Obadiah—Mekem Grow Wei for Fraet lo God

Obadiah hem man wea luk aftarem haos blo wicked King Ahab, datfala ruler wea letem Baal worship for fulap lo datfala land. Nomata olsem, Obadiah mekem grow wei for fraet lo Jehovah “start from taem hem young yet.” (1 Ki. 18:​1-13) So taem Queen Jezebel givim order for olketa killim dae evri profet blo Jehovah, Obadiah savve hem mas garem courage for duim samting mekem datfala nogud samting no happen. For haedem just wanfala profet hem barava danger, bat, Obadiah haedem 100 profet and hem supplyim kaikai for olketa lo taem blo bigfala hangere! Imaginim hao hem mas barava hard tumas for duim datwan lo wei wea haed from staka handred false profet wea servem datfala king and queen.—1 Ki. 18:19.

Wat nao iumi savve lanem from disfala man wea fraet lo God? Nomata Obadiah hem fraetem Ahab, wei wea hem fraet lo God nao hem winim datwan. Datwan mekem hem garem courage for putim laef blo hem lo danger for protectim olketa brata blo hem. If olketa banim tru worship lo ples wea iumi stap, iumi tu need for mekem grow wei for fraet lo God. Disfala wei for fraet bae strongim iumi for sapotim olketa brata and sista blo iumi wea insaed olketa hard situation.