Olketa Gohed for Preach During lo Pandemic

During lo COVID-19 pandemic, olketa brata and sista blo iumi adjustim method lo hao olketa sharem comforting message from Bible lo olketa narawan. Instead for duim pablik witnessing or go lo haos blo pipol, olketa iusim telephone and raetem letaa for sharem Bible message. Staka pipol appreciatim wat olketa duim, and pruv showim dat Jehovah blessim datwan. (Proverbs 16:3, 4) Tingim olketa encouraging experience hia.

Bifor lo pandemic, Helen savve evritaem visitim wanfala young woman and ask for studyim Bible witim hem. Bat evritaem datfala woman no acceptim. Nomata olsem, lo day bifor COVID-19 lockdown hem start, Helen givim hem wanfala Bible and datfala buk Wanem Nao Iumi Savve Lanem Long Bible? During lo lockdown, Helen ask moa for study witim datfala young woman, and hem explainim dat tufala bae iusim telephone for study. Distaem, datfala young woman acceptim Bible study. Hem barava enjoyim discussion blo tufala, and no longtaem bihaen, hem askem Helen for tufala study evriday! And woman hia start tu for attendim olketa Christian meeting evritaem thru lo phone. And hem no just applyim olketa Bible teaching hia lo laef blo hem, bat hem sharem tu wat hem lanem witim olketa narawan.

Olketa Witness lo wanfala kongregeson duim tu leta raeting olsem part lo ministry blo olketa. Olketa raetem olketa leta for olketa police lo community blo olketa for showim appreciation blo olketa for big waka wea olketa duim. Olketa police hia sapraes taem olketa kasem olketa leta hia. Wanfala policeman sei olsem lo Jefferson, wanfala elder lo kongregeson, “Mi tingse Olketa Jehovah’s Witness againstim olketa police.” So Jefferson explainim hao datwan hem no tru. Olketa police hia hapi tumas for readim olketa naes toktok insaed olketa leta hia, so olketa displayim lo entrance blo datfala police station. Nara policeman sei, “Maet diswan bae helpem olketa narawan for garem positive tingting abaotem mifala.”

Edna and Ednalyn tufala regular pioneer.b From tufala no garem Internet connection lo haos blo tufala, tufala no savve joinim olketa kongregeson meeting thru lo videoconferencing. So tufala ringim neiba blo tufala wea no Witness and askem sapos tufala savve iusim Wi-Fi blo hem and pei for datwan. Bat datfala woman letem tufala for just iusim free nomoa. Taem Edna and Ednalyn invaetem hem for connect lo olketa meeting, hem duim datwan. Distaem datfala neiba, wanfala lo olketa pikinini blo hem, and tufala grandota blo hem olketa studyim Bible witim olketa Witness and evritaem attendim olketa Christian meeting.

Olketa brata and sista invaetem olketa neiba, coworker, and olketa narawan for attendim wanfala pablik tok wea bae kamap lo videoconferencing. Firstaem, Ellaine, wea waka lo wanfala hospital lo datfala ples, hol bak for invaetem olketa coworker blo hem. Hem tingse maet samfala doctor garem negative tingting abaotem olketa Witness. Nomata olsem, hem iusim text message for invaetem olketa doctor wea olketa waka tugeta lo sem hospital. Bat Ellaine hol bak for invaetem wanfala couple, wea tufala evriwan doctor. Afta hem ting raonem and prea abaotem datwan, hem disaed for sendem text message for invaetem tufala. Datfala waef reply olsem: “So iu laekem mi for joinim religion blo iu?” Ellaine explainim dat meeting hia hem for evriwan, no for Olketa Jehovah’s Witness nomoa. Lo next day, Ellaine sapraes for lukim datfala couple connect early for meeting! Hem sei: “Bifor meeting hia end, mi kasem text message from datfala waef and hem sei: ‘Diswan hem firstaem for mi attendim wanfala meeting blo Olketa Jehovah’s Witness. Hem barava naes. Mi enjoyim tumas. Thankiu for invaetem mi.’”

Ellaine invaetem 20-fala doctor and hem hapi for lukim 16-fala nao attendim datfala meeting. Hem tingim toktok blo aposol Paul taem hem sei: “Mi hapi dat ‘God strongim mi’ for sharem ‘gud nius blo God’ witim olketa coworker blo mi.”—1 Thessalonians 2:2.

Hem no isi for evriwan lo taem blo datfala pandemic. Bat olketa brata and sista blo iumi evriwea lo world maintainim hapi blo olketa and gohed garem positive tingting taem olketa duim wat olketa fit for duim for comfortim and helpem olketa narawan.—Acts 20:35.