“God blo Truth” Hem Evritaem Fulfillim Purpose blo Hem

1. Why nao iumi fit for trustim dat iumi sef from olketa wicked laea blo Satan? (Psalm 31:​2-5)

IUMI stap lo world wea Satan kontrolem, wea wei for laea and betrayim narawan hem normal samting nomoa. Hem hard for faendem eniwan wea iu fit for trustim. Staka bisnisman ravem pipol. Staka pipol wea duim advertisement laea lo kastoma blo olketa abaotem product wea olketa promotim. And samfala pipol even faendem hem no isi for trustim best fren blo olketa for keepim promis blo olketa. Bat iumi hapi tumas bikos iumi savve evritaem trustim Jehovah. Hem “God blo truth.” (Readim Psalm 31:​2-5.) Truth hem part lo personality blo hem, evri samting wea hem talem hem truth. Lo evriting wea Jehovah talem and duim, iumi fit for depend lo hem and hem reliable.

2. Wat nao bae iumi discussim lo disfala article?

² Lo disfala article, bae iumi discussim samfala reason why iumi savve trustim Jehovah witim full heart blo iumi. Then bae iumi storyim hao datfala God blo truth bae finisim wicked world blo Devil, and wat God duim distaem for fulfillim purpose blo Hem. Article hia bae helpem iumi for kamap olketa Witness blo Jehovah wea no fraet.

WHY IUMI FIT FOR TRUSTIM GOD BLO TRUTH

3. Why nao iumi fit for barava trustim Jehovah?

³ Iumi fit for trustim Jehovah bikos hem nao Creator. Hem nao Man wea Wakem skae and earth and hem Source blo evri samting wea laef. (Gen. 1:1; Ps. 36:9; Rev. 4:11) Hem tu Man wea Mekem Evriting Gohed for laef. Hem creatim olketa ecosystem wea mekem hem possible for evriting savve laef lo earth. Hem nao man wea garem full kontrol lo universe distaem and for olowe. So from hem barava wise and hem paoaful Creator, iumi fit for trustim hem for leadim iumi distaem and trustim dat hem bae givim iumi nambawan future.

4. Hao nao iumi savve Jehovah lovem iumi?

⁴ Iumi fit for trustim Jehovah bikos hem lovem iumi. Jehovah creatim iumi olketa man bikos hem laekem iumi for enjoyim laef, wea hem nambawan present from hem. Jehovah talem klia purpose blo hem taem hem sei: “Iumi wakem man lo image blo iumi, followim olketa wei blo iumi.” (Gen. 1:26) Hem givim iumi freedom for chus. Hem creatim disfala beautiful earth for iumi stap lo hem. (Ps. 115:16) And hem blessim first parents blo iumi witim exciting assignment for mekem disfala earth kamap paradaes. (Gen. 1:28; 2:15) Hem provaedem staka naes kaikai, wakem staka difren plant and animal, and staka nara samting moa, mekem tufala savve hapi and enjoyim laef. Tru nao, evri samting hia pruvim dat “loyal love blo Jehovah hem stap for olowe.”—Ps. 103:17.

5. (a) Wat nao Jehovah duim for fulfillim purpose blo hem for olketa man nomata Devil mekem Adam and Eve for disobey? (b) Wat nao samfala promis wea Jehovah fulfillim finis? (Lukim box “Olketa Pruv wea Showim God Hem Evritaem Talem Truth.”)

⁵ Iumi fit for trustim Jehovah bikos hem evritaem keepim promis blo hem. Jehovah no creatim earth “for stap nating, bat hem wakem for pipol stap lo hem.” (Isa. 45:​18, 19) Taem Adam and Eve bighed, God judgem tufala for dae. So hem luk olsem purpose blo God hem stop nao. Bat Jehovah hem Man wea Fulfillim evri promis blo hem. (Isa. 46:​10, 11) Purpose blo hem for olketa raeteous man and woman stap lo earth hem no change. Dastawe Jehovah letem Adam and Eve for garem pikinini. And Hem provaedem spesol Son blo Hem olsem ransom for sevem olketa wea kam from laen blo Adam and for givim olketa datfala nambawan hope for laef olowe.—John 3:16.

GOD BLO TRUTH FULFILLIM PURPOSE BLO HEM

6. Wat nao Jehovah talem afta Adam and Eve bighed lo Eden?

⁶ Man wea temptim Adam and Eve for bighed againstim God hem “datfala snek blo bifor, wea nem blo hem Devil and Satan.”a (Rev. 12:9; Gen. 3:​4, 5; John 8:44) Jehovah talemaot wanfala judgment againstim Satan dat lo future bae hem distroe. (Gen. 3:15) Bat bifor datwan happen, staka bae followim Satan and duim olketa nogud samting olsem hem. Nomata olsem, samfala narawan bae gohed loyal lo Jehovah.

7. Hu nao followim Devil, and wat nao bae happen lo olketa?

⁷ Olketa wea followim Satan datfala Devil hem olketa bighed angel and olketa bighed pipol. From olketa againstim, or rejectim purpose blo God, olketa mekem olketa seleva for kamap olketa pikinini blo Satan. Bat lo taem wea God markem, Satan and olketa wea followim hem bae distroe.—Dan. 2:44; Rom. 16:20.

8. Wat nao Jesus duim lo 1914? (Lukim tu piksa.)

⁸ Wat nao mekem iumi sure hao purpose blo God for finisim Satan and olketa wicked follower blo hem bae fulfill? Lo 1914, Jesus startim wanfala war againstim Satan datfala Devil and olketa demon blo hem, and hem torowem olketa kam daon lo earth. (Rev. 12:​7-9) Nomata datfala war happen lo heven, datwan affectim tu pipol wea stap lo earth. Bible sei: “Sorre tumas lo earth and lo sea bikos Devil hem kam daon lo iufala, and hem kros fogud from hem savve hem garem lelebet taem nomoa.” (Rev. 12:12) Since 1914, main goal blo Satan hem for mekem staka pipol for followim hem, and from datwan, iumi lukim staka problem hem happen lo world. Bat, klosap nao Jesus bae “winim” Satan and bae hem distroem evriwan wea sapotim Satan. (Rev. 6:2) Then lo datfala taem Jesus bae kliarem nem blo Jehovah from evri laea wea Satan talem. (Ps. 45:​4-6) Evriwan bae savve dat Jehovah hem God blo truth!—Ezek. 38:23.

World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images

GOD BLO TRUTH HIPIMAP EVRIWAN WEA LOVEM TRUTH

9. Hu nao Jehovah hipimap distaem?

⁹ Jehovah gohed for “hipimap tugeta lo Christ, evri samting lo heven and evri samting lo earth.” (Eph. 1:10) “Evri samting lo heven” hem minim olketa anointed wan wea Jehovah chusim for rul witim Christ lo heven. “Evri samting lo earth” hem minim olketa wea bae laef olowe lo Paradaes earth. Evriwan hia wea worshipim Jehovah olketa active for talemaot olketa laea blo Satan and for helpem olketa wea garem honest heart for kasem knowledge abaotem truth.

10. Hao nao Jehovah mekem pipol for free from olketa laea blo false religion? (Revelation 14:​6, 7)

¹⁰ Jehovah iusim preaching waka wea gohed raonem full world for hipimap olketa wea lovem truth. Datwan hem biggest preaching waka wea ever happen lo history. (Readim Revelation 14:​6, 7.) Nomata Jehovah iusim olketa man for talemaot disfala gud nius lo olketa narawan, olketa angel tu involve lo waka for hipimap pipol wea garem honest heart for kam insaed Christian kongregeson. Disfala witnessing waka hem exposim evri laea, wea for staka handred years Devil iusim Bigfala Babylon, wea hem evri false religion lo world, for teachim abaotem Jehovah. (Rev. 18:​2, 4) Klosap nao evri false religion bae distroe, and evriwan wea lovem God blo truth bae givim lo hem glory wea hem fit for kasem.—Rev. 17:16.

11. Hao nao bae iumi luksavve lo olketa tru worshiper blo Jehovah?

¹¹ Olketa wea lovem truth olketa kam from evri difren kaen baekgraon and from evri nation. (Rev. 7:​9, 10) Taem olketa herem datfala “gud nius” olketa luksavve wat olketa lanem hem truth and olketa hapi for joinim pipol blo Jehovah. (Mark 13:10) Distaem hem barava klia hu nao olketa wea worshipim God lo wei wea hem acceptim. Profet Malachi profesi olsem: “Iufala bae lukim moa difference between man wea raeteous and man wea wicked, and difference between man wea worshipim God and man wea no worshipim hem.” (Mal. 3:18) Olketa servant blo Jehovah showim dat olketa worshipim God blo truth thru lo wei blo olketa and preaching waka wea olketa duim.

12. Hao nao preaching waka help for accomplishim purpose blo Jehovah?

¹² Taem iumi preachim “gud nius abaotem Kingdom,” iumi obeyim komand blo Jesus and lo semtaem iumi fulfillim profesi. (Matt. 24:14; 28:​18-20) And bikos lo disfala waka, pipol evriwea lo world kamap disaepol blo Christ and garem chance for worshipim God blo truth for olowe. Hem spesol privilege for iumi share insaed disfala waka for accomplishim purpose blo Jehovah!

TRUSTIM DAT JEHOVAH BAE KEEPIM PROMIS BLO HEM

13. Hu nao main target blo Satan, and why?

¹³ Satan datfala Devil hem kros tumas bikos “hem savve hem garem lelebet taem nomoa” bifor wicked world blo hem distroe. (Rev. 12:​12, 13) Main target blo hem, hem olketa wea representim Kingdom blo God lo earth, wea hem olketa wea “obeyim olketa komandment blo God and wea duim waka for talemaot tru samting abaotem Jesus.” (Rev. 12:17; 14:12) And Satan targetim tu eniwan wea sapotim olketa and sapotim waka wea olketa duim.

14. Wat nao bae happen taem Satan attakim pipol blo Jehovah? (Lukim tu piksa.)

¹⁴ Bihaen Bigfala Babylon hem distroe, olketa wea sapotim Satan bae attakim pipol blo Jehovah. Datfala attak bae lead go for war blo Armageddon. (Rev. 16:​13, 14, 16) Jesus and army blo hem lo heven bae rescuem olketa wea worshipim Jehovah and bae distroem evriting wea left lo wicked world blo Devil. (Rev. 19:​19-21) Evri wicked pipol, evriwan wea laea and ravem narawan bae finis. (Rev. 21:8) Then evriwan bae savve dat Jehovah hem God blo truth and hem evritaem duim raeteous samting.

15. Why nao iumi savve trustim olketa promis blo Jehovah for future? (Isaiah 65:​16, 17) (Lukim tu piksa.)

¹⁵ Distaem world hem divaed winim enitaem bifor. Bat witim help blo Jehovah, olketa servant blo hem gohed for wan mind. Waka for hipimap pipol still gohed distaem. No eni samting savve stopem Jehovah for blessim pipol blo hem and waka wea olketa duim. (Readim Isaiah 65:​16, 17.) Iumi barava sure olketa promis blo hem bae kamap tru. Toktok blo aposol Paul wea stap lo Romans 8:​38, 39 hem assurem iumi olsem: “Dae or laef or olketa angel or olketa gavman or olketa samting wea stap distaem or wea bae kamap bihaen or eni paoa or eniting antap or eniting lo daon or eni nara creation, bae no savve separatem love blo God from iumi, wea iumi kasem thru lo Lord blo iumi, Christ Jesus.”

16. Why nao iu trustim Jehovah witim full heart blo iu?

¹⁶ Iumi garem evri reason for trustim Jehovah, datfala God blo truth. Hem Creator blo iumi. Hem barava lovem iumi. And hem gohed for hipimap staka maka staka pipol from evri nation for kam and worshipim hem. (Isa. 60:22; Zech. 8:23) Iumi savve dat hem evritaem fulfillim purpose blo hem, and klosap nao bae hem finisim Satan mekem hem no laea moa lo pipol. Iumi tu prea olsem David wea sei: “Jehovah God . . . mas kasem praise, hem nomoa duim olketa nambawan samting. Nambawan nem blo hem bae kasem praise for olowe, and glory blo hem bae fulap lo earth.”—Ps. 72:​18, 19.