Why Iumi Needim Ransom

1-2. Why nao iumi needim samwan for rescuem iumi? (Romans 7:​22-24) (Lukim tu piksa.)

IMAGINIM disfala situation. Wanfala building hem foldaon and wanfala man trap insaed. Man hia laef bat hem no savve muv, only samting wea hem fit for duim hem for singaot for help and hope dat samwan bae kam for rescuem hem.

² Each wan lo iumi insaed sem situation. Lo wanem wei? Taem Adam bighed againstim Creator blo hem, hem kamap wanfala sinner. Then bihaen, hem pasim datfala sin lo olketa pikinini blo hem. From datwan, iumi evriwan trap insaed lo sin wea iumi inheritim from Adam, and hard for iumiseleva go aot from nogud samting wea kamaot from datwan. Aposol Paul hem storyim klia wei wea iumi sin lo leta blo hem for olketa Christian lo Rome. (Readim Romans 7:​22-24.) Hem ask, “Hu nao bae sevem mi from disfala body wea leadim mi go for dae?” Paul trap insaed lo sin wea iumi kasem from Adam, wea datwan lead go for dae. (Rom. 6:23) Iumi insaed lo datfala sem hard situation. So iumi tu needim samwan for rescuem iumi!

3. Lo olketa wanem wei nao ransom savve rescuem iumi?

³ Bihaen Paul story abaotem sin, hem story tu abaotem samting wea givim iumi hope. Afta hem ask olsem: “Hu nao bae sevem mi from disfala body wea leadim mi go for dae?” hem sei: “Mi thankiu lo God wea hem sevem mi thru lo Lord blo iumi, Jesus Christ!” (Rom. 7:25) Lo hia Paul storyim ransom sakrifaesa wea Jesus offerim. Thru lo ransom, iumi savve (1) kasem forgiveness for olketa sin blo iumi, (2) free from sin wea iumi inheritim from Adam, and (3) reconcile witim Creator blo iumi. Taem iumi storyim olketa samting hia, datwan bae mekem grow love blo iumi for Jehovah, datfala “God wea givim hope.” (Rom. 15:13) And iumi bae mekem grow tu wei wea iumi tinghae lo Jesus, “wea bikos lo hem iumi kamap free thru lo ransom.”—Col. 1:14.

RANSOM MEKEM IUMI KASEM FORGIVENESS FOR OLKETA SIN BLO IUMI

4-5. Why nao iumi evriwan needim ransom? (Ecclesiastes 7:20)

⁴ Iumi needim ransom mekem iumi savve kasem forgiveness for olketa sin blo iumi. Evri man wea no perfect olketa duim sin, lo toktok or wat olketa duim. (Readim Ecclesiastes 7:20.) Samfala sin hem barava serious. For example, eniwan wea duim olketa sin olsem adultery and murder, anda lo Law blo Moses hem mas dae. (Lev. 20:10; Num. 35:​30, 31) Staka sin no serious olsem, bat nomata hem no serious datwan hem still sin. For example, David wea raetem psalm hem sei: “Bae mi lukluk gud lo olketa step blo mi mekem mi no sin lo wanem mi talem.” (Ps. 39:1) Yes, samfala taem iumi savve sin lo toktok blo iumi.—Jas. 3:2.

⁵ Ting abaotem wat iu bin talem and duim. Hao, iu talem eniting lo olketa narawan wea iu wish nomoa iu shud no talem? Hao, iu duim eni mistek wea iu regretim? For sure, ansa blo iu for tufala kwestin hia hem yes. Bible sei: “Sapos iumi sei, ‘Iumi no garem sin,’ iumi laea lo iumiseleva and truth hem no stap insaed lo iumi.”—1 John 1:8.

6-7. Wat nao mekem Jehovah fit for forgivim olketa sin blo iumi? (Lukim tu piksa.)

⁶ Ransom provaedem basis for Jehovah savve forgivim olketa sin blo iumi. (Eph. 1:7) Nomata olsem, diswan no minim Jehovah ting smol lo olketa sin blo iumi, and no kea lo wat iumi duim. Jehovah no hapi taem iumi duim sin. (Isa. 59:2) Bikos lo perfect justice blo Hem, wanfala basis mas stap for man kasem forgiveness.

⁷ Law blo Moses sei olketa Israelite mas offerim olketa animal sakrifaes for kavarem olketa sin blo olketa. (Lev. 4:​27-31; 17:11) Olketa sakrifaes hia hem shadow blo bigfala sakrifaes blo Jesus and olketa blessing wea kamaot from datwan. Sakrifaes blo hem provaedem wanfala legal basis for Jehovah forgivim olketa sin blo iumi. Paul understandim value blo sakrifaes blo Jesus, and datwan showaot lo wat hem raetem for olketa Christian lo Corinth. Bihaen hem storyim olketa nogud samting wea olketa duim bifor, hem sei lo olketa: “Distaem iufala kamap klin, kamap holy, and kamap raeteous lo nem blo Lord blo iumi Jesus Christ and witim spirit blo God blo iumi.”—1 Cor. 6:​9-11.

8. Wat nao iu savve ting raonem taem iu prepare for attendim Memorial dis year?

⁸ Taem iu gohed prepare for attendim Memorial dis year, ting raonem gud samting iu kasem from forgiveness blo Jehovah. For example, bikos lo ransom, iu no need for feel guilty moa for olketa sin wea iu duim bifor and iu repent finis from. Hao if iu faendem hem no isi for bilivim dat Jehovah forgivim iu? Maet iu ting olsem, ‘Mi understandim dat Jehovah savve forgive, bat hem no isi for mi forgivim miseleva.’ If iu feel olsem, tingim diswan: Jehovah nao hem man wea forgive, and hem givim authority lo Son blo hem for judge. Jehovah no givim lo iu or eni nara man waka for disaedem hu nao bae kasem or no kasem mercy blo Hem. Bible sei: “Sapos iumi wakabaot lo laet olsem God tu hem wakabaot lo laet, . . . blood blo Son blo hem, Jesus, hem mekem iumi klin from evri sin blo iumi.” (1 John 1:​6, 7) Iumi savve trustim datwan olsem iumi trustim tu olketa nara Bible teaching. Ransom hem givim legal basis for Jehovah savve showim mercy lo iumi, and Word blo hem sei hem “redi for forgive.”—Ps. 86:5.

RANSOM MEKEM IUMI FREE FROM SIN

9. Sin hem minim wei for duim rong samting, bat wat moa nara mining blo hem? (Psalm 51:5 and footnote)

⁹ Lo Bible, word “sin” hem no just minim wanfala akson wea man duim bat hem minim tu imperfection wea man garem, wea hem inheritim taem hem form lo bele blo mami blo hem. (Readim Psalm 51:5 and footnote.) Disfala wei for imperfect hem no mekem man for duim rong samting nomoa, bat hem mekem body blo man tu for no function gud and datwan mekem man savve sik, olo, and dae. Diswan helpem iumi for minim why olketa baby wea no duim eni sin olketa savve sik and dae. And hem helpem iumi tu for minim why nogud pipol and gud pipol olketa safa and dae. Evriwan wea born from laen blo Adam olketa inheritim datfala sin wea mekem olketa no perfect.

10. Hao nao sin affectim Adam and Eve?

¹⁰ Tingim hao sin affectim first couple. Hem barava affectim hao tufala feel. Afta Adam and Eve disobeyim Jehovah, stretawe tufala experiencem nogud samting wea kamaot from tufala brekem law blo God, wea hem ‘law wea God raetem insaed heart’ blo tufala. (Rom. 2:15) Tufala savve feelim dat samting hem no stret. Tufala feel dat tufala mas kavarem samfala part lo body blo tufala and haed olsem criminal from Creator blo tufala. (Gen. 3:​7, 8) Hem firstaem lo laef blo Adam and Eve for feel guilty, wari, no feel sef, feel pain, and shame. And tufala mas deal witim olketa feeling hia go kasem taem tufala dae.—Gen. 3:​16-19.

11. From iumi no perfect, hao nao datwan affectim iumi?

¹¹ Wei wea iumi no perfect hem affectim iumi tu olsem datfala first couple. Rut kos blo physical and emotional pain wea iumi kasem hem wei wea iumi no perfect. Nomata iumi trae for impruvim situation blo iumi, hard for iumi solvem evri samting seleva. Why? Bikos olsem Bible talem, iumi “hard waka nating nomoa.” (Rom. 8:20) Iumiseleva experiencem datwan, and nomata evri man waka tugeta olketa no savve succeed tu. For example, tingim olketa samting wea olketa man trae for duim for lukaftarem environment, kontrolem crime, finisim wei for poor, and for mekem peace kamap between olketa nation. Nomata wat olketa duim hem mekem samfala impruvment, olketa no savve solvem olketa problem hia. Hao nao ransom savve rescuem iumi from sin?

12. Wanem hope nao ransom provaedem?

¹² Ransom provaedem hope dat “creation . . . bae kamap free from body wea savve rotten.” (Rom. 8:21) Lo niu world blo God taem iumi kamap perfect bikos lo datfala ransom, iumi bae no safa moa saed lo physical, mentol, or emotional. And bae iumi free from wei for feel guilty, wari, no feel sef, pain, or shame. And tu, effort blo iumi for lukaftarem earth and for stap lo peace, wea iumi waka hard for hem distaem bae succeed anda lo rul blo man wea peim datfala ransom, wea hem nao datfala “Prince blo Peace,” Jesus Christ.—Isa. 9:​6, 7.

13. Wat moa iu savve ting raonem taem iu prepare for attendim Memorial dis year?

¹³ Imaginim hao nao bae laef blo iu taem iu free from sin and kamap perfect. Iu wekap each morning and iu feel gud, iu no need for wari sapos iu or olketa loved wans blo iu bae hangere, sik, or dae. Nomata olsem, iu savve kasem peace distaem taem iu “hol strong lo datfala hope . . . wea hem olsem wanfala anka for laef blo iumi wea hem strong and stedy.” (Heb. 6:​18, 19) Lo sem wei wea anka savve mekem boat for stedy, Christian hope blo iu savve mekem faith blo iu stedy and helpem iu for no givap lo eni hard taem wea iu feisim distaem. Tru nao, iu savve sure dat Jehovah bae “givim reward lo olketa wea barava lukaotem hem.” (Heb. 11:6) Comfort wea iu kasem distaem and hope wea iu garem for future hem possible only bikos lo datfala ransom.

RANSOM MEKEM IUMI RECONCILE WITIM GOD

14. Hao nao sin affectim relationship blo iumi witim Creator blo iumi, and why?

¹⁴ Start from taem Adam and Eve sin, iumi olketa man stap farawe or separate from God. Bible sei evri man olketa enemy witim Creator. (Rom. 8:​7, 8; Col. 1:21) Why? Bikos lo perfect standard blo Jehovah hem no acceptim sin. Bible sei olsem abaotem Jehovah: “Eye blo iu hem klin tumas, and bae iu no luk lo samting wea nogud, and hard tumas for iu letem wicked fasin for gohed.” (Hab. 1:13) So sin hem creatim wanfala big gap between God and olketa man. If no eni bridge akrosim datfala gap, hard tumas for iumi fren gud witim Jehovah and reconcile witim hem. Bat datfala ransom hem olsem bridge wea mekem hem possible for iumi reconcile witim hem.

15. Hao nao ransom savve mekem iumi fren bak witim Jehovah?

¹⁵ Bible sei Jesus offerim “sakrifaes for sin blo iumi wea mekem iumi savve fren bak witim God.” (1 John 2:2) Hao nao sakrifaes blo Jesus mekem iumi olketa man savve fren bak witim Jehovah? Dae blo Jesus givim wanfala basis for perfect God blo iumi savve fren klos moa witim olketa man, wea datwan followim justice blo hem. (Rom. 3:​23-26) And Hem savve ting lo olketa wea faithful for worshipim Hem olsem olketa raeteous even bifor Christ hem dae. (Gen. 15:​1, 6) Hao nao olsem? Bikos lo datfala ransom. Jehovah barava sure dat Son blo hem, Jesus, bae peim datfala ransom. (Isa. 46:10) Datfala ransom openem wei for man savve reconcile witim God.

16. Wat moa nara samting wea iu savve ting raonem taem iu prepare for attendim Memorial dis year? (Lukim tu piksa.)

¹⁶ Ting raonem gud samting wea iu kasem from wei wea iu reconcile witim God. For example, maet iu kolem Jehovah lo “Dadi” blo iu olsem Jesus teachim iumi. (Matt. 6:9) And samtaems, maet iu kolem Jehovah lo “Fren” blo iu. Taem iumi iusim olketa toktok olsem “Dadi” or “Fren,” iumi shud duim datwan witim bigfala respect and hambol. Why? Bikos wei wea iumi sin mekem iumi no fit for duim samting seleva for fren witim Jehovah. Bat ransom nomoa mekem iumi fit for fren gud witim Jehovah. Thru lo Jesus, Jehovah mekem hem possible for “evri nara samting for fren bak witim Hem, mekem peace hem stap . . . thru lo blood blo [Jesus] wea kapsaet lo post.” (Col. 1:​19, 20) Dastawe iumi savve enjoyim wei for fren gud witim Jehovah distaem, nomata iumi no perfect.

RANSOM SHOWIM MERCY BLO JEHOVAH

17. Hao nao ransom pruvim mercy blo Jehovah? (Ephesians 2:​4, 5)

¹⁷ Ransom pruvim dat Jehovah hem “garem bigfala mercy.” Hem “mekem iumi laef . . . nomata hem olsem iumi dae finis bikos lo olketa sin blo iumi.” (Readim Ephesians 2:​4, 5.) Olketa wea “showim dat olketa laekem laef olowe” olketa singaot for help, from olketa luksavve olketa trap lo sin wea olketa inheritim and olketa needim samwan for rescuem olketa. (Acts 13:48) Jehovah duim samting for helpem olketa thru lo disfala Kingdom message, mekem olketa savve lane abaotem hem and Son blo hem, Jesus. (John 17:3) If Satan tingse wei wea Adam and Eve bighed hem stopem purpose blo God, wat hem tingim hem no tru.

18. Taem iumi gohed for meditate lo datfala ransom, wat nao iumi shud tingim?

¹⁸ Taem iumi gohed for meditate lo olketa gud samting wea iumi kasem thru lo ransom, iumi need for tingim main reason why Jehovah provaedem datwan. Hem givim datfala ransom no for sevem iumi nomoa, bat for duim tu wanfala samting wea moa important, hem nao for ansarem kwestin wea Satan askem lo garden blo Eden. (Gen. 3:​1-5, 15) Thru lo ransom, Jehovah mekem nem blo hem for holy, and for pruvim evriting wea Satan talem abaotem Hem, hem no tru. Hem sevem iumi tu from sin and dae, wea datwan showim hem God blo love. And bikos lo undeserved kaeness blo Jehovah, nomata iumi no perfect, hem letem iumi for share for pruvim wat Satan talem hem no tru. (Prov. 27:11) Hao nao iu savve showim dat iu appreciatim ransom? Iumi bae storyim datfala kwestin lo next article.