Courtesy Jamie Christiani/Bulletin of the Atomic Scientists
GOHED FOR LUKAOT!
Doomsday Klok Muv Klosap for Kasem Midnaet
Lo January 27, 2026, olketa scientist setim Doomsday Kloka klosap for kasem midnaet. Midnaet hem representim taem wea olketa human bae distroem olketa seleva and distroem disfala earth.
“Tuday datfala Bulletin of the Atomic Scientists Science and Security Board hem setim Doomsday Klok for hem muv ap 85 seconds bifor midnaet, wea no enitaem bifor hem barava klosap lo destruction.”—Bulletin of the Atomic Scientists.
“Olketa scientist iusim Doomsday Klok for talem iumi samting lo wei wea klia. Olketa situation lo world hem barava worse, pipol no savve able for waka tugeta for solvem olketa problem, and iumi ran aot lo taem. Olketa human need for mekem olketa change and hem possible for duim datwan, bat evri pipol raonem world need for demandim olketa leaders blo olketa for kwiktaem tek akson.”—Alexandra Bell, president and CEO, Bulletin of the Atomic Scientists.
Hao, laef blo pipol and planet earth hem klosap for distroe? Hao, iumi shud fraetem wat nao bae happen lo future? Wat nao Bible talem abaotem datwan?
Wat nao bae happen lo future
Bible hem sei dat, “earth hem stap for olowe” and pipol bae “stap lo hem for olowe.” (Ecclesiastes 1:4; Psalm 37:29) So pipol bae no distroem disfala earth, or mekem full planet earth kamap ples wea no eniting savve laef lo hem.
Bat, Bible story abaotem end blo world. For example, hem sei dat “world bae finis.”—1 John 2:17.
For faendaot wat Bible minim taem hem story abaotem end blo world, readim article “Hao, End blo World Hem Klosap? Wat nao Apocalypse?”
For lanem wat Bible talem abaotem taeming blo olketa world event wea bae happen lo future, readim “Wanem Taem Nao World Bae Finis?”
Gohed garem positive tingting
Bible savve helpem iumi for gohed garem positive tingting nomata olketa problem lo world gohed happen distaem. Hao nao Bible savve helpem iumi?
Bible savve givim iumi olketa practical advaes. (2 Timothy 3:16, 17) For example, readim article “Hao for Kontrolem Wari” for lukim hao Bible savve helpem iu for gohed garem positive tingting nomata iu feisim staka problem.
Bible storyim hope for future wea iumi savve barava trustim. (Romans 15:4) Hem explainim exactly wat iumi expectim for happen distaem, and lo future. Datwan savve helpem iumi for no fraet nomata olketa event lo world gohed for happen.
For iu kasem gud samting from Bible, mifala hapi for invaetem iu for traem free Bible study course blo mifala tuday.
a “Doomsday Klok hem wanfala design wea warnim pipol abaotem hao iumi klosap tumas for distroem world blo iumi bikos lo olketa dangerous technology wea iumiseleva creatim. Hem wanfala metaphor wea remindim iumi abaotem olketa dangerous samting wea iumi mas solvem if iumi bae gohed survive lo disfala planet.”—Bulletin of the Atomic Scientists.