Trustim Sovereign Ruler blo Universe

1. Wat nao olketa nogud samting wea Job kasem?

JOB, wea garem strong faith hem lusim klosap evriting. Hem lusim olketa pikinini blo hem, health, and riches wea hem garem. And tu, evri nogud samting hia mekem hem lusim gudfala reputation blo hem. Thrifala man wea sei olketa fren blo hem talem olketa toktok wea discouragem hem. Even beloved waef blo hem wea sorre tumas hem forcem hem for “tok spoelem God and dae.” (Job 2:9; 15:​4, 5; 19:​1-3) Olketa nogud samting hia fit for mekem Job lusim trust blo hem lo tru God, and mekem hem daotem if Jehovah bae protectim olketa wea lovem and worshipim Hem.

2-3. Taem iumi safa, wat nao maet iumi tingim, and wat nao bae iumi lanem from buk blo Job?

² Samfala taem, iumi tu experiencem olketa challenging situation wea savve barava testim wei wea iumi trustim Jehovah. Iumi stap lo taem wea ‘barava difren and evri samting hem hard tumas.’ (2 Tim. 3:1) Taem iumi gohed feisim olketa hard taem, maet iumi feel sorre and wari tumas and ting dat hard for iumi winim datwan. Samfala wea experiencem datwan wonder if Jehovah really lovem olketa.

³ If enitaem iu tu feel olsem, no lus hope. Job lanem dat Jehovah rescuem olketa wea loyal lo Hem. Iumi tu savve buildim datfala sem trust lo Dadi blo iumi lo heven. For helpem iumi duim datwan, iumi bae lane from buk blo Job and lukim hao buk hia assurem iumi lo tufala main samting: First, Jehovah nomoa hem Sovereign Ruler blo universe. Mek-tu, olmaeti God blo iumi savve kontrolem olketa event wea happen lo world for mek sure purpose blo Hem fulfill, and for protectim pipol blo hem from olketa nogud samting wea savve spoelem spiritual and physical saed blo olketa for olowe.

SATAN KAM MIDOLWAN LO OLKETA

4. Hu nao attendim datfala hipap lo heven wea buk blo Job storyim?

⁴ Wanday, “olketa son blo tru God” hipap front lo Jehovah lo heven. Bible sei: “Satan tu hem kam midolwan lo olketa.” (Job 1:6) Diswan hem firstaem wea Bible iusim disfala title “Satan” or “Man for Againstim” man, for describem main enemy blo Jehovah. Lo datfala taem, Satan hem no longer wanfala faithful son blo God. Hem kamap enemy blo Jehovah and blo famili blo Hem lo heven and lo earth. Jehovah showim dat Satan no longer part lo famili blo Hem lo heven taem Hem talem olketa toktok wea stap lo Genesis 3:15. So Satan hem no part lo “datfala woman,” wea hem olketa spirit son insaed famili blo Jehovah, wea bae producem datfala “pikinini.”

5. Wat nao iumi lanem taem iumi studyim conversation wea gohed lo datfala hipap lo heven?

⁵ Jehovah mek sure conversation wea happen lo datfala hipap lo heven hem stap insaed Bible. Olketa toktok wea Satan talem showim klia dat hem wicked and hem man for spredim laea story for spoelem nem blo narawan. (Job 1:9; comparem Revelation 12:10.) Wei wea Jehovah includim disfala scene abaotem wat happen lo heven insaed Bible reassurem iumi dat hem evritaem iusim authority blo hem lo wei wea perfect and followim justice. And datwan showim tu dat Olmaeti hem markem limit lo wat olketa narawan savve duim.

JEHOVAH MARKEM LIMIT

6. Hao nao Jehovah showim dat hem garem full authority lo datfala meeting lo heven? (Job 1:​7, 8)

⁶ Readim Job 1:​7, 8. Jehovah showim dat hem nao garem full authority lo datfala meeting. Hem askem Satan olsem: “Hao, iu lukluk lo servant blo mi Job?” Really, Jehovah savve finis dat Satan laek for attakim faithful servant blo hem Job. Distaem bae iumi storyim hao Jehovah iusim bigfala paoa wea hem garem for helpem Job.

7. Olsem Job 1:​10, 11 storyim, wat nao Satan talem abaotem why pipol worshipim Jehovah?

⁷ Readim Job 1:​10, 11. Jehovah nao hem olmaeti Sovereign blo universe, and hem iusim authority and paoa blo hem lo taem wea hem lukim hem fitim. (Jer. 32:17; Dan. 4:35) Nomata olsem, Satan talem dat Jehovah no iusim paoa blo Hem lo stretfala wei. Hem olsem Satan claimim dat God bribem olketa man, olsem Job, for worshipim Hem. And Satan talem tu dat olketa wea worshipim Jehovah olketa duim datwan only bikos olketa laek kasem samting from Hem. Wat nao Jehovah duim?

8-9. Wat nao olketa limit wea Jehovah markem for Satan, and why nao olsem? (Job 1:12) (Lukim tu piksa.)

⁸ Readim Job 1:12. Jehovah allowim Devil for pruvim if wat hem talem hem tru, bat Hem markem tu baondri for Devil. God sei olsem lo Satan: “Iu mas no tasim hem!” Front lo evriwan wea hipap, Jehovah markem limit for olketa attak blo Satan. Satan no garem paoa for ovam datfala baondri, so hem no garem eni choice bat hem duim nomoa wat Jehovah allowim hem for duim insaed datfala baondri. And datwan hem semsem distaem tu. Jehovah iusim authority and paoa blo hem for protectim Job and for protectim own reputation blo Hem.

⁹ First attak blo Satan hem barava fail. Job gohed for faithful lo Dadi blo hem lo heven. (Job 1:22) Nomata olsem, Jehovah savve datfala Man for Againstim man hem no stop yet for testim Job.

10. Why nao Jehovah allowim Satan for testim Job moa? (Job 2:​2-6)

¹⁰ Readim Job 2:​2-6. Next samting wea Satan duim for testim faithful fasin blo Job hem barava worse. Hem tingse Job bae tok spoelem God for sevem own laef blo hem. For showim wat Devil talem hem no tru, Jehovah allowim hem for mekem datfala faithful man for kasem bigfala sik. Bat again, Jehovah markem limit, taem hem sei: “Iu mas no finisim laef blo hem!” Satan no garem eni choice bat for followim nomoa restriction wea Jehovah markem for hem. So iumi lukim klia moa dat Jehovah showim hem nao most paoaful Ruler bikos Satan no savve testim Job winim limit wea Jehovah markem.

JEHOVAH FINISIM WEI WEA JOB SAFA

11. Taem Jehovah finisim olketa test wea kasem Job, hao nao Hem rewardim Job? (Job 42:​10-13)

¹¹ Readim Job 42:​10-13. Hem klia dat Job nating lusim faithful fasin blo hem, and Jehovah stopem attak blo Satan. Jehovah duim samting for finisim wei wea faithful servant blo hem safa. Once again, datfala Man for Againstim man hem no garem paoa for blokem disison blo Jehovah. Jehovah no letem Satan for gohed attakim moa spesol servant blo hem Job.

12. Storyim example blo wat Jehovah duim for olketa servant blo hem wea trustim paoa blo hem for sevem olketa.

¹² During lo olketa last day, staka pipol blo Jehovah experiencem paoa blo hem for sevem olketa. For example, lo 1945 olketa soldia forcem 230 Jehovah’s Witness for wakabaot from wanfala prison camp lo Germany for go lo saedsea for killim olketa dae. Datfala journey hem barava long and dangerous. Bat evri Witness hia olketa survive. Olketa raetem olketa toktok hia abaotem nogud experience wea olketa kasem insaed wanfala resolution: “Wanfala longfala and hardfala taem bilong test hem finis and for olketa wea stap laef, wea olsem God sevem olketa aot from bigfala fire, nomata smel bilong fire iu no savve smelem long olketa. . . . Bat, olketa fulap witim strong and paoa from Jehovah.” Olketa sei moa: “Wanfala samting nomoa mifala laekem . . . [afta] mifala stap long hol bilong lion, mifala laek gohed for worshipim Jehovah . . . for olowe. Datwan nao best reward wea mifala kasem.”—Comparem Daniel 3:27; 6:22.

13. Taem iu feisim olketa hard taem, wat nao iu savve sure lo hem? (Lukim tu piksa.)

¹³ Iumi tu savve experiencem olketa hard taem lo laef wea olsem olketa torowem iumi insaed hol blo lion. (1 Pet. 5:​8-10) Samtaems, maet iumi feel discourage and ting dat olketa problem blo iumi bae no savve finis. Lo olketa taem olsem, wei for tingim experience blo Job savve helpem iumi. Iumi savve barava sure dat Jehovah garem paoa for finisim wei wea iumi safa, maet hem duim distaem or lo niu world. Hem bae no letem disfala system for gohed stap winim taem wea hem markem for distroe!

JEHOVAH LOVEM OLKETA LOYAL SERVANT BLO HEM

14-15. Wat nao Jehovah laek duim for olketa loyal servant blo hem, and why? (Job 14:15) (Lukim tu piksa.)

¹⁴ Readim Job 14:15. Dadi blo iumi lo heven hem barava loyal lo olketa wea loyal lo hem. Hem barava lovem olketa dastawe nomata if olketa dae, hem bae resurrectim olketa. Taem hem resurrectim olketa servant blo hem, evriwan bae hapi tumas.—Isa. 65:17.

¹⁵ Nomata Job gohed stap lo world wea Satan nao rulim, iumi lukim insaed Bible dat Jehovah finisim nogud sik wea hem kasem and givim hem staka blessing winim nao blessing wea hem kasem bifor Satan testim hem. Olketa blessing hia hem just wanfala preview blo wat Jehovah bae duim for Job lo future. Jehovah showim dat hem laekem olketa loyal servant blo hem for barava hapi and for enjoyim laef. Tru nao, Jehovah bae givim lo evriwan wea loyal lo hem chance for enjoyim perfect laef lo paradaes earth. (Rev. 21:​3, 4) From hem Sovereign Ruler blo universe, hem garem paoa and desire for duim datwan. Datwan barava comfortim iumi taem iumi kasem olketa hard taem!

16. Wat moa nara reason why iumi trustim dat Jehovah hem Sovereign Ruler?

¹⁶ Afta Jehovah rewardim Job witim long laef, gogo Job hem dae. Bat Jehovah nao Sovereign Ruler, datfala Olmaeti, wea garem paoa even ovarem dae. (Deut. 32:39) So no eniwan savve stopem hem for resurrectim olketa wea hem lovem. And hem bae duim datwan lo taem wea hem markem.—Rom. 8:​38, 39.

PUTIM FULL TRUST BLO IU LO JEHOVAH

17. Wat nao showim evri effort blo Satan for finisim pipol blo Jehovah hem fail?

¹⁷ Story blo Job lo Bible mekem iumi garem staka reason for putim full trust blo iumi lo Jehovah. Iumi barava thankiu lo Jehovah bikos hem no allowim Satan for finisim pipol blo Hem. Iumi savve Jehovah nao hem Sovereign Ruler bikos samting olsem naen million pipol distaem olketa faithful for worshipim hem. Staka taem finis iumi lukim dat no eni weapon wea olketa iusim againstim olketa servant blo Jehovah hem succeed. (Isa. 54:17) Olketa paoaful nation and religious organization no fit for finisim pipol blo Jehovah wea luk olsem olketa no garem eniting for protectim olketa. And no eniting savve stopem iumi for storyim truth abaotem Jehovah and talemaot dat Satan hem man for laea and murder. Even dae no savve stopem iumi bikos Jehovah bae resurrectim olketa loyal servant blo hem wea dae.—Hos. 13:14.

18. Why nao iumi no need for fraetem wat bae happen lo future?

¹⁸ Taem iumi ting raonem story blo Job insaed Bible, datwan savve strongim faith blo iumi for no fraetem wat bae happen lo future. During bigfala trabol, Satan and army blo hem bae ting lo pipol blo Jehovah dat olketa wik and hem isi nomoa for attakim olketa. Bat olsem lo taem blo Job, Jehovah bae iusim bigfala paoa blo hem, hem bae no letem Satan for spoelem pipol blo hem for olowe. Klosap nao Jehovah bae finisim wei for safa wea Satan kosim for iumi olketa man. Devil and olketa demon blo hem bae prison insaed wanfala abyss for 1,000 years. (Luke 8:31; Rev. 20:​1-3) Gogo, Satan and evriwan wea saedem hem bae finis. (Rev. 20:10) Olsem Jehovah talem finis, hem bae smasem hed blo Satan. Satan bae hem finis for olowe.—Gen. 3:15; Rom. 16:20.

19. Wanem reward nao olketa wea putim full trust lo Jehovah bae kasem? (Lukim tu piksa.)

¹⁹ Olketa tru worshiper barava luk forward lo wanfala niu world wea klosap tumas, wea evriwan bae garem perfect laef and hapi. Laef bae barava gud tumas winim wat iumi savve imaginim. Jehovah promis olsem: “Lukim! Mi mekem evri samting hem niu.” (Rev. 21:5) Wat nao datwan minim? Hem firstaem since garden lo Eden wea Satan and olketa demon blo hem bae no kosim nogud samting for pipol, or kosim pipol for duim wicked samting. Iumi bae barava free from evri nogud samting! No enitaem moa olketa samting wea iumi warim lo disfala old system bae mekem iumi safa or no sleep gud. Olketa wea survive thru lo Armageddon bae lukim healing wea bae happen evriwea lo world. And tu, resurrection blo olketa loved wans blo iumi bae start. Iumi bae experiencem laef wea Dadi blo iumi lo heven laekem iumi for garem!

20. Wat nao iu disaed strong for duim?

²⁰ Lo olketa last day distaem, iumi bae feisim staka hard taem, and iumi needim courage for gohed faithful. So iumi laek for gohed putim full trust blo iumi lo Jehovah and sapotim sovereign rul blo hem. Iumi laek for showim dat iumi lovem Dadi blo iumi lo heven and pruvim dat Satan hem rong. Yes, iumi barava luk forward for stap anda lo rul blo Sovereign blo iumi, Jehovah, wea laekem tumas for rewardim olketa faithful servant blo hem, and hem bae no fail for duim datwan!