Why Iu Savve Hapi Taem Pipol Heitim Iu

1. Wat nao sapraesing samting wea Jesus talem abaotem wei wea pipol heitim iumi?

LO SERMON blo Jesus lo Maunten, hem sei: “Iufala hapi, iufala wea pipol heitim iufala.” (Luke 6:22) Masbi olketa wea lisin lo hem olketa sapraes for herem datwan. Bikos no eniwan laekem for pipol heitim hem. Why nao Jesus talem disfala toktok? Datwan hem gud kwestin for ting raonem bikos staka pipol nao heitim olketa follower blo Jesus distaem. Lo disfala article bae iumi discussim why pipol heitim iumi and why iumi savve hapi taem pipol heitim iumi.

WHY PIPOL HEITIM IUMI

2-3. Wat nao wanfala reason why pipol persecutim olketa tru Christian, and hao nao maet datwan affectim hao iumi ting lo olketa wea againstim iumi? (John 16:​2, 3)

² Pipol heitim iumi bikos iumi worshipim Jehovah. Taem Jesus story abaotem olketa wea bae persecutim and even killim dae samfala follower blo hem, hem sei: “Olketa no savve lo mi and Dadi blo mi.” (Readim John 16:​2, 3.) Hu nao bihaenem olketa wea againstim pipol blo God? Satan. Hem nao “god blo disfala taem wea iumi stap lo hem.” (2 Cor. 4:​3, 4) Hem blindim pipol from truth abaotem Jehovah and influencim olketa for againstim olketa wea savve and lovem God. (John 8:​42-44) Hao nao wei for savve lo diswan affectim hao iumi ting lo pipol wea againstim iumi? Taem iumi luksavve Satan nao trikim olketa, datwan bae helpem iumi for no heitim olketa.

³ Tingim example blo Pavel,a wea stap lo wanfala kantri wea olketa banim waka blo iumi. From hem gohed faithful for worshipim Jehovah, olketa arrestim hem, whipim hem nogud, and putim hem stap seleva lo wanfala cell for staka month. Pavel sei: “Mi lukim klia dat persecution hem kamap bikos Satan and olketa demon blo hem barava againstim pure worship. Luk olsem staka lo olketa wea waka lo prison olketa no heitim iumi, olketa just duim nomoa waka blo olketa.” Wanfala brata lo Croatia wea kasem nogud persecution from parents blo hem wea no biliv hem sei: “Distaem mi luksavve Satan nao real enemy blo mi, ino parents blo mi.”—Eph. 6:12.

4. Wat nao iumi savve lanem from example blo Jesus and disaepol Stephen? (Lukim tu piksa.)

⁴ Iumi no heitim olketa wea againstim iumi. Bat, iumi laek for prea for olketa. (Matt. 5:44) Iumi savve lanem datwan from example blo Jesus and disaepol Stephen. Taem olketa Roman soldia nilam Jesus lo datfala torture stik, hem prea olsem: “Dadi, forgivim olketa.” (Luke 23:34) Jesus askem Jehovah for forgivim olketa soldia hia wea kasem komand for killim hem dae. And maet Jesus tingim tu pipol lo crowd wea olketa enemy blo hem influencim olketa for singaot and talem dat hem mas dae. Jesus luksavve pipol hia no really savve dat wat olketa duim hem rong. Disaepol Stephen tu duim sem samting taem hem askem God for forgivim olketa wea redi for killim hem dae. (Acts 7:​58-60) Hao, Jehovah ansarem prea blo Jesus and Stephen? Yes. Staka wea involve for accusim Jesus and killim hem dae, gogo olketa repent, garem faith lo Jesus and baptaes. (Acts 2:​36-41) And Saul from Tarsus, wea agree for olketa killim dae Stephen tu kamap wanfala Christian and regretim olketa nogud samting wea hem duim from hem no savve wat hem duim hem rong.—1 Tim. 1:13.

5. Wat nao iu lanem from experience blo César?

⁵ Jehovah gohed for ansarem olketa prea blo iumi taem iumi prea for olketa wea againstim iumi distaem. Tingim experience blo César, wea stap lo Venezuela. Dadi blo hem barava againstim truth. César sei: “Mami blo mi hem wanfala gud waef and mami. Nomata hem evritaem putim Kingdom first, hem mek sure hem duim responsibility blo hem olsem waef for sapotim dadi blo mi. Hem teachim mi and olketa sibling blo mi for respectim dadi. And hem teachim mifala tu for obeyim dadi sapos samting wea hem askem no againstim will blo God.” Bihaen samfala year, attitude blo dadi blo hem start for change. César sei: “Wanday, afta mi talem wanfala prea from heart, mi askem dadi sapos mi savve studyim Bible witim hem. Mi barava hapi tumas taem mi herem hem sei yes.” Gogo, dadi blo César hem baptaes. Hem tru, no evriwan wea againstim iumi savve mekem olketa change olsem, bat samfala savve changem attitude blo olketa taem olketa lukim iumi showim respect lo toktok blo iumi and iumi garem naes wei. Iumi barava hapi taem iumi lukim olketa duim datwan! Iumi luk forward for taem wea Jehovah, datfala merciful “Judge blo full earth,” bae leadim pipol olsem for kam lo hem.—Gen. 18:25.

6. Olsem Mark 13:13 storyim, wat nao nara reason why pipol heitim iumi?

⁶ Pipol heitim iumi bikos iumi respectim Jesus. Jesus sei evri pipol bae heitim olketa tru Christian “bikos lo nem blo [hem].” (Readim Mark 13:13.) Wat nao “nem” blo Jesus stand for hem? Hem stand for reputation and authority blo hem olsem King lo Kingdom blo God. Pipol wea heitim iumi hem olketa wea trustim olketa leader lo earth and no trustim Jesus Christ, man wea Jehovah chusim for rulim disfala universe. Jesus start for King lo Kingdom blo God lo 1914. Klosap nao hem bae finisim evri gavman wea againstim authority blo hem.

7-8. Wat moa nara reason why pipol heitim iumi? (John 15:​18-20) (Lukim tu piksa.)

⁷ Pipol heitim iumi bikos iumi rejectim world blo Satan. Jesus storyim dat pipol bae heitim olketa follower blo hem bikos olketa follower blo hem “no part lo world.” (Readim John 15:​18-20.) Olsem olketa Christian lo first century, iumi rejectim olketa wei and toktok blo disfala nogud world. From diswan, pipol treatim nogud staka brata and sista blo iumi lo waka ples or lo skul. (1 Pet. 4:​3, 4) Bat iumi hapi bikos samfala wea againstim iumi gogo olketa changem tingting blo olketa and start for respectim iumi.

⁸ Tingim experience blo Ignacio, from Central America. Wanfala teacher lo skul blo hem tok spoelem hem for staka year bikos hem followim olketa standard lo Bible. Bat bifor Ignacio graduate, datfala teacher askem hem hao nao hem fit for followim olketa Bible principle lo skul taem staka no respectim hem from wat hem duim. Ignacio explainim lo hem dat hem ting lo olketa law blo God olsem samting wea protectim hem. Then hem invaetem datfala teacher lo wanfala kongregeson meeting. Ignacio sapraes for lukim datfala teacher hem kam lo meeting! Taem datfala teacher lukim love wea evriwan lo kongregeson showim, datwan kasem heart blo hem, and muvim hem for gohed attendim olketa meeting. Bihaen, datfala teacher studyim Bible, and hem tu experiencem wei wea pipol againstim hem. Nomata olsem, hem gohed progress lo spiritual wei and gogo hem baptaes.

9-10. (a) Wat moa nara reason why olketa Christian difren from pipol lo world blo Satan? (b) Wat nao iumi savve lanem from example blo aposol Paul?

⁹ Iumi difren tu from pipol lo world blo Satan bikos iumi neutral saed lo politik and war. (John 18:36) From iumi followim kaonsel wea stap lo Romans 13:​1, iumi traem best for obeyim olketa law blo gavman. Bat from iumi Christian, iumi gohed neutral taem pipol raoa abaotem olketa issue blo politik, so iumi no ran lo election, or votem eniwan wea stand lo election. Why? Bikos iumi loyal lo Jehovah and lo Kingdom blo hem wea Christ rulim. Staka lo Olketa Jehovah’s Witness stap lo prison bikos lo faith blo olketa. Nomata olsem, olketa brata and sista wea stap lo prison gohed for preach. Olketa followim example blo aposol Paul, wea spendem staka year anda haos arrest and lo prison. (Acts 24:27; 28:​16, 30) Hem gohed sharem gud nius lo evriwan wea lisin lo hem, olsem olketa prison gard, kot official, governor, king, and even olketa bigman blo Roman Emperor Nero.—Acts 9:15.

¹⁰ Distaem tu olketa brata and sista blo iumi wea stap lo prison preach lo evriwan wea lisin, olsem olketa judge, gavman official, and olketa gard. Wanfala brata wea spendem winim six years lo prison from hem gohed neutral saed lo politik, hem sei hem no ting lo taem wea hem stap lo prison olsem wanfala panisment, bat hem ting lo datwan olsem assignment from Jehovah for faendem olketa wea olsem sheepsheep. Iumi bae hapi tumas if Jehovah iusim iumi for sharem gud nius lo pipol olsem! (Col. 4:3) Distaem bae iumi storyim olketa nara reason why iumi hapi nomata pipol heitim iumi from iumi worshipim Jehovah.

WHY IUMI SAVVE HAPI TAEM PIPOL HEITIM IUMI

11. Hao nao wei for experiencem persecution savve strongim faith blo iumi? Storyim example.

¹¹ Iumi savve dat wei wea pipol lo world heitim iumi hem fulfillim Bible profesi. Lo first profesi lo Bible, Jehovah talem dat Satan and tokpiksa pikinini blo hem, wea minim olketa wea followim hem, bae heitim eniwan wea lovem and worshipim Jehovah. (Gen. 3:15) Iumi lukim tu lo fofala Gospel hao staka taem nao Jesus storyim datwan bae happen, wea pruvim datfala profesi hem tru. (Matt. 10:22; Mark 13:​9-12; Luke 6:​22, 23; John 15:20) And olketa nara Bible raeta raet abaotem sem samting. (2 Tim. 3:12; Jas. 1:2; 1 Pet. 4:​12-14; Jude 3, 17-19) So iumi no sapraes taem pipol persecutim iumi. Bat iumi hapi dat Bible profesi hia hem fulfill. Diswan pruvim dat iumi worshipim tru God. Wanfala sista wea stap lo kantri wea gavman restrictim waka blo iumi hem sei: “Taem mi dedicate lo Jehovah, mi savve dat enitaem nomoa bae mi feisim persecution. So mi nating fraet or sapraes taem mi kasem olketa hard taem.” Hasband blo hem tu wanfala lo olketa wea againstim hem. Hem treatim hem nogud and savve bonem Bible and olketa Bible pablikeson blo hem. Bat instead for sista blo iumi fraet, datwan strongim go moa faith blo hem. (Heb. 10:39) Hem sei: “Bible hem profesi abaotem persecution, so mi savve dat hem bae happen. Taem mi experiencem persecution, mi barava sure diswan nao tru religion.”

12. Wat nao helpem wanfala brata for deal witim persecution?

¹² Nomata iumi expectim pipol for persecutim iumi, taem datwan happen maet iumi faendem hem no isi for deal witim. Wanfala brata raet abaotem taem wea hem lo prison, hem sei: “Samtaems, mi feel depress or wari, and mi laek krae nomoa.” Wat nao helpem disfala brata for deal witim datwan? Hem sei: “Mi evritaem prea. Mi startim each morning witim prea, and during lo day, mi savve prea taem mi feisim eni hard situation. Taem olketa narawan treatim mi nogud and mekem mi kros, mi savve go insaed bathrum, lokim door, and mi prea.” And brata blo iumi savve ting raonem tu example blo olketa wea faithful lo bifor and lo distaem. Datwan helpem hem for deal witim datfala persecution and for garem peace wea Jesus promis for givim lo olketa follower blo hem.—John 14:27; 16:33.

13. Wat nao savve helpem iumi for deal witim wei wea pipol heitim iumi?

¹³ Love wea iumi garem hem strong winim wei wea pipol heitim iumi. Jesus lovem Dadi blo hem witim full heart go kasem taem hem dae. And hem lovem tu olketa fren blo hem. (John 13:1; 15:13) Taem iumi strongim kaen love olsem for Jehovah and for olketa brata and sista, datwan savve helpem iumi for deal witim wei wea pipol heitim iumi. Why nao iumi sei olsem? Bae iumi ansarem datwan taem iumi storyim example blo aposol Paul.

14. Wat nao helpem Paul for gohed loyal lo Jehovah nomata taem hem redi for dae?

¹⁴ Just bifor olketa killim dae Paul, hem raet olsem lo gud fren blo hem Timothy: ‘Holy spirit wea God givim lo iumi hem no mekem iumi fraet, bat hem mekem iumi garem paoa, and love.’ (2 Tim. 1:7) Wat nao Paul minim? Paul minim dat strong love for Jehovah savve muvim wanfala Christian for willing for feisim wanfala hard test. (2 Tim. 1:8) For sure love wea Paul garem for Jehovah helpem hem for garem courage and gohed loyal nomata taem hem redi for dae.—Acts 20:​22-24.

15. Lo taem blo iumi, hao nao olketa brata and sista showim olketa garem trufala love for each other? (Lukim tu piksa.)

¹⁵ Iumi lovem olketa brata and sista blo iumi wea gohed loyal lo taem blo persecution. Samfala distaem willing for putim laef blo olketa lo danger for helpem olketa brata and sista, olsem Aquila and Priscilla duim taem tufala putim laef blo tufala lo danger for helpem Paul. (Rom. 16:​3, 4) For example, lo Russia, staka go lo olketa kot haos for encouragem olketa nara brata and sista wea gavman arrestim olketa. Taem wanfala sista wea olketa arrestim lukim staka brata and sista lo kot haos, datwan kasem heart blo hem and hem barava emotional. Trufala love wea olketa brata and sista blo hem showim strongim hem lo taem wea hem barava needim. Iumi barava hapi from iumi garem love wea strong winim wei wea pipol heitim iumi!

16. Why nao aposol Peter sei olketa wea pipol spoelem from olketa worshipim God garem reason for hapi? (1 Peter 4:14)

¹⁶ Iumi savve God hapi lo iumi taem iumi no givap nomata pipol heitim iumi. (Readim 1 Peter 4:14.) Aposol Peter sei olketa wea no givap taem pipol spoelem olketa from olketa worshipim God, olketa garem reason for hapi. Why nao olsem? Bikos taem pipol spoelem iumi datwan pruvim spirit blo God “hem stap lo [iumi].” Peter seleva experiencem wei wea God hapi lo hem and wei for deal witim persecutim. No longtaem afta Pentecost 33 C.E., olketa police lo temple blo olketa Jew arrestim Peter and olketa nara aposol from olketa preach lo there. Bat Peter no fraet for defendim faith blo hem. (Acts 5:​24-29) Nomata afta olketa whipim olketa nogud, Peter and olketa nara aposol hia no stop for preach. Instead, olketa hapi tumas from “olketa kasem privilege for pipol mek shame lo olketa bikos lo nem blo Jesus.” Iumi tu savve hapi taem iumi feisim olketa hard taem.—Acts 5:​40-42.

17. Wat nao Jesus talem lo olketa disaepol blo hem lo naet bifor hem dae?

¹⁷ Lo naet bifor Jesus dae, hem sei lo olketa disaepol blo hem: “Eniwan wea lovem mi, Dadi blo mi bae lovem hem, and mi tu bae lovem hem.” (John 14:21) Iumi luk forward for taem wea evriwan bae lovem each other and no eniwan bae heitim iumi moa taem iumi worshipim Jehovah! (2 Thess. 1:​6-8) Bat go kasem datfala taem, iumi savve kasem strong and comfort taem iumi ting raonem staka reason wea iumi garem for hapi nomata pipol heitim iumi.