Hao Nao Bae Iu Showim Iu Appreciatim Ransom?

1-2. Wat nao ransom sakrifaes blo Jesus shud muvim iumi for duim, and why? (2 Corinthians 5:​14, 15) (Lukim tu piksa.)

IF SAMWAN rescuem iu from wanfala building wea foldaon, hao, bae iu no tinghae nomoa lo wat hem duim for sevem iu? Nomata olketa narawan tu sev, iu barava tinghae and laek for mek sure iuseleva talem datfala person dat iu tinghae lo wat hem duim for rescuem iu and hard for iu forgetim datwan.

² Olsem iumi storyim lo article bifor diswan, iumi no savve rescuem iumiseleva from olketa nogud samting wea kamaot from sin wea iumi inheritim. Nomata olsem, ransom sakrifaes blo Jesus rescuem iumi lo wei wea hem provaedem (1) forgiveness for olketa sin wea iumi duim, (2) hope for kamap free from sin wea iumi inheritim, and (3) iumi reconcile witim God. From datwan, iumi garem hope for laef olowe lo niu world blo Jehovah. Tru nao, datfala ransom showim bigfala love blo Jesus for iumi olketa man, wea datwan hem love wea hem garem for iumi nomata bifor hem born olsem wanfala perfect man. (Prov. 8:​30, 31) Aposol Paul hem sei dat “love wea Christ garem hem muvim” iumi. (Readim 2 Corinthians 5:​14, 15.) Diswan minim love wea Jesus garem shud muvim iumi for showim iumi appreciatim and no forgetim ransom sakrifaes wea hem offerim.

3. Why nao maet wei wea each person showim hem appreciatim datfala ransom hem difren?

³ Lo wanem wei nao bae ransom wea hem loving provision from Jehovah muvim iu? Ansa blo iu maet hem difren from ansa blo narawan. Why nao olsem? Imaginim thrifala person redi for travel go lo sem destination, bat each person stap lo difren ples. Road wea each wan followim bae difren. Lo sem wei, road wea iu followim for kasem destination blo iu or goal for showim iu appreciatim datfala ransom hem depend lo frenship blo iu witim Jehovah distaem. So, lo disfala article bae iumi storyim thrifala grup: (1) olketa Bible student, (2) baptaes Christian, and (3) sheepsheep wea go difren.

BIBLE STUDENT

4. Hao nao Jehovah hem feel abaotem olketa Bible student?

⁴ If iu studyim Bible distaem, tingim diswan: Wei wea iu acceptim datfala gud nius hem showim iu wanfala lo olketa wea Jehovah leadim kam for fren witim hem. (John 6:44; Acts 13:48) ‘Jehovah hem lukluk gud insaed lo olketa heart.’ Datwan minim hem lukim effort wea iu mekem for lane abaotem hem, and hem hapi for lukim iu progress taem iu mekem olketa change for followim olketa standard blo hem. (Prov. 17:3; 27:11) Datfala ransom mekem hem possible for iu fren klos witim Jehovah. (Rom. 5:​10, 11) So no forgetim datwan.

5. Hao nao olketa Bible student savve applyim kaonsel wea stap lo Philippians 3:16?

⁵ If iu studyim Bible distaem, hao nao iu savve showimaot iu tinghae lo datfala ransom? Wanfala wei hem for followim disfala kaonsel blo aposol Paul for olketa Christian lo Philippi: “Nomata iumi kamap strong finis, iumi mas gohed for wakabaot followim sem wei wea iumi followim kam kasem distaem.” (Phil. 3:16) Lo nara Bible transleison olketa transleitim disfala verse olsem: “Iumi mas gohed followim direction wea iumi wakabaot followim distaem.” For followim datfala kaonsel, iu mas no letem eniting for stopem iu for gohed wakabaot followim datfala road for laef.—Matt. 7:14; Luke 9:62.

6. Wat nao olketa Bible student savve duim if olketa faendem hem hard for mekem olketa change? (Deuteronomy 30:​11-14) (Lukim tu piksa.)

⁶ Hao if iu faendem hem hard for acceptim wanfala Bible teaching wea iu just lanem? Duim research abaotem datfala teaching, and prea lo Jehovah for helpem iu minim gud datwan. (Ps. 86:11) If iu still faendem hem hard for understandim datfala teaching, leavim datwan for enitaem bihaen, bat no stop for studyim Bible. Hao if iu faendem hem no isi for lusim wanfala wei wea Bible stopem? Remember, no enitaem Jehovah askem olketa man wea no perfect for duim samting wea impossible. Iu savve followim olketa standard blo hem. (Readim Deuteronomy 30:​11-14.) And Jehovah promis for helpem iu. (Isa. 41:​10, 13; 1 Cor. 10:13) So no givap. Instead for tingting tumas abaotem olketa samting wea no isi for iu, hem gud for focus lo evri gud samting wea Jehovah duim finis for iu, includim datfala ransom arrangement. Taem love blo iu for Jehovah hem grow, bae iu faendem dat “olketa komandment blo hem no hevi tumas for obeyim.”—1 John 5:3.a

7. Wat nao olketa young wan wea growap lo truth savve ting raonem?

⁷ Waswe lo iufala olketa young wan wea growap lo truth? Iu wanfala Bible student tu. Iu wanfala most important Bible student blo parents blo iu. Bible sei: “Kam klosap lo God and bae hem kam klosap lo iufala.” (Jas. 4:8; 1 Chron. 28:9) Taem iu duim samting for kam klos lo Jehovah, hem tu bae duim samting for kam klos lo iu. Jehovah no ting lo iu olsem iu just part lo wanfala grup. Hem leadim kam each wan, includim each wan wea growap lo truth. Wat nao mekem hem possible for iu savve garem personal frenship witim Jehovah? Hem nao ransom, wea hem samting wea iu shud no forgetim. (Rom. 5:​1, 2) So bifor iu attendim Memorial dis year, hem gud for iu ting raonem olketa gud samting iu kasem from dae blo Jesus. Wei for ting raonem datwan bae muvim iu for waka hard for kasem eni spiritual goal wea iu markem for showim iu appreciatim datfala ransom, wea Jehovah provaedem thru lo Son blo hem.b

BAPTAES CHRISTIAN

8. Hao nao olketa Christian wea baptaes finis showim olketa garem faith lo datfala ransom?

⁸ If iu wanfala Christian wea baptaes finis, iu showim finis faith lo datfala ransom lo staka difren wei. For example, iu duim olketa samting for fren klos witim Jehovah and for followim olketa standard blo hem. Iu obeyim komand blo Jesus for mek disaepol taem iu sharem faith blo iu witim olketa narawan. And iu dedicatem laef blo iu lo Jehovah and baptaes. Hao, olketa narawan againstim iu from iu faithful for sapotim tru worship? (2 Tim. 3:12) Wei wea iu faithful and no givap showim iu lovem Jehovah and appreciatim datfala ransom wea hem provaedem thru lo Son blo hem.—Heb. 12:​2, 3.

9. Wanem danger nao olketa Christian wea baptaes finis mas luksavve lo hem?

⁹ Iumi olketa Christian wea baptaes need for luksavve lo wanfala danger. Isisi iumi savve lusim appreciation blo iumi for datfala ransom. Hao nao datwan maet happen? Tingim olketa first-century Christian lo Ephesus. From olketa no givap Jesus praisem olketa. Nomata olsem, hem sei lo olketa: “Wanfala samting nao mi no hapi lo hem, iu lusim finis datfala love wea iu garem lo firstaem.” (Rev. 2:​3, 4) Toktok blo Jesus showim if wanfala Christian no careful, isisi worship blo hem savve kamap olsem wanfala routine nomoa. Kaen person olsem savve prea, go lo olketa meeting, and participate lo ministry just bikos hem getius nomoa for duim datwan, bat ino love nao motivatim hem for duim datwan. Wat nao iu savve duim if iu feel dat love blo iu for Jehovah hem no strong olsem bifor?

10. Hao nao iu savve “ting raonem” and “tingting strong” abaotem olketa Christian activity blo iu? (1 Timothy 4:​13, 15)

¹⁰ Aposol Paul encouragem Timothy for “ting raonem” and “tingting strong” abaotem own Christian activity blo hem. (Readim 1 Timothy 4:​13, 15.) For followim datfala kaonsel, trae for ting abaotem olketa difren wei for helpem iu strong for worshipim Jehovah mekem iu gohed “letem holy spirit waka” lo iu. (Rom. 12:11; lukim “Be aglow with the spirit” lo English study note.) For example, maet iu savve spendem moa taem for prepare gud for olketa meeting mekem iu savve focus taem iu attend. Or taem iu duim personal study maet iu savve go lo wanfala kwaet ples mekem iu savve meditate abaotem wat iu studyim. Diswan bae helpem iu for kasem gud samting from personal study blo iu. Olsem wei wea iu need for addim firewood for mekem fire gohed laet, iu need for duim olketa samting hia mekem iu strongim appreciation blo iu for evriting wea Jehovah provaedem, includim datfala ransom. And tu, lo olketa week bifor Memorial hem gud for meditate abaotem olketa spesol blessing wea iumi pipol blo Jehovah enjoyim. For sure, datwan bae helpem iu for appreciatim go moa datfala ransom, wea hem basis for frenship blo iu witim Jehovah.

11-12. If samtaems iu feel dat iu no strong for duim ministry olsem bifor, hao, datwan minim iu no kasem holy spirit blo God? Explainim. (Lukim tu piksa.)

¹¹ If for samfala taem iu feel dat iu no strong lo service blo iu for Jehovah olsem bifor, no discourage or ting dat iu no kasem nao holy spirit blo God. Tingim disfala toktok wea aposol Paul talem for olketa lo Corinth abaotem ministry blo hem: “Nomata sapos mi no willing for duim diswan, mi mas duim nao bikos hem responsibility wea mi kasem from God.” (1 Cor. 9:17) Wat nao Paul minim?

¹² Samtaems Paul no garem strong feeling for laek preach. Bat, hem disaed strong for no givap lo ministry blo hem nomata hem feel olsem lo datfala taem. Iu tu savve disaed for duim sem samting. Disaed strong for duim stret samting nomata if iu no garem motivation for duim datwan. Iu savve prea for feeling for ‘laek duim samting, and paoa for duim datwan.’ (Phil. 2:13) Gohed active lo spiritual routine blo iu. Iu savve sure dat gogo olketa samting wea iu duim bae affectim feeling blo iu and iu bae strongim bak moa love wea still stap lo heart blo iu.

13. Hao nao iumi savve gohed testim sapos iumi “garem tru faith lo God”?

¹³ Hem gud for iumi evritaem lukluk gud lo iumiseleva olsem aposol Paul talem lo 2 Corinthians 13:​5, wea sei: “Gohed for testim iufala seleva sapos iufala garem tru faith lo God. Gohed for pruvim lo iufala seleva wat kaen man nao iufala.” Hem gud for evritaem ting raonem olketa kwestin olsem: ‘Hao, mi putim Kingdom first lo laef blo mi?’ (Matt. 6:33) ‘Hao, entertainment wea mi chusim showim mi heitim nogud samting?’ (Ps. 97:10) ‘Hao, mi trae for keepim peace and wan mind midolwan olketa brata and sista?’ (Eph. 4:​2, 3) Memorial hem gud taem for ting raonem olketa samting hia. Taem iumi ting abaotem wat Jehovah and Jesus duim for iumi, bae iumi laek for showim iumi appreciatim wat Jehovah duim, and lukluk gud lo iumiseleva for mek sure iumi duim samting wea Christ laekem and no wat iumiseleva laekem.c

SHEEPSHEEP WEA GO DIFREN

14. Wat nao maet kosim samfala Christian for stop for associate witim kongregeson?

¹⁴ Samfala Christian stop for associate witim kongregeson afta samfala month or even afta staka year wea olketa faithful lo Jehovah. Why? Samfala “wari abaotem olketa samting lo laef.” (Luke 21:34) Olketa narawan stambol lo toktok or wat olketa nara brata and sista duim. (Jas. 3:2) And olketa narawan duim serious sin and hol bak for ask for help. Nomata wat nao reason, wat nao iu savve duim if iu go difren from olketa sheepsheep blo Jehovah? Wat nao ransom, wea hem loving provision from Jehovah, savve muvim iu for duim?

15. Hao nao Jehovah showim hem kea for sheepsheep wea go difren? (Ezekiel 34:​11, 12, 16)

¹⁵ Ting raonem hao Jehovah feel abaotem olketa wea go difren. Hem no rejectim olketa. Instead, hem lukaotem olketa sheepsheep wea lus. Hem feedim olketa and helpem olketa for kam bak lo hem. (Readim Ezekiel 34:​11, 12, 16.) Hao, Jehovah bae duim datwan for iu tu? Yes! Wei wea iu readim disfala article showim heart blo iu still laek for duim stret samting. Olsem Jehovah lukim gud samting lo heart blo iu and leadim iu kam lo truth, hem still lukim gud samting lo iu distaem and hem laek for leadim iu kam bak lo famili blo hem.

16. Wat nao savve helpem wanfala sheepsheep wea lus for kam bak lo Jehovah? (Lukim tu piksa.)

¹⁶ Datfala brochure Kam Bak Long Jehovah hem garem olketa encouraging toktok hia: “Jehovah hem stanbae for helpem iu taem iu kam bak long hem. Hem bae helpem iu for lusim wei for feel nogud and for deal witim olketa samting wea mekem iu wari. Hem bae helpem iu tu for garem gudfala konsens wea bae mekem iu hapi moa. Maet datwan mekem iu laek for worshipim Jehovah moa witim olketa nara brata and sista.” Tingim diswan, olketa elder tu barava laek for helpem iu. Olketa savve “olsem wanfala ples for haed from wind, wanfala ples for haed from bigfala rain.” (Isa. 32:2) For showim iu tinghae lo ransom, ting raonem disfala kwestin, ‘Wat nao mi savve duim distaem for “stretem olketa samting” witim Jehovah?’ (Isa. 1:18; 1 Pet. 2:25) For example, hao, iu savve attendim wanfala meeting lo Kingdom Hall? Hao, iu savve story lo wanfala elder and ask for spiritual help, wea maet diswan includim for samwan studyim Bible witim iu for lelebet taem? Iu savve sure dat Jehovah bae blessim effort blo iu for showim iu appreciatim ransom blo Son blo hem.

WAT NAO BAE IU DUIM?

17-18. Hao nao iumi savve iusim gud taem blo iumi bifor Memorial dis year?

¹⁷ Jesus sei Jehovah provaedem ransom “mekem evriwan wea showimaot faith lo hem no dae bat kasem laef olowe.” (John 3:16) Jehovah iusim ransom for rescuem iumi from olketa nogud samting wea iumi kasem bikos lo sin and dae. Iumi evriwan shud tinghae lo datwan. (Rom. 3:​23, 24; 2 Cor. 6:1) Olketa day bifor Memorial hem chance for iumi ting raonem love wea Jehovah and Jesus showim, and disfala love shud muvim iumi for duim samting wea showim iumi appreciatim datwan.

¹⁸ Wat nao iu savve duim for showim iu appreciatim datfala ransom? Ansa blo iu maet hem difren from ansa blo narawan. Bat iu savve sure dat Jehovah bae blessim effort blo iu and effort blo staka nara million worshiper blo hem wea ‘no duim nomoa wanem olketa seleva laekem, bat duim wanem man wea dae for olketa laekem.’—2 Cor. 5:15.