Garem Courage and Loyal Olsem Benaiah

Benaiah hem wanfala brave warrior wea joinim army blo King David and bihaen King Solomon. Benaiah hem son blo wanfala priest. And nomata olketa priest no faet lo olketa war or iusim weapon, Benaiah faet lo olketa war blo Jehovah. Datwan showim hem garem courage. For example, hem killim dae wanfala lion lo hol for wata and hem winim wanfala maeti soldia. David barava trustim Benaiah dastawe hem markem hem for kamap chief blo olketa bodyguard blo hem.—2 Sam. 23:​20-23.

Benaiah gohed loyal lo David taem Absalom and Adonijah againstim David. (2 Sam. 8:18; 15:18; 1 Ki. 1:8) Taem David hem olo, Benaiah sapotim hem tu for mekem Solomon kamap king. (1 Ki. 1:​32-40) Yes, Benaiah hem loyal lo Jehovah and lo olketa anointed wan blo Hem nomata taem olketa narawan no loyal.

Iumi tu needim courage for faet againstim strong enemy blo iumi, Satan, and olketa wea sapotim hem. And iumi shud disaed strong for gohed followim olketa standard blo Jehovah. (Eph. 6:11; 1 Pet. 5:​8, 9) Nomata if samfala disaed for lusim Jehovah, iumi gohed loyal lo hem, and trustim dat hem bae rewardim iumi.—2 Sam. 22:26.