25-31 MAIO 2026
NYIMBO NA. 135 Yahova ankutikumbira kuti: “Mwanangu, khala wanzeru”
Khalani wozindikira ndipo ‘vinthu vidzakufambireni bwino’
‘Munthu yemwe awonesa kudziwa vinthu, vinthu vidzamufambire bwino.’—MIY. 16:20.
CHOLINGA
Nkuwona kuti ndawa chani ni vabwino kuyamba taganiza tikalibe tachita chinthu chilichose pomwe tinkulimbana na bvuto yoshupa.
1-2. Ko kuzindikira ni chani, ndipo khalidwe mwiyi itithandiza tani?
KO NTHAWE inango mudadzibva kuti munthu munango alibe kukuchitirani vinthu mwaulemu? Ko panango mudagumanako na bvuto inango yomwe idakuchitisani kukhala na mantha? Peno vimwivi vidakuchitikiraniko kale, mukudziwa momwe vikhalira voshupa kuchita vinthu bwinobwino. Baibolo ingatithandize ndawa itipfunzisa makhalidwe yabwino ninge kuzindikira.
2 Kuzindikira ni khalidwe yomwe itithandiza kuidziwa bwino nkhani tikalibe kuchita chosalula. Khalidwe mweyi itithandiza kubvesa kuti ndawa chani munthu watichitira vinthu vinango vomwe tiribe kukomedzewa navo. Kuzindikira kutithandiza kuchita vinthu mwanzeru. Mwakulinganiza, khalidwe mweyi idzatithandize kukhala ‘wosamala na vomwe tiyankhula.’ (Miy. 10:19; Sal. 4:4) Munthu munango akatikwinyiririsa, khalidwe yozindikira ingatithandize kuchepesa ukali wathu. Kuingizira mwapa, khalidwe mweyi idzatithandize kubvuma malangizo. (Miy. 19:20) Tikambawonesa khalidwe mweyi yozindikira tidzakondwerese Yahova ndipo isembo tidzakhale wokondwa. Khalidwe mweyi ni yofunika maninge tikakhala kuti tinkugumana na mabvuto yomwe yangatichitise kuchita vinthu mosaganiza bwinobwino. Naboni tikambirane vitsanzo vitatu va m’Baibolo vomwe vinkuwonesa momwe kuzindikira kungatithandizire kukhala wodzichepesa, wodekha na kuthemba Yahova na ntima wose.
KHALANI WODZICHEPESA NDIPO AYI KUKHALA WODZIKUZA
3. Ko Namani wenze mbani?
3 Kuti tichite vinthu vabwino, tifunika kukhala wodzichepesa. (1 Pet. 5:5) Kuzindikira kungatithandize kuchita vimwivi. Mwanjira yanyi? Wonani chitsanzo cha Namani. Iye ambakhala ku Siriya, ntundu womwe umbakhala ku norte kwa Izirayeli. Namani wenze mwamuna wolemekezeka, nkulu wa masocha ya Asiriya. Iye ambadwala khate yomwe yenze matenda yogopsya maninge.—2 Maf. 5:1.
4. Ko Namani adawonesa tani kuti wenze wozindikira?
4 Nkazi wa Namani wenze na kantsikana kachi Izirayeli komwe kambamuphatira basa. Kantsikana mwako kadauza nkazi wa Namani kuti ku Izirayeli kuna mneneri yemwe angakwanise kupolesa mwamuna wake. (2 Maf. 5:2, 3) Namani panango adakaganiza kuti: ‘Ko kantsikana kamwaka ni kambani kuti kanganiuzembo vochita ine?’ Koma Namani adawonesa kuti wenze wozindikira. M’malo mwakuti akhale wodzikuza na kulamba vomwe kantsikana mwako kadanena, iye adadzichepesa na kubvera vomwe kadanena. Iye adakumbira mpfumu kuti ayende ku Izirayeli kuti akagumane na mneneri kuti akamupolese.—2 Maf. 5:4, 5.
5. Ko nchani chidachitika pomwe Namani adafika ku Izirayeli?
5 Namani adayenda kwa Mpfumu Yehoramu yaku Izirayeli kuti akapolesewe khate yake. Yehoramu ambaganiza kuti Namani wayenda kumoku ndawa yakuti mpfumu ya Asiriya imbafuna kumenyana nawo. Mneneri Elisa padabva vimwevi adakumbira Mpfumu Yehoramu kuti amutumize Namani kwa iye. (2 Maf. 5:6-9) Koma vinthu viribe kuchitika ninge momwe Namani ambaganizira, ndawa Elisa alibe kuchoka pamuyi kuti akamutambire panango kuyankhula naye. Koma m’malo mwa vimwivi, Elisa adatuma ntumiki wake kuti akauze Namani vomwe afunika kuchita kuti apole.—2 Maf. 5:10.
6. (a) Ko nchani chidachitisa Namani kuchita vinthu modzikuza pomwe adabva vomwe Elisa adanena? (b) Ko atumiki wa Namani adawonesa tani kuti enze wozindikira ndipo maphindu yake yenze yaponi? (2 Mafumu 5:13, 14)
6 Pakuyamba, Namani alibe kukomedzewa na momwe adatambiririwa. Iye ‘adakalipa ndipo adachoka mwaukali.’ (2 Maf. 5:11, 12) Ndawa chani iye adachita tene? Panango iye adaganiza kuti alibe kutambiriwa bwino ninge momwe nkulu wa masocha afunika kutambiririwa. Panango iye ambaganiza kuti vomwe Elisa adanena vimbaperekalini ulemu kwa Asiriya. Mulimose momwe venzere, Namani ambafuna kubwerera kumuyi akalibe wapolesewa koma atumiki wake adawonesa kuzindikira pomwe adamuuza kuti aganizire bwinobwino va nkhani mweyi. Pamwapa Namani adasiya kukhala wodzikuza ndipo adadzichepesa nkuchita vomwe Elisa adanena. Ndipo patsogolo pake adapola!—Werengani 2 Mafumu 5:13, 14.
7. Ko tinkupfunzirapo chani pa vomwe vidachitikira Namani? (Miyambo 22:4) (Onani pomwe mafoto.)
7 Ko tinkupfunzira chani na chitsanzo chimwechi cha m’Baibolo? Isepano tiwonesa kuti ndise wozindikira tikambaganiza mokwana tikalibe tachita chosalula chirichose. Tiwonesa kuti ndise wozindikira tikambasamala na vomwe tiganiza. Kuzindikira kungatithandize kukhala wodzichepesa na kudziwa kuti tidziwalini vinthu vose. Nthawe zinango tifunika thandizo ya anango kuti tikwanise kubvesa bwino va nkhani inango ndipo Yahova angatithandize. Namani wenzelini ntumiki wa Yahova, koma iye adawonesa kuzindikira ndawa yakuti adakhala wodzichepesa ndipo adabvera vomwe anango adamuuza. Iye adabvera vomwe kantsikana kale kadanena, adabvera vomwe atumiki wake adamuuza ndipo adabvera pomwe vomwe Elisa adamuuza. Namani alibe kudzikuza. Pakumalizira, iye adachita chosalula chabwino ndipo adapolesewa. Ndipomwapa, tikalibe kuchita chosalula chirichose tifunika kuyamba taganiza. Mwakulinganiza, munthu munango agatipase malangizo yomwe tinkubverananayolini. Vimwevi vikachitika tifunika kuganizira momwe tingachitire vinthu na kudzibvunza kuti: Ko vomwe nichite viwonese kuti ndine wodzichepesa panango wodzikuza?—Werengani Miyambo 22:4.
Ninge momwe Namani adawonesera kudzichepesa pakubvesera vomwe anango adamuuza, isembo tifunika kubvesera anango akambatipasa malangizo, munthu munango akambatifotokozera bvuto, panango tikatambira malangizo yanyowani ya gulu yathu (Onani ndime 7)
CHITANI VINTHU MODEKHA OSATI MOKALIPA
8. Ko ni pavochitika viponi pomwe vingakhale voshupa kukhala wodekha?
8 Kuzindikira kudzatithandize kuchita vinthu modekha pomwe tinkulimbana na bvuto. Nishuwadi kuti nivoshupa kuchita vimwevi makamaka peno munthu munango watichitira vinthu vilibe chilungamo. (Aef. 4:26) Naboni tiwone momwe Davide na Abigayeli adawonesera khalidwe mweyi yaku kuzindikira pomwe adagumana na mabvuto.
9. Ko Nabala adachita tani vinthu na Davide?
9 Davide na atumiki wake ambakhala na moyo wothawathawa mu chipululu cha Parana. (1 Sam. 25:1) Pomwe iwo enze kumoko, ambateteza nkhosa komasoti anyakabusa wa munthu munango dzina yake Nabala. (1 Sam. 25:15, 16) Nthawe yogera ukuse wa nkhosa payidafika, Davide adatuma atumiki wake kwa Nabala kuti akakumbire chakudya ndipo iwo adachita vimwevi modzichepesa na mwaulemu. (1 Sam. 25:6-8) Koma Nabala alibe kuwonesa kutembeja pa vose vomwe Davide na atumiki wake adamuchitira. Nabala adadawira atumiki wa Davide mwamwano ndipo adanyoza Davide na atumiki wake.—1 Sam. 25:10, 11.
10. Ko Davide na Abigayeli adawonesa tani kuti enze wozindikira? (1 Samueli 25:32, 33) (Onani pomwe foto.)
10 Ko mudakakhala kuti ndimwe Davide, mudakabva tani? Nishuwadi kuti mudakakwinyirira. Ndipo Davide adabvambo teneuyu. Panthawe mwiyi, iye adaganiza vakuti akaphe Nabala! (1 Sam. 25:13, 21, 22) Koma Abigayeli nkazi wa Nabala adauza Davide na atumiki wake kuti ayi kuti amuphe Nabala. Ko Abigayeli adawonesa tani kuti wenze wozindikira? Iye adazindikira kuti Davide ni munthu wabwino olo kuti wenze adasalula kuchita chinthu choipa. Ndipomwapa Abigayeli adathandiza Davide kuchita vinthu mwanzeru. Abigayeli adamupasa mphaso Davide na kumuthandiza modzichepesa kuti achite vinthu mwanzeru. (1 Sam. 25:18, 23-31) Ndipo Davide adawonesa kuzindikira pomwe adabvesera mwatcheru vomwe Abigayeli adamuuza ndipo adabvesa kuti vomwe Abigayeli adamuuza ni momwembo Yahova ambaiwonera nkhani mwiyi. Ndawa ya vimwevi, Davide adachita vinthu modekha ndipo adapewa kuchita chimo ikulu.—Werengani 1 Samueli 25:32, 33.
Davide na Abigayeli adawonesa kuti enze wozindikira panthawe yomwe vinthu venze voshupa ndipo vimwivi vidawathandiza kupewa mabvuto (Onani ndime 10)
11. Ko khalidwe yozindikira ingatithandize tani peno munthu munango watichitira chinthu chokalipisa? (Miyambo 19:11)
11 Ko tinkupfunzira chani na chitsanzo mwechi cha m’Baibolo? Kuzindikira kungatithandize kuchita vinthu modekha olo kuti tinavifukwa vobveka vokhalira wokalipa. Komasoti kuzindikira kungatithandize kuganizira mabvuto yomwe yangabwere pa vinthu vomwe tingachite. (Werengani Miyambo 19:11.) Pomwe Abigayeli adakumbusa Davide momwe vosalula vake vidakakwinyiririsira Yahova, Davide adakwanisa kukhala wodekha. Peno munthu munango angakukwinyiririseni mumbayambe mwaganiza bwino mukalibe mwachita chosalula chilichose. (Yak. 1:19) Mbapempherani kwa Yahova ndipo khalani na nthawe yoganizira momwe Yahova aiwonera nkhani mwiyi ndipo vimwevi vingakuthandizeni kuchita vinthu modekha.
12. Ko anango angatithandize tani kukhala wodekha na kuchita vosalula vabwino?
12 Ninge momwe Yahova adaphatisira basa Abigayeli kuti athandize Davide, Yahova angaphatise basa munthu munango kutithandiza kubvesa momwe iye ankuiwonera nkhani mwiyo. Ndipomwapa, peno chinthu chinango chinkukuchitisani kukhala wokwinyirira, chezani na Mkhrisitu yemwe ali paushamwali wolimba na Yahova yemwe angakuthandizeni kuwona vinthu moyenerera. (Miy. 12:15; 20:18) Ko peno shamwali wanu wakukwinyiririsani na nkhani inango, mungatewedzere tani Abigayeli? Ko mungamuthandize shamwali wanu kuwona nkhani mwiyo ninge momwe Yahova aiwonera? Ndipo khalani wotsimikiza kuti Yahova adzakuthandizeni kuti muyankhule vinthu volimbikisa kwa anango na kuwathandiza kukhala wozindikira komasoti wodekha.
MBATHEMBANI YAHOVA MUKAKHALA KUTI MUNAMANTHA
13. Ko khalidwe yozindikira ingatithandize tani kuti osati timbachite mantha?
13 Tikakhala kuti tinkugumana na bvuto yomwe inkutichitisa mantha, kuzindikira kungatithandize kuwona vinthu moyenerera. Peno tikhulupirira kuti Yahova anamphanvu kuposha chilichose kungatithandize kumuthemba olo kuti tinkuchita mantha. (Sal. 27:1) Yahova angatithandize kulimbana na bvuto iriyose olo yomwe tinkuiwona kuti ingamalelini. Mneneri Yona ni chitsanzo chabwino pa nkhani mweyi. Iye wenze paushamwali wolimba na Yahova koma ambafunika kukhala wozindikira kuti akwanise kuchita utumiki wadapasiwa.
14. Ndawa chani Yona adakhala na mantha pakuchita vomwe Yahova adamuuza?
14 Yahova adapasa Yona basa yomwe yenze yoshupa maninge. Iye adamuuza kuti ayende ku Nineve kukalengeza ntontholo wa chiweruzo kwa wanthu womwe ambakhala kumuko. (Yona 1:1, 2) Ko mudakakhala kuti ndimwepo mudatambira utumiki moyu mudakabva tani? Yona ambafunika kufamba ulendo moyu woshupa kuchoka ku Izirayeli kuyenda ku Nineve. Ndipo iye ambafunikira kufamba pafupifupi mwezi m’bodzi kuti akafike kumuko. Wanthu wa kumuko ambadziwika kuti enze waukali komasoti wachiwawa. Nineve adafika mpakana kumbachemerewa kuti thaundi ya wanthu ‘wokhesa magazi.’ (Nah. 3:1, 7) M’malo mwakuti abvume basa yomwe adapasiwa na Yahova, Yona adathawa.—Yona 1:3.
15. Ko nchani chidathandiza Yona kupitiriza kuthemba Yahova? (Yona 2:6-9)
15 Yona adapakira barko nkuyenda kutali na ku Nineve. Ali paulendo muyu adathusiwa m’nyanja ndipo Yahova adamupulumusa modabwisa. Vimwivi vidamuthandiza kudziwa mphanvu zikulu za Yahova. (Yona 1:15, 17) Yona adapfunzirapo kanthu. Iye ambafunikalini kuchita mantha kuyenda ku Nineve ndawa Yahova adakamuthandiza. Iye adayamba kuwona kuti Yahova angamuteteze pa bvuto iriyose. (Werengani Yona 2:6-9.) Ndipo padamuuza kachiwiri kuti ayende ku Nineve, Yona alibe kuchita mantha. Iye adayenda ku Nineve ndipo wanthu wa kumuko adamubvesera ndipo adapulumuka.—Yona 3:5.
16. Ko nchani chomwe chingatithandize tikakhala kuti tinkulimbana na bvuto yomwe ingatichitise kukhala na mantha? (Miyambo 29:25) (Onani pomwe mafoto.)
16 Ko tinkupfunzira chani na chitsanzo mwechi cha m’Baibolo? Isepano tinkufunalini kuti chinthu chirichose panango wanthu atikangise kutumikira Yahova. (Werengani Miyambo 29:25.) Kuzindikira kudathandiza Yona kukhulupirira kuti Yahova adzamuthandize pa bvuto iriyose. Mwanjira ibodzibodzi mweyi, isembo tifunika kukumbukira momwe Yahova adatithandizira kumbuyo. Komasoti tingambaganizire vitsanzo va abale na alongo womwe adawonesa kukhulupirira Yahova panthawe yoshupa.a (Aheb. 13:6) Tingawonese kuti ndise wozindikira, komasoti wanzeru tikambakhulupirira Yahova na ntima wose na kumbathandiza anango kuti ambathembe Yahova.
Ndawa yakuti Yona adapfunzira kuthemba Yahova, adakwanisa kuchita vomwe adamuuza (Onani ndime 16)
PITIRIZANI KUMBAGANIZA NINGE YAHOVA
17. Ko nchani chomwe chingatithandize kupitiriza kukhala wozindikira?
17 Ninge momwe tawonera, kuzindikira kutithandiza kulimbana na mabvuto yoshupa. Ko tingakulise tani khalidwe mweyi ya kuzindikira? Yahova ndiye angatithandize kukhala na khalidwe mwiyi ndawa iye ni mphata ya kuzindikira. Iye atithandiza kuti tikhale wozindikira pakuphatisa basa Baibolo komasoti mphanvu ya mzimu wake uchena. (Neh. 9:20; Sal. 32:8) Iye atipasa malangizo yomwe yatithandiza kuchita vosalula vabwino na kuti tikhale wodekha. (Sal. 119:97-101) Tikambaganizira vomwe Baibolo inena na kupemphera kwa Yahova na kukumbira mphanvu ya mzimu uchena, tidzapitirize kukhala wozindikira. Mwivi vidzatithandize kuwona vinthu ninge momwe Yahova aviwonera.—Miy. 21:11, mawu ya m’nyantsi.
18. Ko imwepo mwatsimikiza kuchita chani?
18 Tifunika kupitiriza kumukumbira Yahova kuti atithandize kuti tipitirize kukhala wozindikira. (Sal. 14:2) Tikachita vimwivi, tidzapitirize ‘kukhala wozindikira.’ (Miy. 21:16) Ndipo ndise wotsimikizira kuwonesa khalidwe mweyi pa chochitika chirichose. Tikachita vimwivi, Yahova adzakhale wokondwa.
NYIMBO NA. 42 Pemphero ya ntumiki wa Mulungu
a Wonani chitsanzo cha m’bale Georgiy Porchulyan mu nkhani za “Mbiri ya moyo” pa JW Library® panango jw.org.