Iu Savve Winim Olketa Negative Feeling

1-2. Hao nao aposol Paul feel samtaems, and lo wanem wei nao maet iumi semsem witim hem? (Romans 7:​21-24)

WAT NAO kam lo mind blo iu taem iu tingim aposol Paul? Hao, iu tingim hem wanfala missionary wea no fraet, man wea savve tumas hao for teach, or man wea raetem staka buk lo Bible? Evriting hia hem stret. Nomata olsem, samfala taem hem sorre, discourage, or wari. Olsem staka lo iumi, samfala taem Paul faet againstim olketa negative feeling tu.

² Readim Romans 7:​21-24. Lo leta blo Paul for olketa Christian lo Rome, Paul storyim olketa feeling blo hem wea staka lo iumi tu savve experiencem. Nomata hem wanfala faithful Christian, hem tu stragol witim feeling for laek duim will blo God and feeling blo hemseleva for laek duim rong samting. And samfala taem hem stragol tu witim olketa negative feeling wea hem garem, bikos lo olketa nogud samting wea hem duim bifor, and bikos lo wanfala problem wea hem gohed feisim.

3. Wat nao bae iumi storyim lo disfala article? (Lukim tu “Mining blo Wanfala Toktok.”)

³ Nomata Paul stragol witim olketa negative feelinga wea hem garem, hem no letem datwan for kontrolem tingting blo hem. Lo disfala article bae iumi storyim olketa kwestin hia: Wat nao kosim Paul for feel “sorre” samfala taem? Hao nao Paul deal witim olketa negative feeling? And hao nao iumi savve winim olketa negative feeling blo iumi?

WAT NAO KOSIM PAUL FOR GAREM OLKETA NEGATIVE FEELING?

4. Wat nao kosim Paul for garem olketa negative feeling?

⁴ Olketa samting wea hem duim bifor. Bifor Paul, wea lo firstaem hem Saul, kamap wanfala Christian, hem duim olketa samting wea hem regretim bihaen. For example, hem agree and standap and lukim taem olketa sutim dae faithful man Stephen. (Acts 7:58; 8:1) And tu, Saul hem lead lo wei for barava persecutim nogud olketa Christian.—Acts 8:3; 26:​9-11.

5. Hao nao olketa samting wea Paul duim bifor affectim hem?

⁵ Afta aposol Paul kamap Christian, samtaems hem guilty lo olketa samting wea hem duim bifor. Olketa samting wea hem duim for persecutim olketa Christian maet affectim hem nomata staka year go pas. For example, taem hem raetem first leta blo hem for olketa Corinthian lo samting olsem 55 C.E., hem sei: “Mi no fit for olketa kolem mi wanfala aposol, from mi persecutim kongregeson blo God.” (1 Cor. 15:9) Then samting olsem faev years afta, lo leta blo hem for olketa Ephesian, hem describem hemseleva olsem “lalas wan lo evri holy wan.” (Eph. 3:8) And taem hem raetem leta for Timothy, hem sei lo bifor hem man for ‘tok spoelem God, and persecutim pipol blo hem, and nating respectim narawan.’ (1 Tim. 1:13) Imaginim hao nao Paul mas feel taem hem visitim wanfala kongregeson and hem meetim olketa wea hem persecutim or famili member blo olketa wea hem persecutim lo bifor?

6. Wat nao nara samting wea kosim Paul for barava wari? (Lukim tu footnote.)

⁶ Wanfala nila lo body. Paul comparem samting wea kosim hem for barava wari olsem “wanfala nila hem pokem body” blo hem. (2 Cor. 12:7) Aposol Paul no storyim wat nao kosim datwan, bat word piksa wea hem iusim showim maet datwan hem wanfala physical problem, emotional problem, or maet nara samting wea kosim pain lo body blo hem.b

7. Hao nao olketa wik point blo Paul affectim hem? (Romans 7:​18, 19)

⁷ Olketa wik point blo hem. Paul stragol for winim olketa wik point blo hem. (Readim Romans 7:​18, 19.) Nomata hem laek for duim stret samting, wei wea hem no perfect mekem hem no isi for duim datwan. Hem storyim dat hem mas gohed for faet againstim olketa samting wea body laekem and duim stret samting. Nomata olsem, Paul waka hard for duim stret samting. (1 Cor. 9:27) Masbi hem barava discourage taem olketa wik point blo hem kamap moa!

HAO PAUL DEAL WITIM OLKETA NEGATIVE FEELING

8. Wat nao olketa leta blo Paul showim abaotem hao hem deal witim olketa wik point blo hem?

⁸ Olsem Paul raetem lo olketa leta blo hem, hem storyim hao holy spirit blo God helpem hem and olketa brata and sista for faet and fit for winim olketa wik point blo olketa. (Rom. 8:13; Gal. 5:​16, 17) Staka taem Paul storyim olketa samting wea man laekem and duim wea olketa Christian shud stap klia lo hem. (Gal. 5:​19-21, 26) For sure, Paul ting raonem olketa wik point blo hem, lukaotem advaes from olketa Scripture, and ting raonem wat hem need for duim for deal witim olketa wik point blo hem. Iumi savve sure dat hemseleva applyim olketa advaes wea hem givim lo olketa narawan.

9-10. Wat nao helpem Paul for faet againstim olketa negative feeling? (Ephesians 1:7) (Lukim tu piksa.)

⁹ Nomata samfala taem Paul feel discourage, hem gohed for garem positive tingting. For example, hem hapi taem hem kasem olketa gud report from olketa narawan wea travel witim hem. (2 Cor. 7:​6, 7) Hem kasem hapi taem hem fren gud witim olketa nara brata and sista. (2 Tim. 1:4) And hem savve dat Jehovah appruvim hem. Yes, Paul hapi bikos hem savve worshipim God “witim klin konsens.” (2 Tim. 1:3) Nomata taem hem prison lo Rome, hem encouragem olketa brata and sista for “hapi bikos lo Lord.” (Phil. 4:4) Taem iumi read abaotem olketa toktok blo Paul, iumi luksavve hem no letem olketa negative tingting for winim hem. Hem klia, taem negative tingting kamap lo mind blo hem, hem kwiktaem tingim olketa samting wea mekem hem hapi.

¹⁰ Paul fit tu for winim olketa negative feeling bikos hem bilivim dat ransom hem wanfala present wea God givim for hem. (Gal. 2:20; readim Ephesians 1:7.) From datwan, hem fit for trustim forgiveness blo Jehovah thru lo Jesus Christ. (Rom. 7:​24, 25) Nomata lo olketa nogud samting wea hem duim bifor and olketa wik point blo hem, Paul fit for “duim olketa holy waka” blo God witim hapi.—Heb. 9:​12-14.

11. Why nao example blo Paul hem encouragem iumi?

¹¹ Olsem Paul, maet iumi tu stragol witim own feeling blo iumi. Maet hem abaotem wat iumi tingim, duim, or talem. Iumi tu savve garem sem feeling olsem Paul and sei, ‘Sorre lo mi!’ Eliza,c wanfala sista wea age blo hem insaed 20’s sei olsem abaotem wat hem stragol witim: “Taem mi ting raonem situation blo Paul, datwan barava encouragem mi. Mi hapi dat ino miseleva nomoa garem datkaen feeling. Datwan remindim mi tu dat Jehovah savve lo wat nao pipol blo hem deal witim.” Wat nao iumi savve duim mekem iumi olsem Paul, for garem klin konsens and gohed hapi nomata iumi garem olketa negative feeling?

HAO IUMI SAVVE WINIM OLKETA NEGATIVE FEELING

12. Hao nao wei for gohed garem gud spiritual routine savve helpem iumi for winim olketa negative feeling?

¹² Gohed garem gud spiritual routine. Taem iumi garem gud spiritual routine, hem bae helpem iumi for focus lo olketa positive samting. Iumi savve comparem datwan witim wei for gohed garem olketa healthy habit wea bae helpem iumi for stap healthy. Taem iumi kaikaim healthy kaikai, exercise olowe, and garem inaf sleep, iumi savve feel gud. Lo sem wei, iumi savve hapi taem iumi readim Word blo God evritaem, prepare, attend, and participate lo meeting, and join lo ministry. Olketa activity olsem savve helpem iumi for deal witim olketa negative tingting wea iumi garem.—Rom. 12:​11, 12.

13-14. Hao nao samfala faithful Christian benefit from olketa garem gud spiritual routine?

¹³ Tingim example blo John wea faendaot hem garem cancer taem hem 39 years old. Lo firstaem, hem stragol witim olketa negative feeling. Hem ting: ‘Hao nao disfala sik kasem mi taem mi young nomoa?’ Lo datfala taem, son blo hem just thri years old. Wat nao helpem John for deal witim olketa negative feeling blo hem? Hem sei: “Nomata mi savve taed tumas, mi mek sure famili blo mi gohed garem gud spiritual routine. Mifala attendim evri meeting, share lo ministry evri week, and evritaem duim famili worship nomata samfala taem hem barava no isi.” John sei moa: “Lo wanfala hard situation, firstaem iumi savve barava wari. Bat mi lanem dat Jehovah bae kwiktaem for duim samting for givim strong wea iumi needim and showim hao hem barava lovem iumi. Jehovah savve strongim iu tu olsem hem duim for mi.”

¹⁴ Eliza wea iumi storyim finis sei: “Evritaem mi attendim olketa Christian meeting and duim personal study, datwan remindim mi dat Jehovah herem mi and really lovem mi. Datwan mekem mi hapi tumas.” Nolan, wanfala circuit overseer lo Africa, storyim samting wea helpem hem and waef blo hem Diane, taem hem sei: “Mitufala stik lo spiritual routine blo mitufala nomata taem mitufala feel discourage. Jehovah evritaem showim klia dat hem helpem mitufala for garem stret tingting. Mitufala trae for tingim dat Jehovah bae helpem and blessim mitufala. Mitufala no savve hao bae hem duim, bat mitufala savve hem bae duim datwan.”

15. Wat moa iumi need for duim for winim olketa negative tingting? Storyim example.

¹⁵ Maet iumi need for duim moa samting mekem iumi winim olketa negative tingting. Tingim disfala example. Imaginim baksaed blo iu hem pain. For datfala pain hem finis, maet iu need for duim moa samting winim for just wakabaot evriday. For savve wat nao kosim datfala pain, maet iu need for duim research and story lo wanfala doctor. Lo sem wei, maet iu need for duim research lo Bible and olketa pablikeson blo iumi, and story tu witim wanfala mature Christian for lane hao for deal witim olketa negative feeling wea no savve finis. Distaem bae iumi lukim samfala suggestion moa wea savve help.

16. Wat nao savve helpem iu for luksavve lo wat nao kos blo olketa negative tingting blo iu? (Psalm 139:​1-4, 23, 24)

¹⁶ Prea and ting raonem gud wat iu need for duim. King David savve dat Jehovah savve gud lo hem. So hem askem Jehovah for helpem hem for luksavve lo wat nao kosim hem for garem ‘tingting wea mekem hem wari.’ (Readim Psalm 139:​1-4, 23, 24.) Iu tu savve askem Jehovah for helpem iu luksavve lo wat nao kosim olketa negative tingting wea iu garem and understandim hao iu savve winim datwan. And tu, maet iu savve ting raonem olketa kwestin olsem, ‘Wat nao kosim wei wea mi wari? Eni samting nao savve mekem mi for wari evritaem? Hao, evritaem mi tingim olketa negative samting wea mekem mi wari instead for tingim olketa samting wea savve mekem mi hapi?’

17. Olketa wat kaen topic nao iu savve duim personal study lo hem for helpem mind blo iu focus lo olketa samting wea savve strongim iu? (Lukim tu piksa.)

¹⁷ Adjustim personal Bible study blo iu fitim need blo iu. Iu savve kasem gud samting taem iu gohed for studyim samfala lo olketa wei blo Jehovah. For example, aposol Paul barava kasem gud samting taem hem ting raonem ransom and forgiveness blo Jehovah. Iu tu savve duim sem samting. Iu savve iusim Research index for Olketa Jehovah’s Witness, Watch Tower Publications Index, or olketa nara Bible study tul wea available lo languis blo iu, for lane abaotem olketa topic olsem mercy, forgiveness, and loyal love blo God. Taem iu faendem olketa article wea bae helpem iu, raetem list blo olketa article hia. Putim datfala list lo ples wea iu savve lukim, and studyim olketa article lo datfala list taem iu start for feel wari. Trae for lukim hao iu savve applyim wat iu read abaotem lo situation blo iu.—Phil. 4:8.

18. Olketa wat kaen study project nao samfala Christian faendem hem helpem olketa?

¹⁸ Eliza, wea iumi storyim finis, duim wanfala personal study project lo Bible character Job. Hem sei: “Story blo Job hem barava helpem mi. Olketa hard taem wea Job feisim hem happen wan afta narawan. Nomata olsem, taem hem barava discourage, hem gohed depend lo Jehovah for help nomata hem no savve why nao olketa problem hia happen lo hem.” (Job 42:​1-6) Diane, wea iumi storyim finis sei: “Mitufala hasband blo mi duim study project lo Kam Klos Long Jehovah buk. Mitufala appreciatim wei wea Jehovah moldim mitufala olsem man for wakem samting from clay hem moldim clay. Instead for focus lo olketa samting wea mitufala duim wea mekem mitufala discourage, mitufala trae for imaginim wei wea Jehovah gohed moldim mitufala and trae for mekem mitufala kamap beta person. Diswan mekem mitufala barava fren klos witim hem.”—Isa. 64:8.

IUMI TRUSTIM DAT IUMI BAE GAREM GUDFALA FUTURE

19. Wat nao iumi shud no expectim?

¹⁹ Nomata if iumi garem gud spiritual routine and gud study program wea barava fitim need blo iumi, iumi no expectim olketa negative tingting and feeling blo iumi bae hem finis for olowe. Maet samfala days bae iumi feel discourage! Bat Jehovah savve helpem iumi for deal witim olketa negative feeling blo iumi taem hem kamap. Iumi savve sure dat staka day bae iumi savve enjoyim klin konsens and hapi lo laef blo iumi and lo service blo iumi for Jehovah.

20. Wat nao iu disaed strong for duim?

²⁰ Iumi disaed strong for no letem olketa negative feeling abaotem wat iumi duim bifor, olketa hard taem iumi feisim, or olketa wik point blo iumi for kontrolem iumi. Jehovah savve helpem iumi taem iumi start for garem olketa negative feeling. (Ps. 143:10) Iumi luk forward for taem wea iumi bae no stragol moa for garem positive tingting. Bat, iumi bae wekap each morning witim wei for no wari moa and hapi for servem loving God blo iumi, Jehovah!