Pikinini Hem “Present From Jehovah”

HAO, enitaem eniwan givim iu wanfala present wea barava spesol lo iu? Maet samwan wea iu lovem tumas nao givim datfala present lo iu. Wat nao bae iu duim witim datfala present? For sure iu bae barava lukaftarem gud.

Bible sei pikinini hem “present from Jehovah.” (Ps. 127:3) For sure, Christian parents ting lo pikinini blo olketa olsem spesol present from Dadi blo olketa lo heven, and laek for duim evriting wea olketa fit for duim for protectim pikinini and lukaftarem olketa gud saed lo physical, emotional, and spiritual wei.

Bat sorre samting, samfala parents distaem no ting lo pikinini blo olketa olsem present from God. (Isa. 49:15; 2 Tim. 3:​1-3) Olketa narawan laek for lukaftarem gud pikinini blo olketa bat olketa stragol for duim datwan bikos lo olketa difren challenge. Wat nao samfala lo olketa challenge hia wea mekem hem no isi for parents lukaftarem pikinini? Wat nao Jehovah expectim from parents? And hao nao Christian parents savve succeed for lukaftarem pikinini blo olketa?

OLKETA CHALLENGE

• Pressure from community and famili. Lo samfala ples lo world, parents wea garem staka pikinini kasem moa respect from pipol lo community. So, olketa couple savve kasem pressure from famili or neiba blo olketa for garem staka pikinini, maet winim nao wat tufala fit for duim for lukaftarem olketa.

• Wari abaotem future. Lo olketa kantri wea staka baby savve dae bikos lo malnutrition, disease, and poor health service, samfala couple garem staka pikinini mekem at least samfala pikinini savve laef kasem taem olketa adult. Olketa nara couple maet chus for garem staka pikinini mekem olketa pikinini savve lukaftarem olketa taem olketa olo. Diswan hem tru especially lo olketa kantri wea gavman no provaedem help for olketa olo.

• Famili planning. Lo olketa nara ples, samfala couple no garem staka option for birth kontrol. Olketa narawan fraetem saed effect blo olketa low quality contraceptive wea available lo ples blo olketa. Bat olketa narawan no fit for peim olketa birth kontrol hia bikos hem expensive tumas.a

WAT NAO JEHOVAH EXPECTIM FROM PARENTS?

Provaedem olketa need blo pikinini blo iu. Jehovah givim responsibility lo parents for provaedem material need blo pikinini kasem taem olketa adult. Jehovah expectim parents for willing for waka hard for provaedem kaikai, kaleko, and ples for stap for each pikinini. Jehovah expectim tu parents for educatim pikinini blo olketa. So Christian parents bae no just sendem pikinini go lo boarding skul or for stap lo difren ples for skul. Bat, tufala bae mek sure pikinini stap lo haos go kasem taem hem growap, mekem tufala savve teachim pikinini olketa iusful skill, and tu for spendem taem witim each pikinini, wea datwan mekem pikinini feel sef, and feelim love blo parents. Nomata olsem, Jehovah hem reasonable. Hem no expectim parents for garem staka selen. Tingim, Jehovah chusim parents wea waka hard nomata tufala poor, for lukaftarem spesol Son blo hem.—Matt. 13:​55, 56; Luke 2:24.

Bible principle: “Tru tumas, sapos eniwan no provaed for famili blo hem, and especially for olketa wea stap lo haos blo hem, datwan showim hem no garem faith and hem worse winim man wea no garem faith.”—1 Tim. 5:8.

Jehovah luksavve dat taem parents gogo for olo maet tufala bae needim practical help. Hem tru, wanfala wei wea pikinini savve honorim parents nao hem for mek sure parents kasem help wea olketa needim taem olketa olo. (Ex. 20:12; 1 Tim. 5:4) Bat, Jehovah hem hapi taem hem lukim main samting wea parents tingim hem hao tufala bae lukaftarem pikinini and no hao pikinini bae lukaftarem tufala.—2 Cor. 12:14.

Provaed lo spiritual wei. Christian parents garem tu responsibility for trainim pikinini for lovem and worshipim Jehovah. Lo tingting blo Jehovah, datwan hem most important samting wea parents mas duim for pikinini.—Deut. 6:​6, 7.

Bible principle: “Lukaftarem [pikinini blo iu] lo wei for givim discipline and training wea kam from Jehovah.”—Eph. 6:4.

JEHOVAH LAEKEM IU FOR SUCCEED

Garem plan. If iu tingting for garem pikinini, ting raonem gud situation blo iu. For example, hao, bae iu fit for provaedem kaikai, kaleko, and educatim staka pikinini? If nomoa, story witim marit partner blo iu for iutufala savve disaed if iutufala bae garem staka pikinini or nomoa, mekem iutufala savve lukaftarem pikinini followim hao Jehovah expectim iutufala for duim. Hem tru, Jehovah savve dat samting wea man no expectim savve happen lo laef. (Eccl. 9:11) Bat hem bae blessim wei wea iu waka hard for kamap parents wea Hem appruvim.

Bible principle: “Olketa plan blo man wea waka hard bae succeed, bat evriwan wea kwiktaem duim samting bat no tingting firstaem bae poor.”—Prov. 21:5.

“Hu lo iufala wea laek for wakem wanfala taoa bae hem no sidaon firstaem, and calculatem haomas selen nao hem needim, for savve sapos hem garem inaf selen for finisim datwan?”—Luke 14:28.

Putim Jehovah first insaed famili blo iu. Mekem worship for Jehovah kamap main samting insaed famili blo iu. If iu garem pikinini finis, duim best blo iu for teachim each wan lo olketa for lovem Jehovah. Helpem olketa for concentrate and lanem samting lo olketa kongregeson meeting. No misstim Famili Worship evri week. Trainim pikinini blo iu lo ministry. No givim responsibility wea iu garem olsem parents lo olketa pikinini blo iu wea big finis or lo olketa nara relative. For teachim pikinini for lovem Jehovah hem needim taem and effort, bat bae iu kasem big reward.

Bible principle: “No eni samting hem winim hapi wea mi kasem taem mi herem olketa pikinini blo mi gohed wakabaot followim truth.”—3 John 4.b

Trustim Jehovah. If iu tingting for garem pikinini or iu garem pikinini finis, trustim dat olketa standard blo Jehovah hem moa important winim eni culture or kastom blo iu.

If iu chus for no garem staka pikinini, trustim dat Jehovah bae still provaed for iu taem iu olo. Rejectim eni pressure for garem tingting dat pikinini blo iu nao mas provaedem evriting wea iu laekem taem iu olo. Iu no need for wari dat no eniwan bae lukaftarem iu. Jehovah promis for lukaftarem iu, and hem evritaem keepim olketa promis blo hem.—Josh. 23:14.

Bible principle: “Trustim Jehovah lo full heart blo iu, and no depend lo savve blo iuseleva. Tingim hem lo evri samting wea iu duim, and hem bae showim iu stretfala road.”—Prov. 3:​5, 6.

“Bifor tu mi young and distaem mi olo nao, bat no enitaem mi lukim God lusim eniwan wea raeteous, or pikinini blo hem no garem kaikai.”—Ps. 37:25.

“So gohed putim Kingdom and olketa raeteous standard blo hem first lo laef blo iufala, and evri nara samting hia bae hem provaedem for iufala.”—Matt. 6:33.

Pikinini hem spesol present wea Jehovah givim for parents. Jehovah mas barava hapi taem hem lukim olketa Christian couple lukaftarem pikinini followim hao Hem laekem! Olketa lovem pikinini and provaedem physical, emotional, and spiritual need blo olketa, olketa planim hao many pikinini for garem, and olketa faithful for followim wat God expectim from olketa winim for followim culture or kastom blo olketa. Taem olketa Christian couple duim olsem, datwan showim olketa ting lo pikinini blo olketa olsem wanfala spesol “present from Jehovah.”