Olketa Bible Principle—Why Hem Important

1-2. (a) Why nao iumi savve sei Bible hem wanfala old buk? (b) Why nao Bible hem still fitim distaem?

BIBLE hem wanfala old buk. Olketa start for raetem lo samting olsem 3,500 years ago, and olketa finis for raetem klosap 2,000 years ago. Nomata olsem, “word blo God” wea stap insaed hem laef and still garem paoa for helpem iumi distaem. (Heb. 4:12; 2 Tim. 3:​16, 17) Staka million pipol sei dat Bible helpem olketa for deal witim laef lo world distaem.

² Bat hao nao kaen old buk olsem hem still fitim distaem? Hem bikos lo tufala main reason. First wan, message insaed Bible hem kam from “God wea laef,” datfala Creator wea barava wise. (1 Tim. 4:10; Rom. 16:​26, 27) Mek-tu, Bible garem olketa principle wea no savve aot-of-date. Olketa principle hia savve helpem samwan nomata wat taem period nao hem stap lo hem or wat kaen challenge nao hem feisim.

3. Olketa wanem kwestin nao bae iumi ansarem lo disfala article?

³ Wat nao Bible principle? Why nao hem barava important for iumi followim distaem? Hao nao iumi savve identifyim olketa principle taem iumi readim Bible? Disfala article bae ansarem olketa kwestin hia. Iumi bae storyim tu hao olketa teaching blo Jesus helpem iumi for luksavve hao important nao olketa principle.

WAT NAO BIBLE PRINCIPLE?

4. Wat nao Bible principle?

⁴ Bible principle hem olketa basic truth wea olketa law blo God hem base lo hem. Samfala taem, olketa raetem wanfala principle olsem law. (Matt. 22:37) Bat, principle hem winim olketa specific law. Olketa specific law maet no garem staka application. Maet hem just for wanfala taem period or for wanfala situation. Bat olketa Bible principle showim tingting blo Jehovah taem no eni law stap for wanfala specific situation. Principle hem reason why wanfala law hem stap. Evri law blo Jehovah hem garem wanfala valid reason for why hem stap. Bat olketa principle wea olketa law hia base lo hem savve apply for olketa difren situation and hem fitim olketa difren taem period. (Ps. 119:111) Olketa law maet need for change, bat olketa principle no savve expire or aot-of-date.—Isa. 40:8.

5. Storyim wanfala example wea showim difference between law and principle. (Lukim tu piksa.)

⁵ For helpem iumi understandim gud difference between law and principle, tingim disfala example. Wanfala mami maet sei lo smol pikinini blo hem, ‘No tasim stove.’ Datwan hem wanfala komand or law. Bat principle, or idea, bihaenem datfala law hem: No tasim samting wea hot, nogud hem bonem iu. Datfala principle hem no apply for stove nomoa. Bat hem savve apply tu for iron for kaleko, heater, or eni nara hot samting wea savve bonem man. Principle hia hem no just apply for insaed haos bat hem apply tu for olketa nara ples. Hem tru, taem pikinini hia hem big hem savve iusim stove. Bat, hem bae need for careful for no tasim stove hia lo wei wea bae bonem hem. So law savve change, bat basic principle bihaenem datwan hem no savve change.

WHY NAO BIBLE PRINCIPLE HEM IMPORTANT?

6. (a) Wat nao Jehovah provaedem for iumi insaed Word blo hem? (b) Hao nao Jehovah showim hem respectim iumi?

⁶ From Jehovah lovem iumi, hem givim specific direction for iumi thru lo olketa law mekem iumi savve stap klia lo danger. (Jas. 2:11) And hem helpem iumi tu for understandim principle, or idea bihaenem olketa law. Thru lo Word blo hem, hem provaedem olketa advaes for iumi lo olketa difren part lo laef wea no eni specific law stap for hem. Olketa Bible principle helpem iumi for mekem olketa gud disison lo laef and for duim stret samting. Wei wea Jehovah provaedem olketa principle hia showim hem respectim iumi and hem givim iumi freedom for mekem olketa disison wea pruvim love blo iumi for hem and olketa standard blo hem.—Gal. 5:13.

7. Storyim example wea showim why Bible principle hem barava important. (Lukim tu piksa.)

⁷ For minim hao Bible principle savve helpem iumi, tingim olketa road saen wea draeva savve lukim followim highway lo samfala kantri. Staka lo olketa saen hia helpem draeva for savve olketa law wea hem mas followim taem hem draev. Maet olketa saen hia showim speed limit or hem showim taem for draeva mas stopem car. If draeva no obeyim instruction lo olketa saen hia, bae hem kasem panis. Bat, olketa nara saen showim olketa danger wea wanfala draeva savve expectim. For example, samfala saen hia maet givim warning dat road hem slippery or olketa animal savve akrosim road. Wanfala experience draeva iusim gudfala tingting and draev careful taem hem lukim olketa saen mekem hem stap klia from olketa danger. For example, if hem rain big, datfala draeva bae adjustim hao hem draev lo dangerous taem olsem. Lo sem wei, olketa Christian careful for no duim eni samting wea Word blo God stopem, and tu, olketa stap klia lo eni tingting or no duim eni samting wea savve mekem olketa for brekem olketa law blo God. For mekem gudfala disison olketa need for understandim wat nao tingting blo Jehovah abaotem samting.

8. Olsem Romans 12:​1, 2 storyim, hao nao wei for lukaotem olketa Bible principle trainim iumi?

⁸ Nomata olsem, iumi kasem olketa nara important benefit tu from wei for lukaotem olketa Bible principle and followim lo laef blo iumi. For example, hem trainim iumi for understandim hao Jehovah ting lo samting. Taem iumi readim olketa story insaed Bible, iumi lane for luk for olketa practical leson insaed datwan. Iumi savve ting raonem why nao Jehovah putim olketa leson hia insaed Word blo hem and hao iumi savve benefit from datwan. Taem iumi duim datwan, iumi lane for iusim “gudfala wei for ting raonem samting” and understandim wat iumi savve duim for mekem Jehovah hapi. Iumi pruvim lo iumiseleva dat ‘will blo God hem gud, hem acceptim, and hem perfect.’—Readim Romans 12:​1, 2.a

9. Wat moa nara benefit wea iumi kasem taem iumi followim Bible principle? (Hebrews 5:​13, 14)

⁹ Taem iumi lane for followim olketa Bible principle datwan helpem iumi for kamap mature Christian. Taem iumi followim olketa Bible principle, datwan strongim frenship blo iumi witim Jehovah. (Readim Hebrews 5:​13, 14.) Olketa smol pikinini maet needim long list blo olketa law, or rul, mekem olketa savve wat for duim lo olketa difren situation. Olketa maet obeyim olketa rul hia bikos olketa fraetem panisment nomoa. Bat Jehovah no treatim iumi olsem olketa smol pikinini, hem treatim iumi olsem olketa mature adult. Hem trustim iumi for mekem olketa disison wea followim will blo hem, and taem iumi duim olsem, datwan mekem heart blo hem hapi tumas.—Ps. 147:11; Prov. 23:​15, 26; 27:11.

HAO NAO IUMI SAVVE IDENTIFYIM BIBLE PRINCIPLE?

10. Hao nao iumi savve identifyim olketa Bible principle?

¹⁰ Taem iumi luk for olketa leson lo Bible, iumi savve faendem olketa principle wea savve helpem iumi for understandim hao Jehovah ting and feel abaotem samting. And iumi savve identifyim tu olketa principle taem iumi luk for olketa reason why Jehovah givim samfala law. Taem iumi understandim gud olketa reason hia, bae iumi understandim gud tu tingting blo Jehovah. Bat for understandim tingting blo God, iumi mas prea lo hem for help and developim ability for ting raonem samting. (Prov. 2:​10-12) Iumi savve ting raonem olketa kwestin olsem: ‘Why nao God givim disfala law? Wat nao disfala law teachim mi abaotem olketa samting wea Jehovah no laekem? Wat nao mi lanem from disfala story lo Bible, and hao nao mi savve applyim datwan lo laef blo mi?’ Taem iumi identifyim olketa reason and leson bihaenem olketa law and story lo Bible, iumi bae fit for mekem olketa gud disison lo laef, disison wea followim will blo Jehovah.

11. Lo Sermon lo Maunten, hao nao Jesus showim iumi hao for identifyim olketa Bible principle? (Lukim tu piks.)

¹¹ Lo Sermon lo Maunten, Jesus showim iumi hao for identifyim olketa Bible principle. Bae iumi storyim thrifala example. Lo each example, firstaem Jesus storyim law. Then hem storyim tingting, or principle, bihaenem datfala law. Taem iumi meditate abaotem wat Jesus storyim, bae iumi lukim hao iumi savve applyim olketa principle hia lo taem blo iumi distaem. And lo semtaem, bae iumi luksavve tu lo olketa benefit wea iumi kasem from olketa leson hia.

12. Wat nao wanfala principle bihaenem law wea Jesus storyim lo Matthew 5:​21, 22? (Lukim tu piksa.)

¹² Readim Matthew 5:​21, 22. “Iufala mas no murder.” Wat nao wanfala principle bihaenem disfala law? Jehovah no laekem iumi for heitim olketa narawan, thru lo akson, toktok, or even lo tingting. Wat Jesus talem showim dat nomata sapos samwan no murder, hem still savve brekem reason for datfala law if hem heitim brata blo hem. If samwan “gohed for kros lo brata blo hem” or talem nogud toktok for spoelem hem, datfala person wea kros bae still kasem judgment, bikos diskaen attitude and akson nao savve leadim man for murder.—1 John 3:15.

13. Hao nao iumi savve applyim principle lo Matthew 5:​21, 22 lo laef blo iumi? (Lukim tu piksa.)

¹³ Hao nao iumi savve applyim principle lo Matthew 5:​21, 22? Iumi shud avoidim wei for gohed keepim kros. (Lev. 19:18; Job 36:13) Why? Bikos feeling olsem savve mekem heit kamap insaed heart, wea datwan savve mekem man for talem nogud toktok and duim olketa nogud samting. (Prov. 10:12) Diswan includim wei for gossip and spredim laea story wea savve spoelem nem or reputation blo olketa narawan. (Prov. 20:19; 25:23) So even bifor olketa samting olsem social media, blog, Internet, or olketa messaging app hem stap, Jesus storyim wanfala principle wea savve helpem olketa mature Christian for luksavve lo olketa danger wea savve kamap taem olketa iusim olketa modern technology hia. So nomata lo eni situation, iumi shud avoidim olketa toktok wea showim iumi heitim narawan, wea savve lead go lo wei for spoelem gud reputation blo samwan.

14. Wat nao principle bihaenem law wea Jesus storyim lo Matthew 5:​27, 28? (Lukim tu piksa.)

¹⁴ Readim Matthew 5:​27, 28. “Iufala mas no duim adultery.” Wat nao principle bihaenem disfala law? Jehovah no just heitim wei for durong bat hem heitim tu tingting wea savve leadim man for durong. Jesus explainim dat if wanfala marit man gohed for lukluk lo wanfala woman (wea no waef blo hem) lo wei for garem feeling for durong witim hem, man hia sin finis. So iumi mas kwiktaem duim samting for avoidim wei for garem eni tingting for laek durong. Iumi mas waka hard for duim datwan. (Matt. 5:​29, 30) Disfala principle apply tu for olketa singol Christian.

15. Hao nao iumi savve applyim principle lo Matthew 5:​27, 28? (Lukim tu piksa.)

¹⁵ Hao nao iumi savve applyim principle lo Matthew 5:​27, 28? Iumi shud avoidim wei for ting abaotem olketa dirty samting. (2 Sam. 11:​2-4; Job 31:​1-3) So Christian wea mature bae avoidim evri difren kaen pornography. Hem bae no ting dat hem olraet nomoa for lukluk lo dirty piksa or video bikos hem ting for duim datwan nao hem rong. Hem bae no trae for mek excuse for lukluk lo samfala type pornography wea pipol lo world ting lo hem olsem hem just entertainment nomoa and hem no savve spoelem man. Lo taem blo Jesus, no eni electronic device, movie, or photograph hem stap. Nomata olsem, Jesus givim wanfala principle wea teachim iumi lo hao Jehovah feel abaotem olketa dirty piksa and video wea pipol maet pablisim lo olketa modern device. Diswan helpem iumi for understandim dat Jehovah barava heitim olketa samting wea pipol duim distaem, olsem sexting or for join insaed olketa online activity witim pipol wea duim dirty samting. Wei for followim disfala principle savve helpem samwan wea marit for gohed faithful lo marit partner blo hem. (Mal. 2:15) Hem savve helpem tu evri Christian, nomata olketa wea marit or singol for avoidim eniting wea savve lead go lo wei for durong.—Prov. 5:​3-14.

16. Wat nao principle bihaenem law wea Jesus storyim lo Matthew 5:​43, 44? (Lukim tu piksa.)

¹⁶ Readim Matthew 5:​43, 44. “Iufala mas lovem neiba blo iufala.” Wat nao principle bihaenem disfala law? Jehovah laekem iumi for ting lo evriwan olsem neiba blo iumi and lovem olketa. Sorre samting, lo taem blo Jesus olketa Jew tingse disfala law hem minim olketa bae lovem nomoa olketa Jew and heitim enemy blo olketa. Bat Jesus savve dat diswan hem no reason bihaenem disfala law. Hem savve dat loving Dadi blo hem lo heven expectim iumi for ting lo evriwan olsem neiba, nomata wanem race or kantri olketa kam from.—Matt. 5:​45-48.

17. Wanem gud samting nao iumi kasem taem iumi applyim principle lo Matthew 5:​43, 44 lo laef blo iumi? (Lukim tu piksa.)

¹⁷ Hao nao iumi savve applyim principle lo Matthew 5:​43, 44? Love wea iumi garem for neiba bae muvim iumi for no laek involve insaed olketa war and conflict wea happen lo world distaem. (Isa. 2:4; Mic. 4:3) Hem bae helpem iumi for kaen lo olketa wea kam from difren race, kantri, or religious baekgraon. (Acts 10:​34, 35) Hem bae helpem iumi tu for forgivim olketa wea duim nogud samting lo iumi or lo olketa wea iumi lovem.—Matt. 18:​21, 22; Mark 11:25; Luke 17:​3, 4.

DISAED STRONG FOR FOLLOWIM BIBLE PRINCIPLE

18. (a) Wat nao iumi shud disaed strong for duim? (b) Wat nao bae iumi storyim lo next article?

¹⁸ Iumi barava hapi Jehovah willing for treatim iumi olsem olketa adult and no olsem smol pikinini! Hem laekem iumi for applyim olketa Bible principle wea bae helpem iumi lo olketa disison wea iumi mekem evriday. (1 Cor. 14:20) Taem iumi mekem olketa disison hia, iumi laek disaed strong for “gohed for luksavve lo wanem Jehovah laekem.” (Eph. 5:17) Iumi mekem disison followim will blo Jehovah bikos iumi lovem hem, no bikos iumi fraetem panisment. Bat nara samting tu savve helpem iumi for mekem wise disison. Hem nao konsens blo iumi. Datwan nao wat iumi bae storyim lo next article.