Readim Romans 9:1.) Holy spirit bae helpem iumi for understandim tingting blo God abaotem olketa samting. Hem savve motivatim and strongim iumi tu for duim olketa samting wea followim will blo Jehovah. (Phil. 2:13) Bat hao nao iumi savve kasem help from holy spirit blo Jehovah?

10. Hao nao iumi savve kasem help from holy spirit? (Luke 11:​10, 13)

¹⁰ Prea for holy spirit. (Readim Luke 11:​10, 13.) Iumi savve sure dat Jehovah laekem tumas for givim holy spirit blo hem lo iumi. (John 3:34) Hem kaen tumas for givim holy spirit lo olketa wea obeyim direction blo hem. (Prov. 1:23; Jas. 1:5) Bat wat moa savve helpem iumi for trainim konsens blo iumi?

11. (a) Wat nao shud main goal blo iumi lo laef? (b) Why nao iumi need for mek sure konsens blo iumi kasem training and waka gud?

¹¹ Traem best for kasem appruvol blo Jehovah evritaem. (Prov. 8:​34, 35) Datwan hem shud main goal blo iumi lo laef. If iumi evritaem tingim datwan lo evri situation iumi feisim lo laef, datwan savve helpem iumi for trainim konsens blo iumi. Iumi bae garem konsens wea kasem gudfala trainim if iumi garem sem tingting olsem Jehovah and garem heart wea laek for mekem hem hapi. Taem iumi tingim laef distaem wea hard tumas, iumi luksavve dat hem important tumas for konsens blo iumi kasem gudfala training. Staka taem iumi savve feisim olketa situation wea Bible no story specific abaotem. Olketa situation hia maet includim entertainment wea iumi chusim, waka blo iumi, education, or pipol wea iumi associate witim. So hao nao bae iumi sure dat Jehovah appruvim olketa disison wea iumi mekem abaotem olketa samting hia?—2 Cor. 1:12.

12. Wat nao bae helpem iumi for savve if konsens blo iumi hem leadim iumi lo stret direction? (Ephesians 5:10)

¹² Meditate abaotem wat iu readim lo word blo God. (Ps. 49:3) Taem iu readim Bible, luk for olketa principle wea bae helpem iu for understandim tingting blo Jehovah. (Readim Ephesians 5:10.) Taem iumi deal witim hard taem wea iumi feisim lo laef, iumi need for luk for olketa principle lo Bible wea bae helpem iumi for luksavve sapos konsens blo iumi hem helpem iumi for mekem olketa stret disison. (Prov. 2:​4-9, 11-13) Olketa principle hia savve helpem iumi for adjustim and stretem konsens blo iumi for mek sure iumi gohed wakabaot followim stretfala road.—Heb. 5:14.

13. Wat nao iumi shud no duim? Storyim example.

¹³ No mekem disison firstaem then lukaotem principle for sapotim datwan. Iumi no laek for olsem olketa Israelite wea gohed stap lo land blo Judah afta Jerusalem hem distroe lo 607 B.C.E. Olketa sei olsem lo Jeremiah: “Jehovah, God blo iu, nao bae talem mifala road wea mifala shud wakabaot followim and wanem mifala shud duim.” (Jer. 42:​3-6) Bat olketa disaedem finis wat olketa bae duim. Taem Jehovah givim direction wea olketa no laekem, olketa followim nomoa original disison blo olketa. Datwan mekem olketa for kasem nogud samting. (Jer. 42:​19-22; 43:​1, 2, 4) So bifor iumi mekem eni disison, iumi need for lukaotem olketa Bible principle wea showim tingting blo Jehovah and then duim samting followim datwan.

14. Why nao iumi need for applyim olketa Bible principle taem iumi mekem disison?

¹⁴ Mekem olketa disison base lo Bible principle. (Matt. 7:​24-29; Jas. 1:​23-25) Taem iumi mekem disison base lo olketa Bible principle, iumi letem holy spirit for leadim iumi. From datwan, Jehovah bae gohed for givim holy spirit blo hem lo iumi. (Acts 5:32) Bat, if iumi ignorem lead blo holy spirit blo Jehovah, datwan bae mekem holy spirit “feel sorre,” or iumi againstim holy spirit. (Eph. 4:30; Isa. 63:10; Acts 7:51) Jehovah bae even stopem holy spirit blo hem from iumi. (Ps. 51:11; 1 Thess. 5:19) Datwan bae mekem iumi kasem nogud samting bikos iumi needim paoa and strong wea kam from holy spirit.—Eph. 3:16.

HAO FOR FAENDEM BIBLE PRINCIPLE WEA FITIM SITUATION BLO IU

15-16. (a) Hao nao iumi savve faendem Bible principle wea fitim situation blo iumi? (b) Olketa wanem Bible principle nao savve helpem wanfala Bible student for stop for smoke?

¹⁵ Mekius lo olketa study tul. Bifor iumi savve applyim olketa Bible principle, iumi need for savve wea nao for faendem insaed Bible. For example, hao if Bible student blo iu no understandim why nao hem shud stop smoke? Maet hem ting: ‘Bible no storyim wei for smoke. So hao nao bae iumi savve dat wei for smoke hem rong?’ Hao nao iu savve helpem hem for faendem olketa Bible principle and olketa Bible leson wea bae helpem hem for luksavve dat smoking hem rong? Wanfala best tul hem Research Index for Olketa Jehovah’s Witness. Iu savve showim lo student blo iu disfala heding “Tobacco and Wei for Smoke.” Anda lo datfala heding hem savve lukim reference blo article “Wanem Nao Tingting Bilong God Abaotem Wei for Smoke?” (Lukim Wastaoa blo July-August, 2014.) Taem hem readim datfala article, olketa wanem scripture and principle nao bae hem faendem?

¹⁶ Bae iumi story raonem faevfala principle wea article hia storyim. (1) Iumi shud no kamap slave for samting wea bae leadim iumi for dae. (Rom. 6:16) (2) Iumi shud avoidim eni samting wea bae spoelem body blo iumi. (2 Cor. 7:1) (3) Jehovah laekem iumi for worshipim hem witim full laef blo iumi. (Matt. 22:37) (4) Iumi shud no duim samting wea bae spoelem olketa narawan. (Matt. 22:39; 1 Cor. 10:24) (5) Jehovah savve givim iumi paoa for duim stret samting. (Phil. 4:13) So nomata Bible no storyim klia wei for smoke, olketa principle wea iumi faendem insaed savve helpem student blo iumi for luksavve lo tingting blo Jehovah.

17. Hao nao tufala Witness wea planim wedding blo tufala savve faendem olketa Bible principle wea savve helpem tufala?

¹⁷ Hao nao tufala Witness wea planim wedding blo tufala savve faendem olketa Bible principle wea savve helpem tufala for mekem olketa wise disison? Research Index savve helpem tufala. Anda lo heding “Marit and Marit Feast,” hem garem olketa article wea storyim olketa basic Bible principle. Tingim sixfala principle wea tufala savve ting raonem. (1) Evri arrangement lo datfala wedding shud honorim Jehovah. (1 Cor. 10:​31, 32) (2) Kaleko wea iumi werem shud showim respect, modest, and no ova tumas. (1 Tim. 2:9; 1 Pet. 3:​3, 4) (3) Iumi shud no olsem pipol lo world blo Satan for show-off witim samting wea iumi garem. (John 17:14; Jas. 1:27; 1 John 2:​15, 16) (4) Olketa arrangement shud followim order. (1 Cor. 14:40) (5) Reception shud no kamap wild party wea pipol drunk. (Gal. 5:21) (6) Samwan shud garem responsibility for lukaftarem datfala event.—John 2:​8, 9.

18-19. (a) Wat moa nara tul wea savve helpem iumi? (b) Wat nao olketa principle wea iu savve faendem lo disfala tul wea savve helpem iu for mekem wise disison abaotem olketa celebration? (Lukim box “Hao, Iu Savve Faendem Olketa Principle?”)

¹⁸ Nara tul wea helpem staka pipol hem disfala buk Scripture for Laef blo Christian. Disfala buk garem olketa scripture anda lo staka difren topic. Taem iu go lo datfala topic, bae iu lukim wanfala list blo olketa kwestin witim olketa Scripture wea savve helpem iu for luksavve lo olketa Bible principle. For example, maet wanfala Christian wonder if hem shud attendim wanfala celebration. If hem go lo heding “Celebration,” bae hem faendem subheding “Celebration wea Christian mas no join insaed.”

¹⁹ Ting raonem samfala information wea stap anda lo datfala sekson: “Why nao hem rong for join insaed eni celebration wea join witim false religion? (1Co 10:21; 2Co 6:​14-18; Eph 5:​10, 11).” Then hem storyim example blo samfala celebration wea no fitim Christian. Anda lo subheding “Celebration wea mekhae lo kantri,” hem garem olketa Bible principle wea wanfala Christian savve ting raonem if hem shud joinim event for celebratem politikol history blo wanfala kantri, rememberim olketa war wea kamap lo kantri, or join insaed olketa celebration for honorim wanfala bigman. Iumi tinghae tumas lo organization blo Jehovah wea provaedem olketa tul olsem for helpem iumi trainim konsens blo iumi!

PRUVIM IU GAREM KONSENS WEA KASEM GUD TRAINING

20. Hao nao bae iumi savve sapos konsens blo iumi hem kasem gudfala training?

²⁰ Iumi barava tinghae lo free will wea hem wanfala present from God. Bat iumi luksavve tu dat iumi mas trainim konsens blo iumi mekem iumi savve iusim free will blo iumi lo wei wea mekem Jehovah hapi. Konsens wea kasem gudfala training bae helpem iumi for mekem olketa disison wea honorim Jehovah and wea followim will blo hem. For duim datwan, iumi needim help from holy spirit blo Jehovah. So iumi mas gohed ask for holy spirit and duim samting followim lead blo hem. Olketa Bible principle savve helpem iumi tu for trainim konsens blo iumi. Iumi laek for iusim gud olketa present hia and then lukim paoa wea Word blo God garem for helpem iumi lo laef.—2 Tim. 3:​16, 17; Heb. 4:12.