Simplifyim Printing for Helpem “Evri Difren Kaen Pipol”

Jehovah God laekem “evri difren kaen pipol” for “kasem stretfala knowledge abaotem truth.” (1 Timothy 2:3, 4) Bat, olketa brata and sista blo iumi and olketa wea iumi preach lo olketa speakim staka handred languis. Each year mifala printim klosap tu billion literature lo olketa difren languis hia. Wat nao mifala duim for producem olketa Bible pablikeson lo staka difren languis, and for iusim wise lo olketa donated funds wea mifala kasem?

No Staka Printery, Beta Equipment

During 1980’s, mifala printim olketa magasin lo winim 40-fala kantri. Since dat taem, mifala isisi reorganizim ples for duim printing mekem distaem mifala savve duim printing lo naenfala kantri nomoa. During datfala sem period, namba blo olketa languis wea mifala savve producem olketa Bible pablikeson lo hem increase klosap kasem 500 percent! Hao nao hem possible for mifala printim staka languis moa bat no staka printery? Important samting hem for garem beta equipment.

Olketa niu type printing press savve printim staka literature insaed short taem nomoa. Bat olketa old type printing press hem tek staka taem for preparem for duim next waka. Distaem, witim beta equipment, for preparem press for duim next waka hem fo taems faster. Mifala savve completim staka waka kwiktaem tumas, even for printim smol amount blo olketa literature lo languis wea no staka pipol speakim. Hem tru, olketa waka hia needim niu printing plates. Insaed 12-months ago, mifala spendem klosap tu million dollars lo printing plates seleva.a So, for olketa smol jobs nomoa mifala savve iusim olketa digital press wea no need for iusim printing plates. Olketa printing press hia hem includim olketa wea iusim laser technology, olketa producem smol quantity blo olketa literature lo low kost and no weistim staka samting.

Lo past thri years, mifala spendem moa than ten million dollars for updatem printing and binding equipment blo mifala raonem world. Diswan nao hao mifala iusim samfala lo olketa equipment hia for producem Bible. Lo bifor, afta mifala printim wanfala Bible mifala savve duim winim 40 difren steps, includim sewing, cutting, trimming, sanding, and gilding. And tu, staka taem mifala mas manually muvim and stackem olketa Bible between each step hia. Distaem, only ten steps nomoa mifala iusim bikos witim olketa niu equipment hia hem combinem evri nara step and olketa machine nao muvim olketa Bible. So waka for manually producem Bible hem reduced by over 55 percent. Bindery lo Japan branch savve producem 2,000 Bible evri eit hours. Distaem, lo datfala sem period hem savve producem samting olsem 35,000 Bible!

Les Inventory, Lower Kost

Bikos lo olketa improvement hia hem helpem mifala for sevem olketa donated funds. For example, from distaem mifala no printim staka literature and no staka waka, hem reducim amount lo literature wea mifala stoarem lo printery. Gary wea waka lo United States branch hem sei: “Firstaem, hem hard for understandim dat for printim smol quantity blo literature staka taem hem gud idea. Maet hem beta for printim big quantity and no staka taem. Lo first year afta mifala start printim smol quantity staka taem, kost for printing plates and weist pepa hem increase for 60,000 dollars. Bat, lo datfala year mifala sevem moa than 1.5 million dollars wea mifala shud spendem for stoarem pepa and olketa printed buk!” Olketa savings hia mifala iusim lo olketa nara important samting, olsem Kingdom Hall construction and disaster relief.

Les inventory hem mekem staka spes lo samfala lo olketa branch office blo mifala. Then olketa branch hia savve iusim datfala available spes for olketa nara waka lo Bethel. And tu, taem printing hem lo tu-thri location nomoa, staka taem mifala able for reducim size blo olketa niu construction project. For example, lo 2018 Central Europe branch nao duim printing for Britain branch and olketa nara branch. Diswan sevem staka million dollar for buildim niu branch lo Chelmsford, England.

“Iu Tingim Mi!”

Moa important, disfala simplified wei for printing hem helpem pipol spiritually. Distaem mifala able for duim printing lo staka languis, even for printim tu-thri handred copies blo wanfala pablikeson wea olketa needim. For example, only abaot 35,000 pipol wea speakim Wallisian languis nomoa stap lo New Caledonia and lo Wallis and Futuna. Bat lo August 2024, mifala releasem complete Niu World Transleison blo Holy Scripture lo Wallisian languis. Wanfala pablisa wea speakim Wallisian languis wea nem blo hem Selafina hem sei: “Mi use for readim French Bible bat mi no understandim samfala toktok insaed. So taem mi receivim Bible lo Wallisian languis, tias kam daon from eye blo mi. Mi prea olsem, ‘O Jehovah, iu tingim mi! Iu God wea no fevarem eniwan.’”

Nomata les than 500,000 pipol wea speakim Sanga languis nomoa stap lo Democratic Republic of the Congo, full Enjoyim Laef for Olowe! buk hem available lo datfala languis. Josué from wanfala Sanga languis kongregeson hem sei: “Hem big waka for explainim and transleitim samfala word and expression lo olketa Bible student. Nomata olsem, samtaems olketa student blo mi no savve understandim wat nao datfala buk storyim. Hem gud tumas for garem disfala buk lo Sanga languis! Distaem olketa student blo mi understandim wat mi teachim, and mi no longer havtu givim long explanation.”

Mifala pablisim and distributim spiritual kaikai lo staka pipol and lo staka languis winim enitaem bifor. Olketa donation blo iufala, includim olketa wea givim donation lo donate.jw.org, hem helpem mifala for duim datwan. Thankiu tumas for generosity blo iufala.