Gohed Garem Stret Tingting Abaotem Hard Taem

1-2. Wat nao iumi need for duim mekem iumi gohed faithful taem iumi deal witim olketa hard taem? (Lukim tu piksa.)

HAO, iu feisim injustice, famili opposition, or persecution distaem bikos lo faith blo iu? Hao, iu deal witim problem saed lo health or old age? Or hao, iu deal witim wanfala hard taem, maet iu lusim loved wan blo iu lo dae? Olsem staka nara spesol sheepsheep blo Jehovah, laef blo iu tu maet “fulap witim trabol and pain.”—Ps. 90:10.

² For winim olketa hard taem wea kasem iumi, iumi mas garem stret tingting abaotem olketa hard taem hia. Why nao datwan important? Bikos if iumi no garem stret tingting abaotem olketa problem wea iumi feisim, olsem hao Jehovah laekem iumi for ting lo datwan, bae hem hard for iumi savve lo wat nao best samting for duim for deal witim olketa problem hia. Hem olsem wei for draevem car. If olketa window hem dirty hem bae hard for iumi lukim olketa object lo road. Bat if window hem klin, bae iumi savve lukim klia road for followim. Lo disfala article, bae iumi discussim (1) stretfala tingting wea iumi mas garem abaotem hard taem, (2) hao rong tingting abaotem situation blo iumi savve spoelem iumi, and (3) samfala samting wea iumi savve duim for gohed garem stret tingting abaotem hard taem wea iumi feisim.

STRET TINGTING ABAOTEM HARD TAEM

3. Why nao hem hard for iumi avoidim olketa problem distaem?

³ Iumi hard for avoidim olketa problem lo disfala wicked system. Iumi expectim olketa problem for affectim iumi bikos iumi no perfect, and Satan nao rulim disfala world. And tu, taem disfala system hem gogo for end, iumi bae feisim staka problem moa, maet from olketa natural or man-made disaster or from pipol wea duim olketa wicked samting. (Matt. 24:8; 2 Tim. 3:13) If Jehovah fixim evri problem hia distaem, hem bae olsem Jehovah helpem Satan for rulim disfala world. Lo disfala system iumi bae hard for misstim olketa “nogud samting.”—Eccl. 9:​12, ftn.

4. Wat nao nara reason why olketa Christian kasem hard taem?

⁴ Olketa Christian kasem hard taem bikos olketa obeyim God. Staka taem Jesus talem olketa disaepol blo hem dat pipol bae persecutim olketa bikos lo faith blo olketa. (Matt. 24:9; John 16:2) Wei for savve lo diswan savve helpem iumi for no letem olketa hard taem spoelem faith blo iumi. (1 Thess. 3:​3, 4) Taem iumi winim olketa hard taem bikos iumi garem strong faith, datwan mekem iumi sure dat iumi still followim road wea lead go for laef olowe. And tu, iumi showim dat iumi chus for worshipim Jehovah bikos hem nao best ruler, and iumi showim dat Satan hem laea. Satan laek spoelem nem blo God, hem claimim dat olketa man worshipim God bikos olketa laek for kasem reward nomoa. So hem gohed attakim pipol blo Jehovah for pruvim datwan. (Job 1:​9-11) Bat taem iumi gohed faithful bikos iumi lovem Jehovah, datwan mekem Hem hapi tumas.—Prov. 27:11.

5. Wat nao iumi savve lanem from Ecclesiastes 7:​13, 14? (Lukim tu piksa.)

⁵ Jehovah allowim hard taem for happen. No enitaem Jehovah duim wicked samting or duim nogud samting for traem iumi. (Jas. 1:13) Bat, King Solomon sei dat “day blo trabol” hem “samting wea tru God hem duim.” (Readim Ecclesiastes 7:​13, 14.) Datwan no minim Jehovah kosim nogud samting for happen, bat olketa samting hia happen bikos hem allowim for happen. Solomon storyim olketa gud advaes wea savve helpem iumi for garem stret tingting abaotem olketa hard taem wea iumi feisim. Hem remindim iumi lo tufala samting. First, iumi need for realistic dat laef blo iumi lo world blo Satan hem no perfect, samtaems iumi bae garem gud day and samtaems nogud day. Taem iumi garem gud day iumi savve showim iumi appreciatim evri gud samting wea God duim for iumi and ting lo datfala day olsem present from Hem. Mek-tu, iumi “no savve sure lo samting wea bae happen,” whether bae iumi stap gud or kasem hard taem. Olketa problem wea iumi no expectim savve kasem evriwan wea raeteous and wea no raeteous.

6. Why nao Jehovah allowim iumi for feisim olketa hard taem? (Hebrews 12:​7, 11)

⁶ If iumi garem stret tingting abaotem olketa hard taem blo iumi, bae iumi luksavve dat Jehovah teachim iumi for depend lo hem and no lo iumiseleva. Jehovah evritaem lukim olketa hard taem wea iumi kasem and hem evritaem duim samting for helpem iumi. Nomata Jehovah allowim iumi for go thru lo “valley wea dark fogud,” hem gohed for leadim iumi, hem assurem iumi dat hem lovem iumi, and hem givim strong wea iumi needim mekem iumi savve winim olketa hard taem. (Ps. 23:4) And tu, olketa hard taem savve helpem iumi for luksavve lo olketa weakness blo iumi, and for luksavve lo olketa quality wea iumi need for impruv lo hem, and then Jehovah savve helpem iumi lo datwan. (Readim Hebrews 12:​7, 11.) For example, Job need for impruv lo wei for hambol. Jehovah no kosim hard taem wea kasem Job, bat Hem allowim and iusim datwan for helpem Job lanem olketa important leson. (Job 42:​1-6) Nomata wat nao maet iumi feisim, iumi savve dat watever Jehovah allowim no savve spoelem iumi for olowe. Taem iumi no givap lo olketa hard taem wea iumi deal witim, “iumi savve winim evri samting hia.”—Rom. 8:​35-39.

7. Why nao iu savve hapi nomata taem iu kasem persecution bikos lo faith blo iu?

⁷ Iumi savve hapi taem iumi kasem persecution. If iu kasem persecution bikos lo faith blo iu, no tingse iu no kasem blessing blo Jehovah. Bat, taem iu kasem opposition datwan showim iu kasem appruvol blo Hem. (Matt. 5:​10-12) Taem iu garem datfala stret tingting, iu savve hapi taem iu kasem persecution from iu wanfala Christian, olsem olketa aposol duim lo bifor. (Acts 5:​40-42) And tu, iu maet helpem olketa wea no Witness for lanem truth and “praisem God.” (1 Pet. 2:12) Tingim Joseph, Jehovah helpem and blessim hem taem hem still lo prison, no just afta hem free finis. Jehovah savve duim sem samting for iu tu taem iu kasem hard taem.—Gen. 39:​3, 23.

8. Wat moa savve helpem iumi for no givap taem iumi feisim olketa hard taem?

⁸ Olketa hard taem wea kasem iumi bae finis. Experience blo Job remindim iumi dat olketa hard taem wea kasem iumi bae finis. Tru nao, “Jehovah blessim last part lo laef blo Job winim first part lo laef blo hem.” (Job 42:12) Lo sem wei, Jehovah promis for blessim “last part” lo laef blo iumi, wea hem nao lo niu world. Laef blo iumi distaem hem fulap witim trabol and hem short nomoa taem iumi comparem witim laef olowe wea bae iumi enjoyim lo future. Datwan muvim each wan lo iumi for no givap go kasem end!—Matt. 24:13.

HAO RONG TINGTING ABAOTEM HARD TAEM SAVVE SPOELEM IUMI

9. Hao nao wei for garem rong tingting abaotem hard taem savve spoelem iumi?

⁹ Nomata wanem hard taem iumi feisim, iumi need for garem stret tingting abaotem datwan mekem iumi savve avoidim eni problem wea savve spoelem iumiseleva. For example, iumi maet ting dat Jehovah nao kosim olketa hard taem wea kasem iumi. For lelebet taem, Job tu ting dat Jehovah nao kosim olketa problem wea kasem hem, and datfala rong tingting mekem hem trae “for pruvim dat hem nao stret and no God.” (Job 32:2) Naomi tu garem sem tingting, lo firstaem hem blamem Jehovah for olketa hard taem wea kasem hem. (Ruth 1:​13, 20, 21) If Job and Naomi no aotem datkaen tingting, maet tufala bae spoelem frenship blo tufala witim Jehovah. (Prov. 19:3) Bat, Jehovah helpem tufala for garem bak stret tingting abaotem olketa problem wea tufala kasem and hem blessim tufala bikos tufala loyal.

10. Taem iumi feisim hard taem, wat nao maet iumi start for tingim?

¹⁰ Even if iumi sure dat Jehovah no kosim olketa hard taem wea kasem iumi, maet iumi start for wonder if hem still kea abaotem iumi. Kaen negative tingting olsem savve mekem iumi wikdaon. (Prov. 24:10) King David and profet Habakkuk tu feisim hard taem and samtaems tufala no sure if Jehovah lisin lo krae blo tufala for help or nomoa. (Ps. 10:1; Hab. 1:2) Nomata olsem, tufala no stop for prea. And Jehovah assurem tufala faithful man hia dat hem sapotim tufala, and hem bae duim sem samting for iu tu.—Ps. 10:17.

11. Wat nao savve happen if iumi no garem stret tingting abaotem olketa hard taem?

¹¹ If iumi no garem stret tingting abaotem olketa hard taem, maet iumi bae seke taem iumi feisim datwan, and tingse kaen samting olsem shud no happen lo iumi. (1 Pet. 4:12) Olketa disaepol blo Jesus tu stragol for minim dat Jesus bae feisim bigfala persecution. (Luke 18:​33, 34) Nomata Jesus talem klia lo olketa finis abaotem wat bae happen lo hem, aposol Peter tingse hard for kaen nogud samting olsem happen lo Jesus. Jesus savve kaen tingting wea Peter garem bae stopem hem for duim will blo Jehovah, so hem tok strong lo Peter. (Mark 8:​31-33) And nomata afta Jesus dae, olketa disaepol blo hem no kwiktaem for minim why olketa samting hia happen lo Jesus. Nomata olsem, Jesus no givap lo olketa. Taem hem story lo olketa afta hem resurrect, hem helpem olketa for garem bak stret tingting abaotem wei wea hem safa taem hem “kliarem kam olketa Scripture lo [olketa].” (Luke 24:​25-27, 32, 44-48) Wei for ting raonem samting wea Jesus teachim lo olketa helpem olketa for redi for opposition wea olketa klosap for feisim bikos olketa followim hem. Wei for ting raonem olketa truth wea stap insaed lo Bible savve helpem iumi tu for redi for olketa hard taem.

12. Wei for garem rong tingting abaotem situation blo iumi savve mekem iumi feel hao?

¹² Wei for garem rong tingting abaotem situation blo iumi savve mekem iumi feel dat wat iumi deal witim hem tumas nao for iumi. Jesus showim wanfala wei wea diswan savve happen taem hem storyim illustration abaotem olketa wakaman wea waka lo grape planteison. Samfala lo olketa wakaman hia feel nogud bikos olketa tingse pei wea olketa kasem hem no fair, bat boss hem sei lo wanfala lo olketa: “Fren, mi no ravem iu.” (Matt. 20:​10-13) Olketa wakaman hia komplen no bikos lo unfair treatment, bat bikos olketa garem rong expectation. Samfala Witness distaem tu mas deal witim semkaen feeling, for example, taem olketa no kasem wanfala privilege or mas let go lo wanfala privilege wea olketa garem. Wat nao samfala samting wea iumi savve duim for garem stret tingting abaotem wanfala hard taem wea iumi feisim?

WAT IUMI SAVVE DUIM TAEM HARD TAEM KAMAP

13. Wat nao maet happen taem hard taem kamap?

¹³ Maet iu savve lo olketa truth lo Bible abaotem hard taem. Maet iu even sharem olketa truth hia witim olketa narawan for helpem olketa deal witim olketa hard taem wea olketa feisim. Bat, taem iu kasem hard taem, maet iu faendem hem no isi for gohed garem stret tingting abaotem datwan. For example, maet iu feel dat Jehovah hem panisim iu or hem no lisin lo olketa prea blo iu. Wat nao iu savve duim for helpem iu gohed garem stret tingting abaotem olketa hard taem?

14. Wat nao iu savve prea abaotem taem iu kasem hard taem? (Philippians 4:13)

¹⁴ Askem Jehovah for sapot blo hem. Storyim lo Jehovah olketa hard taem wea kasem iu and hao datwan affectim iu. Iu savve talem specific prea lo hao iu laekem Jehovah for helpem iu. Iu savve ask for holy spirit blo hem for givim iu strong and wisdom wea iu needim for gohed deal witim hard taem blo iu. And tingim, Jehovah savve ansarem prea blo iu lo wei wea iu no expectim. (Eph. 3:20) Maet hem savve iusim tu olketa angel or olketa brata and sista for sapotim iu. (Ps. 34:7) So nomata lo wanem wei nao Jehovah provaedem datfala help, acceptim datwan. Hem willing for givim holy spirit blo hem, and datwan savve mekem iu winim eni challenge wea iu kasem.—Readim Philippians 4:13.

15. Wat nao savve helpem iu for no givap taem iu feisim hard taem? (Lukim tu piksa.)

¹⁵ Maintainim spiritual routine blo iu. During lo olketa hard taem, maet iu no able for duim olketa spiritual samting wea iu savve duim bifor. Bat iu need for fulimap mind blo iu witim tingting blo God especially lo taem wea “trabol and hard taem” kasem iu. (Ps. 119:143) So duim wat iu fit for duim for gohed readim, studyim, and ting raonem Bible evriday. Gohed share lo ministry if iu fit for duim datwan, and attendim and participate lo olketa meeting. Spendem taem witim olketa brata and sista. And rejectim feeling for laek isolatem iuseleva.—Prov. 18:1.

16. Taem iu kasem hard taem, wat nao maet iu daotem, and hao nao iu savve kliarem olketa daot olsem? (2 Corinthians 10:​4, 5)

¹⁶ Kliarem eni daot wea iu garem. Taem iu deal witim olketa hard taem, maet iu need for aotem olketa idea “wea strong” includim olketa samting wea iu daotem abaotem iuseleva or abaotem Jehovah. (Readim 2 Corinthians 10:​4, 5.) Iu savve kliarem olketa daot olsem if iu iusim “knowledge blo God” wea stap lo Bible and olketa pablikeson wea organization blo hem provaedem. For example, hao, iu daotem dat Jehovah still appruvim iu? If olsem, studyim olketa experience blo aposol Paul. During lo ministry blo hem, hem safa lo staka nogud samting, bat datwan mekem hem for barava sure dat hem wanfala wakaman wea Jehovah and Christ appruvim. (2 Cor. 11:​23-27) Hao, iu wonder if Jehovah really forgivim iu for olketa mistek wea iu duim bifor? If olsem, raetem list blo olketa scripture wea showim dat Jehovah savve forgivim olketa sin. (Isa. 43:25) Then readim olketa verse hia and ting raonem. (Ps. 119:97) Hao, olketa hard taem wea kasem iu mekem iu for daotem promis blo God for protectim olketa faithful servant blo hem? If olsem, duim research lo subject abaotem why God letem safaring for gohed and hao hem protectim iumi lo spiritual wei nomata wanem hard taem iumi feisim. (Ps. 91:​9-12) And tu, read abaotem story blo olketa brata and sista wea gohed faithful lo olketa hard taem.a

17. Wat nao iumi shud duim taem iumi kasem hard taem?

¹⁷ Hao, distaem iu enjoyim wanfala gud day wea iu no deal witim eni hard taem? If olsem, talem thankiu lo Jehovah and iusim datfala chance for ting raonem evri gud samting wea hem duim for iu. (Eccl. 7:14) Bat taem iu kasem hard taem, gohed for garem stret tingting abaotem datwan and gohed for strongim trust blo iu lo Jehovah. Taem iu duim olsem, Jehovah bae “mekem [iu] fit for deal witim datwan and helpem [iu] for gohed strong.” (1 Cor. 10:13) Bat waswe lo olketa brata and sista blo iumi? Hao nao iumi savve helpem olketa taem olketa deal witim hard taem? Bae iumi storyim datwan lo next article.