8-14 JUNHO, 2026
NYIMBO NA. 8 Yahova ni pothawira pathu
Yahova nthawe zose akwanirisa vomwe wapolomisa
‘Mwaniwombola imwe Yahova Mulungu wa chonadi.’—SAL. 31:5.
CHOLINGA
Nkupfunzira kuti Yahova adzakwanirise vomwe adapolomisa kutsogolo ndipo adzamalise mabodza yose ya Satana.
1. Mobverana na lemba ya Salimo 31:2-5 ndawa chani tifunika kukhulupirira Yahova?
TIKUKHALA mudziko yomwe Satana ndiye ankutonga. Ndipomwapa, mabodza na kusakhulupirika vinkuchitika ntsiku iriyose ndipo vikhala voshupa kukhulupirirana. Wanthu anango womwe achita malonda achita vinthu mwachinyengo ndipo wanthu womwe agula malonda mwayo akhala okwinyirira. Wanthu azinji azindikira kuti olo shamwali wathu chaiye tingamukhulupirirelini. Ni vokomedza kudziwa kuti nthawe zose tingakhulupirire Yahova ‘yemwe ni Mulungu wa chonadi.’ (Werengani Salimo 31:2-5.) Yahova anamalini ndipo chirichose chomwe wanena chikhala chaicho ndipo tingakhulupirire vomwe iye anena.
2. Ko tipfunzire chani mu nkhani mwaino?
2 Mu pfunziro mwaino, tione vifukwa vomwe vitichitisa kukhulupirira Yahova na ntima wose. Patsogolo pake tione vomwe Yahova ankuchita manjeuno kuti akwanirise cholinga chake cha kumalisa mabvuto mudziko ya Satana iyi. Ndipo kupfunzira mpfundo mwizi kutithandize kuuza anango va Yahova molimba ntima.
NDAWA CHANI TIFUNIKA KUKHULUPIRIRA YAHOVA?
3. Ndawa chani tifunika kukhulupirira maninge Yahova?
3 Tifunika kukhulupirira Yahova ndawa ni wachilengedwe chose. Iye ndiye adalenga kudzulu na vose vomwe viri padziko yapasi. (Gen. 1:1; Sal. 36:9; Chiv. 4:11) Yahova adalenga pomwe vinthu nchilengedwe kuti tipitirize kukhala na moyo. Ndawa yakuti Yahova ndiye adatilenga, adziwa chirichose komasoti anamphanvu ziribe malire. Ndipomwapa, tingamukhulupirire nthawe zose kuti atitsogolere pa moyo wathu ndipo tikaikiralini kuti adzatidalise kutsogolo.
4. Ko tidziwa tani kuti Yahova atikonda?
4 Tingakhulupirire Yahova ndawa iye atikonda. Yahova adalenga wanthu na cholinga chakuti ambakhale okondwa na moyo mpakana kalekale. Iye “adatilenga muchifaniziro chake,” kuti timbakwanise kuonesa makhalidwe yake ninge chikondi komasoti kukoma ntima. (Gen. 1:26) Yahova adatipasa ufulu wosankha vochita komasoti dziko yokhuza yakuti timbakhalemo. (Sal. 115:16) Kuingizira mwapa, Yahova adadalisa azibereki wathu woyambirira, pakuwapasa basa yokomedza yakuti asamalire dziko yapasi. (Gen. 1:28; 2:15) Yahova adawapasa chirichose ninge: Vakudya, vinyama zosiyanasiyana na vinthu vinango. Yahova adachita vimwivi kuti iwo akhale okondwa. Umuyu ni umboni wakuti ‘chikondi chokhulupirika cha Yahova chidzakhalepo mpakana kalekale.’—Sal. 103:17.
5. (a) Olo kuti Adamu na Hava alibe kubvera, ko Yahova adachita tani kuti cholinga chake chipitirize? (b) Ko ni mapolomisi yanango yaponi yomwe Yahova wakwanirisa kale? (Onani bokosi yakuti: “Mulungu nthawe zose anena chaivo.”)
5 Tingakhulupirire Yahova ndawa akwanirisa vose vomwe wapolomisa. Yahova adalenga dziko yapasi kuti ‘wanthu ambakhalemo.’ (Yes. 45:18, 19) Pomwe Adamu na Hava adachimwa, adauziwa kuti adzafe. Panthawe mwiyo vimbaoneka ninge kuti Yahova akwaniriselini cholinga chake. Koma chaivo ni vakuti nthawe zose Yahova akwanirisa vose vomwe wanena. (Yes. 46:10, 11) Yahova wenze akali nacho cholinga chake chakufuna kuti wanthu adzakhale na moyo wosapera padziko yapasi. Ko Yahova adachita tani vimwivi? Yahova adachita vimwivi pakubvuma kuti Adamu na Hava akhale na wana ndipo iye adatumiza pomwe mwana wake Yesu kuti adzatiwombole kuti tidzakhale na moyo wosapera.—Yoh. 3:16.
VOMWE YAHOVA WACHITA KUTI AKWANIRISE VOMWE ADAPOLOMISA
6. Ko Yahova adanena chani pomwe Adamu na Hava padachimwa?
6 Yemwe adachitisa Adamu na Hava kuti aleke kubvera Mulungu ni “nyoka yakale ire yomwe idziwika kuti Ndyerekezi komasoti kuti Satana.”a (Chiv. 12:9; Gen. 3:4, 5; Yoh. 8:44) Ndawa ya vimwivi, Yahova adanena kuti Satana adzadzongewe. (Gen. 3:15) Nthawe mwiyi ikalibe yafika, wanthu azinji ambadzatewedzere vochita va Satana. Koma anango adzakhale okhulupirika kwa Yahova.
7. Ko ni mbani ali kumbali ya Satana ndipo nchani chidzawachitikire?
7 Angelo anango na wanthu anango, adasalula kuleka kutumikira Yahova nkukhala kumbali ya Satana. Ndawa yakuti atsutsa Yahova, iwo ali kumbali ya Satana. Ndawa ya vimwivi, Yahova waikha kale nthawe yakuti adzadzonge Satana na womwe ali kumbali yake.—Dan. 2:44; Aro. 16:20.
8. Ko nchani chomwe Yesu adachita mu gole ya 1914? (Onani pomwe mafoto.)
8 Ndawa chani tingatsimikizire kuti Yahova adzakwanirise cholinga chake chakuti adzadzonge Satana na omwe ali kumbali yake? Mu gole ya 1914, kudzulu kudachitika nkhondo ya Yesu na Satana ndipo Yesu adathusa Satana na viwanda vake padziko yapasi. (Chiv. 12:7-9) Nkhondo mwiyi idachitika kudzulu, koma pano pa dziko yapasi wanthu adagumanambo na mabvuto ndawa ya nkhondo mwiyi. Baibolo inena kuti: “Tsoka dziko yapasi na nyanja, ndawa Ndyerekezi wabulukira kwa imwepo ndipo ali na ukali ukulu ndawa ankudziwa kuti wandosala na kanthawe kang’onong’ono.” (Chiv. 12:12) Kundoyambira gole mwiyi ya 1914 cholinga cha Satana ni kusokoneza wanthu kuti asiye kutumikira Yahova. Ndawa yake dziko yapasi vinthu vikuipiraipira. Manjemanjeapa Yesu, “adzadzonge Satana” pabodzi na wanthu omwe ali kumbali yake. (Chiv. 6:2) Yesu adzachenese dzina ya Yahova na kumalisa mabodza yose yomwe Satana adayambisa. (Sal. 45:4-6) Ndipo wose adzadziwe kuti Yahova ni Mulungu wa chonadi.—Ezek. 38:23.
World War I: U.S. National Archives photo; bomb: USAF photo; pandemic: blvdone/stock.adobe.com; riot: inhauscreative/E+ via Getty Images
Kundochokera mu 1914, dziko yapasi inkuyipiraipira (Onani ndime 8)
YAHOVA AUNGANIDZA WANTHU WALE OMWE AKONDA CHONADI
9. Ko Yahova ankuunganidza mbani?
9 Pomwe Satana na viwanda vake vikalibe vadzongewa, Yahova ‘akuunganidza vinthu vose pabodzi kuti vikhale vobverana na Khrisitu, vinthu va kudzulu na vinthu va padziko yapasi.’ (Aef. 1:10) Mawu yakuti “vinthu va kudzulu” yatanthauza odzodzewa womwe Yahova adawasalula kuti akatonge pabodzi na Yesu kudzulu. Ndipo mawu yakuti “vinthu va padziko yapasi,” yatanthauza atumiki wa Yahova omwe adzakhale pano padziko yapasi. Atumiki wa Yahova mwawa, achita vose vomwe angakwanise kuti athandize wanthu kudziwa chonadi na kuwonesa kuti Satana ni wabodza.
10. Ko Yahova ankuchita chani kuti athandize wanthu kupfunzira chonadi? (Chivumbuluso 14:6, 7)
10 Kuti Yahova akwanise kuunganidza wanthu omwe amukonda, aphatisira basa atumiki wake kuti ambalalikire va ntontholo wabwino. (Werengani Chivumbuluso 14:6, 7.) Olo kuti Yahova wasalula wanthu kuti ambalalikire, angelo nawombo athandizira pa basa mwiyi. Atumiki wa Yahova akambalalikira va ntontholo wabwino, akhala kuti ankuthandiza wanthu kubvesa kuti Satana aphatisa basa vipembedzo vabodza kuti afalise nkhani zabodza. Kwa nthawe itali Satana wakhala ankuphatisa basa Babulo Nkulu kuti apfunzise wanthu vabodza pankhani ya Yahova. (Chiv. 18:2, 4) Manjemanje vipembedzo vabodza vidzongewe ndipo wose omwe akonda Yahova adzamupase ulemerero womwe iye afunikira.—Chiv. 17:16.
11. Ko tingawazindikire tani atumiki chaiwo wa Yahova?
11 Yahova akuunganidza wanthu wa mitundu wosiyanasiyana. (Chiv. 7:9, 10) Iwo akapfunzira va “ntontholo wabwino,” adziwa kuti agumana chipembedzo chaicho ndipo akhala wokondwa kukhala mugulu ya Yahova. (Maliko 13:10) Ntsiku iriyose vichita kuwonekeratu kuti, nimbani ankutumikira Yahova munjira womwe iye afuna. Ndipo nimbani yemwe ankuchitalini chifuniro chake. Mneneri Malaki adanena kuti: ‘Ndipo mudzawone pomwe kusiyana pakati pa munthu wolungama na woipa, komasoti pakati pa yemwe ankutumikira Mulungu na yemwe ankutumikiralini.’ (Mal. 3:18) Nivokwanisika kuwadziwa atumiki chaiwo ndawa ya makhalidwe yawo na basa yolalikira yomwe achita.
12. Ko nchani chichitika tikakhala kuti tikulalikira ntontholo wabwino?
12 Tikambalalikira va “ntontholo wabwino wa Ufumu” tikhala kuti tinkubvera Yesu. Pa nthawe ibodzibodzi mwiyo tikhala kuti tikukwanirisa maulosi. (Mat. 24:14; 28:18-20) Kuingizira mwapa, tithandiza wanthu wosiyanasiyana kukhala wopfunzira wa Yesu na kukhala na chidikhiro chotumikira Yahova mpakana kalekale. Ni mwayi ukulu maninge kuphatisiriwa basa na Yahova kuti timuthandize kukwanirisa cholinga chake.
TINGAKHULUPIRIRE KUTI YAHOVA ADZAKWANIRISE MAPOLOMISI YAKE
13. Ko Satana afuna kudzudza maninge mbani ndipo ndawa chani?
13 Satana ali na ukali ukulu ndawa yakuti “wandosala na kanthawe kang’onong’ono” kuti adzongewe. (Chiv. 12:12, 13) Satana adzudza maninge wale omwe adasankhuliwa kuti akatonge kudzulu pabodzi na Yesu Khrisitu womwe ni wodzodzewa. (Chiv. 12:17; 14:12) Iye adzudza pomwe wale omwe athandizira wodzodzewa.
14. Ko Satana akadzaukira atumiki wa Yahova nchani chidzachitike? (Onani pomwe foto ya pakhava.)
14 Patsogolo pakuti Babulo Nkulu wadzongewa, wale omwe ali kumbali ya Satana adzaukire atumiki wa Mulungu. Patsogolo pake, nkhondo ya Arumagedo idzayambe. (Chiv. 16:13, 14, 16) Yesu na gulu yake adzapulumuse atumiki wa Yahova ndipo adzadzonge wanthu omwe ali kumbali ya Satana. (Chiv. 19:19-21) Vimwivi vikadzachitika padzagumanikelini pomwe wanthu omwe achita vinthu voipa. (Chiv. 21:8) Pa nthawe mwiyo, aliyese adzadziwe kuti Yahova achita vinthu vabwino ndipo akwanirisa vose vomwe wapolomisa.
Yesu na wodzodzewa, apakira pa makavalo panthawe ya nkhondo ya Arumagedo ndipo ni wokonzeka kudzonga azondi wa Mulungu (Onani ndime 14)
15. Ndawa chani tikhulupirira kuti palibe chingakangise Yahova kukwanirisa cholinga chake? (Yesaya 65:16, 17) (Onani pomwe foto.)
15 Ntsiku zino vinthu vinkuipiraipira ndipo wanthu ankupitiriza kuchita vinthu voipa. Koma na thandizo ya Yahova atumiki wake ankupitiriza kukhala wobvana. Basa yomwe ni younganidza wanthu inkuchitika ndipo palibe aliyese yemwe angakangise Yahova kudalisa atumiki wake ndawa ya basa yomwe achita. (Werengani Yesaya 65:16, 17.) Tingakhulupirire kuti vomwe Yahova wapolomisa adzavikwanirise. Pa lemba ya Aroma 8:38, 39 ntumi Paulo adanena kuti: “impfa, moyo, angelo, maboma, vinthu vomwe viripo, vinthu vomwe vinkubwera, mphanvu, msinkhu, kunoka panango cholengewa chirichose, vidzakwaniselini kutilekanisa na chikondi cha Mulungu chomwe chiri mwa Yesu Khrisitu Ambuya wathu.”
Mudziko inyowani timbadzakumbukirelini mabvuto yomwe tinkugumana nayo ntsiku zino (Onani ndime 15)
16. Ndawa chani imwepo mukhulupirira Yahova na moyo wanu wose?
16 Tinavifukwa vizinji vokhulupirira Yahova ndawa adalenga vinthu vose ndipo atikonda. Iye ankuunganidza wanthu azinji padziko yose kuti ambamutumikire munjira yoyenerera. (Yes. 60:22; Zek. 8:23) Tidziwa kuti Yahova akwanirisa vose vomwe anena ndipo manjemanje amalise mabvuto yose na mabodza womwe yachitisiwa na Satana. Isepano tipemphera ninge Davide yemwe adanena kuti: ‘Atamandike Yahova Mulungu, . . . iye yekha ni yemwe achita vinthu vodabwisa. Itamandike dzina yake ya ulemelero mpakana kalekale ndipo ulemerero wake udzadze dziko yose yapasi.’—Sal. 72:18, 19.
NYIMBO NA. 2 Dzina yanu ndimwe Yahova
a Baibolo inena lini dzina ya mngelo yemwe adapandukira Mulungu. Koma iye andochemerewa na madzina ya ulemu ninge yakuti “Ndyerekezi” kutanthauza wabodza na “Satana” kutanthauza wotsutsa.