Kwestin From Reader

Wat taem nao olketa nation bae announcem “peace and security”?

Olsem iumi storyim lo “Kwestin From Reader” lo recent issue blo Wastaoa magasin,a klosap nao Jehovah bae putim insaed tingting blo “tenfala horn” (evri gavman) “samting wea hem laekem,” wea hem nao for olketa givim paoa and authority blo olketa lo “wild animal wea kala blo hem red,” wea hem United Nations. Bible kolem tu disfala wild animal lo “image blo datfala first wild animal.” (Rev. 13:​14, 15; 17:​3, 16, 17) Then datfala “tenfala horn” and wild animal wea just kasem paoa, bae finisim evri false religion raonem world. Hao, bae olketa nation announcem “peace and security”b bifor or afta false religion hem distroe?—1 Thess. 5:3.

For tok stret, iumi no really savve lo wat taem lo future nao datfala announcement abaotem “peace and security” bae kamap. If iumi savve lo evri detail abaotem datwan, maet iumi bae no need for gohed alert and lukaot. Bat, Jesus gohed repeatim lo olketa follower blo hem for “gohed for lukaot.” (Matt. 24:42; 25:13; 26:41) Distaem bae iumi story raonem datfala profesi wea Jehovah iusim aposol Paul for raetem lo leta blo hem for olketa Christian lo Thessalonica.

Paul raet olsem: “Lo taem wea olketa sei: ‘Iumi garem peace and security nao!’ then seknomoa trabol bae wantaem kasem olketa.” (1 Thess. 5:​2, 3) Staka taem olketa pablikeson blo iumi explainim wat Paul talem lo wei olsem: Announcement abaotem “peace and security” bae kamap just bifor bigfala trabol hem start. Bigfala trabol bae start taem Bigfala Babylon, wea hem evri false religion lo world, hem distroe. Lo bifor iumi sei tu dat disfala announcement wea olketa bae talem lo future, hem nao final saen wea showim bigfala trabol bae start.

Bat, afta samfala deep study moa abaotem diswan, luk olsem nara explanation for diswan hem stap tu. Maet disfala announcement abaotem “peace and security” bae kamap afta false religion hem distroe. Why nao iumi talem olsem? Lukim olketa reason hia.

Hao nao false religion involve insaed olketa war between olketa nation? Bible explainim olsem: “Blood blo . . . evriwan wea olketa killim dae lo earth, hem stap lo datfala taon [“datfala paoaful jury woman,” Bigfala Babylon].” (Rev. 17:​1, 5; 18:24) Thru aot lo history, disfala paoaful jury woman promotim olketa war between olketa nation and staka taem hem nao kosim and mekem terrorism kamap worse. So hem nao bihaenem olketa war and conflict, and no peace and security. Diswan mekem disfala kwestin for kamap: Hao, olketa nation bae talemaot “peace and security” only afta olketa finisim Bigfala Babylon? Maet hem bae happen olsem, bat iumi no really sure.

Wat nao bae happen afta olketa talemaot “peace and security”? Paul sei: “Then seknomoa trabol bae wantaem kasem olketa.” (1 Thess. 5:3) English study note for disfala verse hem sei: “Lo hia Paul storyim dat taeming between datfala announcement blo ‘peace and security’ and destruction blo olketa wea announcem datwan, bae hem short nomoa or hem stretawe happen. Datwan bae happen kwiktaem nomoa and no eniwan fit for ranawe from.” If olketa politikol paoa lo world announcem “peace and security” afta false religion hem distroe, then destruction blo evri nation hia bae seknomoa happen.

Wat nao pipol blo Jehovah bae duim taem olketa lukim olketa event hia hem fulfill? Paul sei: “Olketa brata, iufala no stap lo darkness. Man wea stap lo darkness bae seke lo datfala day, olsem man for steal bae seke taem daylaet kasem hem.” (1 Thess. 5:4) Tingim: If datfala announcement abaotem “peace and security” hem kamap afta false religion hem distroe, then pipol blo Jehovah bae savve dat destruction blo olketa nation hia hem barava klosap. Bat, for olketa nation, destruction blo olketa bae kam olsem wanfala man for steal, hem bae seknomoa happen and olketa bae no expectim.

So, wat nao iumi expectim? Klosap nao “tenfala horn” and datfala wild animal wea olketa givim paoa lo hem bae distroem false religion. Diswan bae hem start blo bigfala trabol. And iumi savve tu dat enitaem nomoa, olketa nation bae talemaot “peace and security.” Wat taem nao bae datwan happen? Iumi storyim tufala possibility. Wan: Bae olketa mekem datfala announcement bifor false religion hem distroe. Mek-tu: Bae olketa mekem datfala announcement afta olketa distroem false religion. Iumi mas weit for lukim wat nao bae happen. Staka taem iumi savve minim gud olketa Bible profesi taem olketa gohed fulfill or afta hem fulfill finis.—Comparem John 12:16.

Distaem, samting wea barava important, hem no taeming blo datfala announcement abaotem “peace and security,” bat hem wei wea iumi gohed faithful lo God. Iumi mas “gohed wekap and garem gudfala tingting,” mekem iumi barava redi gud nomata hao olketa event hia bae happen.—1 Thess. 5:6.